رسالتك محزنة جدا بس احيي فيك صبرك وتحملك لها وانا رأيي قبل لا تهدم بيتكم ( ولو كان بيت حايس ومو نظيف
) انك تحاول تكسب فيها أجر - خاصة ان زوجتك واضح انها ترغب في اكمال حياتها معك وفيه قدر من المحبة لك في قلبها بدليل انها قعدت تصيح وتبكي لما حست مجرد احساس انك ممكن تتزوج واحدة ثانية ، انا انصحك نصيحة من قلب تجرب أحد هالحلول قبل لا تتخذ أي قرار مصيري :
- زوجتك كما اعتقد وانا مو دكتورة ولا أخصائية نفسية واضح جدا انها تحتاج لزيارتين واحدة لطبيب متخصص في الهرمونات والغدد عشان لخبطة الدورة ( واللي من اسباب تأخر الحمل على فكرة ) ، والثانية لأخصائي نفسي لعلاج مشكلة الوسواس القهري وعلى فكرة لازم يكون بالك طويل لأن العلاجين هذولا يبغالهم وقت طويل حتى تظهر نتائج ملموسة
- في نفس الوقت ابدأ بالتأثير عليها بجلسات من الحوار والنقاش الهاديء بكلمات حنونة كلها محبة وتقدير لها بخصوص مشكلة النظافة والاهمال - والطبخ اليومي المنظم - وعدم التأخير واحترام الموعد ، قل لها لو صار عندنا عيال كيف بنربيهم ؟؟ بهالطريقة الفوضوية ؟؟ بنأكلهم من المطاعم طول الوقت ؟؟ بنهمل ملابسهم ونظافتها ونظافتهم ؟؟؟ اسألها وش مشكلتها بالضبط ؟؟ بايش تحس ؟؟ وليش هالاهمال الشديد في كل مكان ؟؟ اطلب منها الحد الأدنى على الأقل من النظافة ....
- لو ما نفعت الطريقة السابقة ومالها تأثير جرب الاستعانة بأي أحد من أهلها ( الوالدة - أخ - أخت ) يكون قريب منها وله تأثير قوي عشان تحس ان الموضوع كبير لدرجة انك اشتكيت لشخص ثالث ....
- الصبر جميل خاصة انها طالبة وتدرس وممكن لما تتخرج تقول لها " انا صبرت عليك كثييير الين خلصتي دراستك وعطيتك فرصة والحين جا الوقت اللي تلتفتين لي شوي وتهتمين فيني والبيت هذا لو كنتي فعلا حريصة على استقرارنا وحياتنا الزوجية وتبين السعادة فيها وتجيبين العيال "
- شجعها على كل شي تسويه في البيت ولو كان بسيط ، حتى لو قصرت المدة اللي تقعدها في دورة المياه بـ 5 دقائق شجعها واظهر الفرحة والوناسة بهالانجاز اللي سوته ، أسلوب المكافأة جيد - لا تقول هذا أسلوب للأطفال - يعني ( كلمة حلوة / دعوة للعشاء في مطعم / هدية / وردة ) ممكن تفعل المعجزات، عشان تتشجع وتنجز اكثر واكثر بالمقابل ، ولا يكون تركيزك فقط على النواقص والعيوب وتكثر من انتقادها لأن كثرة الانتقاد هي أكثر شي يزعج الحرمة حتى لو كانت فعلا غلطانة لأنها بتحس انها مهما سوت ما راح ترضي بعلها المصون
- في النهاية لو صار كل هذا ومازالت الحال على وضعها تبدأ بتهديدها انك بتتخذ قرار الزواج وعليها ان تختارك انت أو حياتها الفوضوية الحالية .... وبلغ قرارك لأهلها