ياحبيبي أقبل، وبعد فحط بالسيكل داخل القاعة، لا وأبشرك نصف البنات يبي يعجبون فيك، ويمكن يخطبونك بعد ، الزبدة توكل على الله واركب السيكل واتمشى، ولما توقف ابتسم وخذ الماكيرفون، وقل والله هذا تحدي من صديقي بيعطيني خمسين ألف ريال، وطلع لهم الخمسين، تبي تشوف الحريم كلها تصفق لك ، المهم انتبه لايلعب عليك، خل يعطيها أحد ثقة ولا حدى الحريم أول ماتوقف السيكل على جنب خلها تسلمك اياه

والله تصدق تحمست ودي أحظر عرسك

__________________
ياصبحِ لاتِقبل !!
عط الليل من وقتك..

من جد هاذا إللي فكرت فيه يوم قريت الموضوع والله من التميلح إللي بيصير بالقاعه

طيب معروف إن العريس مايدخل لحاله أكيد أبوها وأخوانها وأعمامها وأخوالها معك وش بتسوي!

تبي الجد الله يلعن الفلوس إللي تخلي الواحد مستعد يسوي أي شي عشانها

لاتفكر بنفسك وبس فكر ببنت الناس بأهلك وبأهلها هاذا إذا ماأشتغلت الجوالات تصوير وبكره ماندري إلا إنت باليوتيوب وهاتك ياتعليقات وسب ومسخره

مو أي تحدي تقبل فيه ولا هي رجوله على فكره ولا تدل على قوتك ولا غيره

أجل بكره لين قالوا لك طلقها ونتحداك ولك مبلغ وقدره بتسويها؟؟؟

بس زين أن أمك ركدتك إنتبه لنفسك الحين إنت متزوج ماعاد إنك عزابي حياتك إللي قبل إنساها

أي تصرف تسويه الحين يمس زوجتك كثر مايمسك

وألف مبروك الله يتمم زواجك على خير

ههههههه تخيلت شكلك والشماغ والبشت تتطاير وراك ..اذا سويتها وانت داخل شغل اغنيه هنديه (تيري ميري ميري تيري بريم كهاني هاي مشكل) وتوقف عند العروسه وتركب وراك ..الاااا حركة جميله ورومانسيه ...

اذا سويتها بليز اعزمني ...راح اضحك لمدة 10 سنين قدام

__________________


سبحانك اللهم وبحمدك، أشهد أن لا إله إلا أنت، أستغفرك وأتوب إليك

من شان 50 الف تخسر هيبتك
لكل مقام مقال
التحديات و حركات طيش بين اصحابك مو بين الحريم و حجات بعمر امك وجدتك والله لتقلب مسخرة
100 سنه لقدام
احفظ حالك خلي ليلة الزواج تكون راقية وخليك راقي مو معجوق ومهبول

__________________
سبحان الله والحمد لله ولا اله الا الله والله اكبر

اذا قرايبكم مو من النوع النقّاد والعروس ماعندها مشكلة ادعس بالسيكل لاتوقفك الا منصّة الرقص وحط الخمسين الف بجيبك .

انت الان بداية شبابك ومتحمس تسوي اي شي لكن بعد كم سنة لما تعقل شوي وتتزن الامور بنظرك

صدقني بتندم ....

حافظ على هيبتك

ههههههههههههههههههههه ذكرتني بها السالفة وهي قصه واقعية حصلت في ليلة الدخله..!! سأسردها لكم كما هي بالعامية
واحد مثلك شرواك ...
..........
وش اللي صار ليلة الدخلة؟؟؟
بعد ما دخل صاحبنا شقته مع زوجته وإذا بجواله يدق ويقوم خوينا يرد على الجوال ويدور الحوار التالي:
الزوج : ألووووو.
المتصل : السلام عليكم ورحمة الله وبركاته . كيف حالك يا (فلان) و ألف ألف مبروك .
الزوج : وعليكم السلام وينكم يا أنذال ما حضرتوا الحفل يا تعبانين. المتصل : والله تعطلت علينا السيارة في الخط وحنا جايين عندكم ووصلنا وسألنا عنك قالوا انك رحت مع المدام.وذلحين حنا راجعين الديرة.((طبعاً الديرة تبعد حوالي 300كم ))
الزوج : المهم تعشيتوا .
المتصل : لا والله.
الزوج : كم عددكم؟
المتصل : عشرة.
الزوج : أقولك (حرام طلاق عشاكم الليلة عندي) قل تم.
المتصل : يا ابن الحلال (غيير بدل).
الزوج : يالله أنا أنتظركم مع السلامه.

وقفل الخط. الزوجه المسكينه ميهي مصدقه اللي سواه زوجها ليلة الدخلة ثم قال يا فلانه أنا رايح السوق وراجع.===((على بالها بيجيب عشاء جاهز)) بعد ربع ساعه رجع الزوج ومعه أغراض العشاء .
قالت الزوجه وش ذا . قال الله يسلمك قومي سوي العشاء لزملاي في العمل جايين من بعيد ولا تعشوا . في أثناء الحوار. وإن الباب يدق ..
قال هم ذولا وصلوا يالله همه يامره. وراح عند ربعه يقهويهم. المهم المسكينه في المطبخ تقطع البصل و الطماط بفستان الزفاف وعيونها تدمع وتقول في نفسها ( بكره بأرجع عند أهلي من الفجر وأطلب الطلاق) المسكينه سوت العشاء وتعشوا وراحوا لديرتهم المسكينه متضايقه . و المفاجأة؟؟؟؟؟؟؟؟؟؟؟؟؟؟؟؟؟؟؟؟؟؟؟؟

أن زوجها يدخل عليها ويرمي لها بــ(50000)خمسين ألف قال هذا حقك قالت وشوا حقه قال الرهان اللي بيني وبين زملاي العشرة على كل واحد (5000) بأنك تطبخين ليلة الدخلة
وتمت ليلتهم على خير
لذا توكل على الله 50 الف ريال ما تحلم فيها لكن على العروس حتى لا تتفاجأ

وينك يابو سيكل؟

__________________
ياصبحِ لاتِقبل !!
عط الليل من وقتك..

و الله حرام عليكم

بالزور لين ما اقنعناه يشيل الفكرة من راسه، ترجعوا تزرعوها من جديد

اتقوا الله في عيلته
ترى رد فعل النسوان مو مثل رد فعل الرجال

الله يكون في عون اهله ادا هو و اخوه موانسين على هذول المقالب

معقوله بيصدق

__________________


سبحانك اللهم وبحمدك، أشهد أن لا إله إلا أنت، أستغفرك وأتوب إليك