أخوي وش صار معك

انسى اللي راح وابدا صفحة جديدة
افرح بزوجتك وعيالك وعش اللحظة بدون تفكير وحسابات سابقة

تغيير البيت ما اشوف له لزمة الحين
زي ماقالوا جب شركة تنظيف اهم شي
وغيروه بعدين حبة حبة وعلى رواق

اهتم بتغيير عاداتكم القديمة اللي سببت الانفصال

واذا خايف زوجتك ما استعدت انت استعد واصنع اللحظات .. املا دولابها بكم قطعة للبيت ومناشف جديدة
وحط عالتسريحة عطور ولوشنات ومفرش جديد للسرير

ياليل مابعدك ليل .. رضينا بالهم والهم مارضى فينا
اللي صار معاي مريتها أخذتها من بيت أهلها ركبت وركبوا أطفالي اثنين مديت يدي عليها سلمت شخباركم
جميع الزعل قطيته ورى ضهري جلست اسولف واضحك مع الاولاد ماخليت شي خاطرهم فيه ماجبته لهم
أكل في افخم المطاعم سوالف ضحك وهي نوعاً ما مسويه رسميه احياناً تضحك من تصرفات الاطفال واحياناً عادي
ولكن ثلاثتنا عايشين جونا وهي مشغوله بالتسوق واذا كنا قاعدين احاول افتح معها حوار رسميه طبعاً الويكند قضيناه خارج البيت واستاجرت فندق بالليل قلت بطلع أجيب أغراض من برى وتعمدت أتاخر قلت خلها تاخذ راحتها تنوم الاطفال
رجعت حصلتها نايمه معهم بغرفتهم وبنفس الملابس اللي ركبت من بيت اهلها فيهم قميص ابو عشرين انصدمت قلت يمكن تعبانه وراحت عليها نومه خلقت لها عذر بعد مشاورات مع نفسي قلت اصحيها صحيتها قلت شفيك نايمه هنا قومي نامي معي قالت تعبانه مالي خلق قلت طيب ارتفع الضغط معاي رحت نمت قلت خلها على كيفها قمت صليت الجمعه رجعت قلت صليتي قالت لا معها عذر شرعي خف قهري البارح شوي لكن مو عذر لها مر يومنا طبيعي مع الاولاد وهي اثقلنا بخاطرها شي وضاربه ثقل وضحكاتها على استحياء وكلامي معها عادي مافيه ميانه أحس حافظه كلام وجايه تطبقه بالحرف الواحد والليله الثانيه جلست على التلفزيون وراحت نامت مع الاولاد طنشت الموضوع ورحت نمت وماكان شي صار ابداً باختصار اللي استنتجته منها بانها انا منتصره في كل شي وابي امشيك على كيفي قلت لها هذا السوق اللي تبينه اخذيه وماعارضتها في شيء نهائي ابداً لاني نزلتها عند اهلها وبحكم عملي الان مضطر أخليها عند اهلها واخذها
بالويكند فقط العذر الشرعي مو سبب يخليها تسوي كذا لاني ممكن اعيد ترتيب حساباتي من جديد اخاف استمر معاها وتستمر على هالطبع اولا عاد تضع لي اي قيمه لاني صبرت عليها كثير وجاء في بالها انه مايستغني عني

اجلس مصارحه معاها
جلسه صفا وان شاءالله يطيح ما في راسها
وتهدى النفوس

طول بالك عليها شوي
ﻻ تنسى صارلها فتره بعيده عنك
اعطيها وقت
ان شاءالله المره الجايه راح تظبط امورك
الله يفرجها عليك امين

__________________
انا لله وانا اليه راجعون

طول بالك أخوي،،ولا تخلي ابليس يهدم اللي تعبت وبنيته..

اللي لا حظته من كلامك كنت مركز ع الأطفال في اللعب والممازحة،،أم كنت منتظر منها المبادرة بخطوة ايجابية تشجعك للتقدم للأمام،
أقصد أخوي هل قلت لها كلام جميل لها... يمسح الماضي ويأسر نفسها،،
لا أقصد تبالغ في الشوق والحب والوله،،،

أخوي إنت قدمت وقدمت وقدمت مدري محبة لها ولا من أجل الأطفال،فلا تخلي بعض المطبات الصغيرة تجعلك تتوقف بمنتصف الطريق وتتراجع،،
بقيت لك خطوات بسيطة تتخطاها وتعيش حياتك بإذن الله بأمان..

مافيه احسن من المصارحه الزوجيه علمها باللي في بالك كله واطلب منها تقول اللي في بالها واتفقو على كل شئ وربي ان شاء الله يسخركم لبعض .

الله يوفقكم

أختي مكلومه
أنا قدمت تضحيات وتنازلات متاكد مافي رجل بيسويها لاني افكر بعقلانيه بعيداً جداً عن الانتصارات اللي يفكرون فيها الازواج وقت الخصام والزعل أولاً زوجتي لها محبه في قلبي ولكن مابين هذا الحب اكتشفه من تصرفاتي والسبب الثاني لا ارغب بان يعيشوا اطفالي عمرهم بين أب وأم منفصلين لان هذا الشيء راح يضعفهم مستقبلاً وراح يشعرون بالنقص مهما توفرت لهم سبل الرفاهيه ، بالنسبه لي بعد ماطلعوا معي كنت بشوش أحد الاطفال كان معطي جو جميل ماشالله تبارك الله يلعب كثير ومشاغب وانا عايش اللحظه معاه وهي ضحكاتها على استحياء وكثيره الصمت واتكلم معها وتتكلم معي بطريقه عاديه الخواطر فيها شي اللي مستغرب ليش ماصارحتها لاني متاكد كل شي صار راح يكون بالحرف الواحد عند امها واهلها وانهم متشوقين لرجوعها لهم عشان يشوفون وش رده فعلي بعد شد وجذب معهم لمده سنتين هل راح اعاتبها على كل شي ولكن ماقدامي حل الى اخلي الموضوع عادي لكي تخف حده الخلافات وانتظارهم لرده الفعل
احياناً التمس لها العذر في تصرفها ان النفسيه وقت العذر الشرعي تكون مو تمام واحياناً مالتمس لها العذر واقول انها راح تستمر على هالطبع عمرها كله وهي تشعر بلذه الانتصار وتحوم كبدي وتنكد علي

وينك
بحكيلك
المرأة وقت الدوره الشهريه بتكون نفسيتها تعبانه والهرمونان ﻻعبه فيها
وتصرفاتها غصب عنها
طول بالك شوي عليها
الله يفرجها امين

__________________
انا لله وانا اليه راجعون