ياليت تجيني ردود كثر المشاهدات محتاجه ارائكم خصوصا اللي مرو بنفس مشكلتني
احس اني ضايعه ماعرفت اتعامل مع هالمشكله

يا اختي انتي ماقلتي لنا كيف متأكده انه جوال زوجك وكيف اخذتي الرقم

عموماً انا حصل بيني وبين زوجتي سوء تفاهم في يوم من الأيام واحد من اصحابي حط جواله عندي بالشاحن وطلع بخلص مشاوير لأهله بهالفترة جات زوجتي للمجلس تنظف الحوسه شوي وتشيل القهوة وشافت الجوال تحسبه جوالي

وقلبت الدنيا وانا احاول اقناعها ولا ومافيه وقلت انتظري بيرجع الرجال ورفضت وحلفت يمين بالله لو ما افتحه لها الآن تشوف وش فيه ان ماتقعد بالبيت بعدها ولا دقيقة

والحمد الله اقنعتها تنتظر الى ماجا صديقي وانا ما اعرف رمز القفل واخذ جواله وصدقتني وخلال هالحوسه كلها بدت تشك اني منسق الموضوع مع صديقي

فأنصحك نصيحه كوني شديده وحازمه بهالموضوع واذا مافيه مجال للشك انه جوال زوجك واجهيه

وشئ طبيعي بيخفي الجوال تماما بما انه انكشف امره فكيف تتوقعين راح تواجهينه بدليل مفقود وختفي

خليك حازمه بهالموضوع والله زوجتي لو ماكانت حازمه هذاك اليوم كان طلعتها من المجلس وقلت مالك شغل جوال صاحبي وخلاص

بس مع جديتها وحزمها وان هالشئ خط احمر بعده فراق صرت بموقف ضعيف وصار لازم اثبت برائتي وافضل طريقة ننتظر الى مايجي الرجال وتراقب تحركاتي الجوال ماتمسكه ماتتصل علشان مايساعدك ويقول حقي وبكره يرجعه لك

الحزم ثم الحزم ثم الحزم اذا متأكدة من هالموضوع والله يازوجتي اول مره اشوفها بهالشكل هذاك اليوم تحولت الى وحش اكلتني بقشوري وانا مستسلم بلا حول ولا قوة من شدة الهجوم

^^^^^^^^^^



وشهد شاهد من أهلها ...الاخ (تحملتك كفايه) اعطاك كيف تتعاملي معاه اذا حاول يستهبل معاك...

الرجل يعرف إذا المرأه سهل ينضحك عليها ولا حازمه ولايمكن التساهل معاها....

لذلك أختي شوفي الانسب لك وامشي عليه...

لاتستسلمين وتضعفين وتعتذرين بلا ذنب من حركاته ترا اي خاين يحب الدفاع عن نفسه بطريقة الهجوم وقلب الطاوله عليك لانه مفتشل،،،استمري على زعلك واستياءك من فعله وكوني قويه بمواجهة الامر وكرهيه باللحظه اللي خانك فيها ..بنفس الوقت قومي بجميع واجباته عليك من طبخ وتنظيف وفراش..ولكن بيني له انو في شي انكسر بداخلك ..وتحاشيه هالفتره اجلسي بمكان ثاني غير اللي يجلس فيه والتهي بهواياتك او طقطقي بجوالك بعيد عنه بيني له نفورك منه ..واستمري ع هالحال لحد ماتحسي انه بدا ينجذب لك ويندم..

الجوال انا متأكده انه له ومتأكده بكذا طريقه ماحب اني اذكرها
وطبعا ارسلت ع جواله كﻻم كثير اني مارضى بالخيانه وماابيك وكنت جاده هو خاف وكسر الجوال بالدق مارديت جاء عند باب اهلي وخﻻني اطلع بالغصب
قال عطيني الرقم وعطيته قال هذا رقم صديقي وصديقي هذا راعي بنات قلت اذا حق صديقك ليه مارد علي
الرقم رقمك وحتى صورة العرض مثل صورتك بكل البرامج الثانيه
قال ان صديقي يدخل بحساباتي وهو اللي حط الصوره واحيانا يكلم البنات بحساباتي
طبعا كﻻمه مو مقنع ابدا واخذ يحلف اني غلطانه وانا متأكده مليون بالميه انه كذاب
وجلس عندي طول الوقت قال يﻻ راقبي ظهور صاحب الرقم متصل وانا عندك اتوقع ضبط السالفه مع صاحبه
سئمت من كذبه شايفه كل شي بعيني ومع هذا ينكر انكار شدييييد
تأكد انه اذا انعدم الخوف من الله اﻻنسان يسهل عليه كل شي خيانه كذب ووو
الله يعيني على ماابتليت فيه

حلو تصرفك انك خوفتيع انه ممكن يفقدك ....

اختمي الموضوع وقولي شوف والله اني ماني مرتاحه لكن تأكد انه ربي رح يكشفك بالدليل لو انك كاذب ووالله لو لقيت شي اتمنى مااشوفك الا بورقة طلاقي....

وانتي لاترضي بسهوله خليك ثقيله اقل شي شهر ...

ابفهم الي يخونو ليه يتزوجو ...يستمتعو بالحرام ويفكو بنات الحمايل من دنائتهم...

اختي قد صار لها نفسك
بس اختي ما قالت له ولا كلمته
خذت ارقم وعطته اخوي قالت له سالفه
وكلمه بس برقم الثاني وصار هو
فااختي جلست في بيت اهلي مده ست شهور يحاول معها
لازم جد تصرين قويه ليش يحط في ديره وهو في ديره
قولي اذا ما حطيت لي بيت انساني الي متى نجلس ولا عليك من اعذاره من ناحيه البيت لازم اهلك يتدخلون
الله يعينك

هل مازلتي في بيت أهلك ؟؟؟!!!
والا انتقلتي عنده

أولا" كل رجل عنده ماضي خذوها قاعده عشان ماتنصدمون
الا من رحم ربي وأنتي قلتي متزوجيين لكم ثلاث شهور
طيب ثلاث شهور مع سكنك في بيت والدك بضنك هل بينسى بها السهولة المكالمات مع البنات
وليه ما انتقلتي عنده أشوف أنك تسرعتي كثييييير
طالما انتي بعيدة عنه كيف تحاسبينه ليه ماقلتي له بعييش عندك
بعض الرجال يمكن يكون ماضي عنده ولسا ماتعود عليك يعني بالعقل فكري فيها انتي
في ثلاث شهور بيقدر يترك الماضي مع بعد زوجته له ماهي عايشه معاه
يعني كانه عزوبي ماكانه متزوج معليييش بس هذا الصدق
طبعن هذا غير الخوف من الله
اعرف لك وحده في بدايه زوجهم اكتشفت خيانه زوجها وشوي شوي قام هو يصرفهم لما استقر وجاه ولد

__________________
استغفر الله وأتوب إليه

والله العظيم كأنك تتكلمين عن قصتي مع زوجي
نفس التفاصيل ونفس المواجهه وكمان نفس العذر !
قال لي الرقم مع صديقي وهو اللي يستخدمه
انا كنت غبيه وخليت الموضوع يعدي بعد ما زعلت يومين
وحلف لي وحاول يراضيني وف الآخر رضيت
انتي اذا متأكده ميه بالميه ان الجوال له كوني حازمة وقوية في موقفك ولا تغلطين نفس غلطتي
انا صح رضيت بس حسيت اني غبيه وانه قدر يستغفلني
وصح ان الرقم الثاني صار يدخل الواتساب وهو عندي وجالس معي الا اني للحين اشك فيه وانه لو الغى هذا الرقم يقدر يطلع بداله الف رقم
انتي حلي المشكلة من جذورها عشان ما تجلسين تدورين في دوامات الشك مثلي
الله يعييينك يارب ويلهمك الصواب