فيه اخر شي بالحكاية هذه

موضوع البار و البنات الي قاله زوج صحبتي
و رد زوجي ايش كان ليا..

كملي روح
بس صدقيني
مستحيييييييييييييييل يكون عنده علاقات ويشرب ما تحسين
ياروح احنا اذا اخوانا الرجال يغلطوا نقدر نعرف ونحس باحساس الانثى ..
ف كيف لو ازواجنا ؟
يا ستي انا مرة شفت قريب لي في بيت اهلي وكنت صغيرة ما اتجاوز المرحلة المتوسطة
وعرفت انه شارب من عيونه وثقل راسه بالاستيعاب
مع انه ما وصل مرحلة انه يفقد توازنه في المشي
بس عرفت من شكله مو طبيعي
وهذا الرجل أشوفه بين فترات متباعدة جدا
تخيلي عاد لو زوجك

__________________
الحمدلله الذي بنعمته تتم الصالحات

فاكهة

ايش يدريني ؟
انا قلت كذا .. بس يقولولي الي يشرب مو لازم يبان عليه ..
و هذه صحبتي الي تحب القرقرة.. تقول الي يشرب مرات يجي البيت
عادي مافيه شي و مبسوط و فرحان يكون

بس الحق .. ما عمره عدى يوم و شفته مو بعقله او دايخ مثل مايقولوا
بس كيف كذا يتبلوا عليه ؟

و ما عمري دقيت عليه و ما رد او ما كان بعقله لا سمح الله

حجته .. انه شاف زوجي يطلب شراب لونه اصفر
و زوجته قلتلها بايسون

تقول يعني برأيك ياعصامية زوجي اهبل ما يعرف البايسون ؟

طيب هما يقولوا وقت ما تجمعوا مع الخمس سعوديين
طيب زوجي ماراح تجيه الجرأة انه يطلب قدام 5 سعوديين و زوج صحبتي ؟
و سعوديين اول مرة يقابلهم و كلهم يطلبوا شاي و هو يطلب ويسكي لاسمح الله

زوجي و اعرفه مايشرب قهوة و لاشاي
يشرب يا كولا او بيبسي

.
.

المهم

زوجي يقول شافوني اروح صالة ألبلياردو .. و في الصالة فيه اكيد
ناس يطلبوا الشراب هذا
مثل ما كل المطاعم برة .. فيه ناس تطلبه

فقالوا عني كذا ..

اكمل بعد شوي عن كلامه عن البار و الكلوب ..
.
.

بس حابة أضيف شي للامانة

زوجي ماعمره نام برة البيت

كانوا برة السعوديين يتجمعوا يوم الجمعة مع بعض .. مع الغربة و الطفش
عشان السبت و الاحد ويك اند كان
و السعوديين اغلبهم كانوا الجمعة يتجمعوا و يسهروا

فزوجي اول مرة كذا بدأ ..
كل جمعة و شوي صارت اغلب الايام

و اليوم الي غاب فيه ليلتين

الصراحة ..
انا وقتها خلاص ماتحملت كل شي علي و فوق راسي و هو مو داري عننا
بحجة انه ماله دخل بالولد
و انا و هو قبل لا يجي ولدي كان اغلب اكلنا برة و ماكنا متعودين نقضي للبيت
فما كان متعود

و مرة من المرات خلاص تعبت .. و رجع زوجي قبل الفجر بساعتين ..
قلت له اطلع برة.. و أصريت انه يطلع و كنت ابكي لاني تعبت خلاص من كل المحاولات

يعني مو هو الي خرج من حاله

انا الصراحة قلت له يخرج
و خرج وقتها قبل الفجر و تاني يوم راح عند صاحبه

صاحبه قال له الصراحة انت مرة زودتها و عاتبه و عطاه كم كلمة عن انه زود السهر
بس كان مقفل جواله زعلان
و نام عند صاحبه و رجع تاني يوم

رجع و يتأسف انه غلطان في كثرة سهره و انه خلاص بيتعدل و بدأ ينظم سهره شوي
سالته فين نمت ؟
قال عند صاحبي فلان عشان زوجته بالسعودية

و اول يوم يقول راح المسجد صلى الفجر و بعدين بعد ماطلعت الشمس راح عند صاحبه
و صاحبه عاتبه و قال له انت الغلطان و المفروض تقلل من ساعات سهرك و ماحد يعمل مثلك

بس حبيت اوضح للامانة

و صرت عصبية الفترة هذيك بعد ما صارت مواقف كثيرة تكشفت عيوبه
كنت افكر انفصل عنه و خلاص كنت ماني متحملته

لازم اخرج دحين

فترة ما بديت أشد شوي.. بدأ يتعدل و يرجع كويس مثل أيام الملكة

يعني بداية الغربة كنت مرة معاه تمام و بداية الزواج كمان
بدأ هو يطنشني و يتغير و كذا

رجعت احاول ارجع لنفسي و استرد قوتي و ثقتي و استقل بنفسي
و اعطيت لنفسي دروس بالحياة وقتها و هي نفس الفترة الي صارت
الاحداث هذه .. و بدأ يتعدل لما شافني قوية بموقفي

اخدت دروس لنفسي.. مشيت عليها الى الان

بس خلاص باكتب عن البار و الكلوب

طبعاً الدروس اللي أخدتها وقتها ،، فترة ما كثر اهماله و سهره .. و كنت تعلقت فيه و هو يطنش ..
كنت بجد تعبانة تعبانة ..

- أول شي ، قلت بأعتبره ( ميت ) خلاص .. و اعتبر نفسي ( منفصلة عنه ) .. عشان لا أفكر فيه بإستمرار ..
- أحاول ما أكون واضحة تماماً و لا أكون دفتر مفتوح أمامه .. و أكون غامضة ..
- أبدأ استقل عنه ، و أنا كمان ارسم حياتي في بريطانيا و أعيش حياتي .. مو شرط معاه أروح أي مكان ..
- ادلع حالي و مالي دخل فيه ..

أخوي الكبير قال لي شي ،، الصراحة ( تفكير أخوي الكبير كان خبيث شوي ، بس ذكي الصراحة و هو الصح ) ..
ما كنت أحكي لأهلي عن اللي صار أبدا ،، بس كنت أبكي و أقول لأمي ( تعبانة و ما أبغاه ) .. و ابكيييييييييي ..

أخوي الكبير قال لي ..
- مثل ما جبتيه معاك بالغربة و التحق للبعثة و بدأ يستغني ، فإنت خليك أذكى منه .. و لو نويتي تتركيه ..
خليه يرجع ( بخفي حنين ) و مثل ما كان .. و لا تكوني غبية ، خليك أذكى منه ..

لإنه زوجي الفترة هذيك كان يقول ( تبغي ترجعي ارجعي ، خلاص أنا مبتعث و بأجلس هنا )
بس بعدين عرفت إني لو رجعت ، هو بيرجع معاي غصب عنه .. و كان يضحك عالملحقية كمان ..
ما يروح الجامعة و يكذب عالمشرفين ..

قلت بداخلي ( تعليقاً على كلام أخوي ) ،، بس حراااااااااااااااام ما أقدر .. و ما يصير أأذيه ووو إلخ ..
و حزنت و رفضت الفكرة .. بس طلع تفكير أخوي ( هو الصح ) ..

.
.

بس بعدها تغيرت بجد .. و قبل لا زوج صحبتي يتكلم بفترة ..

و صرت بدل ما كنت أفكر بمصلحته و بدراسته قبل مصلحتي ووو إلخ ..
تعلمت أفكر ( بنفسي قبل ما أفكر به .. و أفكر بمصلحة نفسي و ولدي ) ..

تعلمت ما أكون ( أنا و هو واحد ) ..
لا .. أنا أول ،، ثم هو ..

تعلمت أطلع كل شي ( من عيونه ) ..

تعلمت ( ما ارحمه ) ..

تعلمت إني ادعس على قلبي ، و اهتم بشهادتي أهم شي .. و احصل عليها بأي طريقة ..
و انسى كل شي بس عشان أقدر أمشي و اهتم بدراستي ..

تعلمت أخليه يرجع ( للصفر ) ..

تعلمت إني ( أطلب منه يقدم لنا كل شي ) ..

نويت إني أبدأ أتغير و اتعلم ( التطنيش ) ،، لإنه صحتي أهم شي ..

.
.

سامحوني .. لإني صريحة ..
بس مع كذا ، كنت ارحمه و أوقف معاه ..
بس ( بعقل ) و تفكير ..

بس بعد ما أفكر مليون مرة ..

زوجي كان تعليقه على موضوع ( البار ) ..

إنه كان دايما يروح للبلياردو و يلعب هناك .. و البلياردو برة يكتبوا عالمدخل ..
Snooker Club
Snooker Bar

فزوجي قال لي ..
إنه السعوديين وقت كان يقول لهم تعالوا معايا نلعب ( بلياردوا ) ..
كانوا مجرد ما يقرأوا عالمدخل
Snooker Club

يحسبوا ( كلوب ) يعني ملهى أو نادي ليلي ..
بس هو معناه ( نادي البلياردو ) ..

و هو زوجي مدمن الصراحة للعبة هذه ،، بس كان يخبي علي ،.
عشان لا أقول له ( فيه حريم بالصالة ؟ ليه طيب ما تدور شغل ؟ ليه طيب ما تروح المعهد أو الجامعة ؟ ... إلخ )

هو يكره أي شخص يمنعه عن البلياردو ..
أهله كل يوم و إلى الآن ،، يخاصموه إذا راح لعب البلياردو ..
فصار ماخد موضوع البلياردو ( مسألة عناد و تحدي ) لهم .. و بدأ يعاملني مثل ما يعاملهم و يحسبني راح ( أحرم اللعبة ؟ )

.
.

أما البار ..

فقال لي ،، أي مكان فيه طاولة طويلة يجلسوا الناس قدامها و يطلبوا ويسكي ،، يسموا الطاولة ( Bar ) ..
و قال لي ، مثل المطعم اللي نروح له .. يكتبوا برة مثلا عالمدخل ..
Resturant & Bar
يعني مطعم و بار ،،

بس نحن مالنا دخل بالناس اللي يشربو ، نحن نروح و نتغدى أو نتعشى و خلاص نخرج ..
و أنا نفس الشي ، مالي دخل باللي يجوا يشربوا ..
أنا رايح ألعب ( هوايتي ) ، و اللي يشربوا أنا مالي دخل فيهم .. و كل واحد جايي و معاه صاحبته ..
و أنا مالي علاقة بهم .. أنا ليا بالطاولة حقتي و بس ..

.
.

حتى افتكر إني نزلت سؤال هنا بالمنتدى عن ( البلياردو ) قبل كم سنة ..
و ردت علي وحدة من الأخوات ، إنها مدمنة اللعبة هذه ..
و إنه الواحد إذا بيلعب البلياردو .. يكون تركيزه كله عاللعبة و بس ..
و الوقت يمشي من غير ما الواحد يحس .. ممكن تعدي 5 ساعات و الواحد ما حس بالوقت ..

فكان هدا كلام زوجي و تبريره ..

.
.

و أعترف بإنه غلطان ، لإنه ما كان أبدا يحكي لي أي شي .. و لا يقول لي فين رايح و لاشي .. و شخص صامت كان ..
و يقول ما كنت أعرف و لا أحد علمني ،، و كان في بيت أهله ما يتكلم أبدا و ما يقول لهم فين رايح و تعود كذا في بيت أهله

و وعدني إنه بيتغير و يصير يعطيني خبر عالأقل ، إنه بيتأخر مثلا أو بيغيب كم ساعة ..

لإني ما كنت أطلب منه ( تفاصيل و تحقيق ) فين راح و مع مين جلس ووو إلخ ..
بس يحسسني إني زوجته ، أسمع أخباره منه .. مو من زوجات أصحابه أعرف عنه كل شي ..

كنت أحسن معاملته ، بس اكتم بداخلي فكرة إني أحاول الإنفصال عنه - عاطفياً - ..
حتى لا أتعلق فيه .. لإني ما كنت قادرة أخذ أي قرار بالفترة هذيك ..

كل اللي كنت أقدر أعمله ، إني مؤجلة التفكير بالحمل ..
لإني حاطة احتمالات و ماني عارفة ، الرجال هذا .. إيش نهايتي معاه ؟
كلها أفكار بداخلي ..

لكن ما كنت أقصر معاه أبدا بالتعامل و لا بالتمشيات و لا بالضحك و لا بشي ..
بس إني ما كنت أحاول أخليه ( كلّ حياتي ) ..

و هو الأفضل الصراحة ،، و ارتحت الصراحة بعدها ..
لإنه الرجل يحتاج لإمرأة لها شخصية و غامضة ،.

المهم ..

وعدني زوجي إنه ياخدني لصالة بلياردو عشان أشوف بنفسي الصالات اللي يقصدوها أصحابه ..
و يحسبوا إنها أماكن ( سيئة ) ..

بس علاقتنا ، اللي ما يختلف عليها اتنين ..
( كانت صداقة أكثر شي ) .. حتى أخواتي كانوا يقولولي إنت و زوجك علاقتكم حلوة ماشاء الله ( كأنكم أصحاب )

كنت أحب أضحك و نتمشى و كل يوم احكي له حكاوي عن الأحداث اللي تصير معايا ..
حتى مع الزعل و كذا ، كنت ارضى و أنسى بسرعة ..

بس هو اللي مو راضي يبطل كذب ، و يلعب بذيله .. و يخبي عني أشياء كل مرة ..
كل ما أكون كويسة معاه مررررررررة و أدلعه ، يقوم يستغل الفرصة عشان يكذب علي ..
أوكي ، أنا ما أحاسبه أو أعاقبه مثل أهله ..

بس ما كان راضي ( يعقل ) ..
مو شرط أمور لا سمح الله بطالة ، بس المهم يبغى يكذب ( أحسه مرض ) ..

.
.

و الدليل ، إنه دحين لما صار الموقف اللي من شهر ..
( و وقت تكلم و لأول مرة بصدق و صراحة ) ..
احترمت صراحته .. و هو ما توقع ردة فعلي ..

حتى بدأ دحين معايا بمبدأ الصدق ،، و بدأ حالياً ( يتكلم بصدق و ما يكذب )


.
.

حالياً ..

أنا جداً تغيرت عن الفترة هذيك ، و هو كمان ..
صرت أهدأ .. و هو العكس ..

كل واحد أحسه تأثر بالتاني ..

.
.

ما أعرف إيش ممكن نسيت أكتبه عن الموقف هذاك ؟؟؟

.
.

إيوة صح ، وقت ما صحبتي جلست تقول إنه ( زوج صحبتنا مستحيل يكذب ) ..
قلت لها ( هذا انسان كذاب ، تبلى علي و كذب على زوجي و قال كذا و كذا عني .. لو مو أنا .. كنت صدقت كلامه )

صحبتي صارت تدافع عن زوج صحبتنا ، و تقول ( لأ .. هو بس انفجع و ما توقع إنهم كذا يجوه بدا الوقت و يسألوه .. )

و بدأت تحط لزوج صحبتنا الأعذار ، و لزوجي التهم .. بإنه زوجي بينكر فعلته الشينة بالطريقة هذه

.
.

صحبتي اللي زوجها ( بطل الموضوع ) و هي معروفة بالعقل و الدين و الإتزان .. تقول أنا اللي أعرفه ..
إنه زوجي مرات كنت أسمعه يكلم زوجك بالجوال زمان .. بس ما أعرف إيش كان بينهم ؟؟؟ بس فيه شي ..
و تقول كمان .. إنها تعرف عن زوجها ، إنه من الناس اللي ما يقول شي .. إلا و يكون صح وصل له كلام أو سمعه ..

المهم ..
صارت صحبتي القرقارة .. تقول المصدر واحد مراهق عمره 18 سنة .. زوجك أول ما جا هنا ..
راح معاه لأماكن زي كذا .. و جاء الولد هذا و قال لنا ..

قلت لها مين الولد هذا ؟ رافضة تقول ..
بس تقول إنها متأكدة .. و المصدر الأساسي ما يبغوا يقولوا اسمه لإنهم وعدوه ..
و أنا أتوقع صحبتنا الثالثة .. بس هي كانت بعيدة عن القصة و لا دخلناها من البداية أبدا ..
بس هذا اللي فهمته منهم ..

.
.

هذا اللي افتكره ..

و بعده بشهر ، و بعد ما ننقل و نستقر ..
تجيني ضربة قوية كمان .. أقولها مو دحين ..

بعدين ..
و هي اللي بجد أحسها ( خربت حياتنا ) ..

و إن كنت بالظاهر ( أتظاهر بإنه كل شي تمام )

ما عندي شي أضيفه حالياً بخصوص الموضوع هذا ..

كانت عندي أنا كمان أغلاط ممكن ، بس كنت أحاول و أسعى إني أصلح كل مرة .. و أطور من نفسي ..
و إنه حياتنا تمشي كويس و ما تنهد لا سمح الله ..

و الدليل طلبي لمشورة الصائمة لله ببداية الغربة، لكن مجرد ما صارت الحكاية هذه ..
توقفت و ما كتبت شي .. انشغلت أنا بنفسي مع المشاكل هذه ..

و دحين أول مرة افتح الموضوع هذا ..

و اللي خلى الجرح ( مفتوح ) ..
إني غطيته غصب عني ، لإنه ما كان أمامي أي خيار ..

كانت عندي اختبارات نهائية ، و مرض أمي ، و أخوي و مسبب لي مشاكل هناك مع زوجته ..
فكان غصب عني وقتها ، إني ادفن الجرح .. و أتناساه ( غصب ) ..

بس جلس الموضوع هذا ينغصّ علي حياتي ..

دحين ماعندي شي أضيفه ..

.
.

أرغب بإغلاق هذا الموضوع بشكل نهائي ..
حابة أرتاح من الحكاية هذه .. لإنه مجرد ما يصير أي موقف ..
ارجع افتكر الحكاية هذه ، و تتأكد ( الشكوك ) ..

الحكاية هذه ( زلزلت ) كل شي بالفترة هذيك ..

.
.

خلال ما كنت أكتب الأحداث خلال الكم يوم هذول، زوجي كان يسعى لتغيير نفسه للأفضل و لإرضائي ..
حتى يقول لي يبغى يرجع ( يربي لحيته ) و يصلي ( إمام بالمسجد ) ..
و جالس يشجعني نروح نكمل دراستنا و إنه بيكمل معايا و يوقف معاي ..
( و يقول تعلم من أغلاطه و شاف كيف لما جاء هنا و تبهدل من غير شهادة و لا وظيفة )
يقول جلس مع نفسه يفكر و يسأل حاله و هو بالمسجد .. لمتى بتجلس كذا تضيع عمرك ؟
خلاص حافظ على أولادك و زوجتك و بيتك ..

قال لي أبغى أعيش معاكم سوا .. نربي الأولاد .. و من غير أي مشاكل ..
و نحل مشاكلنا أول بأول ..

و أبغى توعديني كل شي تقوليه لي أول بأول و أنا أوعدك ما أكذب من اليوم ..

يقول حاسبيني على أغلاطي من اليوم ..

و كل يوم يقول كلام كثير و وعود إني بأشوف كيف راح يعوضني عن الأيام اللي شفتها و ما راح أصدق إنه تغير ..
صار يتكلم الكلام اللي كنت أقوله له زمان ،،

أنا تغيرت كثير .. مرة صايرة هادية ..
و أعد للمية قبل لا أقول أي كلمة معاه أو مع أهله أو أهلي .. حتى صحباتي ..

.
.

فكرت اطلب منه الفجر اليوم ، أروح اصلي بالحرم ..
نفسي أزور قبر أمي ،. و اجلس لوحدي معاها بس كذا ..

( ما عندي إضافة )

بس أي ضربة أخيرة من زوجي أو من أهله لا سمح الله ،،
بتكون الأخيرة ..

و أنا محسسته إني رجعت الإنسانة اللي قبل و اللي عرفها أول مرة ..
لكن ما رجعت ( بغبائي السابق ) .. و بأخليه ( ينجنّ علي ) ..
بس أنا ( قلبي ما راح أخلي زوجي يمتلكه و لا غيره ) و إن كنت بالظاهر راح أظهر له كل الحب و العشق و الغرام .. إلخ

راح أحبه ( عشان نفسي و أولادي و اخرتي ) ..
بس ما راح أعلق نفسي به أبدا ..