طعن ياعمري يا حبيبتي أوكيه أنا معاكي انك مقدره
وضع زوجك وكلامه أثر فيك ومن داخلك تبغي تساعديه
بس ابغاكي تجلسي مع نفسك شوي وتفكري بكل
اللي سواه فيكي والظروف والنفسيه اللي عيشك
فيها وتسألي نفسك هل هو يستحق تعطيه وتساعديه
عشان يرد الدين لطليقته اللي كانت هي وزوجك سبب في كل
اللي مريتي فيه ؟؟؟؟؟
وهل كنتي تستحقي اللي سووه فيكي !!!
انتي بتقولي لنفسك بالأخير هو زوجي وأبو عيالي وهو أعترف بغلطه
بس هذا مو معناته تتنازلي عن حقوقك بهالبساطه ،،
زوجك شافك انسانه سموحه وقلبها طيب ف صار يطبق موال { دموع التماسيح }
ومجرد ما تعطيه اللي يبي ماتدرين ايش التصرف اللي راح يتصرفه ،،
وماتدرين إذا سالفة الدين هذي صحيحه أو لا حتى لو شفتي صك الطلاق بعينك
،،
أختي أنا ما ابغا احرضك على زوجك بالعكس من حقك تساعديه وتوقفي معاه
بس صدقيـــــــني مو بهالطريقه اللي جالسه تسويها ،،
الله يكتب لك اللي فيه الخير ،،

نفس الاحساس


ان كان بتدفعين لوجه الله ومقتدره جزاك الله خير
لكن ديون فاسمحيلي هذا التصرف جانب الصواب
هو ياخذ الفلوس وعارف انه منتف ويبعزقها ليه؟
وانت تعلقين نفسك بديون وماتدرين تعيشين وتسددينها!!

ماساتك الزوجية جزء كبير انت من يتحمل مسؤوليته
الجواب واضح ﻻ وبس

__________________
الحمدلله الذي بنعمته تتم الصالحات

حبيبتي انتي تقدري تقولي لا ببساطه وبشويش واذا هو حاسبها عناد يحسبها بكيفه وصدقيني مصيره يرجع لك ايش حيقول للناس كنت ابغى منها فلوس ومااعطتني وطلقتها
...يعني بالله وسامحيني ماستخدمتي اسلوب الحيله الاذحين في موضوع من جد مايبغالو حيله ولا لف ولادوران كفايه انو جرحك وتزوج عليك بدل الواحده تنتين ومافكر الا بنفسه وقت ماتزوج ولاحتى فكرعياله..تجي انت وقت الحق معاك مليوووون بالميه ماتفكري حتى بنفسك ..

اختي الحبيبة ،، زوجك انسان بالغ فاهم ولما تزوجها تزوجها بعقل مو كطفل ينجبر او ينقص عليه!! بما ان كذلك اذن هولازم يكون حاسب حساب اي شيء وكل شي .. خليه يحل مشاكله ببنفسه وانتي قلتي بنفسك كأني أمه اسمع له واحل مشاكله! اذن لمتى هالشي ؟؟ خليه هو يدبر نفسه حبيبتي مو كرها او حقدا او انتقاما منه لاااا عشان هو يتعلم سواء اللي سواه بنظره صحيح او خاطئ ....

واكيد الزوجة تساعد زوجها اذا محتاج ولكن اذا كانت تمتلك المال ومو محتاجته او موفره لها مبلغ فليش لا ولطن انتي راح تاخذي قرض على ظهرك وانتي عارفه جم سنة راح تدفعين للبنك!؟ فاذن مابيدك حيلة ومو مجبورة تتحملي وزر أحد
لمجرد انه حس انه ندمان وانه غلط ،،،

اعتذري منه باسلوب مهذب وقولي له انا مقررة بعد كم سنة اتقاعد واقعد اربي عيالي بالبيت فما اقدر اطلع قرض وانجبر اشتغل اكثر ،، او قولي له فكرت بالموضوع و قررت ما اخذ القرض بالحالتين الرد بالرفض من حقك ومو من حقه يجبرك على اخذ القرض ...

حبيبتي ،، انتي مو واثقة اذا كان الموضوع تطليق او ارجاع وان اخذتي ففي الحالتين بتتندمي يعني الاولى بتحسي انك سبب بطلاق مرأة مهما كان نسبة السلبيات بينكم ويبان عليك مرأة عاقلة وموازنة للامور ماشاء الله ،، وبالحالة الثانية بتنفقع مرارتك وراح تنصابي بالصدمة الكبيرة من زوجك ! وبالنهاية ينطبق المثل اللي يقول وضاعت فلوسك يا صابررر

شفتي الفلوس اللي بتعطينها خليها لك وروحي اشتري لك ارض والا سوي فيها شي
معليش معليش معليش كل شي واضح وانتي خايفه يزعل عليك ويرجعها لازم تتصرفين وتحطين حد عشلن ما يتمادى ويحسب لك الف حساب
وحده اعرفها خذت قرض وحطت فلوسه مع فلوس زوجها عشان يبنون لهم بيت وكان يتملصح معها وهي ضعيفه ما تدري يوم خلص البيت ويسحب عليها يتزوج وحده ثانيه
وطلقها وقال مالك شي عندي ..

والله ياطعن قلبي أنا من زمان وأنا أقرأ مشاكلك مع زوجك بس هذا الموضوع تحديدا عرفت السبب الرئيسي في مشاكلك ... أنت السبب بدون شك مو معقول كمية الضعف والسذاجة والطيبة اللي مو في مكانها هنا ... يعني يتزوج ويهينك ويعيشك في جو من القهر والمشاكل وفي الأخير وبكل بساطة انت اللي قاعدة تسددي فاتورة هذا كله بصراحة ماألوم زوجك لو حط عليك اربعة مادام أنت بهذي الشخصية ...وصدقت روزليتا الموضوع هذا بيجلطنا كلنا ...الله المستعان بس .

__________________
اللهم إن أبي نزل بك وأنت خير منزول اللهم أكرم نزله ووسع مدخله وارفع درجته وجازه بالحسنات إحسانا وبالسيئات عفوا وغفرانا .. آمين

مو هو الي كان يبي الثالثة خلاص يتحمل الي يجيه وهو انسان بالغ عاقل يعرف يتصرف ويدبر نفسه

انتي انسانة طيبة ما شاء الله عليكي وتبين تمدي يد العون وما قصرتي معه ابد وهو لمن شافك كذا بدل ما يستحي من وقفاتك معه صار يتمادى ويطلب شوفي مساعدتكي له شي حلو جزاكي الله خير بس تغرقي نفسك بديون هذا غباء بام عينه ومعليش على هذي الكلمة وخاصة ان زوج مثله ما يستحق

يعني مثلا اذا رفضتي بيضربكي؟؟ بيطلقكي؟؟ لا والله ولا راح يقدر بالعكس برفضك راح تحطين حاجز في وجهه عن هذي التصرفات من الي تطلع منه وانا اشوف انه انسان ما يتحمل المسؤولية وما يقدر يعني لا تستغربين اذا ساعديته راح يجيكي في كل موقف يطلب فلوس انتي في غنى عن هذا الكلام
في النهاية لا تنسين الي مثل زوجك اذا شاف الطيب ركبه

الله يفرج همك

	((فقد روى البخاري ومسلم في صحيحهما عن أبي هريرة رضي الله عنه: "أن النبي صلى الله عليه وسلم كان يؤتى بالرجل المتوفى عليه الدين فيسأل: هل ترك لدينه فضلاً؟ فإن حدث أنه ترك لدينه وفاءً صلى، وإلا قال للمسلمين: صلوا على صاحبكم، فلما فتح الله الفتوح قال: "أنا أولى بالمؤمنين من أنفسهم، فمن توفي من المؤمنين فترك ديناً فعلي قضاؤه، ومن ترك مالاً فلورثته" وهذا الحديث يدل على وجوب الصلاة على الميت وإن كان مديناً، لأن النبي صلى الله عليه وسلم ترك الصلاة عليه وأمر المسلمين بها، قال ابن حجر: (قال العلماء: كأن الذي فعله صلى الله عليه وسلم من ترك الصلاة على من عليه دين، ليحرض الناس على قضاء الديون في حياتهم، والتوصل إلى البراءة منها، لئلا تفوتهم صلاة النبي صلى الله عليه وسلم) انظر فتح الباري. ))

وعادة الإنسان لا يأخد دينا إلا لضرورة قصوى


أسأل الله أن يهديك لما فيه الخير ويسدد خطاك ويحفظك من الزلل ويصلح حالك وحال زوجك ويرده إليك ردا جميلا

اين صرف المال الذي اخذه منها؟

هل صرفه عليك وعلى عيالك؟

بالطبع لا

زوجك مراوغ وبعرف مفاتبحك

ان لبيت طلبه هذه المرة سوف تغتحين على نفسك بابا لن يسد

تعبك ومالك سيكون في خدمته

عزيزتي عندما اخبرك زوجك انه تزوج نكاية بك كان ذلك تمهيدا لطلبه االمال اﻻن

الحقيقة الوحيدة الواضحة هو انه مراوغ ومزواج

سواء اعطيته المال ام لا لن يتغير

لا تظني انك تستطيعين شراء رضاه بالمال

احفظي مالك لنفسك ولا تفرطي ب هللة واحدة

هو لا يستحق ابدا ابدا ابدا