السلام عليكم ورحمة الله وبركاته

والله الواحد مافي احد يشكيلو عن همو غيركم .. الموضوع دا اعتبروه فضفضة مع طلب مشورتكم
انا كتبت موضوعي قبل كدا .. وانقفل الموضوع ورجعت فتحتو تاني بس الاشراف قفلو
عالعموم انا قررت انفذ خطواتي بنفسي وقلت ان شاء الله ربنا بيكون معايا وبيساعدني

موضوعي كان باختصار اني احببت فتاة من 5 سنين .. وهي كانت تبادلني نفس الشعور .. كنا نتكلم دايما .. يوميا تقريبا .. وكنا مخططين اننا نكون لبعض من جد يعني مو بس لعب .. واتفقنا على هذا الشي .. ونيتنا كانت صافية .. وكنا عارفين حدودنا كويس .. وقلنا في حاجات ما نسويها عشان نعيشها بعدين لما نتزوج ..

صح ممكن تخالفوني اننا اساس علاقتنا كان غلط وكدا .. وانو ما كان علاقتنا شرعية .. بس احنا اثبتنا اننا نبغاها تكون صح .. لما رحت خطبتها من اهلها .. وعرف كل واحد فينا اننا من جد نحب بعض

5 سنين وخطبتها فالسنة الرابعة .. بداية الخطوبة كانت شي رائع نستني كل شي سار فالاربعة سنين الي كنا مع بعض فيها .. شفتها وشافتني وكانت احاسيس لا توصف .. كنا فرحانين من قلبنا

انا خطبتها سنة ليا دحين .. والملكة الزواج المفروض كان بعد 6 شهور كمان

مشاكلنا بدأت في الـ 3 أو 4 شهور الاولى من الخطوبة

مشكلتي بالتفصيل حتلاقوها فمواضيعي السابقة
بس حقولكم هيا باختصار .. مشكلتي معاها انها كانت ما تبادر .. وكانت تطنش

حاولت معاها .. دخلنا في مشاكل اعمق .. واتصالحنا .. ورجعت برضو تطنش ..
لما رجعت كلمتها تاني برضو اتزاعلنا .. بس دي المرة انا طنشت ..
وانا مو من عادتي اطنش لانو بالنسبالي مو حل أبدا .. وما احب اكون معلق كدا

المهم انا بداية ما طنشت كان نهاية ذي القعدة .. لين جا عيد الاضحى .. قلبي ما اعطاني .. رجعت كلمتها تاني .. لما كلمتها عرفت انهم في درة العروس في جدة ( كباين )
قلتلها اوك انبسطو ولما ترجعو البيت كلميني

المهم هيا رجعت وما كلمتني الا بعدها باسبوعين يمكن .. كل دا الوقت انا منتظرها .. قالتلي انا اعطيتك وقت كفاية وانتا ما تبغا تكلمني ولو حركاتك دي تبغا تروح الباب يفوت جمل ..
انا طبعا بالقوة بالقوة اقوى شي فالعالم مسكت اعصابي يعني .. وقلت حرام انهي 5 سنين بسبب حاجة تافهة
وقلتلها انا اتصلت عليكي وقلتلك كلميني لما ترجعي وانتي ما اتصلتي .. انتي اللي حركاتك كانك تبغي تروحي ..

المهم بعدها الكلام دا من الحج .. الى قبل امس وما اتكلمنا مع بعض ولا اي كلمة ..
صح كنت احن لها كثير وكان نفسي اكلمها .. بس قلت ابغا اوصلها رسالة انها لو تبغا الاسلوب دا اقدر اسويه .. ولو تبغا نكون مع بعض برضو اقدر .. وقويت قلبي
انا كنت اكلم اهلها من فترة لفترة .. وما حسيت انهم عارفين شي .. يعني اكيد ما قالتلهم .. وانا طبعا ما كنت ابين لاهلي ..

المهم لين ما سارت كارثة جدة يوم الاربعاء ( الله ينتقم من اللي كان السبب )
هيا من سكان جدة وانا من سكان المدينة ..
كلمني اخوها الخميس الضهر .. وقلي كلمتها ( قصدو على خطيبتي ) .. قلتلو لا ليا يومين ما كلمتها ( عشان ما يشك )
قالي انهم كانو فالطريق لما المطرة نزلت .. وغرقت السيارة وراحو عند ناس وباتو عندهم لين ما خفت ورجعو البيت بعدها وطمني انهم بخير

انا اول ما دريت ارسلتلها رسالة وقلتلها الحمد لله عالسلامة طمنوني كيفكم دحين ؟

ردت عليا الليل متأخر .. الحمد لله طيبين .. قلتلها اقدر اتصل عليكي ؟
قالتلي ليش ؟ قلتلها ابغا اطمن بس .. قالتلي جيت متأخر مرة .. واصلا احنا انتهينا .. قلتلها ايش اللي انتهى ؟ قالتلي عادي لو تبغانا نتكلم انا عادي .. قلتلها ما جاوبتيني ؟
قالتلي اتصل عليا واجاوبك .. < الكلام دا بالرسائل

بعدها اتصلت عليها .. واطمنت عليها انها بخير .. وقلتلها ايش الجواب طيب ؟
قالتلي انا وانتا خلاص انتهينا .. انت ما تهتم وانا مابغا اعيش مع واحد كدا .. وانت اللي اخترت الطريق دا مو انا .. قلتلها يعني خلاص ما تبغينا نكمل ؟ قالتلي لا ولا تتعب نفسك ..
قلتلها طيب حصل خير ان شاء الله .. انا عرفت جوابي .. مع اني ما توقعت نهايتنا تكون كدا يعني .. بس يمكن خيرة .. والله يوفقك ان شاء الله وتلاقي اللي يسعدك .. وافتكريني بخير بس .. وقفلت

الغريب اني بعد ما قفلت مني حاس باي احساس .. لا حلو ولا سيء ولا شي ..
ما حسيت الا قبل شوية وانا اصلي الفجر فالحرم ..
مادري ليه جاتني ضيقة نفس مو طبيعية .. يمكن كنت توي استوعبت !

انا ماني ندمان الا على شي واحد .. علاقتنا كانت حلوة جدا .. واتعلمت منها حاجات كتير ومستعد اعيدها مرة تانية من البداية حتى لو النهاية كدا .. لاني كنت مبسوط
بس الشي الوحيد اللي نادم عليه .. اني ما كملت مشواري وانو انا اللي متركب الغلط عليه وانا مو غلطان .. وعلى حاجة تافهة .. وانو يعني هيا كانت اول بنت فحياتي .. وكنت ابغاها اخر بنت .. لانو عارف حاقارن بعدين لو سار شي ثاني

ومدري احس جواتي لين دحين في شي ليها .. ومادري لو حيروح ولا لا ..
احس اللي بيننا كان شي فوق الوصف .. شي اعلى من الحب .. يمكن عشان كدا مني مستعد استغني عنها ؟
بس هيا كيف قدرت تطلب الانفصال ؟
والله مادري احس اني ملخبط ومو عارف ايش اسوي ؟
كيف اقول لاهلي واهلها ؟
وهل خلاص يعني انتهى كل شي ؟ وكيف اقدر اتجاوز علاقتنا ؟

معليش لو طولنا عليكم .. بس والله محتاج نصائحكم وارشاداتكم لتجاوز مشكلتي
بانتظار الردود


الموضوع السابق
http://www.66n.com/forums/showthread.php?t=215749