مساء الخير يا بنات يا رب تكونو كلكم بخير يا رب
فى قصة النهاردة سمعتها فى التيفزيون عن لسان صاحبتها و قلت لازم احكيهالكم
هو واحدة مصرية و كانت بتتكلم فى برنامج الدين و الحياة على قناة الحياة
و بتقول
انها اتجوزت من خمس سنيين و عرفت انها هى و جوزها عندهم مشاكل و ابتدت فى رحلة العلاج و كل ما تحل مشكلة تظهر الجديدة و جربت الحقن و اطفال الانابيب لحد ما الحمد لله حملت بس الحمل مستقرش و سقطت و سبحلن الله بعد السقوط دا حصلها مشكلة كبيرة كل الاطباء اجمعو انها "لايمكن" تحمل و انها لازم تشيل الموضوع من دماغها
بس هى كان عندها يقين بقدرة ربنا و قالت اذا الطب قال كلمته فربنا لسة مقالش كلمته و ابتدت تدعى "رب لا تذرنى فردا و انت خير الوارثين" و الاستغفار و كانت بتكثر من قرأة سورة مريم و بعدين بعد فترة الدورة تأخرت عليها و كانت خايفة تحلل و بعد الحاح من جوزها و والدتها راحت تحلل و كانت خايفة تكلم المعمل تعرف النتيجة
و كانت قاعدة تتفرج على التليفزيون و كان موجود الشيخ خالد الجندى فى برنامج و كان فى واحدة ربنا مكرمهاش بالاطفال اتصلت و قالتله يدعلها فدعالها هى و كل محرومة
بتقول انها حست بفرحة ملت قلبها فقامت و اتصلت بالمعمل فالدكتور لما رد عليها قالها صوتك فرحان انتى حاسة انك حامل؟ و قالها انها هى فعلا حامل
بتقول انها من كتر الفرحة كانت حاسة انها من جوا بتترج و كانت خايفة ان من كتر الفرحة انها تسقط تانى و بعدين بنت عمها كلمتها و قالتلها انها فرحنالها جدا و انها كانت زعلانة عليها جدا فبتقول ان دا احساس بنت عمى بيا فسبحان الله ازاى ممكن يكون احساس ربنا بيا و قالت ان ربنا هو اللى حيحفظلها جنينها
و فى فترة الحمل بتقول انها راحت لاكبر دكاتر بتعمل سونار فى مصر و الكل اجمعو ان البيبى اللى فى بطنها مشوة و ان اطرافة مش حتكتمل فسابت تكالها برضو على ربنا و الحمد لله ربنا اكرمها بطفلة مكتملة النمو و سمتها "هبة الله"
و كانت بتتكلم بتقول على فضل الدعاء و الاستغفار و خلت بنتها بسم الله ما شاء الله تكلم الدكتورة عبلة الكحلاوى و كانت جميييييييييلة ربنا يحميهالها
سبحان الله يا بنات قلت ايه الجمال دا و قلت مافيش حاجة بعيدة عن ربنا
و قلت اللى بتقولها الدكاترة مافيش امل دا فعلا رأيهم لكن كلام ربنا هو الكلام المختلف و هو الاصدق بس احنا نتمسك بالامل
و مع كل دورة تجيلنا نحمد ربنا اننا قربنا شهر كامل من تحقيق حلمنا
ربنا يكرمنا جميعا بأذن الله و نفرح بفرح بعض
تقبلو تحياتى و دعائى
رب لا تذرنا فردا و انت خير الوارثين
__________________
ربنا يحفظلى اولادى من كل سؤ
فَأَنْبَتْنَا فِيهَا مِنْ كُلِّ زَوْجٍ كَرِيمٍ /اللهم ارزق اخواتى بالذرية الصالحة
التعديل الأخير تم بواسطة cute_baby ; 20-07-2008 الساعة 12:09 AM
16-07-2008, 11:08 AM
ضوابط المشاركة
العرض العادي
