مافي تناقض اطلاقا
لا تدقق لا يعني سايرها واقبل بما تفعل
اكيد الدين ثابت و الاختلاط حرام و نزع الحجاب وابداء الزينة حرام و سماع الموسيقى حرام و التدخين حرام

الله يهديها ويهدينا يارب
ويثبت قلوبنا
ياليت صاحب الموضوع يدخل ويبلغنا وش صار معاه

السلام عليكم ورحمة الله وبركاته

غبت عن الموضوع فترة وتفاجأت من كثرة الردود ولكن وجدتها في الغالب بين اثنتين من الأعضاء

المهم بصراحة أنا مشتت ولا أدري ما اقول وخلال الشهر الماضي زرت مدينتي مرتين وحصل شيء إيجابي وحصل شيء سلبي

خلال الزيارة الأولى حصل تقارب نفسي بيني وبينها وكنت أهم بالخروج من البيت في آخر الليل لإحضار والدتي من حفل وزاج ، وقالت زوجتي نومني قبل ما تطلع وفعلا حضنتها ونومتها وأحسست برغبة شديدة في ممارسة الحب خصوصا مع الانقطاع لمدة أكثر من شهرين وكانت على وشك النوم ومع ذلك دعتني للممارسة لكن أمي تنتظرني فقلت لها إذا رجعت نسوي كل شي وذهبت ووصلت امي ولما رجعت للبيت نمت قليلا ثم صحيت وصليت الفجر ونمت مرة ثانية لمدة ساعة او ساعتين ثم صحيت على صوت بنتنا التي تنام معنا في الغرفة وزوجتي تطلعها من الغرفة وسمعتها تعطيها الخادمة ثم دعوتها وقفلنا الغرفة وكدنا أن نعملها لكن نفسيتها تغيرت علي ومع ذلك أحسست بفرق كبير في التقارب النفسي بيني وبينها في الاتجاه الإيجابي

لكن الشيء السلبي حصل في الزيارة التالية حيث لاحظت انها صارت تدخن في البيت وبشراهة في غرفة مخصصة كمكتبة مع اني سبق وحذرتها من التدخين داخل البيت حتى لا يتأثر الأطفال بالتدخين السلبي ولا تنتشر الرائحة في البيت ، كذلك تركها الطرحة تماما يعني صارت تلبس الطرحة عند الخروج من البيت والحارة وعند العودة وما عدا ذلك تروح لكل مكان بشعرها مكشوف والعباية مفتوحة ولا تهتم بستر ملابسها وجسدها هداها الله

اول مرة شفتها بدون طرحة خلال زيارتي في صباح يوم السبت احسست بدوخة وشكيت يكون ارتفاع في ضغط الدم وقلت لها تاخذني لمركز طبي اقيس ضغطي وكان على الحد الأعلى للمدى الطبيعي ، ويوم ركبت السيارة سألتني: انا الي رفعت ضغطك ؟ نظرت لها وسكت لم أرد حتى لا يتفجر حوار ماله نهاية ، ثم سلكت طريق ليس طريق البيت وقالت بوديك لكفي نجلس فيه نغير جو ويوم وصلنا نزلت الطرحة عن راسها ونظرت لها باستغراب وهي لاحظت ذلك وقالت ابي انزل من السيارة بدون طرحة بليز ، وقبل أن أرد قالت: بتقول أنا بزر (طفلة) ايه أنا بزر بس ابي انزل كذا ،، أنا كنت تعبان وكان نفس يوم سفري وابي الفكة ،، المهم نزلنا وجلسنا في مقهى في جلسة خارجية طبعا عشان لازم حضرتها تاخذ سيجارة ،، صرت اضحك على حالتنا بيني وبين نفسي واتخيل انطباع الي يمرون من عندنا وش يتخيلون العلاقة بيني وبينها ، يمكن بعضهم يقولون صديقته ويمكن البعض يقولون بينهم عمل او بزنس ، لكن اتوقع يستبعدون انها زوجتي ، وقصدي من ذلك ان شكلي وهيئتي وعمري ولحيتي ما تتناسب مع ظهورها هي بهذا الشكل والتدخين علنا بدون حياء ولا خجل

بعدما سافرت أنا مستمر في التواصل معها واكلمها مكالمات فيديو واتطمن عليها وقبل يومين كتبت لها خاطرة قصيرة فحواها اني احبها وما كرهتها أي يوم لكن اكره بعض أفعالها ولابد يكون فيه تعديل لبعض الأمور إذا كنا صادقين في رغبتنا الاستمرار مع بعض وانبسطت على الكلمات ولكن نفس افعالها لم تتغير ، وانا شخصيا ما ادري متى ازورهم المرة القادمة

__________________

كان الله يعونك
مواقف صعبه

الله يكون في عونك
ويفرج همك
ويدلك للخير من امرك

فعلا تخيلت المنظر
ما بيجي ببالي انهم زوجين
غالبا صديقين

احس بحيرتك
واشعر بشعورك
انك تشوف شي ما تبغى تشوفه
وتسكت وانت ودك تتكلم!

لا تكتم مشاعرك
اكتب لنا كل شي تبغى تقوله
لين الله يدلك للخير لك ولها

مرحله وتنتهى عندك وعندها

__________________
( اللَّهُمَّ آتِ نَفْسِي تَقْوَاهَا، وَزَكِّهَا أَنْتَ خَيْرُ مَنْ زَكَّاهَا، أَنْتَ وَلِيُّهَا وَمَوْلَاهَا )

اخي الكريم
انت تفكر هنا بصوت مسموع وبحاجة الى مستمع
وتحاول بسردك ما يحدث لك، فك شفرة المنعطف الخطير الذي تقف اليوم انت واسرتك عالقا في عنقه

هل انت بحاجة الى اكثر من كوننا منصتين لك؟

__________________
الحمد لله..اللهم صل على محمد و ال محمد

التفريغ المنهجي

أولا أشكر كل من مر وعلق بكلمات طيبة ودعوات جميلة وكذلك كل من مر ودعا بظهر الغيب دون ان يكتب شيئا ،،

اليوم الخميس 21 شعبان سأسافر للرياض في إجازة لمدة أسبوعين تقريبا وأحس ان السيناريو يتكرر ، قبل سفري من عند زوجتي لآخر مرة احتد النقاش وارتفعت الأصوات وقالت انت بس تجي تنكد علي وتروح؟! خلاص لا تجي لين تخلص بعد ثلاثة شهور! ولما سافرت بقي بيننا صمت لمدة يومين او ثلاثة ثم ارسلت لي: العيال يبون يكلمونك اتصل فيس تايم على رقم سوا (رقم سوا لها ويستخدمه ولدي الصغير للألعاب) وبعدها بكم يوم تتصل من جوالها ولكن العيال يطلعون في الصورة ثم هي تبدا تكلمني شوي شوي ، وانا طول الفترة اراسلها طبيعي واناديها بنفس الكلمات والنداءات الي بيننا كزوجين حبيبين ( حبي ) (ياعيوني) ولكن هي صارت تبدا حواراتها او كلامها معي بـ( مرحبا ) أو ( أهلين ) ولكن مو مشكلة

المشكلة هو تفكيري في المستقبل وماذا سيكون وضعنا اذا خلصت دراستي ورجعت وهذا ما يقلقني ، لذلك وضعت لي هدف استباقي وهو اني بحاول قدر الإمكان خلال هالاسبوعين القادمين وأثناء وجودي بالرياض اني اكسبها واهاديها واحاول اني ادخلها على أمها وتصلح معها على دخول رمضان بإذن الله ثم المرحلة الثانية ارجعها لجو اهلي ووالديني ، لأني مؤمن ان العودة للجو العائلي هو خطوة مهمة في الإصلاح ، لأنها وللأسف الشديد مقاطعة والديها وعائلتها ووالدها يراسلني يسأل عنها يقول اكلمها وما ترد علي! ومقاطعة اهلي ووالدي لذلك وجد عندها الفراغ الاجتماعي الي صارت تعبيه بصديقات مختلفات ويزيدون كل فترة ولما اكون مسافر واكلمها وتكون رايقه تسولف لي عن فلانة وعلانة وانا أسألها فلانة مين وش اسم عائلتها؟ تقول ما ادري بس تعرفت عليها في المرسم او الكوفي ، منهم مدخنات ومنهم من يستخدون المعسل وقد اعترفت لي زوجتي انها طلبت من وحدة من البنات انها تعلمها على المعسل وفعلا راحت واياها لمقهى وجربت! وهي تسولف علي وهي مبسوطة وتقول ودي اكرر التجربة ، وانا مصدوم واتعجب من وضعها والله كأنها مسحورة ولا تدرك وش قاعدة تشوي في نفسها وفي عيالها وفينا كلنا ،، حتى امس القريب كنت اكلمها بالفيديو وكانت جالسة في غرفة المكتب وتدخن سيجارة وتقول ياليت عندي معسل بس ، وش رايك اذا رجعت من السفر هالمرة تجيب لي هدية معسل! لا حول ولاقوة الا بالله ،، والله اني احيانا اقول ليتها ما تعلمني وش تسوي يمكن احسن واريح لبالي لكن ارجع اتساءل هل تساهلها وانفتحها بالكلام معي لأنها تحبني من داخلها ومتعطشة تبي تسولف والا تتكلم معي بهالطريقة لأنه لم يبق لي احترام ولا هيبة في نفسها ؟؟

دعواتكم لي بالثبات ولها بالهداية ،، ويمكن اغيب فترة واوافيكم بما يحدث في إجازتي بعد انتهائها وعودتي لمقر دراستي لاحقا

__________________

عدنا والعود أحمد
من البداية اقول لكم ان نيتي للإصلاح ولم الشمل العائلي خلال هذه الإجازة لم تتحقق للأسف

كان وصولي يوم خميس ودخلت البيت بعد المغرب وكان الأطفال في الصالة وسلمت عليهم ثم دخلت على زوجتي الغرفة وكانت نائمة وانسدحت جنبها وحضنتها وحست بوجودي وحضنتني وبقينا وقت يسير وقبلتها على جبينها وحينما حاولت أقبلها على شفتيها تكهربت وانتفضت وبدات تدفعني عنها فعرفت ان بيننا وبين المعاشرة الجنسية مسافات بعيدة

بعدها قمت وبدلت ملابسي وجلست مع أطفالي ، وفي اليوم التالي يوم الجمعة بعد العصر ذهبت هي بالأطفال لمقابلة أختها في مطعم وانا بقيت في البيت قليلا ثم خرجت امشي على رجلي حتى وصلت جامع كبير في الحي ودخلت وصليت تحية المسجد ودعوت الله لها بالهداية وأن يصلح حالنا ويلهمنا رشدنا ، وبعد صلاة المغرب جلست في مقهى قريب من الجامع ووردني اتصال من زوجتي تقول انهم عادوا للبيت وتسألني متى سأعود ، فقلت لها أين أنا وطلبت منها أن تأتي إلي وناخذ قهوة مع بعض ، فسألتني أنت جالس داخل المقهى أم في الخارج ؟ فقلت أنا في الداخل ، فقالت ولكن انا لو جيت ابي اجلس برا عشان ادخن عشان كذا مابي اجي بروح للبنات في الكفي وتعال عند العيال لا تتأخر الله يعافيك ،، وبالليل بعد أن نام الأطفال عادت هي ووجدتني في الصالة وكنت على وشك القيام من أجل الاستعداد للنوم لكنها قالت اجلس معي شوي ابيك ، واخرجت دفتر وقلم وقالت لي ماذا تنتقد بي من تصرفات ؟ فقلت في نفسي لعل الله استجاب دعائي وهي تريد إصلاح الأمور كلها بإذن الله ،، وأجبتها أول وأهم نقطة ضعف علاقتك بالله عز وجل وتقصيرك في الصلاة قالت ثم ماذا ؟ قلت : القطيعة وعدم التواصل مع الوالدين ،، ثم بدأت تسألني طيب وصديقاتي الي ما يعجبونك ؟ طيب ورسماتي الي فيها أرواح ؟ طيب والأغاني ؟ وفي كل مرة أقول لها لو حافظتي على صلاتك وصلة الرحم لتغيرت هذه الأشياء بالتدريج لأن الصلاة تنهى عن الفحشاء والمنكر ،، المهم انها كتبت حوالي صفحة ونص من الملاحظات التي تعرف هي في قرارة نفسها أنها أخطاء وأنها أشياء لا ترضي الله ولا رسوله ولا ترضيني كزوج وولي أمر ورب أسرة

ثم قالت طيب خذ القلم واكتب لي وش بتسوي لو ماتغير ولا شي فيني ، فأخذت القلم وكتبت سأستمر في نصحك وإرشادك وتنبيهك ، فقالت احب اقول لك اني ماراح اتغير ولا تتعب نفسك وتزيد المشاكل بيننا ، فابتسمت لها وقلت كل شي جايز والتغير ممكن يصير بشكل غير متوقع لأن القلوب بين أصبعين من أصابع الرحمن يقلبها كيف يشاء ،، قالت: أنا مو معترفة بالرحمن !!! فصدمت من ردها وقلت أعوذ بالله من الشيطان الرجيم هذا كلام خطير وما يجوز تقولين كذا الله يهديك وانتهت الجلسة على هذا الموقف المخزي ولا حول ولا قوة إلا بالله

بعدها بثلاثة ايام ايقظتني الصباح وانا احاول الاستمتاع بإجازتي وقالت حول لي فلوس بشتري عباية ، قلت اذا كانت عباية ستر وحشمة ما يخالف اما عبايات الزينة والتباهي فاشتريها من راتبك ، يوم ولعت وزعلت وذهبت وهي تسب الرجل السعودي والشرقي الخ وفي نفس اليوم بالليل قالت اني لما ذهبت اداوم في الكفي جيت للبنات وانا اصيح وقلت لهم الكلام الي قلته لي الصباح وان فلانة قالت لي ماعليك منه ترا الف واحد يتمناك!! فقاطعتها قائلا : الله لا يوفقهم وتلوميني يوم اقول صديقاتك صديقات سوء المفروض لو كانت هالبنت عاقلة وصادقة معك كان قالت لك كلام يقرب بينك وبين زوجك مو تزهدك فيني وحنا بيننا عيش وملح وثلاثة اطفال وهذي بنت مابعد تزوجت ولا جربت الحياة الزوجية

أيضا بعد عدة أيام حاول اخوها التواصل معها عن طريقي ولكنها رفضت لأنها مقاطعته من أربعة شهور لأنه نصحها وكنت انا واياه في السيارة ويسألني عنها وكيف نقدر نؤثر عليها وترجع لرشدها المهم قلت له هي جالسة في كفي قريب من الشارع الي كنا نمشي في فقال كلمها وقل لها اننا بنجي ويوم كلمتها كانت هادية ورايقة في بداية المكالمة لكنها تغيرت 180 درجة يوم قلت لها ان اخوها معي وانه يبي يشوفها وقالت لو جيتوا عندي في الكفي والله لارفع صوتي وافضحكم واسوي وافعل قلت خلاص انقلعي منب جايين ، وبعدها بيومين جانا اخوها في بيتنا في عصر رمضان وانا دخلته الصالة وكانت جالسة تقرا كتاب يوم شافته انحرجت وهو سلم عليها وحب راسها ويدها رغبة منه التقرب منها وإحساسا منه بالمسؤولية لأنه الأخ الوحيد وهو اصغر منها بكم سنة ومابعد تزوج ولأنه مدرك أنها لو فعلا انفصلت عني سواء بطلاق أو خلع فستنتهي علاقتها بي ولكن لن تنتهي علاقتها به وستظل اخته إلى لذلك هو متخوف من تصرفاتها غير المتوقعة لو حدث الانفصال لا قدر الله

لم يتبق لي إجازة سوى إجازة عيد الفطر سأقضي مع أسرتي أسبوع تقريبا إن شاء الله وبعدها بشهر ستنتهي دراستي وسأعود نهائيا ،، أسأل الله أن يفرج همي وينفس كربي إنه ولي ذلك والقادر عليه

__________________

هل تصوم
لا اعرف هل فعلا الحدت او تبي تحدك على اقصاك وتشوف رده فعلك
هل هي ذات شخصيه ضعيفه لدرجة ياثرون فيها البنات وماطبيعة عملها
ام انها كانت منغلقه ومجبره على اشياء بسبب العادات والتقاليد ومع الانفتاح انفجرت
لا اعرف
واحييك على طولة بالك
ولا نملك سوى الدعاء لك ولها

أنا ما شفتها بعيني تفطر من يوم دخل رمضان ولكن إذا جا وقت الفطور ألاحظ اني افطر لوحدي! شكلها تاكل وتشرب من وراي ، وأصلا بعد كم يوم من دخول رمضان جتها الدورة الشهرية وصارت تاكل وتشرب عادي وتاكل غداء مع الأطفال ، ثم تدخل غرفة المكتبة وتقبع الزقارة

والله ما كانت مضغوطة ولاشي بالعكس بيئتهم ماشاءالله متوازنة ومحترمة ، والدها ملتزم وكان إمام مسجد لكنه مرن ومرح وفلاوي ووالدتها موظفة مرموقة وعاقلة ومتزنة ، وحتى حياتي معها ما كنت معقد الامور وعندي مرونة كبيرة وكنا متفاهمين ومنسجمين الحمدلله.

أكيد بطول بالي لأني محسن الظن بالله ومتفاءل ان الامور تتحسن على الأقل الأساسيات والأصول من أفكار ومعتقدات اما الأمور التابعة ممكن اقدم تنازلات فيها يعني مثلا لو رجعت تصلي وتركت الدخان وتركت المجاهرة والتباهي بالأخطاء ممكن اسكت عن كشف الوجه إذا لفت الطرحة بطريقة ساترة ولا حطت مكياج في هالحالة لو قالت فيه قول فقهي وكذا ممكن نتناقش (وأصلا انا مقتنع بالقول بوجوب تغطية الوجه للمرأة لكن بعطيكم مثال لأي حد انا مرن وابي اكسبها) لكن الوضع الحالي انها متخذة الحرية شماعة انها تسوي كل الي تبي ولا تعترف بأي قيود او قوانين بما في ذلك شرع الله

أنا ما استحي اني اقول اني احبها وميت عليها وممكن نظرة منها او ابتسامة تخرفني يعني من جد اقدر اسميها توأم روحي ووجودها في حياتي عوضني عن الجفاف الي كان في حياتي الزوجية الاولى ولا اطيق زعلها او اني اشوفها متضايقة وبيننا رصيد ثري من ذكريات ومغامرات ورحلات وسفرات عشان كذا مابي افرط فيها حتى آخر محاولة وآخر لحظة والله يكتب الخيرة ولا زلت مستغرب وش هالفكر الي لعب في عقلها وتخلت عن كل الي بيننا عشان ترضي رغبتها في الحرية وحب الذات والأنانية

نعم هي رغم انها في منتصف الثلاثينات إلا أنها تتأثر وعندها فضول معرفي وتقرأ كثير سواء كتب أو في وسائل التواصل الي اشوف انها أكبر مؤثر عليها من حسابات الطاقة والماكروبايوتيك ومرات أفكار صوفية ومرات بوذية يعني تخبط عنيف نتيجته الابتعاد عن كل شيء

فعلا أحيانا كأنها تتعمد تستفزني عشان اطلقها وأحيانا أحسها تتصرف ببلاهة ولا تقدر العواقب لكن العهد الذي قطعته على نفسي اني اسيطر على مشاعري مهما استفزتني ولا اطلقها من نفسي ، مع الاستمرار في محاولات التقارب والنصح والتوجيه واذا طفشت مني تروح تطلب خلع الله لا يهينها ، على الأقل اخذ المهر مع اني ما ادري من وين بتجيب الفلوس وهي راتبها اقل من اربعة الاف ومقاطعة اهلها !! لكن الله يكتب الخيرة من عنده ويثبت علينا العقل والدين ويرزقنا من واسع فضله

__________________