الحين طلقك؟؟؟


اتخيل ان باقي تكمله انه اتصل او جا عندك واترجاكي ترجعي

__________________
يارب ...والباقي وحدك تعلمه

غاليتي دلع

أوصيك ونفسي بتقوى الله وان تسعي في طلب رضاء الله لان من أرضى الله بسخط الناس رضي الله عنه وأرضى الناس عنه
ومن أسخط الله برضى الناس سخط الله عليه وأسخط الناس عليه

وأوصيك أن تدعي الله بأن يرضى عنك (اللهم اني أسألك رضاك) و إذا رضي الله عنك أرضى الناس عنك.

وأوصيك بسماع شريط رحلة مع القرآن للشيخ عبدالمحسن الاحمد شفاه الله
وذكر الشيخ في هذا الشريط أن امرأة جائت إليه تشتكي من زوجها وأنه لايرضى بشي رغم سعيها ليل نهار في إرضائه حتى أنها في صلاته تفكر في إرضائه فتعجب الشيخ منها كيف أنها في صلاته تفكر في زوجها وتقصر في صلاتها فأوصاها أن تقوم الليل وتدعوا الله وتقول (اللهم إني لا أسألك إلا رضاك) يقول الشيخ بعد شهر جائت الي وقبلت راسي""لانها إحدى محارمه"" قالت أن زوجي تغير رغم اني لم أفعل ماكنت افعله من قبل فأوصيك بهذا الدعاء كما أوصاها الشيخ..

فأوصيك بإتباع ما أمرك الله ورسولة وإجتناب ما نهاك الله عنه ورسوله وأسألي الله الرضا عنك وأبشري بتيسير أمورك

واعلمي أن الخيرة فيما أختاره الله لك

سألت الله أن يزيل همك ويفرج كربتك وييسر أمرك

دلع..اعانك الله على ما بلاك...اعتقد و الله اعلم زوجك مريض نفسيا...لازم تكوني اقوى في ردات فعلك..
باين من كتابتك انك تحبيه لدرجه الجنون و كل مره تعفي عن اخطائه على امل انه يتغير...
و لكن يلي فيه طبع مارح يتغير...
لازم لازم زوجك يتعالج عند طبيب نفسي...انصحك بأن تشرطي هذا الشرط عليه اذا اراد ان يرجعك...
تقبلي مروري

__________________
اللهم يا مقلب القلوب ثبت قلبي على دينك

بسم الله الرحمن الرحيم
السلام عليكم ورحمة الله وبركاته

اقتباس:

لكن إبتليت بزوج لا يريد المسؤولية زوج كئيب لوتحضرون له لوحة جميلة بيجلس يبحث عن أي نقطة سوداء لاترى إلا تحت المجهر ليبدي رأية فيها...

اختي الفاضلة المشكلة الحقيقية ليست انه زوج كئيب ولكن اصل المشكلة انه لم تكن اولوياتكم فيه من البداية الدين
واكتفيتم بقول والدته انه يحافظ على الصلاة في المسجد بالرغم من انه من المفترض انها لن تذكره بسوء في مثل هذا الموقف
ولكن عندما اخبرتكم والدته انه خصص لكي جناح في البيت خاص بكي كان يجب تحري الامر وذهبتم وعاينتم هذا الجناح قبل الزواج
وعندما اخبر والدك انه يعمل ويتقاضى دخلا شهريا تحرى بالطبع والدك عن الامر وتأكد من صدق هذه المعلومات
ولكن امر دينه كان كافيا فيه رأي والدته!!!
وبالطبع يتضح من خلال ما ذكرتي المستوى الايماني المتدني الذي تعيشه هذه الاسرة
لدرجة ان زوجك لا يصلي الجمعة في رمضان وهذا كفيل بتوضيح حاله مع الله

ناتي لنقطة اخرى وهي حبك الشديد لزوجك بالرغم من كل الاهانات وسوء المعاملة وعدم الاهتمام
تجدي انه حب غريب من نوعه فكثيرا ما تقابلنا حالات يكون فيها الزوج شخص غير ملتزم وكثير الزلات ولكن الزوجة تتردد كثيرا في تركه والابتعاد عنه لانه يحسن معاشرتها فهو يدللها وكريم معها
ولكن زوجك بالاضافة لكونه يسىء معاملتك فهو ايضا ليس من الرجال المحافظين على الصلاة في المساجد ولا على صوم النافلة ولا على قيام الليل ولا من الحافظين للقرآن ولا من الذين لهم دور دعوي في المجتمع اي انه ليس مسلم ملتزم

وها هو الان ايضا طلقكي ولسبب غير مقنع
ارأيتي كيف يمكن ان نعذب اذا احببنا غير الله وذلك لان حبكي لزوجك لم يكن في الله ولكن كان لاسباب اخرى غامضة وغير مفهومة ربما ان امسكتي انتي ورقة وقلم وكتبتي لماذا تحبيه ستحتاري وتأملي معي قول رسولنا الكريم صلى الله عليه وسلم
ثلاث من كن فيه وجد طعم الإيمان . من كان يحب المرء لا يحب إلا لله . ومن كان الله ورسوله أحب إليه مما سواهما . ومن كان أن يلقى في النار أحب إليه من أن يرجع في الكفر بعد أن أنقذه الله منه . وفي رواية : من أن يرجع يهوديا أو نصرانيا
الراوي: أنس بن مالك المحدث: مسلم - المصدر: المسند الصحيح - الصفحة أو الرقم: 43
خلاصة الدرجة: صحيح

وتأملي ايضا هذه الكلمات لابن القيم
فكل من أحب شيئا غير الله عذب به ثلاث مرات في هذه الدار ، فهو يعذب به قبل حصوله حتى يحصل ، فإذا حصل عذب به حال حصوله بالخوف من سلبه وفواته ، والتنغيص والتنكيد عليه ، وأنواع من العذاب في هذه المعارضات ، فإذا سلبه اشتد عليه عذابه ، فهذه ثلاثة أنواع من العذاب في هذه الدار
وبالفعل لقد استشعرتي معه هذا العذاب

اتمنى ان تطلعي على هذه الفتوى بعنوان (زوجي عقيم وغير ملتزم بدينه فهل هذا حب من الله لي أم أنه سخط ؟) فهي تنطبق على حالتك
http://www.islamweb.net/ver2/Istisha...p?reqid=266169

نأتي الان للحل
يجب عليكي ان يكون حرصك على دينك ورغبتك في تكوين بيت مسلم ملتزم مقدم على رغبتك في العودة لزوجك
لهذا يجب عليكي الان وبعد ان طلقكي ان تشترطي عليه امام شهود من عائلته وعائلتك بمنتهى الحزم ان يحافظ على الصلاة في المسجد
وان يتوب من التحدث مع النساء ويتقي الله
ان يحسن معاشرتك ويكف عن افشاء اسرار البيت لاخته وغيرها
وتكوني واثقة تماما من نفسك وثابته على المطالبة بهذه الحقوق حتى تعودي
ولا تجعليه يرى منكي هذا الضعف الذي يعتريكي امامه وخوفكي من ان تقابل عينيكي عينيه تحت مسمى الحب ومثل هذه الامور التي تشعره بضعفك

لانه اغلب الظن ان تعاملكي معه بهذه الطريقة زادت ثقته بنفسه واصبح يرى انه لا مثيل له وانه بالنسبة لكي شىء كبير كالحلم الذي تحقق

وانا لاحظت خلال عرضك للمشكلة مدى ايجابيتك وحرصك على التجديد لكونه رجل ملول ولكن اليس من الممكن وربما من المرجح ان ما مل منه حقا هو شخصيتك وليس شكلك
بدليل كل التناقضات التي تخللت هذه المواقف عندما جعلتيه هو من يختار لكي
فبعض الرجال يحبون المرأة قوية الشخصية الواثقة تماما من نفسها وقتها يكون الزوج هو من يسعى لينال رضاها وحبها

لهذا يجب ان تجددي الان ولكن في شخصيتك ان تتعلمي الحزم والثقة بالنفس واريدك ان تتأملي شخصية اخته وامه القريبين لقلبه فستجدي انهن صاحبات شخصية قوية وبالتالي تستنتجين انه قتنع بالمراة صاحبة الشخصية القوية

ومن الان واثناء كل هذه المحاولات الزمي الاستغفار وستجدين تيسيرا لامرك وتفريجا لكربك ربما اكثر مما تتمنين
فاجعلي الاستغفار على لسانك لا يفارقك وانتي تعملين في بيتك في مطبخك في خروجك وستجدي فرجا قريبا بإذن الله

قال رسول الله صلى الله عليه وسلم
من لزم الاستغفار جعل الله له من كل ضيق مخرجا ومن كل هم فرجا ورزقه من حيث لا يحتسب
الراوي: عبدالله بن عباس المحدث: المنذري - المصدر: الترغيب والترهيب - الصفحة أو الرقم: 3/57
خلاصة الدرجة: [لا ينزل عن درجة الحسن وقد يكون على شرط الصحيحين أو أحدهما]

وابحثي في النت ستجدي كثيرا من مواقف لاشخاص مع الاستغفار من تفريج كروب وتوسعة الرزق في الاموال والاولاد وغيرها من القصص الرائعة
ولا اريدك ان تضعي تصورا معينا في تفكيرك عن ان هذا الفرج يحمل معنى معينا كالعودة فقط لزوجك مثلا فربما ان في تركه الخير والصلاح وربما في العودة له بعد هذه التجربة الخير والصلاح ايضا

الله يفرج كربك ويرزقك السعادة في الدارين
في رعاية الله

__________________

مرحبا..أشكر الجميع ..قرأت ردودكم ونصايحكم الله يجزاكم كل خير..
الجورية الحمراء..فعلا أحس إنه ممكن مريض بمرض الدلع يبي يسوي كل اللي يبيه ومتى مايبي..حتى أنا ماأعتقد إني أسوى شئ عنده..مراهق في سن الثلاثين..ملول لدرجة كبيرة ومثل ماقالوا الأخوة والأخوات في بداية ردودهم أن الحرام عاميه عن الحلال...خلاص يبي من وحدة لوحدة...وكان عندي إحساااس إن كل تصرفاته تدل إنه يبيني أروح لبيت أهلي والله أعلم هل يبيني أطلب الطلاق يعني حاب وحدة غيري؟..هل كذا بس يبي الفكه مني وأي وقت يجي ياخذني؟..ماأدري عن اللي براسه..بس أنا كنت أحاول أني فقط أصبر على أمل يمكن يتغير..
غادة777 ،،، لحظة...كلامكم مية على مية....الله يجزاكم والجميع كل خير...وأعتقد إني إندفعت لزوجي بقوة..ومن كثر التفكير فية وإنشغالي بمشاكلي..كنت حاسة إني مومثل أول من الناحية الدينية!!...
أكمل لكم...
بعد ماأرسل(دلع أنتي طالق)..إنصدمت كيف يطلقني بدون سبب..نعم بدون سبب..لأن السالفة ماتسوى أصلا هو الغلطان أرسلت عليه رسالة(أبركها من ساعة) وبسرعه دقيت على أبوه وأنا خلااااص معصبة..سلمت علية قلت ياخالي ولدك البارح ضربني ويسبني..واليوم يطلقني عشان سوالف حريم وهو عنده مشكلة بالإنجاب وبصبر أجل لوقايله موصابره وش بيسوي فيني؟(أنا كنت متأكدة إن أبوه يدري)...قال إيه أنا أدري..(وبصراحه أبوه عصب وزعل من زوجي وقام يسبه يقول هذا موصاحي وأنا بتفاهم معه وأنا خالك والحين بتصل عليه وكيف طلقك بالجوال)..قلت إيه لكن أنا مومتصله أستنجد إنك ترجعه لي ..أنا أبيك تكلمه يرسل ورقتي ويريحني...
طلعت لأمي وأبوي في الصاله..قلت:زوجي أرسل رسالة أنتي طالق... إنصدموا وجالسين يطالعون فيني ولا واحد فيهم سأل أي شئ بالذات أبوي..لأني أمثل قدامهم الزوجة السعيدة ولاعمري شكيت لأبوي ولاعمرهم حسوا بشئ رغم إن الناس الثانية ملاحظين إني تغيرت..جدتي كانت دايم تقول ليش شنتي بعد الزواج ليش دايم شكلك تعبانه؟..
ناظرت في أبوي ..قلت بعصبية وأحاول أمسك نفسي عشان ماأبكي..أنا أصلا مومرتاحه معه..وأكرهه أكرهه أكرهه
ماأدري ليش كأني جالسه أبرر طلاقي وهوأصلا موبيدي ولاذنبي..أوكأني أخفي إنكساري بأني أصلا أنا مابيه وأخفي الحقيقة إني أحبه وهواللي كسرني.....جلست عندهم أنتظر أحد يسألني أوبالأصح أنتظر أبوي يسألني...ولاأحد تكلم جالسين يطالعون فيني بهدؤ!!...(الأربعاء هوأيضا يوم زيارة أمي لجدتي..يعني متعودين أمي وخالاتي وإحنا البنات نتجمع عند جدتي)....وقفت قلت..يمه بروح معك....وطلعنا ولاأدري ليش حتى مابكيت...وفي السيارة أفكر وين راحت الدموع والله مومصدقة إني مابكيت!!....رحنا لجدتي كنت أبين إني طبيعية وأحاول أبين السعادة لأني بغنى عن أي سؤال..
رجعنا للبيت في وقت متأخر...لقينا أبوي صاحي ولانام..مومن عادته!!..شايل هموم الدنيا وجهه متغير..سألني وش السالفة ..طلاق؟!!..عمرك ماشكيتي منه؟!!...الموضوع يمكن تافه؟!!..وش اللي صار بينكم؟!!...قلت له عن المشكلة الأخيرة ..طبعا فشله وإحرااج ماأقدر أقول لأبوي إني طلبت من زوجي إنه يضمني وشبت الحريقة ..قلت له إن زوجي يتكلم فيني عند أخته والكلام وصلني ..عاتبته ليش يتكلم فيني..وصار دايم يسأل من اللي قال لك؟..و..و..
طبعا زوجي في البداية ماسأل لكن بعدين صار يسأل لأنه بإختصار أكيد سأل أخته..وأخته إنجنت تبي تعرف من اللي وصلني الكلام...وشاده حيلها في زوجي سببت له ضغوطات...هودايم عنده رعب دايم براسه قبل أي شئ يسويه لي سؤال (وش بيقولون أهلي عني؟) خايف إنهم يقولون ماقدر على زوجته ويبي يوري أخته بطولته!!!..عجبا للعقول الصغيرة!!
أو إنه قال الكلام عند أحد ثاني غير أخته وبيشوف هل هو اللي طلع الكلام؟!!..طبعا أكيد تسألون من يكون ؟..تدرون توقعاتي وإستنتجت من أسلوبه لأنه مرة صرخ قال أبي أعرف من قال لك أنا قلت لأختي ولناس ثانين؟؟!!!
الناس الثانين مين؟!..أنا أتوقع إنه يكلم وحده من قريباته يعني من ضمن البنات اللي يكلمهم ويسوي نفسه أنه مومرتاح معي عشان كذا هي الحبيبة وزوجته ولاشئ....لأن ماعنده غير أخته وأمه أحد..علاقته سطحية جدا مع قريباته..وأذكر مرة في بداية زواجنا نبهني إني مهما أشوف من بنات(...) فلازم أكون واثقة من زوجي ولاعلي منهم؟؟؟!!...
....مر إسبوع لاإتصل ولاأرسل..طبعا ماأقدر أوصف لكم حالي..كنت أعاني يوم يبتعد عني يومين فما بالكم أسبوووع وصدقوني ماأعرف أقول كل اللي عندي متضااايقة منه مرررة...وبنفس الوقت أبغاه!!
بعد أسبوع أتصل أبوي عليه قال له:تعال بنتفاهم...
أبوي يقول بسمع شكواه منك ..وبحل الموضوع بينكم...وطلبني أجهز القهوة...وفعلا جلس الوالد ينتظرة..وحلف على أخوي الكبير إنه يطلع من البيت لأن أخوي جالس على نار ومعصب يقول أنا بكسر له يده ليش يمدها على زوجته ليش؟وين عايش هذا؟بأي عصر .مافيه زوج يضرب زوجته ......وفعلا طلع أخوي الكبير...والباقين جالسين وبرضو أبوي نبه عليهم مايجون
...جاء زوجي ..وفتح له أبوي الباب...وش تتوقعون صار؟..
الأخ دخل بدون مايسلم على أبوي يعني مر من عنده ودرعم للملحق ودخل وجلس...وأبوي ساكت ودخل وراه..
والله لايوريكم والله ياناس إحنا داخل في البيت والملحق برا وبعيد عنا ومع ذلك نسمع صراخ زوجي..جالس يتكلم مع أبوي بصراخ وأبوي مانسمع له صوت ولاأحد يظن إن أبوي غلط عليه بالعكس أنا متأكدة من أسلوب أبوي وطريقة كلامة وزوجي عارف أبوي زييين......أمي تناظر فيني مومصدقه...قلت لاتستغربين ترى أسلوبه معي كذا...
أخوي الصغير 20سنه إنجن وراح يركض.

دخل عليهم في الملحق ..صرخ على زوجي :لاترفع صوتك على أبوي..
(أنا وأمي واقفين بعييييد نناظر لباب الملحق)..شفنا أبوي دف أخوي برا الملحق ويصارخ على أخوي يبيه يسكت
صرخ أخوي:لاااا ليش يرفع صوته عليك هومايرضى إن أحد يرفع صوته على أبوه..وبسرعه أبوي ضرب أخوي كف على وجهه وسكر باب الملحق بوجه أخوي!!....وهذي أول مرة يمد أبوي يده على واحد منا!!...
أنا خلاص حسيت إني إنقتلت..أخواني اللي أكبر مني واللي أصغر مني يخافون علي من نسمة الهواء يحترموني لدرجة كبيرة...حسيت إني أنا اللي إنضربت وموأي ضربة....
أخوي ماأرتاح وجاء أخوي الثاني ورايحين جايين عند الباب يبغون يدخلون وخايفين أبوي يطردهم...وبعد شوي دخلوا ..
وأخوي الكبير جاء وبرضو دخل..ومانسمع غير صوت زوجي...
وناداني أبوي ودخلت عندهم...والله والله والله النقاش كان كأنه نقاش أطفال صاير بينهم زعل على قطعة حلوى
المصيبة إنه قال لأبوي وأخواني بنتكم يوم خلصنا وتسبحنا جلست تبكي تقول ليش ماتضمني وأنا كنت في نفس اليوم العصر ضميتها!!.....أنا خلاص تمنيت الأرض تبلعني...حسبنا الله ونعم الوكيل...حتى إخواني أصغر منه إنقدوا عليه
وقال ليش في الليل مرتين نامت ماغسلت أوانيها..قلت لأبوي هي خلال 9شهور مرة كنت تعبانه ومرة كانت فيه بس سكينه مادخلتها في مكانها وكان فيه صحن صغير ماغسلته!!...قال زوجي مالي دخل أنا أنسان نظيف وأحب الترتيب!!
قال أخوي(اللي إنضرب):لوكل زوج بيطلق زوجته عشان سكين مغسوله بس ماإنحطت في مكانها كان ماجلس أحد متزوج كل الناس بتطلق..قال:مالي دخل !!
وقال:انا سمحت لها تطبخ فوق وكنت وعدتها أشري ثلاجة بعد6شهور مدري 8شهور وماااااافيه ثلاجة!!
قال أبوي يمكن زعلك عشانها تطبخ فوق؟!..
وقال:ليش بنتكم تشين سمعتي عند قرابتي وتقول إنها ميتة جوع عندي!!
طبعا قرابته (عماته)وياكثر مشاكلهم بينهم وبين أم زوجي وأخته..ناس أعوذ بالله..الحريم أعوذبالله والرجاجيل كل واحد يامع أمه يامع زوجته!!...طبعاأناأذكر إن وحدة من عماته(وزوجي في بداية زواجنا قال ترى عمتي سبب بطلاق ولد عمي لزوجته!!)(ولد عمه كان متزوج وحده تقرب لي جميييلة وتركها عندأهلها إلين ولدت وبعدها طلقها والكل يتكلم إن سبب طلاقه أمه...الظاهر بعد عمته لها دخل بالموضوع) المهم وحدة من عماته سألتني ليش صرتي تطبخين فوق ليش هم مقصرين معك؟..قلت لاماقصروا بس أنا أستحي وماآخذ راحتي بالأكل..قالت:أصلا معروفه عن زوجة أخوي ماتحط إلا إنتيفات ..وتسكر الموضوع!!
طبعا اللي نقل الموضوع لزوجي أمه وكبرتها براسه...والدليل إني طيبة معهم وآخر ليلة قضيتها مع بناتها وآخر إسبوع كانت بيننا جلسات كثيرة....لكن للأسف زادت النار حطب...
وقال:ليش تحلف أمي!!..طبعا سالفة الحلف هي إختلقتها..والسالفه هذي من شهووور أيام كنت زعلانه عشان الطبخ.. حسبنا الله ونعم الوكيل فيها..حلفت قدام أبوي وزوجي وأخواني..لكن شكله ماصدقني....أبوي صدقني لأنه عارفني..
أبوي قال لزوجي أنت وش عليك من كلام الحريم ..والرجال مايدخل أمه وأخته بحياته..طبعا زوجي جالس بس يصارخ..
يعني هذي شكواه مني..
في النهاية وقف ويصارخ ..قال لأبوي:خل بنتك تنطق عندك!...وطلع..
أبوي إتصل على أبوه وقال له عن اللي صار..أبوه قال ماعليه الحين نفسيته تعبانه..و..و...
أبوي كان مررة معصب...وقال زوجك كان يستاهل ينضرب أو أبصق على وجهه على أسلوبه وصراخه لكن ماحبيت أسوي كذا خفت إن في نفسك شئ إتجاهه(يقصد إني أحبه)وبكرة تقولين أبوي سبب بحرماني منه..
أنا بعد ماطلع رحت لغرفتي ناظرت في جوالي شفت صورته مسحتها ومسحت رقمه..فتحت الدرج وأخذت دفتر كنت أكتب فيه مشاعري إتجاهه في كل مرة أزور أهلي..قطعت الدفتر..وكنت أتمنى أني أبكي كعادتي كنت أبي أرتاح لكن ماقدرت كل شعوري كان الغضب....أخذت الفستان والشموع و..و..وبسرعه رميتهم وتخلصت منهم...أكثر شئ كنت أحسه ثقيل الوقت اللي أمي وأخوي اللي كان عارف بموضوع الشالية يكلموني ..كنت أهرب موقادره أحط عيوني بعيونهم أحس إنهم الوحيدين اللي عارفين إني مكسورة مهزومه..مجروحه..ضعيفة......

دخلت في حالة حزن...أنا نفرت منه ويمكن صحيت بوقت متأخر!!..لكن أعاني من بعدة فيني شي بداخلي يقول إنه طيب..والشئ الثاني يقول:ياغبية بعد كل هذا تفكرين فيه؟!!..خيانته أكثر شئ أتعبتني وملازمه لتفكيري حتى ذاك اليوم اللي أخذ فيه اللاب توب ونزلت لبيت أهلي أتخيل إنه بيروح يقابل وحدة ويقدمه لها هدية..إلى الآن أفكر لييييه عاملني كذا؟!...كلامه فيني عند أخته ومن أول شهر سببت لي جرح عميييق بنفسي ماأظن راح أنساه حتى لوبيوم نسيت أيامي مع زوجي...
(طبعا نسيت أقول لكم إن زوجي يوم جانا رجعني لذمته)
تعبت من فراقه .. لكن بعدين جلست أفكر أقول ياربي كيف كنت متحمله العذاب لأني فعلا عند أهلي حسيييت براااحه عجيبه أثاريني كنت بضغط نفسي عجيب!!...ولا ليلة نسيته أحبه لكن كأنه مات ماله وجود عندي..إكتشفت إني مع العشرة معه تغيرت بدون ماأحس بنفسي أقصد دينيا..عند أهلي حسيت بطعم حلو على سجادتي وبسجودي من زمان ماشعرت فيه..يوم الجمعة قريت سورة الكهف يالله متى آخر جمعه قريت فيها سورة الكهف؟..طبعا مابي أظلم زوجي في الفترة الآخيرة كان يصلي الجمعه....أما أناأصلي وتفكيري محصور بزوجي كيف بيكون مزاجة..بروح ألبس قبل يجي ..بصلح قهوته لايعصب؟!!!!....ونسيييت أشياء كثيرة أهم...ظلمت نفسي والله ظلمت نفسي..
طبعا أمه نااوية شر..تتصل على أمي تقول بنتك ماتستحي يوم ولدي طلقها راحت تتصل على أبوه وتقول خل ولدك يطلقني لأني ماراح أحمل عنده!!!...طبعا أكيد زوجي مصدقها...أما أبوزوجي فأكيد ماكذب قال لزوجته الحقيقة لكن هي تألف وحتى لوأبوزوجي يسمع كذبتها مايقدر يقول شئ..هي الآمرة والناهية في حياتهم!!...
وبعدين إتصل أبو زوجي قال ليش بنتك تعلم بأسرار زوجها ليش تقول عند جدتها عن مشكلة الإنجاب اللي يعاني منها زوجها!!!(لأن زوجي يوم خبرني طلب مني ماأقول لأحد)وأنا ماقلت شئ ولاتكلمت فيه أبدا أبدا..أصلا ماأحد يدري إني عند أهلي ..يعني أقرب الناس لنا يظنون إنها زيارة عادية...ياربي العائلة هذي ماعندهم إلا(القيل والقال)!!...
أبو زوجي قال لصديقة عن مشكلة زوجي..وصديقة قال لجدتي عن المشكلة!!..طبعا صديقة من العائلة ولدخالته..
وياسلام..أم زوجي تتصل(أصدرت الحكم) وكلمت أمي:قالت إنه لازم أبوي يمر وياخذ أبو زوجي وياخذون صديقة ويروحون لجدتي......تدرون وش تقول؟؟؟؟؟.....تقول لازم فلان(أبوي) يظهر برائة بنته؟؟؟!!!!!.....كأنها تقول إذا أنا بريئة يعني موأنا اللي خبرت عن الموضوع فممكن أرجع لزوجي...وإذا ثبتت إدانتي فالحكم ممكن يكون قاسي!!
يعني الموضوع صار حركات حريم!..ومن المستحيلات إننا نقبل بقرار أم زوجي...مهما كان الثمن..هذا ليس من فعل الرجال
طبعا أبوي إنصدم ولا عطاهم بال...وتأكد إن زوجي وأبوه مالهم رأي ..وإن المشورة والقرار بيد المدام..
وخلاص زوجي تركني...ولاحاول يسأل عني...

أشكرك

أشكرك..أتمنى أسمع رأيك مجددا

شاكره مرورك