:*
تعرفي ياغالية أمي ماتطلقت رسمياً وأخذت ورقتها منه إلا من 7 سنوات بس...؟
كان رافض يطلقها رسمي ومكتفي بطلاقه الشفهي لها والسبب أنه مايبغاها تتزوج
من بعده مع أن أمي مافكرت بالزواج نهائي

والآن أمي تقول ما ابغى ذنوب وأنا بها العمر من تركته وأنا مرتاحة على الأقل
اضمن إني ماقصرت بحق زوج وأتفرغ لعبادة ربي وطاعته بدون مشاكل

وتعرفين كلنا ندري إن أمي تحبه وتموت فيه والدليل أول ماصار عليه الحادث
هي أول إنسان راح للمستشفى يشوفه وكانت تتردد على غرفته وتزوره وتصر
إن إخواني يأخذونها معهم وكل مارحت أزوره لقيت أمي تبكي عند رأسه
ولما بدأ يفيق سبحان الله ناداها وعرفها وهي بعبايتها قلنا لها يمه كيف عرفك؟
قالت يقول عرفتك من صوتك مانسيته على أنهم مفترقين من فترة طويلة

وأكبر صدمه لنا إن زوجة أبوي وأولادها تنكرو لأبوي بعز حاجته لهم
تخيلي ماشفناهم بالمستشفى إلا مرات تنعد على الأصابع طوال 6 أشهر
وإلي يغبن أمهم تطالب بتقسيم الورث وهو حي وعلى فراش المستشفى ظناً منها
أنه ماراح يصحى من غيبوبته


أحمد الله إلي أعطاه عمر جديد ورجعه لنا واحد ثاني

رجع لنا أبونا إلي فعلاً نحس أنه أبونا
وذآك الأول انتهى من حياتنا وماعاد له وجود

هالأب إلي نعرفه اليوم

أب نقدر نضمه ونحتضنه الأول عمرنا ماحضناه ولاعرفناه
هالأب إلي نعرفه اليوم يدعي لنا ويأكل معنا بسفرة وحدة
هذآك الأول عمرنا ما أكلنا معه ولاعمرنا حسينا إن عنده قلب أو ذرة إحساس
هالأب إلي نعرفه اليوم يخاف علينا ويحب رؤيتنا ويمزح معنا هذآك عمره ماشال همنا

أنا لما أتحدث عن أبوي القديم أحس إني أمقت ذآك القديم
بس هذا عوض الله لنا عن كل السنين إلي مرت بدون أب

ورغم إني كنت من أشد المعارضين لرجعت أمي له بس وعدته أقنعها
ترجع له لأني متأكدة إن كلام الشيوخ صحيح وإن أبوي كان مسحور
وكل إلي كان يسويه كان خارج عن إرادته

لأن أمي بنفسها تقول ما استغرب شخصيته الجديدة هذه شخصيته
أول ماعرفته كان طيب وحنين لحد ماتزوج وتغير فجأة

:*
ماذا لو قلت لك إن أمي بنفسها تذهب مع أبي لمواعيده عند الطبيب الذي يتابع مستوى السكر
عنده ويتابع حالته...؟
وإذا حاججناها وقلنا تحبينه أرجعي له قالت ماكان فيه أحد يوديه وخفت عليه ورحمته
هذا عشرة عمر أنا وياه وأبو عيالي ومسكين ماله أحد غيرنا زوجته وعياله مو سألين فيه
بس رجعه ماني راجعه له وأنا رايحه معه ومع ولد أخوك ماراحت معه لحالي وتبغوني
يجي يطق الباب وأقول له رح دور لك أحد يوديك...؟

مع العلم أبوي رجال عنده سواقين وماقاصر عليه شيء وأحنا مانقصر معه وأخواني برسم الخدمة له

بس تصرفاتها معه تدهشنا

عشنا سنوات ماعمري سمعت أمي تدعي على أبوي أو تحرضنا عليه
أو تجيب سيرته بشيء شين كانت لما خوالي يجلسون يذمونه تقول
أحمدو الله على العافية تراه مايدري مسحور

وفي كل زواجاتنا وزواجات أخواني ماتوافق لين يجي بنفسه
ويقابل الناس ودائماً تقول عيب هذا أبوكم

وإلي سوآه في مالكم شغل فيه بيني وبينه وبيضل أبوكم مهما
كنتم بعيدين عنه

وأعتقد إن تربيتها لنا على أحترامه هي سبب تعلق قلوبنا فيه
رغم قسوته لأن رجعته لنا سوت فرحة عارمة في العائلة
وكأنه كان مسافر ورجع

بس مسألة رجعتها له: هذه عجزنا عنها وهو مو مقصر يعيد
الإسطوانه كل يوم عليها

أحيان أقول بتوافق وأحيان أقول مستحيييل


:*

:*
ويحفظ لك من يعز عليكِ ياغالية ويجزاكِ خير
جمانة الآن في بداية التاسع يمكن تولد إن شاء الله بآخر رمضان إذا حسابها صحيح
والله يهون عليها

:*

:*
الدم يا فتاة عمره مايصير ماء
وهذا والدنا ورضاه من رضى رب العالمين حتى لو قسى وتجبر قلوبنا ترحمه وتحبه
ومايشفع له الآن أنه تغير للأحسن وطلب السماح منا وأعتذر وكل يوم يكرر
أنه ماكان يعرف ليش كان يأذينا يعني كان مغيب مو بيده

وكيف ماتبغيني أحن ويرق قلبي له وأنا أشوف ضحكته بوجهي وأشوف يديه
ترتفع للسماء يدعي لي
إلا بسامحه وأسامح الكون كله عشان خاطره

شعورنا تجاهه مثل شعور اليتيم إلي قالوا له أبوك ترآه حي مامات
بعد سنوات طويلة من اليتم

:*

:*
الله يجزاكِ خير يا أم سلطان
ويسعدك يا أختي دنيا وآخرة
وشهادة أعتز فيها من أخت
أحبها في الله وهذا ما أعتبره
تسامح أعتبره واجب لأنه والدي
لو غريب ممكن يكون تسامح بس هذا
مهما حصل منه بيضل الإنسان إلي
أحمل اسمه وبيسألني الله عنه
وإن حدث ظلم وقصور في الماضي
فالحاضر كفيل بشفاء كل الألآم ومافي
مخلوق معصوم من الخطأ والله يسامحه
ويغفر له ويقدرنا على بره

ومشكورة على كلماتك وتواجدك إلي
أعتز فيه الله لايحرمني منك حبيبتي

:*

:*
شوفي ياغالية أنا فاهمة عليك ومعك في وجهة نظرك
ولعلمك في البداية كنت أول المعارضين لرجعة أمي له
بس بعد ماشفت بعيني إنه واحد ثاني وفعلاً أمي عنده شيء مهم جداً
حبيت أشوفهم مجتمعين مع بعض ببيت واحد ويقضون باقي عمرهم سوا
بس أمي ما أظن بترجع له لأني أعرفها أمي جرحها مستحيل يندمل
وبداخلها كبرياء ماراح يسمح لها ترجع له
حتى لو تحبه وفرحت برجعته
وهي المهم عندها الآن مو نفسها بقد ماهي مهتمة إن علاقاتنا معه كأب
تحسنت
مرات أسألها أقول يمه سامحتيه....؟
تقول لي مو مهم أنا أسامحه المهم الله يسامحه على إلي سوآه فينا
وأمي كسرها منه كبير لأنها نادر تلقينها فرحانة بدون غصة حزن
ودائماً بداخلها قهر وياكثر ماشفتها لحالها تبكي بدون صوت
أمي حتى عتاب ماعاتبته ولا حاسبته على إلي سوآه فيها
تقول من أعاتب ومن أحاسب جيبوا لي ذآك الظالم إلي بقوته وجبروته
هذا إلي أشوفه اليوم شايب مريض وضعيف ماقدر أحاسبه ولا اشفي غليلي منه

وعلى فكرة أخواني الشباب رافضين رجعت أمي له وإذا حاول معهم
قالوا له هذي هي عندك أسألها ومايتوسطون بها الموضوع نهائي
بس حنا البنات ماعادا أختي الكبيرة
مختلفين بوجهة نظرنا لأننا شايفينه حاب يعيش بوسطنا
يمكن على كلامك حنا عاطفيات بتفكيرنا وهمنا الوحيد نشوف
الثنين إلي نحبهم بنفس البيت كل مارحنا لزيارتهم
بس بالنهاية تهمنا راحت أمي قبل أي شيء ومدام هي مرتاحة
لقرارها مالها منا إلا السمع والطاعة

ولاتستغربي تسامحنا معاه
لما تشوفين إنسان على فراش الموت وتشوفين نظرة الوداع
والأسف بعينه صدقيني كل غل وكل حقد وكراهية راح تزول
من قلبك
كلنا عايشنا لحظات غيبوبته وإفاقته منها والله يا أختي لأول مرة
بحياتي أشوف إنسان يكلمك بعينه كأنه يقول سامحوني أنا ظلمتكم
أنا راحل من هالدنيا بس سامحوني كان بأشد حالات الوهن والضعف
ولا ثانية توقعنا إنه بعيش لأن وضعه كان حرج
مافي طبيب طمنا وقال ترآه ممكن يتعافى أو فيه أمل يعيش

الله له حكمة في نجاته

عطاه فرصة يطلب السماح وعطانا فرصة نسعى في بره

والدنيا يافتاة ماتسوى الإنسان يفكر فيها وإلا يفكر إنه مايسامح
لأن آخرتنا بحفرة صغيرة مانافعنا فيها إلا هالصفح والمعروف
إلي نسويه

والعاطفة إلي بين الإنسان ووالديه عاطفة عظيمة تتفوق على
أي شعور ثاني
تتفوق على أحساس الكراهية وأحساس الظلم وأحساس الحرمان والغبن
ريحة الأب وضمته صدقيني تجعل أقسى القلوب تلين

:*