اختي من كون ؟
شكراً جزيلاً على ردج
وبخصوص تحليلج للرساله وانه بغى يشوفها
بصراحه تحليلج منطقي وفكرت باللي قلتيه وهذا اللي اظنه

المهم انا مثل ماقلتي مستعده نفسياً لكل شي
ومستعينه بالله رب العالمين

اما انه زوجي محور حياتي
هو لابد اني افكر فيه وفي علاقتنا لما تصير بيننا مشكله
اما في ايامنا العاديه وامورنا مستقره عادي ما اخليه محور حياتي

يعني باختصار يوم اكون مرتاحه نفسياً
اطلع وانشغل واعيش حياتي
ويوم تصير معاي مشكله وياه
ما افكر فيه هو نفسه كثر ما افكر في مستقبلي وحياتي
لكن هالشي غلط التفكير ما يسوي شي والافضل انه الانسان يتوكل على الله ويشغل وقته


بخصوص المصارحه صح كلامج
فعلا مب كل شي المفروض الازواج يقولونه حق بعض
في اشياء اتمنى لو انه ما قالها لي .. سببت جرح واثر حزين بلا فائده

الله يكتب اللي فيه خير يزاج الله خير اختي

لاحول ولا قوة الا بالله

والله متضايقه وماعندي حد افضفض له

ريلي صار له كم يوم غايب بحكم انشغاله بموضوع معين
مايكفي غيابه برمضان والعيد

واليوم اكتشفت انه مسافر

هو خبرني قبل فتره انه احتمال يسافر بسبب شغله معينه ، لكن مب اكيد يسافر
يعني بين لي انه بيكنسل موضوع السفره حالياً
عقبها غاب عن البيت كم يوم يخلص شي معين
ولما اتصلت عليه اسأله متى يرجع البيت
ماعطاني وقت محدد لرجوعه
و ابدا ماحاسبته و حققت وياه ولا زعلت وصبرت

واليوم اكتشفت انه سافر للمكان اللي خبرني عنه عشان شغله

بس اللي حارق قلبي وقاهرني
لهذه الدرجه مالي اعتبار واهمية
عالاقل يخبرني انه مسافر
الحمدلله مب نوعيتي اللي اعصب واحاسب والله

يعني الحين هو مبين لي انه منشغل بموضوعه الثاني
وربط غيابه هذا مع سفرته

والله بموت من الحره
الحمدلله على كل حال

بس شو رايكم لما يرجع اكلمه ولا اسكت
اخلي الموضوع يطوف جني مادريت عن هذه السفره
ولا الافضل اتكلم

بتسافر الله يحفظك بس قولي مب عشان تاخذ رايي
بس عشان احس لي قدر ومكانه

صبر جميل والله المستعان

والله فكرة اني اروح المحكمه واطلب طلاق للضرر وايد تتردد على بالي

بس المشكله ماعرف كيف اتصرف
ولا ودي اتعب ابوي بروحه ريال كبير يبغي يرتاح

ماعرف ليش جي يسوي فيني

لا انه يطلق ولا هو يصلح العلاقه مابينا

الحين انتم ساكنين في نفس البيت. ؟ و الا كنتي عند اهلك؟؟
ومن يقوم بامورك انتي تسوقين ؟

ووين يبات يوم يغيب عن البيت هل في نفس المدينة او منشغل في مكان بعيد .. يمكن شغله هذا مسوي له هم كبير و متعب نفسيته لدرجة الانشغال .. خصوصا انك مستقلة وتديربن شؤونك بنفسك خصوصا اذا كنتي تقودين سيارة

معك حق تتضايقين ماراح اجاملك
وانت لك خيار الصبر و انك تدعين ربك يصلح شأنك لان كل شي بيد رب العاللمين ..

اختي استنكار

نحن ساكنين في نفس البيت
بس هو كثير التغيب عن البيت بسبب انشغاله واعماله

احب اوضح نقطه وبكتب بالرموز
نحن ساكنين في منطقه أ
وهو قبل كان ساكن ويا أهله في منطقة ب
تبعد عن منطقتي أ ساعتين بالسياره
وهناك موجود بيت ابوه

وعقب انتقلوا منطقة أ وخلاص استقروا فيها هو واهله وهني يشتغل و شروا بيت

لكن وجود بيت ثاني لابوه هناك في منطقة ب متعبني
فهو لازم كل ويك اند يروح هناك لانه مايصبر عن منطقته اللي تربى فيها
والمشكله الكبيره انه يرفض اروح وياه
دايما يقول عنده شغل وبينشغل ويا ربعه ومابيقدر يتفرغ لي


ف هو راح للمنطقة ب عشان شغل يخلصه هناك
ومن هناك سافر بدون ما ادري لانه بعيد ومافي تواصل

انا اسوق و اوصل نفسي بنفسي
بس اشغال البيت هو يسويها ويخلصها


والله يا اختي تعبت احس مافيني اتحمل زياده
الله المستعان
هالمره بصبر يرجع من السفر واشوف اخرتها
لانه فعلاً اذا ماتغير شي بطلب الطلاق

الله يعينك ولا حول ولا قوة إلا بالله.




الموضوع راجع لك وأتوقع إنه طلقك لكن يبغى يعلمك لما تنتهي العدة.

الله المستعان يا اختي

لا ما اظن انه طلقني
كيف يطلقني بدون مايلفظها
او بدون مايخبرني لا قول ولا كتابه
وكيف بيعرف انه عدتي خلصت

اشكرج اختي عالرد

قبل شوي اتصلت عليه
التلفون كان مغلق

بعدين طرشت له رساله
قلت له وينك ليش ماترد

بعدها بثواني يالي اتصال من رقم خارجي ( للبلد اللي سافر له )
ورديت وسويت روحي مصدومه ومادري انه مسافر

سلم علي وقال انه كان بيتصل لكن سفرته صارت فجأه وبسرعه وانضغط وقال كان المفروض اخبرج بس مداه يخبرني
وحاول يتصل فيني من تلفونه لكن كان فيه مشكله بالاتصال

الله يهديه دايما ويصلحه

{فلولآ أنه كان من المسبحين(143)للبث في بطنه إلى يوم يبعثون}

الله يصلح أمرك

__________________
اللهم صَل وسلم على نبينا محمد