زين ماسوا ابوك لعل زوجك استوعب الدرس
وتصيحه انتبهي تخلي اخوانك يودونك او يجيبونك وهو موجود
لانه بكذا يتعود وماعاد يبي يسوي لك شي وبيشيل يده منك وكل ماطلبتي شي بيقول قولي لاخوانك

هو اصلا ما يوديها لاهلها الا بطلعه الروح
ومن سنوات ماتغير
اي تعود هو تعود وخلص مايوديها لاهلها
بدل المشاكل ومنته وزعل ابوها تجي مع اخوانها شالمشكله
كثير تروح عندنا لاهلها اما مع السايق او اخوانها او تسوق سيارتها
مو كل مره ودني وجيبيني للزوج خاصه الي نفس توعيه زوجها

زوجي ما عنده تفاهم .. كان متنرفز لكن اليوم بكلمه و احاول معاه يكلم ابوي و ياخذ بخاطره .

عندي اخو يدرس برع والثاني بعده صغير .
و زوجي لو تارك المجال مفتوح ممكن ابوي يمر احيانا .. لكنه يرفض

شو الفايدة يستوعب على حساب زعل ابوي
صحيح بيستوعب مماطلته شو تسوي . و بيعرف شو معنى اني ماازورهم
لكن ابوي كيف يرضى الحين

أفيدوني

كيف اتدارك تبعات الموقف ؟؟

قولي لزوجك الاسبوع الجاي بروح لاهلي
واعملي اصناف يحبها ابوك وادخلي بوسي راسه وايده وتسامحي منه
وخليه يعرف ان زوجك تغير ويخليكي تروحي لاهلك

اميرة خلي ابوك ياخد وقته يزعل و يفرغ غضبه مسيره يهدأ
بعدين روحي باتي عنده و استسمحي منه و حبي رأسه
بس لو زوجك يكون فهم الدرس و يبطل تعنت و مماطلة
و تنتظمي في الزيارة بدون مشاكل ابوك بينسي
ما في اب يحب بيت بنت يخترب تطمني بس يبغي يشوفك مرتاحة

__________________

اعطي ابوك وزوجك وقتهم للزعل
لاتستعجلين الرضا
وان شالله يكون زوجك استوعب وينتظم كل اسبوع يوديك

يفترض أنك كزوجة متعلمة مدركة أن تعرف أن حق الزوج أعظم من حق الأب ومقدم عليه

فكيف تحتارين وأنت امرأة مسلمة تعرفين الحلال والحرام وأبسط أمور الحياة الزوجية

أجل ليش أبوك زوجك , ليس معنى ذلك ألا يحترم زوجك أبوك وليس معنى ذلك أن تكسري

كلام أبيك بل تداريه بالكلام

أشكر الجميع على مشاركاتهم
كلامكم فادني جدا ..
و بخبركم اللي صار و لو اني تاخرت عليكم بالمستجدات.

الموقف اللي خبرتكم عليه صار يوم الخميس ..
ولما رجعت كنت ساكته و باين علي مضايقة .. وكملت يومي ساكته و جالسة لوحدي وما اكلت عدل

بعد صلاة الجمعه ..
زوجي تكلم و استفسر شو صار امس . قلتله انت سببت مشكلة بيني و بين ابوي .. عطني حل
قال خلاص اليوم اوديج لهم و تمي عندهم يومين .

وهذا اللي صار رحت لهم بعد العصر .. و زوجي كلم امي انه تهدي ابوي وانه ابوي عصب على زوجي وكلمه بنرفزة .
واستسمحت من ابوي و اول يوم زعلان ما يكلمني
لكني اسولف وياه عادي و اتمصخر وماانتظر يرد علي . و رديت بيتي يوم الاحد بالليل .


والحمدلله على تدبيره