.
.

خليني أقول النقاط هذه ..
1 - زوجي زمان كانت شخصيته ضعيفة ، فكان لازم أنا اللي أضع حد بنفسي للجميع ..
لكن هو الآن ، تغير و صار يتكلم و ما يخاف من أحد ..

2 - أهل زوجي بشكل عام ، اتربوا إنه - زوجة الإبن - ، هي مجرد كائن أقل مستوى و درجة من أهل الزوج ..
يعني هما اتربوا على كذا ، لكن مو إنه طبيعة الشر بداخلهم ( هذا اللي استنتجته بالفترة الحالية و الأخيرة )

3 - أنا جيت ، و كسرت القاعدة هذه ،. برفضي للظلم ، و رفضي للاستغلال و الإهانة و الديكتاتورية
و اللي ساعدهم على فرض هذه الأمور ، إنه زوجة ولدهم عاشت معاهم سنوات و كانت مضطهدة منهم ..
و على بالهم إنه خلاص ، زوجة ولدهم التاني .. راح تكون مثلها و إنه هما راح يربوها و يعجنوها على كيفهم ..
لكن للأسف ، طلعت أنا عكس توقعاتهم .. ( فصارت الحرب الباردة بيني و بينهم ) ..

و اللي ساعدني أكثر ، استقلالي بوظيفتي و امتلاكي للشي اللي يفتقدوه و راتبي و الحمد لله أولادي ,,
و العامل الأكبر ، وقوف زوجي معاي .. و فقدانهم الأمل فيه و عدم تأثره بكلامهم عني و عنه ..

4 - طيب أهل زوجي شافوا لما أنا و زوجي و أولادي بعدنا عنهم ، فيه شي ناقص صار بالعائلة ..
ما نحضر اجتماعاتهم و لا حفلاتهم و لا اعيادهم ، و أولادي ما يعرفوهم .. و زوجي من زمان بعيد عنهم ..
يعني هما الخسرانين .. و أنا ما تفرق معايا ، لإني ما أسمح لأي شي يكسرني و خاصة إني ما غلطت على أحد.

5 - أهل زوجي ما شافوا مني أي عيب أو تقصير و الحمد لله .. هما لما يتعدوا حدودهم ..
أنا بأرسم لهم الحدود المسموحة لهم ، و أرسم لنفسي أيضا حدود ..
و الشي هذا المفترض ما يزعل أي شخص عاقل ..

.
.


طيب نجي للأسباب الي خلتني أفكر بالتواصل معاهم ؟؟
و اعتذر عن الإطالة و التأخير ..

الأسباب :

1. قلت قبل كذا ، إني ما شفت من أخوات زوجي أي شي .. و انهم حالهم حال نفسهم ..

2. لما كانت تصير اي مواقف بيني و بينهم ( و أرد عليهم من وقتها خلاص ) ..
و يكون السبب أمهم و تكذيبها عليهم بالدموع ..

أو يكون بسبب تقصير زوجي معاهم ، أو كذبه عليهم .. فيحسبوا اني اكذب و ولدهم صادق .. و انا احسب مرات
إنه السبب منهم ، و يطلع بالأخير بسبب زوجي و أكاذيبه علي و عليهم ..

اهل زوجي فيهم ميزة - حسب اللي شفته - ، انهم ما يحقدوا و لا يفكروا انهم ينتقموا ..
ينسوا خلاص الإساءة و يفتحوا صفحة جديدة ..

أهل أبوي الله يرحمه ، شديدين .. ما يسامحوا اللي يزعلوا منه ، حتى لو سنوات و يشيلوا في نفسهم ..
عشان كذا ، كانت أمي الله يرحمها تقارن بينهم و تقول كويس اهل زوجك مو مثل أهل أبوك ..

عشان كذا ، اتصال حماتي .. قدرته لها ..
و حبيت الشي هذا فيهم .. مع إنه ( سلفتي تحذرني كثييييييير منهم ) .. بس أنا بأحكم عقلي ..

.
.

3. الفترة اللي انقطعنا فيها عن بعض ..
كنت بعض المرات ، اقرا رسايل أخوات زوجي .. لزوجي ،،

نفسهم اننا نتصالح و تتصلح العلاقات ، و يكلموا زوجي إنه لازم يسعى لمحاولة الإصلاح بيني و بين أهله ..
و كانوا منصفين بصراحة مع أخوهم ، و ما تكلموا عني بسوء ..

و وحدة من أخواته قالت للبقية ، ترى السبب أخونا .. و زوجته مالها ذنب ..
و كانوا منصفين ، مع إنهم ما شافوا مني لا خير ، و لا شر ..

4. المبادرة كانت منهم ، و شايفتهم كويسين دحين الحمد لله و مبسوطين إنه العلاقات تحسنت ..
فما يصير إني أكون سبب للقطيعة ، أنا قاطعت المرة الأولى بسبب اذيتهم و بالتحديد حماتي و تماديها علي ..

و المرة التانية ، حماتي اللي غلطت علي و ما كنت أنا السبب ..
و شفت رسايلهم لزوجي ، أخواته يبغوا علاقتنا تتحسن ببعض ..
و زوجي مطنششششششششهم ، أشوفهم يكلموه بالواتس و هو خاصرهم ..

5. لإنه أهل أبوي أقوياء مرة ، أبوي الله يرحمه كانت شخصيته قوية و كان يبعد أمي عنهم و عن اذيتهم ..
فصارت علاقتنا بأهل أبوي الله يرحمه .. رسمية ( و كان أفضل لنا الصراحة ) ،، لإنهم يظلموا أمي الله يرحمها ..
و ما أبغى أولادي يصير لهم نفس الشي .. و لا أبغى أولادي يعيشوا منقطعين عن أهل أبوهم ..
لإني ما راح أعيش لأولادي طول العمر ،. و أولادهم ماشاء الله مرة كثيرين و أغلبهم في نفس أعمار أولادي ..

حلو لما يكبروا يكونوا متداخلين مع بعضهم من صغرهم ، و تكون بينهم ذكريات ..
و ما أبغى أضيعها على أولادي ( طالما أهل أبوهم كويسين الآن معايا )

أبغى أولادي يعيشوا مع أقاربهم و أهل أمهم و أبوهم ..
أهل زوجي مافيهم - غرور و تكبر - أهل أبوي ، بسيطين ..
و كنت أرسل أولادي مع أبوهم بعض المرات ، في الفترة اللي ما كنت أروح لهم فيه ..
عشان هذولي أهل أبوهم مهما كان ..

6. السبب الرئيسي بصراحة ..
بعد اللي صار لي من أخواتي ، بعد وفاة أمي الله يرحمها ..
شفت اللي يعملوه أهل زوجي - و لاشي - مقارنة بهم ..

ف خف علي وقع الألم ، لإنه جرحي من أهلي و أخواتي خاصة .. كان أكبر بكثيييييييييير ..
أهلي و أخواتي - شافوا خيري - ، أهل زوجي ما شافوا نص اللي قدمته لأهلي ..
و مع كذا أهل زوجي انصفوني من خلفي و أمام زوجي ..

بينما أخواتي ، طعنوني من خلف ظهري و أمام أخواني .. و ما صدقوا اني طحت وقتها ..

7. ماشاء الله أخوات زوجي - مترابطين - و السبب الرئيسي وجود الأم و الأب ..
و اغبطهم عالشي هذا ، و أتمنى انه يستمر ما بينهم .. و ما يفسروا طيبتي معاهم ( بنوايا سيئة )

عكس اخواتي .. من ورايا اتفاجأ ، إنهم يفسروا تصرفاتي بأشياء عجيبة ..

8. في يوم من الأيام قبل سنة و نص ، حضرت زواج لقريبتي .. و كانوا أهلي و أهل زوجي موجودين ..
و كنت حايسة و تعبانة لوحدي و مافي أحد يساعدني مع أولادي ..

و وقتها جات أخت زوجي و مسكت ولدي اللي كان بيدي ..
بينما أخواتي كانوا يتفرجوا علي .. و ما في أي وحدة منهم تحركت و ساعدتني ..

و أنا أقدر المعروف و ما أنساه ، حتى لو كان صغير ..

9. لما رحنا لهم مدينتهم زمان ، ما قصروا معانا بصراحة .. ( أكيد عشان أخوهم و اللي هو زوجي ، مو ليا )
و بالمقابل ، ما عمرهم دخلوا بيتي هنا ..

و زوجي ما يبغى يفتح الباب علي و عليه ..
لإنه المشكلة لو انفتح الباب ، وقتها أم زوجي و أخو زوجي .. يستحلوا البيت لنفسهم ..

10. وحدة من أخواته ، أهدت لي هدية بسيطة جدا ..
و قبل كذا ارسلت لأولادي كمان هدايا ، صح هدايا رخيصة بس الهدية بمعناها ..
و قدرت لها الشي هذا ..

.
.

ايش رايك أخوي مثابر و أختي مبتعثة ؟

طبعا الى الان ، ما عزمتهم في العيد ..
زوجي ما ناداهم و لا قال لهم يجوا عندنا ..

مع إنه نفسهم ، و كم مرة يسالوا زوجي عن بيتنا كم غرفة ؟
و يسالوا عن البيت .. بس زوجي يعمل حاله مو فاهم .. و مافي اشطر من زوجي بالإستغباء و التمثيل ..
و التطنيش ..

و السبب الأخير ..

معاملة أخوان زوجي لأولادي - كويسة - ..

مو معنى كذا ، إني راح أشيل الحدود بتعاملي مع أهل زوجي ..
لإنهم ما يعاملوا سلفتي نفس المعاملة ، و هي تخدمهم مسكينة و ما يرحموها ..

القوة تمشي مع أهل زوجي ..
لكن الضعف و الطيبة ما تمشي معاهم ، عشان كذا هما كويسين معايا ,,

و سلفتي تقول لي ( خليك كذا معاهم ، و لا تفتحي باب على نفسك )
و قالت لي ( ما شفتي لسى أخوات زوجك و لا عرفتييييهم )
قالت لي ( خليك كذا بعيدة ، أفضل لك .. و زوجك فاهم لهم ، و عشان كذا يبعدك عنهم و يبعد نفسه )
و قالت لي إنها شافت كثيييييييييييييييير منهم .. و انهم أشد من أمهم و أخوانهم

على فكرة ، هما بشكل عام ..
ما ينعطوا وجه .. لإنهم مباشرة يتغيروا و ينقلبوا ..

و حتى زوجي فيه نفس الطبع ..
يعني يخدمني و يشيلني فوق راسه ، و لما أصير معاه كويسة و ذوق و ادلعه و طيبة مرة ..
يشوف حاله و يبدأ يدعسني و يتعامل معاي معاملة أهله - القديمة - ..
و لازم اعصب عليه ، عشان يرجع يحبني ؟؟؟ هو عكس الرجال ما عرف ليه .. و أمه و أهله نفس الشي فيهم ..

( لكن أنا ماني كذا ، أنا تعودت أعطي و ما انتظر المقابل و أكرم الآخرين ) ..

.
.

يعني سلفتي ، تطبخ لهم كل يوم .. و يعزموا نفسهم عندها كل يوم ..
و ما يرحموها .. و لا يقدروها .. و لا يحترموها ..

مع إني ما عملت لهم ربع اللي هي تعمله لهم ..

.
.

هل استمر كذا معاهم ( وجهي قاسي ،، أو مغسول بمرق مثل ما يقولوا ؟؟؟ ) ؟
لإني ما تعودت ، بس ما تمشي معاهم غير الطريقة هذه للاسف ..

يعني ممكن تتوقع اي شي منهم ، لو اني فتحت الباب هذا ..

و أحس زوجي مبسوط لإنهم محترميننا و صاروا عاملين له مقدار ..
بسبب إنهم صاروا يحسبوا لي حساب .. لاحظت كذا عليه ..

يسعدك ربي ، و يارب أكون عند حسن ظنك ..

مو أخونا مثابر ، يتهمني إني ظالمة و اعمل حالي مظلومة ؟؟؟؟

مادري ايش معنى ( الخامس ) ..
بس الي فهمته ، تطنيش صح ؟

و الله انشغلت عشان إجازة زوجي القصيرة ..
و قلت نستغلها بسفرة صغيرة في وسط ربوع بلادي ..

و ما قصدت التطنيش و لا قصدت الخامس ..

نسيت أقول ..

إنه شخصيتي القديمة ( كانت شخصية هبلة ) .. كنت طيبة بزيادة و واضحة بزيادة و اخجل بزيادة ..
فكنت أفتح لهم المجال انهم يتدخلوا بحياتنا .. لإنهم كانوا يسالوني عن كل شي ..
و كنت أجاوبهم بكل التفاصيل و ما كنت مثل ما أنا ( الآن ) ..

شخصيتي القديمة ، سببت لي مشاكل مع أهل زوجي و حتى مع أهلي ..
لإني كنت واضحة جدا جدا جدا ، و أوراقي مكشوفة تقريبا ..

حاليا ، صرت اعطيهم اجابات ذكية و الشي اللي أبغى أوصله لهم أقوله ،..
و أعرف متى اسكت و متى اتكلم ، و أيش اقول .. و ايش اكتم ..

و صرت اقدر ارد لو احد غلط علي ..
و ما أعطيهم كل التفاصيل ..

.
.

أهل أبوي كانوا أقوياء ويستقووووا على أمي الله يرحمها ..
و كنت انقهر عليها ، و ارفض انها تخاف منهم .. و كم مرة كنت أكلمها و أقويها ..

و حاليا أنا متواصلة مع أهل أبوي .. و شخصيتي قوية معاهم ،. و طيبة نفس الوقت معاهم ..
و يعاملوني بكل احترام و محبة و تقدير .. و من صغري ، اللي يتكبر علي منهم ، أتكبر عليه ..
و دايم أمدح في أمي و تربيتها لنا أمامهم ..

فمستحيل ، إني راح أضيع عمري تحت تسلط أهل زوجي ..
لإني كنت رافضة الشي هذا لأمي ، فما راح أكرر اللي شافته أمي ..

الله يجزاكم خير ، و تحملوني معليه ..

حابة اقفل الصفحة هذه على خير ..
و اتفرغ خلاص للبحث عن قبول دكتوراة ..

مافهمت

اي صفحه اللي تبي تقفليها؟

تقصدي موضوعك هذا بالمنتدى؟

ام تقصدي قصتك مع اهل زوجك في الحياة؟

صادقة ،.
و ترى الفضل لله ثم لأعضاء و عضوات المنتدى ، كلماتكم و نصايحكم كانت تنير لي الطريق ..