كلام روح صحيح و ف نفس الوقت رجوعها بدون ما بطلع اللي ف نفسك من غضب سبب لك هالنفور ... تعود بالله من الشيطان و حاول ما تفكر او تحلل اي شي✨

__________________

تصرفاتها غريبه شلون رجعت لوحدها.؟ ..تضمك وبعدها تهددك ....وفي نفس الوقت احس كاسرة خاطري مسكينة ... يمكن بعد الولادة تتغير..
لاتنسى الموضوع الرئيسي اذا جابت طاري اهلك ذكرها ان هذا أمر مفروغ منه وخط أحمر ماتتعداه ..الله يعينك ويسهل أموركم.

والله ي اخواني واخواتي .. فعلا في اضطرابات فيها مو طبيعيه .. اللي حصل بعد مارجعت من الدوام فتحت الموضوع ثاني مره .. ونفس السيناريو القديم .. مصره ان تعاملها حاليا او مستقبلل مع امي مافيه اي نوع من الخطاء ... رفضت وبينت لها انه خط احمر .. وماعندي ننقاش في هالشئ ابدا .. مو عاجبها الكلام .. وبعدها بداء اللف والدوران من طرفها وكيف تسافر وكيف تتركني في حملي .. رديت عليها انتي تركتيني 4 شهور ومادريتي عني خير شر .. وتاركه بيتك ولا عبرتيني ولا حتى احترمتني في العزاء .. قدمت اعذار واهيه وبدات تتلفظ بي الفاظ غير مهذبه من سب وشتم وقذف .. اانا. هنا رديت عليها وسكتت .. بعدها كلمتها اذا تبي عشاء قالت لا وصلني لبيت اهلي واتضح لي ان امس جاءت مع ولد خالها للبيت والحين قلت لها ماراح اوصلك هاذا بيتك زي ماجيتي له وانا بخرج على طلبك بحكم انك ماتبين تشوفيني .. خرجت ورحت لبيت خويي تعبان ومواصل من امس والحين بدات تدق على وتقول تعال وديني بيت خالي خايفه مااقدر انام لحالي .. قلت لها انتى طلبتي مااقد بالبيت وانا مااقدر اوصلك للاسف ..

لا حول ولا قوة إلا بالله

أسمحلي أقول لك أنت غلطان لما طلعت وتركتها في بيتكم لوحدها

نصيحة لك أرجع بيتك ولا تتركها وحدها مهما أختلفتم ولَك الحرية في توصيلها من عدمه مع نصحي لك لا توصلها خليها في البيت ولا تطنشها وكون ثقيل معها لكن من غير صد
هي حالياً عندها ظروف لازم معدنك يظهر في مثل هذه المواقف حرمه ضعيفه جاتك كيف تتركها وخاصة إذا كانت زوجتك !!! عجبي

زوجتك حامل كيف تتركها آسف أقول لك أنت بتقلب القصة كلها عليك وأنت الحين بتغلط أغلاط أخاف تكون فضيعة

يا أخي كفاية نقاشات عقيمة العزاء و السفر و و و و

هذه نقاط لا تتناقشوا فيه

ركزوا على النقاط الجوهرية

حياتكم حياة طفلكم

أهاليكم من دون أسترجاع مواقف من الماضي

راجع آية سيدنا إبراهيم مع النمرود و كيف حاجه إبراهيم

لم يصر على نقطة الأحياء والإماته بل إنتقل لنقطة أخرى أقنعه بها وحاجه بها

ليس بالضروري الآن تقول لك أن غلطت بلسانها رجوعها لك بهذا الشكل أكبر كسر لها

وعليك بتقويمها فهي تحبك والتقويم سيأتي بالإستعانه بالله و من ثم الصبر عليها

ومعرالعطف و الحزم والحب و المد و الجزر

اللهم فرج الهموم و استر العيوب ويسر الأمور و اشرح الصدور

لاحول ولاقوة الابالله

واضح من زوجتك كانت تبغى تسمع كلام عاطفي منك بس مشكلتها ماتعرف تعبر وصارت تتخبط من سالفه لسالفه
وانت مااعطيتها ريق حلو لين تمادت

لوو جربت تهديها بكلمتين حلوه عشان الشيطان مايجيله فرصه يخرب بينكم اكثر من كذا
من رايي ترجع البيت عندها حرمه وحامل صعبه تنترك لحالها

الله يصلح مابينكم ويسخركم لبعض

__________________

هي جات بنفسها لك ع الرغم من مكابرتها وانو مو شايفة نفسها غلطانه
ارجع بيتك عند زوجتك لا تتعب وماتلقى احد يوديها المستشفى
والله لما كنت حامل كنت اتمنى زوجي يظهر تعاطفه معي خصوصا في الشهر الاخير وكنت اصرخ واعمل مشاكل عشان يحس فيني وفي اللي اعانيه ويهدي روعي لكن كان مثلك جاف و ماتطلع منه الكلمة الطيبة لكن بعد الولادة هديت كثييييير و الحمدلله ،، هي ولادتها قريبة اتركها لبعد الولادة واحسن معاملتها الان اي نقاش بهذا الوقت وانتو مشحونين ومنتظرين طفل ماراح يكون مثمر وبناء ،، لا تقسى عليها هي غلطانه والغلط راكبها لكن باذن الله بعد الولادة وبعد ماترتاح وتشوف تعامل والدتك الطيب معاها راح تتغير للافضل

اظن انك تتصرف بشكل
يحسب عليك ، لا يحسب لك

الله يصفي القلوب

الله يصلحك ويهديك
حرام عليك تخلي زوجتك وحامل بالأشهر الاخيره لحاله في البيت
رجوعها لك اكبر اعتذار خلاص يااخي خلك كريم معها
وش يضرك ياكافي لو تطبطب عليها وترحمها وتدلعها وتقولها كلام حلو وتحضنها
زوجتك تررررحم وتذكر مالها بالدنيا بعد الله غيرك
ارجع لبيتك وخذها بحضنك وانفث عليها وحن عليها مالك الا الأجر يابن الحلال
جرب معها العاطفه والريق الحلو وخاصه هالفتره
ولما تفتح مواضيع قديمه خليها تفضفض وتبكي وتطلع كل الي بخاطرها وكلام يطير فيه الهواء
اسمع كلام ام دان ومحب السنه
وخف الله بزوجتك وعاملها كنها مريضه وهي بالفعل هالوقت بأضعف حالاتها ولاتطيعها تروح لاهلها ابدا ولما تقولك كذا احضنها قل مااقدر استغني عنك وتمشى بها ووسع صدره وامشي معها بمنتزهات لتسهيل الولاده وانسى كل شيء حاليا ولما يشوفوك الشيطان كذا ييأس منك ويترك من غير رجعه يارب
انت بعد تراك مو هين بك حقك
الله يهديك ويصلحك ويحنن قلبك

يا أخي إذا زوجتك غلطانة فأنت أغلط منها
هي عنيدة وانت أعند
كل يبي يمشي رأيه
كل يبي يثبت هوا الصح
أنت الحين اللي كبرت المشكلة بعد ما جاتك زوجتك برجولها لأنك ما اتعاملت معها بالشكل الصحيح
ماجربت ولا طريقة غير الحوارات وتبي بالغصب بالإكراه بالجبر تقر وتعترف وتعتذر عن خطأها
شخصية مثل زوجتك ماتجي بهالطريقة
قلنا لك ألف مرة غير أسلوبك
تستخدم معها نفس الأسلوب لا تتوقع نتائج مختلفة
ثم تركك البيت غلط
لا تنس قلنا لك من البداية اتفاهموا وبعدين سافر
إنت سويت اللي في راسك وسافرت
الحين الكل نصحك أشكال وألوان مازلت ترمي بالنصايح كلها وتسوي اللي في راسك ثم تجي تكتب نفس نتايج اللت والعجن اللي مايفيد بل يزيد الطين بلة
صراحة أسلوووووبك غلط قبل ماتلومها لووووم نفسك وحاسب حالك وأصلح عيوبك.
ارتفع ضغطي منك.