السلام عليكم ورحمة الله وبركاته

مشااااااااااااكل مشااااااااااااااكل مشااااااااااااااااكل
حياتي كلها مشاكل من تزوجت الى الان حتى بات من الروتين اليومي لحياتنا

انا صار لي 8 شهور متزوجه والان حامل بأول شهور لي
مشكلتنا ان نحن مو قادرين نتوصل لحل لمشاكلنا ودايما نسكر عالمشاكل
قبل ما نلاقي حل لها واعتقد هالشيء يخليني مثل اللي قاعد على فوهة بركان
ممكن ان ينفجر بأي وقت وعلى اي مشكله نطلع الجديد والقديم .....

بداية زواجي كانت مشاكلنا ماديه لاني ما تعودت اعيش بمستوى يحدد فيه مدى الانفاق
ادري هالشيء عادي لاننا ببداية حياة جديدة وان الزوج ما راح يقدر يصرف علي مثل اهلي
اللي كنا نصرف بلا حساب

المهم كنت احسه مو بس انسان حريص بل بخيل نوعا ما
ولما كان يمر بفترات شح ما كان يقول ما عندي كان يلف ويدور
المهم لما تجاوزنا هالشيء وصرنا صريحين مع بعض من بعد محاضرة من اهلي واهله
لاني كنت اكبر الموضوع واخلي السالفة توصل لاجتماعات عائلية لاني بصراحه
كنت اخجل او ما اتنزل اني افتح معه موضوع الفلوس

المهم صرنا نتبع قانون المصروف وانا بداية اعجبني لاني انا من اقترحته
وفعلا ارتحت من حرج الطلب منه بس الحين صار ما يكفيني
وصرت ما اقتنع بحججه لاني بديت افهمه وصرت اعرف صرفيته ومدخوله
يعني انا لما ابى يتحجج بألف عذر وعذر ويطول لين انسى
بس لما هو يبى لسوالفه مثل سيارة ولا يسلف ربيعه ولا سفره مفاجأه
سبحان الله الفلوس تطلع بقدرة القادر!!!!!
عشان جذي صرت ما اراعي ظروفه لاني صرت ما افرق بين الصدق والكذب

هذي احدى المشاكل..... ننتقل للي بعده ( ترى السالفه لها مغزى بالاخر تابعوا )

المشكله الثانيه انه من امارة وانا من امارة بس انا لما خذته كان صار له 3 سنين بامارتي
وهو يشتغل هنا ونحن وافقنا عليه على هالاساس عشان اكون قريبه من اهلي
المهم صار قانون انه كل اسبوع خميس وجمعه ينزل عند اهله
بدايه ما تقبلت الامر وكنت اخلق مشكله كل نهاية اسبوع الى ان رضخت للامر
الان هو يدرس بجامعه بامارته وكان الاتفاق انه يدرس كل خميس يعني بايام زيارته
بس بعدين صار لازم يروح الاربعاء والخميس وانا ما قلت شي وحبيت اشوف كيف بيحلها الحين
بس سكوتي خلاه يروح من الاربعاء الى الجمعه خليته اسبوعين بعدها فتحت معاه الموضوع
وقلت انت كنت تقولي بخلي لك الاربعاء كإجازة نهاية الاسبوع والان صار من ضمن شغلك
فلازم ترد يوم الخميس عشان تصير اجازة نهاية الاسبوع يوم الجمعة لي....
بتقولون لي هو عندك طول الاسبوع بس يا ناس طول هالاسبوع نحن بدوامات ومو فاضين لشيء
هو يكون تعبان طول الاسبوع ومرهق وماله خلق لاي شي
فمن حقي بنهاية اسبوع اقضي فيه مع زوجي بطلعه حلوه صح ولا لاء؟؟!!

كان المفروض نبأ من هالاسبوع بس الحبيب دق من اهناك يقول لي ان الدوام ارسله بدوره
لمده راح يعرفها يوم السبت بامارته هنا انفجر وما سكت عنه وقلت كلام يجرح وبالاصح قليل ادب
بس يستاهل وانا مو ندمانه على هالكلام....
راح اصرحكم بجزء من اللي دار..
هو: انا ببدأ دورة يوم السبت باماراتي يعني مو جاي هالاسبوع..!!!
انا: لين متى؟
هو: ما ادري..
انا: وانا؟!!
هو: شو انتي؟ روحي عند اهلك..
انا: اوكي مو مشكله روح وان شاء الله عمرك ما رديت انت اصلا واحد طرطور بالدوام مو محصلين واحد يمشونه على كيفهم غيرك
هو: مب جذي السالفه انهم يعرفون اني من هالامارة عشان جذي يرسلوني انا لانهم ما يوفرون سكن لنا...
انا: طز فيك وفالدوام وخله ينفعك دوامك اللي بـ(امارته) واللي بـ(امارته) اقصد اهله بهالشيء.. ويلا مع السلامه
هو: ........
انا: مع السلامه ابى اروح اصلي
هو: مع السلامه
بعدها ما اتصل فيني الى اليوم اللي هي ثاني يوم من الضرابه بس انا اعرف انه جذي ولا جذي راح يتصل

ننتقل لجزء آخر من المشاكل....

بتقولون لي دوامه وشو بيده يسوي بقولكم ان دوامه زفت وما راح ينفعنا للمستقبل خصوصا ان في بيبي فالدرب
قلت له مره يغير وظيفته لانه كراف عالفاضي والمعاش ما يساعد
غير جذي باماراتنا اغلب الوظايف الحكوميه توفر بدل سكن الا هالمكان...
والعالم تجي من آخر الدنيا عشان البدل مخلين اهلهم وعيالهم وهو مع زوجته ولا فكر يغير
علما انه هو نفسه يشتكي من دوامه
بتقولون مو سهل يحصل بس بقولكم اللي قاعد وحاط ايده على خده على امل توصله الوظيفه
تراى ما راح يوصل لشيء صح ولا لاء؟

ننتقل لمشكله اخرى .....

باختصار هو ولد امه ويخاف منها ومشاكلنا اسبوعيا توصلها وانا من النوع الكتوم اللي ما احب حد يدري عن خصوصياتي
حتى لو كنت رايحه الجمعيه ما ابى حد يدري واظن هذا من حقي....
المهم اعترف لي مرتين بعد ما تعمقنا بسوالفنا انه خبر امه عن بعض المشاكل اللي انا اشوفها شخصيه جدا
من هنا عرفت انه فتان ولما صارحته قالي تعلمت منك لانك انتي بعد توصلين لاهلك
هنا انصدمت ..!!!
لاني لما (كنت) افتن على قولته كنا ببداية حياتنا الزوجيه وما كان هو يفهمني ولا يسمع لي
كان غارق بمشاغله لين فهمه ابوي مره لما اشتكى له عن هالمشكله
وقاله لو انت جربت تسمع لها وتتفاهم معاها صدقني ما راح ادور حد غيرك تفضفض له
وفعلا هذا اللي صار وانا صرت ما اطلع سوالفنا لبرى بس هو مازال يفتن مو لاي حد بس لامه
ولما سألته ليش رد علي بكل بروح وحقاره لانها امي ولازم تعرف...!!! يا سلام..
بس السالفه اللي فجرتني هو خبر الحمل انا عرت قبل 3 ايام من يسافر لمكان (لمدة اسبوع)
المهم قلت له لا تخبر حد من اهلك لين ما نتأكد وهو ثاني يوم كان راح امارته ورد ولما سألته خبرت اهلك
قالي نعم..!!!
هنا الشياطين الحمر كلها نقزت جدامي وقلت له انك ولد امك وانك فتان وطلعت كل اللي بخاطري
وكانت ضرابه عوده...كل واحد جرح الثاني ...
تدرون شو رد علي لما سألته ليش استعجلت وخبرتها...
قال لام حد من اهلي يعرف لاني مسافر ويمكن يصير لي شي....... عذر اقبح من ويهه
رديت عليه ليش يعني لو مت هناك كنت بقولهم انا هذا مو لدكم وهذا ولد حرام مثلا..!!!!
يعني مو بذمتكم عذر بايخ ومومقنع..!!!؟؟!!

بخبركم نبذه عن حياة اهله عل وعسى يشفع لسلوكياته...
ابوه متزوج على امه لانه اراد يأدبها لانها طردت امه من البيت فهي صارت ما تعطيه حقوقه
ولا تبيه يصرف عليها فصارت تاخذ من عيالها وبطريقتها قدرت تكسب عيالها وتخليهم يشوفون
ان ابوهم غلطان وهي الصح لانه ظلمها بزواجه عليها متناسين الجرم الاكبر لها ...
المهم انا اعتقد ان اهمال زوجها لها بعد ما صارت تمنع حقوقه ولا تحترمه جدام العيال
صار عندها نقص وتحس انها مهمله لذا تحاول ان تخلي عيالها كلهم تحت امرتها
وانا اقول نعم الام اللي قدرت تخلي عيالها يسمعون كلامها
بس اي وحده تاخذ عيالها راح تحس ان هذي مو تربيه صحيحه هذي تسلط
لانها دايما تحاول ترضي نقصها باصدار اوامر على ابنها المتزوج الوحيد اللي هو زوجي علما انه الثاني من اخوانه
لتثبت انه الى الان تحت سيطرتها....
وانا تأكدت من هالشيء بأكثر من موقف

مع اني اهتم فيه وارعيه وادلعه لما نكون متصافين حتى احس انه مستانس انه حد يهتم فيه
لان ببيتهم محد يدري عن الثاني ولا حد يهتم له حتى وهو بعيد عنهم ما يتلهفون له
بس لازم يجي كل اسبوع ...!!!!!!

الان نجي لصلب الموضوع واللي اباكم تساعدوني فيه...

انا قررت اني اقطع اتصالي به وان ما اردله لين يصير اللي انا اباه..
لانه تعود يعيش بلا قيود وبحريه وبتساهل مني فصار انسان عديم المسؤوليه واظن اني ساعدته بهالشيء
لان البيت لازم يكون له قوانين تحكمه ولا صار فوضى صح ولا لاء؟

سابقا كنت ازعل واروح بيت اهلي ويظل يتصل فيني لين نتصالح وارد له
وكان زعلي يكون سهل وارضى بسرعه وارد له
بس هالمره قررت اني اراويه العين الحمرا لانه ما ينفع معاه الاسلوب المتساهل
واخاف يجي يوم ويصير زعلي عادي عنده وهذا ما لاحظته فالفتره الاخيره.. لانه بدأ يتعود عالمشاكل والزعل

فقررت اني اقطع عنه فتره يعني تقريبا اسبوعين لا اخليه يقدر يوصلني ولا يكلمني
وانا متأكده انه ما راح يسترجي يجي بيتنا ويدق يسأل عني خوفا اني افشله
عشان جذي راح اغلق موبايلي وهذي طريقة اتصاله الوحيده معي
وما راح استخدمه الا لما ابى انا اوصله عشان اوصله الفكره والطلبات

المهم بعد الانقطاع راح اقوله على شروطي للعوده وهالمره بجد وبدون تنازل مني
وهي:

- اولا يزيد لي المصروف لانه ما عاد يكفيني.
- من الساعه 8 ونص يكون بالبيت...
- لازم يرجع كل خميس من امارته..
- لازم يكون لي طلعه محترمه كل اسبوع او اسبوعين عالاقل..
- يوفر نت لي بالبيت..
- يوفر لي خادمه تجيني يوم بالاسبوع عشان تنظف لاني حامل وما اقدر على شغل البيت
- يحاول جديا البحث عن وظيفه جديده لاضمن مستقبل طفلي...
وغيرها راحت عن بالي الحين

وما راح ارد له لين يسوي لي كل اللي اباه واظن شرطي سهله وهي بالاحرى حقوق مو شروط
ولا شو رايكم؟؟؟!!

ادري طولت السالفه ومع ذلك احس اني ما وصلت كل اللي مفروض يوصلكم عشان تفهمون المشكله صح
عشان جذي راح يكون مستجدات بسياق المناقشه ان شاء الله

الله يخليكم لا تطنشوني لاني راح اتابعكم خصوصا اني حاليا بعز المشكله وانا جديا افكر
بالطلاق وهذا ثاني مره تجي على بالي وبجد هالمره
تستسهلون مشكلتي لانها اكبر من جيه وتحتاج صفحات لاعرضها بالتفصيل بس انا مو شاطره
بالتعبير ولا بايصال الفكره ....

انتظر ردودكم الله يخليكم..