صباح الخيرات أختي ...

يعلم الله أني متأثرة لما حصل لك ، والحق أنه ليس منا من لم يخطئ ، ومن يتراجع عن خطئه ويعتذر ليس كمن يُصر ويدعي أن ما فعله هو الصواب ، وأنت اعتذرت في البدء واعتذرت مرارا ، وما فعله كان أكبر من حجم الموقف .

لذا أنا أؤيدك في الذهاب لبيت أهلك ، فالبعد أحيانا يحل الأمور ، ويحسسه بمقدار خطئه لاسيما موقفه مع والدته .

أسأل الله أن يرزقنا وإياك صباحًا طيبًا هانئًا .

حسبي الله ونعم الوكيل
لا استطيع قول اكثر من ذلك
تحملت وسكتت وجلست بالبيت انظف واطبخ
تنازلت عن كرامتي وتغاضيت عن الاهانات والبهذله
كنت ارد على نفسي بأني اشعلت الشراره الاولى
واقرأ ردودكم واصمت وألزم بيتي وألعب بنتي
استرخصت نفسي وهو بدا يسترخصني
اعتقد بنات الناس المحترمين تطلع من اول يوم
خصوصا ان لي اهل لايرضون لي الذل والاهانه
وكونه زوجي فعلى عيني وراسي لكنه طغى وتكبر
تذللت له واحنا مسافرين واعتذرت له
ولما رجعنا رجع بالشر معه
وامس مسوي ساكت عني عشان خاطر امه
وقال لي اياها بالحرف
وهي حتى قالت لي لاتخافي ابهديه
لكن هل انا فعلا شي تافه حتى تتوسط عنده؟
مو كافي البهذله اللي سواها معي؟
ما ادري ايش شعور العظمه اللي هو عايش فيه!!

الميزة الوحيدة لجلستي بالبيت بعد اللي صار
اني اثبت طيب اصلي واني تكتمت عن فضايحه
ولارحت اشكيه لاهلي زي معظم البنات
صبرت عليه بكل مافيني.. كل مافيني
واليوم ان شاء الله ابروح لاهلي بعد المغرب
واباخذ معي شنطه كبيره
تكفي اسبوع او اسبوعين
وانا راضيه باللي ربي كاتبه ان خير او شر

لو لاسمح الله وصلت للطلاق ابحاول اتقبل الوضع
لان الخيرة فيما اختاره الله بكل الاحوال

مزايا الانفصال عن زوجي:

ارتاح من ذنوب الاغاني اللي ماتوقف
يرفض تماما يقفلها وانا بالسياره معه
واحيانا حتى وقت الاذان يعاند فيها

ابصلي اذا طلعت برا البيت
لانه يرفض تماما اروح ادور مسجد
يقول جمعي صلاوتك بالبيت اذا رجعنا

ابرتاح من الكلام الوسخ اللي دايما يقوله
يعني اذا عصب من احد وانا بالسياره
يسبه بكلام شوارع ويقول اسم العورات مره عيييب
انا اسكت من هول الكلام القذر اللي يقوله
وهذا السبب من اسباب نفوري منه
علما بأني سبق وعاتبته وهو صار يعاند اكثر

من مزايا الانفصال اني ابرتاح من تلطيشه لي
وابرجع احس بجمالي وانوثتي واناقتي
لانه هز ثقتي بنفسي حسبي الله عليه
واقسم بالله انا يشبهوني بمغنيات وملكات جمال
لكن هو يحاول يحسسني بالنقص والدونية

من مزايا الانفصال اني ان شاء الله ابكمل عملي
بدون غيره منه وزعل عالفاضي والمليان
علما بأنه يغار جدا جدا من اي نجاح احققه
يعني لو يجيني خطاب شكر.. يبوز ويزعل يومين
وانا كنت اقول لنفسي اغلب الرجال كذا
مايحبون يشوفون زوجاتهم احسن منهم


انا جالسه اقنع نفسي واحاول اهديها
وللأمانه الشي الوحيد اللي بخسره هو بيتي
مملكتي اللي بنيتها وشكلتها من روحي وطاقتي
وابضطر اعيش بغرفه صغيره مع بنتي



حسبي الله ونعم الوكيل

اعذروني اذا ازعجتكم بمشكلتي
لكن انا اكتشفت انه اساسا ما نام في البيت!!
كنت احسبه نايم بالمجلس مثل امس!!
لاول مره يسويها بحياته طول 3 سنين زواج
ولا بلغني ولا شي تخيلوا !!

اخر شي بينا امس لما قلت لكم نظفت وسويت قهوه
وهو تقهوى وقال يعطيك العافيه.. بصوت خشن
بعدين طلع ولاشفته!!

انا ميته قهر.. ليه ليه ليه
الى اخر لحظه جالس يسوي معي كذا
اللهم اجرني في مصيبتي واخلف لي خير منها

زوجك أتوقع لماح وذكي ..ضح؟

لما اعتذرتي خلال السفرة كان حاس وفاهم تماما أن اعتذارك مو ندم واحساس بأنك غلطتي ولا اعتذار لأنك قدرتي غضبه وما هان عليكي زعله ... اعتذرتي لأنك مو حابه السفره تخرب .. وهو فاهم هذا الشي تماما ولهذا ما شفعت لك دموعك ولا اعتذارك .
زوجك لو كارهك كان طلقك من زمان ... شو جابره بزوجة شايفه نفسها عليه بتفوقها وبأهلها وحتى بجمالها اللي مفروض أنه ميزة للزوج مو عليه .

كنت بقترح عليكِ اقتراح لكن أشوف أن نفسيتك وموقفك ما يسمحوا لك توافقي .
على الأقل افهمي نفسية زوجك وافهمي اللي صاير ببيتك مملكتك ... طبيعة العلاقة بينك وبين زوجك ممكن جدا تطور لخيانه لأن الرجل دائما يبحث عن أنثى تقدره وتحسه رجلها وتنظر له نظره احترام ونظرة اشتياق ... هو الى الان صابر وباقي على بيتكم حبا فيكِ ورغبة وأمل بأن ممكن تتحسن نظرتك له .
هذا الفوران والثورة اللي تشوفيها منه انما تعبير عن مشاعره هذي بالنقصان أمامك . لو انه مو متعلق فيكِ ما كان تحمل هذي المشاعر على أمل بأيام أفضل .

حبيبتي خلي نظرتك لبعيد وعالجي مشكلتكم الأساسية مو الموقف الحالي وبس ..
ولو بتروحي لأهلك روحي فترة راحة بدون ما تقولي لهم أو تشعريهم بشي ... قولي لهم بحالة تكوني قررت الطلاق فعلا وخلاص مو ناوي تحاولي تعالجي مشاكلك معاه .. لكن تقولي لأهلك وانتي ناوية تظلي زوجته فهذا مو من صالحك وبينعكس سلبا على جهودك للحل

__________________

كنافه اكثري استغفار ولا تروحي لاهلك

زوجش صفاته مقاربه كثير من صفات اخوي بس اخوي تغير مع الوقت كان ما محصل الاحتواء ومو محصل العلاقه الحميمه مع مرته ويطلع حرته بالسب والسواقه المتهوره بس حرام فيه صفات حلوه انتي تذكرتي سلبياته راجعي ايجابياته بعد والطلاق موب حل ممكن تتزوجين بعده رجل هادي بس مقصر في بيته يعني امسك مجنونك ليجي الي اجن منه فكري على الاقل ببنتش بعدين ليش تقولين انش تحسين نفسش تافه لمى امه تدخلت وهدته امه ادرى بطبعه وعارفه كيف تحتويه ويا ليت تقعدين وياها وتتعرفين على طبع زوجش من خلالها شكلش بعددش ما عرفتي مفاتيحه ولا عرفتي طبعه وبعد تشوفين مزايا الطلاق ادخلي قسم المطلقات وانتي تعرفين الحقيقه يا اختي انتي جربتي في مشاكلش السابقه تدخلين اهلش هالمره اضغطي على نفسش واقعدي في بيتش والله بيستغرب وبيحتار وبعد هو بيتنازل ويعتذرلش بس انتي جربي حتى تعرفين شو الوضع الي يناسب زوجسش وكيفيه التصرف موب كل مره تهربين وتدخلين اهلش انضجي والله يهدي سركم

اخوي أنا اشوف ردودك واحس بنضجك ورجاحه عقلك
لكن مالاحظت من كلامي ان زوجي سيء الخلق والطباع؟

يعني يحاول تدميري ويقلل احترامي قدام اهله والناس
وفوق هذا تقول انه ممكن ينصرف عني ويخوني
يعني تقبلي للبهذله هو اللي بيكبرني بعينه؟ ما اعتقد
بدليل تصرفاته الاخيره
علما بأني اول مره امارس هذا الصمت ولاول مره تكون المشكلك بهذه الضخامه والتصعيد من ناحيته

دائما اسمع ان الرجال يرخص المرأة اللي ترخص نفسها
وهذا بديت احسه الان

اما اني اشوف نفسي عليه.. لا والله ابدا
لكن هذا ردا على تحطيمه لي بالكلام
هو اللي يدوس علي بالكلام ويحاول يحسسني بالدونيه
بينما انا احاول احس بمكتسباتي حتى ما انهار تماما


والله اني تعبانه من حياتي كلها

لا زال تفكيرك الى الان متمحور حواليكي ... هو يسوي هذا لأنه هو مقهور ولأنه هو محبط ولأنه هو حيران مو متقصدك أنتي ولا جالس يخطط كيف يقهرك

تقولي قالها بصوت خشن ... متخيله الصوت أنا ... صوت طالع من داخله ويمثل شعوره .. ما حسيتي بغصته وهو يكلمك ؟؟؟؟

__________________

انا امرأة حبيبتي وعانيت مع زوجي بحياتي وتعلمت كثير ... أحس فيكي صدقيني .. وأعرف كيف كلمة الرجل تحطم النفسية والثقة بالنفس .. وعاذرتك والله ... لكن أحس فيكِ عقل كبير وتقدري تفهميني ولهذا مو قاعدة أطبطب عليكي .... أحذرك من حاجات عشتها وشفتها وفهمت نواحي معينة بزوجي متأخره ولهذا احاول أجنبك اياها .
دائما يقولوا أن نجاح البيت والعيله من فشله متوقف على المرأة .. وأنا أقول متوقف على المرأة العاقلة الحكيمة اللي قلبها كبير

__________________