صباح الخير ..
أخذت الألفين وزيادة الحمدلله ..

متضايقة..
أدري في ناس مشاكلهم أصعب من مشكلتي..
بس انا من زمان أحس انه مشكلتي نفسية
من لما مات أبويا الله يرحمه الين تعب أخويا وأشياء ثانية ما أبغى أذكُرها أو أتذكرها..

صارت أحداث كثير الفترة اللي فاتت مالي مزاج أتكلم فيها .. وأمس كمان صار شي أنا مو غلطانه فيه بس برضو بكيت مع العلم انه زوجي حالياً مو عندي ..

يا ناس أنا من النوع اللي أحب الإلتصاق بالرغم من كُلّ لأحداث اللي صارت لي الا اني أحب ألقى بحياتي مصدر أمان..

بنفس الوقت ما أحب القيود.. السيطرة.. حاولت أتنازل واتجرد من ذاتي.. علشان ما يتكرر حدث طلاقي.. بس ماااااقدرت ..
حاولت اوازن بين مُتطلباتي ومُتطلباته بس أحس انه الشي ان ما كان ع مِزاجه وبالوقت اللي يبغاه ما يصير ..

من غبائي اني رابطه سعادتي برضاه ان ما رضي طووووول الوقت ابكي والله ينام ويصحى ودمعتي ما جفت .. ادري انه هذا مو حساسية عاديه لا .. هذي مشاعر مَرَضيّة ..
وبنفس الوقت عندي كرامة لدرجة اني اكثر من مره قلت له انا ما أخاف من الطلاق تبغى تطلقني بالطقّاق !!!
كم مره قلت له انت تزوجتني علشان تلعب فيني وترميني .. يلا ارميني الله لا يسامحك !!!!

هو مو خالي من العيوب .. رغم كذا اعتبره العوض من الله ...

لكن !!!
وحطوا تحت لكن مليون خط فسفوري ..
العيب فيني .. حساسة لدرجة مؤذية .. بيوم رفض البس اللي ابغاه ما رحت لصحبتي والهدية للان عندي ويومها قضيت ساعات بالمستشفى ضغطي مرتفع ومكتومه..

والله العظيم ابغى أعيش براحة بس بنفس الوقت تعبانه .. اكذب عليكم لو أقول اني مو خايفه اني اخسره .. بنفس الوقت احس اني غلطت بحق نفسي اني تزوجت متزوج .. مين قال اني بيوم اكتب هالكلام .. او اشتكي هالشكاوي ..
مو لازم يكون كلامي واضح وأنتم كمان مو لازم تكتبوا لي بوضوح بس اكتبوا لي اي شي .. ليا يومين ما نمت .. ولا قادرة امارس حياتي بشكل طبيعي .. ولا قادره اركز باللي جالسه اكتبه.. كل اللي ابغاه من الحياة راحة بال .. ومشاعر مُستقرّة.. تعبانه والله

حبيبتي الاعتراف بوجود نقطه او مشكلة بالشخص نفسه تعتبر نصف العلاج ،،
انتي من النوع اللي جسمه يتاثر بنفسيته بشكل كبير بالتالي الكتم غييير مفيد لك ،، استغليرعدم وجود زوجك لحتى تضبطي امور في نفسك وهالشي بالمقام الاول لك انتي لراحتك النفسية ... لما تتذكري وتحسي بالكبت و الضغط عليك بالصراخ ! اصرخي وتكلمي بصوت عاالي دام ان مافي احد يسمعك او جنبك ،، بعدها اعملي تمرين التنفس واخذي زجاجة مو محتاجتها خالية افتحيها وتكلمي بكل شي ضايقك بحياتك بكل سر او احساس مكبوت حسيتي فيه ومريتي فيه بحياتك قبل زواجك و قولي كل مشاعرك السلبية بهالزجاجة وبعد ماتنتهي اغلقيها وقولي بنفسك خلاص كل هالمشاااعر السلبية راااحت ومالها مكان فلك خيارين يا اما تاخذي هالزجاجة وباقوى قوتك تكسريها ( بس تحملي من الزجاج لا يجي عليك ) او انك تحتفظي بها بخيث ان كل ما حسيتي بالكبت تطلقي مشاعرك فيها ...

بعدها اكتبي النقاط الضعيفة او اللي ماتعجبك بنفسك على ورقة ،، وانتي اوجدي حلول لكل نقطه وشنوو لازم يكون البديل لها ،، واكتبي بعدها قراراتك اللي لازم تبدئيها من اليووم ..

حبيبتي لا تضغطي على نفسك بالتغير المفااجئ عشان ماتفشلين من البداية يعني اعطي نفسك شهرين ثلاثة الى ان تعتادي على نمطك وتفكيرك زاسلوبك وشخصيتك الجديدة اعطي نفسك الفرصة للتغير ولا تخافي وانتي بمجرد ما تحسي بدرجة القبول والتغير الايجابي لزوجك راح تحسي بالتشجيع وتواصلي ،،، موضوع كلامك عن الطلاق وعدم اهتمامك لو طلق يوصل لزوجك معلومة انك مو متعلقة فيه وباي وقت عادي تتركينه وتحسسينه بالنفور او الابتعاد ويقلل الثقة فمثلا حطي نفسك مكانه شلونوبيكون احساسك لما زوجك بين اي مشكلة يقولك هالكلمتين فاشتغلي من هالناحية وكوني واثقه بنفسك وانتي ماشاء الله مو ناقصك شي من كل النواحي ،،

الله يفرج همك
بصراحه احسك تبحثي ع النكد
انصحك بالرجوع لله قوي علاقتك مع الله نصيحه من اخت

انت في بالك فكره خاطئة لاحظتها في بدايه موضوعك بس اشوفها كبرت في راسك ( تفكرين انه تزوجك عشان يلعب فيك ويرميك ع قولتك ) طلعيها من راسك هذي هي سبب مشكلتك
وقاعده تدورين اسباب تنكد عليك حياتك
خليك ايجابيه واستمتعي بالاشياء البسيطة اللي معك و باليوم اللي مايكون عندك لاتقعدين لحالك اطلعي عند اهلك و اشغلي نفسك اهم شي قبل ماتشغلك نفسك بالتفكير

تدري ايش اللي مخوّفني من نفسي !
إنّي لما أزعل أمسك خط بطولة اللسان واللي يزيدني سكوته ..
لدرجة أوقات يقول لي اسكتي ولاكلمة ومرا قالي حطّي لسانك بفمّك !!!!
أتكلم وأبكي وأعيد نفس موّال انت ما تحبني انت قاسي انت تزوجتني علشان تلعب فيني
فيني مشاعر سلبية فوق ما تتصوري لدرجة اني متوقعه أموت بزعله
قال لي مرا بكاك وكلامك وقت الزعل يكرّهني فيك
قال لي أوقات أقول لنفسي ايش خلاني اتزوجها،،. قلت له المجنونة صح ! ضحك وقال بس بكاك مو طبيعي ..
مو طبيعي اللي يصير وانا احاول اني أنفذ اللي كتبتيه
مرا ضربته .. مو ضرب بس كنت أعيد نفس هالموال ومسكت ملابسه من عند رقبته وجلست اضرب بصدره واهلوس أقول كلام ندمانه عليه وانا أقوله بس مدري ليش قلته وما هجدت الا لما وراني العين الحمرا ونفضني نفض من يدي صحّاني...
أقول الحقيقة علشان انا ابغى اتغير .. لازم اتغيّر.

برد من ردودك قلتِ اني عنيدة
والان كمان صرّحتي بأني أحب النّكد
تدري ايش يقول لي زوجي !
أحب فيك مرحك..
ابتسامتك..
طيبة قلبك ..
بس يقول وقت تزعلي اكره كل شي فيك ومو مصبرني الا اني عارف اللي بداخلك ..
يعني هالشي كان بداية الزواج يتكرر بشكل يومي وبعدين يوم عن يوم وبرمضان بس مرتين صار بس بالمرتين اجلس يومين ابكي بكل زعله

ماني نكديه وعلاقتي بربي ربي يعلم فيها.

ابغى أكون إيجابية
ابغى اكون باااااردة ما أحِس
ما ابغى ابكي بكل وقت يسوء فيه التفاهم بيننا..
هو وصلت فيه انه يحلف انه عمره ما راح يطلقني
بس انا ما ابغى حالتي تتطور برتااااح خلاص بُكى عيوني تعبت وراسي صدّع وضغطي ارتفع وخلاص صرت اكره نفسي من حالتي
مرا قلت له الزعل سبب لي أمراض ما راح أزعل اكثر من ساعه المره الجايه
ولما زعلت قال لي فين اللي قالت ساعه وأرضى علشان نفسي ؟
ما قدرت اعمل كنترول ع انفعالي
ما اجلس لوحدي

انتي بتعاني من الشخصية الحدية
ابحثي عنها بجوجل
علاجك بسيط بس لازم تزوري طبيب نفسي
افضل دواء لحالتك دواء اسمو زولفت فيكي تشتريه بدون وصفة لانو مالو اعراض جانبية
مع ذلك الافضل تتابعي طبيب نفسي رح تنقلب حياتك و تعيشي باستقرار نفسي باذن الله

ذكرتيني بنفسي بداية زواجي....

وتدريجياً بدأت أحس ببرود لدرجة اني ادور الدموع مالقاها خاصه لما اكون غلطانه والشي الي يبردني اكثر واكثر انه اي كلمه يقولها لي زوجي وقت الزعل اعرف انها مش من قلبه بسبب الغضب لكن نفسي زوجي يحس بنفس احساسي 😭لانه يتأثر بكلامي وقت الغضب ويزيد في هجرانه....

السلام عليكم ورحمة الله وبركاته ..
دخلت من أجلك وسريعا بعد أخذ الإذن ، الحبيبة منفردة أحزنني حالكِ جداً يُفترض تكوني سعيدة مع زوجك لأنكِ جديدة
وأنتِ فعلت بخطأ وللأسف تتركين لدى داخل زوجك عن منفردة بأنها سلبية وووو
ارسمي في قلبه عن منفردة التي ليس لديها تجربة سابقة التي جعلت قلبك مملؤء بالأسى لا تحملين حقائبك الماضية إلى حياتك الجديدة وتدميرها بأيديك إياك يا حبيبة قلبي .
تجردي وتحرري من هنا ستبدأ انطلاقتك بحياة سعيدة معه رغم ماستمرين به .
لديك أنلميتد واطلبي المساعدة بشرط ان تكوني جادة أعتذر لدي الكلام الكثير لك لكن لا أستطيع أسترسل اكثر لأنشغالي .
منفردة تستحق الحياة الجميلة التي تليق بها ...
ينقصك التعامل مع زوجك وقبل ذلك التحرر من الماضي وبعدها وانا على يقين ستنظر ين لحياتك مع زوجك بكل وضوح وخالية من أي تراكمات
تحرري منفردة الحياة نعيشها مرة واحدة فلا تضيعي الأيام الجميلة بهذا القلب الممحمول بكل هذا الماضي .
أحبك جداً جداً