يوم الاربعا اخوي عنده اجازه لمدة اسبوع و نص ،
تقاجأنا انهم جو عندنا يباتون في الملحق اللي ابوي بناه لهم برا ،
طبعا ابوي بنى الملحق بسببها لانها قامت تاخذ غرفة اختي و اختي كأنها لاجئه ، و مسكينه اغراضها في شنطة سفر و تبات في الصاله او عند امي او عند اخواني الصغار ،
فابوي اضطر عشان يبعدها يبنيلهم ملحق ع قدهم ..

المهم انهم يوم الاربعا جو يباتون في الملحق و تركت ولدها للساعه 3 الفجر عند امي و امي مسكينه ميته نوم لانها تصحى من الصبح من وقت عشان شغل البيت ، و يوم قامت اختي تتسحر و سألت امي وين زوجة اخوي ؟ قالت امي ان زوجة اخوي رايحه السوبرماركت تشتري اغراض للملحق لانها بتطول عندنا (=

المهم انهم الخميس راحو العمره و اليوم راجعين ، بس المشكله ان ام زوجة اخوي بتكون في العمره مع ولدها الصغير ، و الاب و الاخوان الكبار و اختها موجودين في بيتهم و اخوي بيرجع دوامه ، و الغريييييييب انها بتسكن عندنا !!! حتى ترجع امها من العمره و امها تطوّل اصلا في العمره !

و اكتشفنا ان السبب الي يخليها تبات عندنا انها بتخلي ولدها عند امي الصبح الساعه 7 يوم هي بتروح الدوام - الدوام اللي في المدينة الثانيه ، اللي اصلا قريب من بيتها و بيت اهلها (= -

ارجوكم نبغي حل لها ما ينفع نعيش و تتمحور حياتنا كلها حول زوجة اخوي !
يعني ما يُعقل ، وانا و اختي لليوم نقول ان البنت طيبه و خلوقه و كل شي ، لكن هاللي تسويه غلللللططططط ،

يعني مافي خصوصية لدرجة انا و اختي رجعنا البيت مره الساعه 10 بالليل ، و نسمع صوت فوق ، يوم ركبنا الدرج شفنا واحد من اخواني الشباب جالس بملابس البيت - عندنا يلبسون وزار و فانيله - و هي جالسه معاه و اختها !!!

اول ما وصلنا انا واختي فوق و شفنا المنظر ، اخوي قام من مكانه و راح غرفته و لحقته ، قلتله كيف تجلس بهالملابس قدامهم و انته اصلا حتى قدام الشغالات ما تطلع بملابسك الداخليه !!
قال لاني رحت الصاله استخدم الطابعه و برجع غرفتي ، و سمعت صوت بنتين ع بالي انتي و اختي و لكن يوم وصلو فوق عرفت انها زوجة اخوي و تفاجأت و ما عرفت شسوي من الحيا و قعدت و ما تحركت !!

يعني تخيلو لهالدرجة ، و ليش تجيب اختها ، و كيف تجرأت تخليها تجي فوق في الصاله عند غرفنا و الساعه 10 و بدون لا احم ولا دستور .. عيب عيب ، طيب مو موضوع خصوصيه لكن في شي اسمه ادب في شي اسمه ذوق في شي اسمه احترام في شي اسمه تربية في شي اسمه " حياء "

ننتظر ردكم ، هي بتسكن عندنا في رمضان شنسوي

حركه اختها عيب فعلا

يختي كلموها واعطوها الي في قلوبكم يمكن شافتكم ساكتين تفكر راضين 😩

مالكم إلا المصارحة الله يعينكم

__________________

الحل والربط عند امك

في فرق بين الطيبه وقلة الذوق 😡

ماتقدروا تزعلوها لان امكم معاها ورح تزعل لزعلها
زوجة اخوي طيبه ومحترمه جدا بس مع ذلك مانقدر نزعلها بحرف لان امي بتزعل

تكلموا مع امكم بالبداية علشان لاتقلبها عليكم
وحاولوا تكلموها بكل وضوح انه تصرفاتها وطريقتها بالتعامل تنفر الواحد وانكم مش حابين تخسروها لانه هذا الي بيصير لو ماانتبهت على تصرفاتها

عاد اذا طنشت ماتنلاموا ابد بكل تصرف بعدها

تصرفها الاخير امك المفروض ماتسكت عليه ابدا تجاوزت الحدود بقوة

__________________



هل تتعرضين للأبتزاز ؟؟ أدخلي هنا

مفضلة المتزوجين 2011-2014



مفضلة المقبلين على الزواج 2014

.

أمي اول فترة يوم كنا نشتكي كانت فعلاً تزعل و احياناً ما تكلمني انا و اختي ،
بس لاحظنا يوم زوّدتها زوجة اخوي اخر سنه ، امي قامت تتضايق منها و من ولدها لكن ما تقول او تتكلم ، عشانها تعرف انها اذا تكلمت راح تعطينا ضوء اخضر لي و لاختي عشان نتصرف على كيفنا بعدين مع البنت ..

و المشكله الموضوع كبر ،
خالتي متضايقه منها ، صايره اذا تلاقو نففففس الشي تسوي فيها ،
صاحباتي متضايقين منها ، اذا طلعت معهم تقط نفسها و مره طلعت معهم و دقت علي تقول ارجعي البيت بخلي ولدي عندك و بروح النادي !!
و اذا عزمتهم بيتنا ، ما تخلينا في حالنا ،
عندي صاحباتي ف مدينه بعيده كثير ، هي صارت صديقتهم و تكلمهم و تزعجهم ،
يعني حياه مقلوبه فوق تحت ، اول مره ادري ان في حد بهالجرأه و اللامبالاه و يمكن السخافه بعد !

البارحه رجعو من العمره ،
و نمنا و كل شي ، و هم طبعا في الملحق ،
شوي ولا نسمع صريخ في الصاله فوق ، شصاير شصاير ؟ طلع ولدها يبي يشوف امي و امي كانت نايمه صحوها عشان يشوفها و اضطرت امي تقعد معاه و تجامل !!

يعني اقل من اقل من اقل من هالذوق مافي ، ابد ما تستحي و نحن نايمين و اخواني الشباب ف البيت و جايه متعنيه صحتنا من النوم بصوتها العالي الساعه 3 الفجر !!

.
.

حالياً انا و اختي نتجنبها ، اذا دخلت البيت نقعد فوق ، و اذا جت فوق نقعد في الغرف و اذا دخلت غرفنا اعزكم الله نقعد في الحمام و اذا صار انها زودتها ، نلبس عبينا و نطلع من البيت !!!

بس لمتى ؟
ما نقدر نصارحها بتصير مشكله وايد كبيره بينها و بين اخوي و بين اخوي و بينا و بين امي ،

فكرت بطريقه غير مباشره اخليها تستوعب اللي تسويه غلط ،
نطلع انا و اختي مع 2 من صاحباتي وحده منهم عندها بنت عمرها سنه ،
و مع زوجة اخوي ، بخليها تشوف كيف صاحباتي يتصرفون ،
ما يرمون بنتهم علي ، و ما ييتطفلون و يمسكون جوالاتنا ،
ما يزعجون اهل زوجهم ،
و ما يسوون اللي هي تسويه ، و ابدا انا و اختي نشكر فيهم و في اسلوبهم و خصوصيتهم مع اهل زوجهم و كيف انهم حاطين حدود ..


رايكم هالشي بيخليها تستوعب ؟ لو 10٪ ع الاقل ؟

والله وقفوها عند حدها و أعطوها في وجهها

أمكم راح تزعل هي و اخوك يومين
ثلاثة
أسبوع
شهر

بس بالاخير ترتاحوا و مصيرها أمكم ترضى و اخوك كمان يرضى مصيره
و هي تعرف حدودها

بجد قهرتني و صايرة قليلة أدب

سكتنا له ..
دخل بحماره .. ينطبق عليها المثل هذا بجد

ليش مفترضين إن أخوكم بيزعل منكم إذا كلمتوه عن تصرفات زوجته؟!


أخوكم عايش معاكم عمر .. عارف أطباعكم وأسلوب حياتكم .. اللي المفروض إنه نفس أسلوب الحياة اللي هو تربى عليه.

بالتالي لما تشرحون له بعض مواقف زوجته غالباً راح يتفهم كلامكم .. وراح يصدقكم لأنه صار عارف طبع زوجته وأسلوبها .... يعني ما راح يعتقد إنكم تتبلون عليها مثلاً.


ومب بالضرورة يروح يتهاوش معاها عشانكم .. ولا هذا هو المطلوب منه .. لكن على الأقل يمسكها شوي عنكم.

لأن زوجته فعلاً مب معقولة أبداً!!



كلمو أخوكم وقولو له إنكم عارفين إن زوجته طيبة وعلى نياتها .. لكنكم قررتو تلجأون له لأنكم مب حابين تصعدون الموقف بينكم وبينها .. ومب حابين تحصل مشاكل أو نفسيات تعبانة أو قلوب شايلة .. عشان جذي تتمنون إنه يتدخل بطريقة حكيمة وموزونة ما تخلي حد يزعل من حد .. ولا حد يثقّل على حد.

هو ممكن يحل الموضوع بطريقة ما بدون حتى ما يضطر يكلم زوجته صراحةً عن ضيقكم من تصرفاتها.

__________________


اللهم طِيبَ الأثر .. وحُسْنَ الرحيل.

معقول انها تسوي كل هذا ومو حاسة بنفسها؟ 😶

__________________

اختلافي عنك لا يعني اختلافي معك

فعلا الله يعينكم، هذي غثيثة

و انا باقرا مشاركاتك اتخنقت ما ضحكت الا لماقلتي انها اذا جات تطلعوا فوق و اطا طلعت دخلتوا الغرف ,,,,,

المهم في شئ لسه ما سويتوه

روحة لعندها و ما تخلوا شئ بمحله حتى غرفة نومها افتحوا اصعر دولاب و عيدةا ترتيبه

اذا جاءت و جابت ولدها و الا بلاش حرام في هطا الشهر الفضيل

المهم اخترقوا خصوصياتها، حتى صورها في الجوال طرشيها لبعضكم خليها تعني منكم شوي