ترى اللي مات أبوها مو ولد الجيران !! أنا أبوي توفى العام الماضي الله يغفر له ويرحمه ويجعله في عليين وإلى الآن حزني في قلبي ماطفى ...ترى الأب رجال الدنيا ماتعوضه الله يصلح حالك بس .

__________________
اللهم إن أبي نزل بك وأنت خير منزول اللهم أكرم نزله ووسع مدخله وارفع درجته وجازه بالحسنات إحسانا وبالسيئات عفوا وغفرانا .. آمين

معلش برد عليك
وش ذا المحبة والتعلق اللي ماجاء الا بالعزاء اذا كانت لك احتياجات فبقدر ماهي وقفت اكيد معك بامور كثير
فانت ضح باحتياجك لها سوا بغرفة بماكل ومشرب
ولا حتى سوالف

ترى الاب فقدااانة مو سهل يمكن ماكان يرفع راسها الا بوجود ابوها بحياتها يمكن انها متخوفة من امور انك
تضايقها تهينها تلجاء بعد الله لمن اخوانها ماراح يهتمون مثل ابوها لها
ترى وضعها صعب
ماتدري وش هي تفكر وانت تفكر بامور اخرى

طيب انت قلت اذا راحت لاهلها وقت عزاء يعنننننني تفهمممممم

لاتزيد همها على همممم
يمكن متضايقة تذكر امور معك ماتدري

طيب هي بترجع بترجع وش بتقول ليش ماتراسليني وتسالين عني
بترد وانت ماعندك قلب
ولا تبكي ولا توقع اي شي

طيب خلك انت بادرة خير اسال عن صحتها ولو ماجاوبت قولها حبيبتي اذا فعلا تهتم لنفسيتها
حبيبتي اهتمي بصحتك واعطي نفسك راحة
ادعيلة واللة يرحمة كلنا فقدنا غالي

وبس مالة داعي الززززنة من جد وبامانة انتو يارجال ماتتحملون من زوجاتكم غفلة عنكم
يعني انكرررررت منها دهرررر وجبت لحظة عزاء وتشتكي

ليت الرجال بعرف وش مكون المراة اقلها كلمة حلوة مرة مرتين ثلاث تلين القلب الميت
مافي شي مايفيد انة كلمة مايفيييد مع الرجال وبس معلش لكن

ياما ضحينا وحبينا ولا لقينا الا الخيانة في البعد يامقاطع ولا صور وعلى كذا لاابعد عنة كثير وقريبة منة ولا اخلية يحتاج شي لكن اذا ابتلاة الله فاللة يكون في عونة وتحملت منة هالشي
وبعدها حلف لي باقران ونسينا ورجع احسن من اول مرابط معي

دام زوجتك في بيت اهلها وحزن افضل من تكون تعرف ان زوجتك على شي ثاني من حقك وقتها تتكلم

اما تحسن وتكمل إحسانك تتركها لبر والدتها
فاذا لم تستطيع اكثر
اخبرها انك ستاخذها في هذا اليوم
وانتهى الامر والألم

شكرا لك .. الاحسان ان شاء الله اني ماقصرت فيه ولا تأخرت بشيء وياما سافرت وجلست عند اهلها بالاسابيع والشهور زمان وانا كنت راضي عن هالشيء وموافق عليه وباتفاقنا حتى لا احرمها من اهلها بل حتى قبل وفاة والدها بيوم الله يرحمه طلبت منها انا اني اوديها لاهلها عشان تزوره وتزور اهلها وهي كانت تقول طيب ارتب اموري الى ان تفاجأنا بالوفاه اليوم التالي ..

الصراحه افضل شيء
قول لها انت مااقدر استغني عنك ولا عن الاولاد احس بوحشه

ابغاك ترجعين البيت
او روح لها واسكن معها فمدينة اهلها استاجر شقه او اي بيت واجلسو اسبوع هناك تغيير
وماتحرمها من اهلها ولا تنحم منها

اليوم هو اليوم التاسع لها .. اخر حديث بيننا كان بالامس مساء بعدما تواصلت مع اخيها الكبير وبيننا علاقة احترام وصداقه قويه ولم اذكر له شيء ولكنه قال لي انه سوف يسافر اليوم فتكلمت معها وقلت لها اخيك بيسافر اليوم وش رايك تجين معاه او اجي بعد بكره واخذك .. قالت افكر وارد عليك قلت طيب
بعد ساعات سألتها بكره ولا بعد بكره ؟ قالت لي خلاص بكره قلت لها اوكي وبعد شوي ترجع ترسل تقول لي ابي اجلس الى الخميس او الجمعه وانا بجي بعدين لاتجي انت !
طبعا مااخفيكم بعد رسالتها وش صار فيني من احباط وغضب وقلت لها وانا صادق براحتك متى بتجين بعد يوم او شهر او سنه وبكيفك بتجين ولا تقعدين واعتذرت اني بنام وفعلا حسيت برغبه شديده في النوم للابتعاد عن التفكير والهروب من الموضوع .. لقيت لها مكالمة لم يرد عليها وانا نايم ورسالة منها بعدما شكلها حست اني تضايقت من ردة فعلها تقول خلاص ابنزل اليوم مع اخوي وكان ودي اسولف معك امس وتراني كنت امزح !!! تمزح !! بالله عليكم هذا مزح ولا كيد نساء ولا ايش بالضبط ؟
انا لو مااسيطر على نفسي في مثل هالمواقف واتعوذ من ابليس ولا كان يمكن اتهور وارتكب غلط مايتصلح
والله حسيت ان داخلي شيء انكسر امس من تصرفها معي وبغيت اكلمها اليوم اقول لها خلاص لاتجين
والله العظيم ابليس انه يوسوس براسي ويقول لي افكار من الصباح وعشان كذا قلت اكتب لكم هنا عشان لاجلس افكر بلحالي واتهور لان في داخلي شحنة غضب ممزوجة برغبة انتقام وكسر بداخلي ماتوقع يتصلح ولا راح ينسى ..
اقسم بالله العلي العظيم ماطلبتها تجي عشان احتياجاتي الزوجية ولا عشان العيال .. طلبتها عشانها هي
عشان اشتقت لها وعشان ماعندي احد قريب مني ويفهمني مثلها .. اقسم بالله العظيم لو بغيت اتزوج عليها او حتى اخونها او ابحث عن اي علاقات خارج الزواج سأجد وبكل سهوله ولكن احترامي لعلاقتنا
ووعدي لنفسي بأن اكون وفيا لها في وجودها وفي غيابها هو ماجعلني احن واشتاق لها ولم اطلب منها
غير ان تشعر فيني وتحس فيني ! ليش تبي تخليني اكره اهلها ولا احرمها من زيارتهم ؟ ليش تختلق مشكلة من لامشكلة ؟
اعتقد بالنهاية ان المشكلة فعلا فيني انا والله وليس فيها ويبي لي اغير من طبعي ومن شخصيتي واترك عني اشياء كثيرة جميلة كانت بداخلي ولكنها تكسرت مع الوقت ويجب ان اكون مثل بقية البشر واتعامل بطريقة واقعية اكثر معها وان لا ابالغ في مشاعري تجاه من لايقدرها !!

والله إن أمرك عجيب ..
البنت ابوها متوفي وانت تقول شوق وماشوق واهتمام وسؤال ..
ترا ماينفر الزوجة الا كثر الحنة والزنة ..
شهور تجلس عندك وشفيها لاقعدت مع امها تواسيها وتجالسها في وحدتها ..
تقول كل خواتها رجعو .. طيب هم عندهم ظروف .. ليش انت بعد تتسبب على أملهم الوحيد اللي هي زوجتك وتاخذها ..
9 أيااام ؟؟؟ ترا ولا شي ..
هاذي أمها جنتها ونارها ..
وأمها تمر بظرف ماترضى به على عدو ..
وإنت لو تطيح في ظرف مشابه لا تتوقع إنها بتخليك ...
حقوقك بتوصلك لما ترجع .. يعني هي وين بتشرد ؟؟؟
ميبس راسك ولا راضي تغير رايك أو تلين من أول ماطرحت الموضوع لأخر رد وإنت على راي واحد ..
الله يعينها .. فعلا ..

ترا انا مثل زوجتك ..
أهلي بديرة ثانية وممكن شهور ما أقدر أشوفهم ..
فلما أكون معاهم بالاجازة .. أنسى الدنيا ومافيها ..
وحتى زوجي .. إيه زوجي انساه ..
هذول أهلي وأيامي معهم بالنسبة لأيامي مع زوجي قليلة ..
وزوجي مدرك ومقدر هالشي ولا يزعل ويعمل مشكلة ..
ممكن يشره من باب المحبة ..
بس أنت بتشرهك تكدر عليها المسكينة .. كدر فوق كدرها وحزنها ..

نعم .. المشكلة فيك وحدك .. وحبك ومشاعرك لها لا تشفع لك هذا التعامل السئ .. الحب مشاعر حلوة مش مشاعر لئيمة ..

مو كل خواتها رجعوا باقي ثنتين من اخواتها هناك .. ماطلبت حقوق والله يعنني فعلا