ذكريات صبحك ربي برصاه حبيبتي
تدرين ياقلبي بالنسبة للمادة والله أمس قلت له اشتريلي. وسو عشاني
عمري ماثقلت عليه بشئ بس بودي يروح ان شاء الله يأخذ قرض ويشتريلي شيء ثمين
لو يأخذه مني ثاني يوم أهم شيء أحس بالغالا لي فقدته
هم العلم ان لي فقدته ماله ثمن ولا يقدر بالمال
وأنا معك بخصوص السفر ودي أروح معه أي مكان أغير جو
بالنسبة لسوالك ياحبيبتي أنا لي متمسكة فيه ولولا تنازلاتي كان زمان فرقناه
أنا ع قولة الأخ أبو حكيم كان المفروض أجي مطلقة عند أهلي وأشوف هل فعلا بيسوي شيء
بس ماقدرت وخفت يتغير شعوري ولا ارجه له .. صدقيني أعرف نفسي
أنا بسوي لي قلتي عليه وان شاء الله مايخذلني بمشاعري مرة ثانية
الله يهديه ياذكريات ويفهم ان الانسان له قدرة للتحمل
والله ياحبيبتي قلت ماراح اطلب منه لا مشاعر ولا أدور ماكنت أدوره من عواطف تعدقني
وبعظمة لسانه قال مابيك تحبيني مابي حب احترميني بس
قلت أبشر بعزك ولايهمك
وهذاه الحين قاعد يدور مني كلمة تطيب خاطره
سالني قال تحبيني ؟
قلت الله عليك يابو الشباب كم سمعت مني كلمة أحبك ولا لقيت لها بال
عموما حبيبتي بسوي لي قلتي عليه وأسأل ان يهديه ويهديني معه
والله لايحرمني منك يالغلا
ويجعل السعادة بطريقك ويحبب خلقه فيك أكثر
الله يرزقك كل ماتتمنينه ويحقق لك مرادك
أحبك حبيبتي

__________________

عزيزتي صابرة

معليه على المداخلة ، بس حسيت فهمتي كلام الأخت ذكريات لا تغيب
إنك تطلبي من زوجك شئ مادي أو سفر و كذا

بس اللي فهمته من كلامها ، الجزء الثاني إنك تركزي عليه

----------------------------------------

عزيزتي صابرة بدنيتي

أنا بأرد عليك و راح أعتبر إنه زوجك ما بيقرأ الرد حتى أخذ راحتي في الرد عليك

- لا تجلسي تتكلمي عن الماضي ، مهما كان جرحك و ألمك و مهما كان اللي حصل لك نتيجة له
لإنه الرجل ما راح يفهم الشئ هذا أبدا ، الرجل ينظر لها بمفهوم اخر

إنت بكلامك هذا ، راح تزيدي الفجوة اللي بينك و بين زوجك و راح تخليه يبعد عنك أكثر
لإنه الرجل بشكل عام ، يكره ( اللوم ، العتاب ، الإنتقاد ، النكد ... إلخ )

إنت صحيح تفضفضي ، بس زوجك يوم يقرا كلامك ..
بيقول ، خليني أبعد عنها كمان ، دام إنها لسى بتتذمر و تتشكى و تتألم وووو إلخ

هو ما راح يشووف الجزء الثاني من كلامك ، إنك تحبيه و تغليه ووووو إلخ
لإنها ما راح تعني له شئ ، إن كان معها ( لوم و عتاب )

و لا تنسي إنه ( كثرة الدق ، تفك اللحام )


افتحي صفحة جديدة ، تعلمي إنك ( تنسي ، تسامحي ، تعالجي نفسك بنفسك )
إنت مازلتي مثل ما إنت ، ما تغيرتي .. الفرق :
إنك صرتي خايفة من الإنفصال

و بطريقتك هذه ، راح تخلي الفاس يوقع في الراس لا سمح الله

الرجال يتزوج عشان يلقى ( الحب ، الحنان ، التسامح ، الراحة ... إلخ )

تبغي تعيشي معاه ، لا تستني منه شئ ..
عيشي حياتك بثقة ..

----------------------------

دام إنه زوجك سافر و إنت كنت بعيدة عنه ، و العلاقة بينكم مشوشة نوعا ما ..
و ما كلمتيه غير من أسبوع ، اخر مرة ..

فإنت في مرحلة حاليا ، إنك تعتبري زوجك ( وجوده ، مثل غيابه )
مع احترامي لزوجك الفاضل ..
بس كلامي ، لراحة الطرفين بإذن الله ..

زوجك يكره القيود ، زوجك يكره اللوم ، زوجك يكره الإنتقاد ، زوجك يكره المرأة اللي تلاحقه ..
هذا هو زوجك ..

و كلها إنت بتعمليها ، و علشان تبتعدي عن الصفات هذه ..
فلازم تنشغلي بشئ مع نفسك ، لا تخليه محور حياتك ..

زوجك يحب المرأة الغامضة ، يبغى منك ( حنان و حب و تسامح ) من غير مقاااااااااااااااااااااااااااااااااااابل

أنا برأيي ، إنك تستمري في البعد عنه ..
لحد ما تنشغلي مع حالك ، و حاولي تعملي علاقات مع زميلات ..
تواصلي مع أخوات ثانيين ، و سجلي في دورات .. و يوم ترجعي له ، ترجعي له بشكل اخر
و بشخصية واثقة و متفائلة ..

هو جرحك و ألمك ووو إلخ

مافي رجال ، ما جرح زوجته .. إلا ما ندر ..
يعني أنسي ، تعلمي النسيااااااااااااااااااااااااااااااااااااااااااااا اااااااااان ..

و لا تزعلي من كلامي يا صابرة ..
إنت كمان في فترة من الفترات ، جرحتيه و اعترفتي بغلطك و هو رجع لك
فلا تخليه يندم لا سمح الله ، بإنه رجعك ..

هو رجعك ، و إنت وعدتيه بالتغيير للأفضل و الأعضاء و العضوات ترجوه من أجلك

خليك المرة هذه أقوى ،، و لا تكشفي كل أوراقك لزوجك
خليك ( غامضة ، متجددة ، واثقة ... إلخ )

الرجال ، لو زوجته ملكة جمال .. و تنكد عليه حياته .. بيكرهها
ما تشوفي هناك رجال متزوجين من حريم ( غير جميلات ) ، لكن يموت عليها ؟؟؟
لإنه روحها حلوة .. و لإنه لقي الحب و الدلع و الإهتمام

أدري إنك مو مقصرة معاه في الحب و الإهتمام
لكن بالمقابل ، بتمسحيها بعصبيتك و الإنتقاد ووو إلخ

زوجك كذا و ما يتغير ، لازم تتقبليه بكل اللي فيه

السلام عليكم شخبارج يالغاليه
صابره ياقلبي لاتتعبين نفسج بالتفاصيل اذا يبي يقولج حياه الله واذا مايبي على راحته طنشيه شووووي ريحي اعصابج ترا موزين تحاسبينه على كلشي بعدين يطفر منج وبعدين مايقولج
وعسى ربج يسخره لج ويجمعكم على خيررررر اميييييييييييييييين

حبيبتي روح الطير كلامك ع عيني وراسي
أدري انكم تبون مصلحتي وصدري والله وسيع للنضائح من مثلكم وشرواكم
والله ياحبيبتي عمر المادة ما كانت هدفي
هي مجرد سوالف أنا وذكريات
ودي بس شيء يحسسني بغلاتي عنده
والله ياروح ما عاتبته بشئ ولا اشتكيت من يوم سافرت لأهلي
يمكن يشوف كلامي بالمنتدى بس ما أجرحه ولا أذيت مشاعره
هي فضفضة لعلي ارتاح
يمكن قلبي ماتغير ياروح حبيبتي
بس أحس انه بداخلي شروخ خلتني اصير غريبة عن نفسي
وأحس اني محتاجة لكم
بحاول حبيبتي صدقيني راح أحاول
أنا نفسي أسعده ويسعدني واذا في تقصير ان شاء الله أصلحه
الله لايحرمني منكم يارب
ترجعين بالسلامة يابعدهم

__________________

هلا صابره

اعتقد اني كثرت عليك الكلام..

شوفي يا صابره...

تطلبين وانتي بعيده ما ينفع ..

تطلبين وانتم خلاص رجعتم .. ما عاد ينفع

لو كان قبل كان فيها كلام الآن خلاص والحمدلله انكم مع بعض.


روح الطير فهمتني...

أنا بينت لك وش ممكن تطلبين

لكن خلينا نقول الآن بينكم اتفاق جديد...

- تنسين كل الي صار...

- انتي عروس فتهيأي لعودتك لزوجك...

وهدفك ما هو ؟...(أن تسعديه... مو تسعدي نفسك)

- انتي ما زلت تدورين بنفس الحلقه..جنني بالطلاق..احس بالخوف ...

هذا الكلام كله ما ينفع...الرجل ما يفكر بنفس طريقتك العاطفيه ...

فرجاءاً ستوب لكل هالأفكار...

حتى حواركم الآن واسمحيلي بس ما لقيت تعبير اهون (ما عاد له طعم)

يدور حول (ظلمتني-الطلاق)

حاولي تحولين الحوار لشيء إيجابي أكثر ..

فكري كيف تشغلين وقتك إذا رجعتي..وكيف تهدين نفسيتك مع زوجك

صابره ...

الزواج ليس ماذا فعل بي وماذا أعطاني والكلام للرجل والمرأة

الزواج عشرة وتحمل..وصبر وأخلاق

وأفضل حسن الخلق الي تتصف فيه المرأة هو معاملتها مع زوجها

تقمصي شخصية الانسانة المعطاءه الحنونه .. الي ما تنتظر شيء

صحيح ان زوجك أخطأ معاك وهزك بالطلاق...لكن الحل ايش

تندبين حظك طول عمرك

ينتحر...

تنتحرين..

وإلا تحاولين تهدين الأمور لين يندم من داخله انه زعلك بيوم..

صابره ارجعي اقرأي ردودي بهدوء وتمعن

واستعيني بالله علشان يقويك لقادم الأيام..

ما راح أكثر عليك ..


انتظرك

هلا حبيبتي صابرة ..

انا أوافق الغاليه ( روح الطير ) في كلامها .. يعني قالت اللي بغيت اقوله ..

ونصيحه مني لك حبيبتي ... لا تحاسبين على كل شيء وأي شيء ترا محد بيتعب الا إنتِ ... لا تقولين عمل فيني كذا
وقال لي كذا ... فكري انتِ شو تقدرين تعملين الحين ... خليها بداية جديده فهي فرصة من رب العالمين ... تعلمي من
مواقفك وتجاربك السابقه ... لا العناد ينفع ولا اللوم ينفع ولا الزعل ينفع ... تفكيرك في الماضي بخرب ويضيع عليك الحاضر
ادعي لك من كل قلبي ان الله يفرج همك ويقويك .. ويكتب لك حياة كلها راحة وسعادة وطاعه وخير ... ربي يحفظك يالغلا

__________________

اكثر من هلمعزه و الدلال مافي

قولي اييييييييييييييييييييييي


ما تقدري تبداي بمعرف جديد

ابداي بكلام جديد و كل ما جيتي تفضفضي اكتبي واقريه كم مره

و ابداي اختصري بلكلام و عيدي اقري كلامك و اختصري

اخر شي ما حتلاقي كلام تكتبيه



و اعرفي انه ما في بيت بهلدنيا كلها الا و فيه مشاكل و هموم

في وحده اعرفها ام صاحبتي
تقول زوجها اذا جا يعاتبها

بلليل تقول له خلي ننام و الصباح رباح من اصبح افلح

و يجي الصبح يوم جديد ناسين الموضوع

انت دايما اقنعي نفسك انك فرحانه وسعيده وزوجك ما في منه و انه حياتكم حلوه وسعيده و افرحي باقل شي عندك و قولي يا الله نعمه احفظها من الزوال ،،،، كرريها كم مره وبصوت عالي و يسمعها هو كمان شوفي مقدار الفرحه الي تدخل قلبكم

تدريجي حتبرمجي نفسك علسعاده و بس انتهى الموضوع

__________________

في البداية اعتذر اذا فيه كلام يضايقك...

ارجع اقرأ ردودك ...

(يحسسني-يسوي لي-يشتري لي- يسفرني)

طيب ليش دائماً أنتِ ردة فعل...

ليش ما أقرأ...

(بأحسسه بالحنان-بسوي له جو هادي-بأعطيه الأمان-بصبر عليه-بأحبه بدون مقابل-ما راح افتعل مشاكل)

صابره اعرف إن التغيير صعب...

واعرف إن الانسان ما يحس الا بألمه الشخصي..

لكن ألمك....يؤدي إلى عتب...خصام...مشاكل....قلق...طلاق

عطائك.......يؤدي إلى رضا..هدوء...تقارب...تماسك...اتفاق

ولا تسألين ليش أنا

هذا قدرك...

اعرف انك محتاجه للحنان ولكل المشاعر الي تحتاجها المرأة

لكن مو هذا وقتها...

أجمل الأشياء هي التي تأتي دائماً متأخرة...

بعد صبر وتحمل ..مو تصبرين على موقف موقفين...

لا اعتبري السنة الجديدة هذي كلها سنة تنسين فيها نفسك...


إذا ما أثمرت هذي الطريقة...فأنتي تزرعين في ارض قاحلة...

وقتها بتفكرين كيف ما يضيع تعبك هدر..

**************

هلا ذكريات حبيبتي
من الصباح ابغى أكلمك ماقدرت
عندنا ضيوف وكلش ماقدر أخذ راحتي
أعذروني عن التأخير
ذكريات بقولك شيء وأنتي أكثر الناس فاهمتني ولايهون الجميع
ذكريات لمن تحسي انك قاعدة تسوي مجهود أي كان سواء مظهرك كشختك أي شيء
مو مسألة مقابل بس عالاقل يحسسك هالرجال انك أنجزتي
يعتبر كل شيء عادي وان كل حرمة تسوي وتحب وتخضع كأنه شيء اجباري وواجب
طيب في رجال يشتكون من حريمهم وأقلها يقول زوجتي ما تعطيني حقي الشرعي زوجي ما تلبس ماتسوي
صدقيني أحس باحباط
أبا منه بس الكلمة الطيبة تشجعني
والله ياذكريات ماقولك اني ملكة جمال بس كانت عندي ثقة بنفسي جبارة وكنت واثقة من قدراتي
أحس اني فقدتها وفقدت كل احساس حلو بداخلي
يمكني حساسة يمكن اطلب حنان وحب زود عن باقي النساء _ بس غضب عني أحبه واباه هو يعطيني
مثلا وقت النوم أقوله بس حاول تحضني لين يجيني النوم
أبيه يحتويني ياذكريات أرجوك افهميني
والله يمكن أروح بس المطبخ أجيب مويا أحصله دخل بسابع نومة
مسافة متر بينا بالسرير
في اشياء يمكن تافهة عنده أو عند غيري بس عندي تعنيلي الكثير
ومع هذا قلت له ياحبيبي أباك تحس فيني ترى الأمور لي تعتبرها فروع جزئيات أنا اعتبرها جزء كبير من حياتي
أروح كوافير بالأسبوع ? مرات تخيلي كل مرة وش أسوي له لدرجة هو يضايق من روحتي
يقول انتي ماعندك سألفة غير ذا الشئ
أقوله عشانك أبيك تشوفني حلوة
والله ولا كلمة مجاملة منه ! والحمد الله ماني شينة
بس أحيانا أطالع بوجهي أقول في شيء بزوجي ماهو عاجبه !
صرت أدق ع أمي أقولها يمه أنا حلوة ؟ تقولي تجننين »» القرد بعين أمه غزال
مرة أمي قدام زوجي تقول طالعي وجهك بالمرأيا لأنه اشتكى لها اننا رحنا مكان مختلط ومعنته انه يطالع
كان في بنات وماحبيت يرفع عيونه
تقولي أمي ليش تخنقينه ؟ قلت والله مإودي زوجي تطالع عيونه بتبرج وقلة حيا
أدق ع صديقتي أقوله يأم فلأن أنا حلوة ؟ تقول والله تجننين
طيب. أنا كنت أعرف انه لي قبول بين الناس والحمد الله ع حسن الخلقة
ليش زوجي مايمدحني ولا ع الأقل لا تانقت له ولبست يجتمل حتى أعطي وازيد بعطائي
مع العلم اني امدحه واثني عليه والله أحسسه انه ملك زمانه
بس من مالقى منه تجاوب ومع أول مشكلة انقلب شرسة أبي أهد كل شيء حولي
كل هالعوامل وغير الطلاق هدوا حيلي وافقدوني الثقة بنفسي
يوم مرض ياذكريات راح بيته الثاني وكان يومي
قلت ليه ماتمرض في بيتي تشوف اني مقدر اتحمل مرضك ؟
قال: كنت تعبان حيل. وأنتي ماراح تتحملين. ! !
قلت هي تحملتك وأنا لا وش لي خلاك تحكم جربت !
قلت له والله لو تشوف اين مقدر اتحملك يوم تمرض فتاكد اني ماستحق أكون زوجتك
والمصيبة ياذكريات يمكن لو بس صكه رأسه تنزل دمعتي واحن عليه
معقولة هالرجال مو قادر يستوعب اني ممكن أخذمه يعيوني
وقلت. له والله لاقدر الله مت وأنا ع دمتك ماراح اتزوج
وأنا وربي صادقة عبرت له عن كل ما أملك
حسيت ولأول مرة بحياتي أعطي بلا حدود
من نتخاصم أجي أصالحه زي المجنونة مايهون علي أنام وهو مخاصمني
أقول وش معنى هو يقدر وأنا لا؟
عشان. عنده زوجة غيري ؟ وعشان أنا ماعندي إلا هو ؟


والله ياذكريات رجعت له اخر مرة منهارة لظروف زواج والدتي
أمي حبيبتي نبض قلبي طول عمرها كانت لي وفجأة ما أصبحت لي
وهو كان عارف اني أمر بظروف تغير حياة أهلي
وأخذت قرار وقلت أنا بروح عند زوجي مالي إلا هو بعيش عشانه
رحت له وأنا كلي حطام وبقايا انسان كنت أبيه يضمني صمة عقبها الموت
قام أول. ماتهاوشنا قال كلك مشاكل ! صارت ظروف أهلي مغاير
الحين أمي رجعت لي وصرت أنام معها بعرفتها زي أول
بس وينه زوجي كنت أبيه لي الأب لي انحرمت حنانه
أبيه الأم لي ماشبعت ضمتها لأمر الظروف
كنت أبيه الأخ لي فقدته
أبيه العشيق إلي طول عمري تمنيته
صح هو مو مجبر يلعب معي كل الأدوار بس بالاخير هو زووجي وأقرب لي من أي أحد
سامحيني بس ..

__________________

تسلمين حبيبتي لمنى الشوق
الله يسعدك يالغالية
بحاول حبيبتي افتح صفحات جديدة واطوي الماضي الأليم
بحاول ياقلبي بس لا تنسوني من دعواتكم النقية
انتم قلوبكم طاهرة

__________________