رد : حكايتي مع الألم وفصول العذاب المتكرر.. رحمـاك يــا الله
النجاة النجاة
هي بالعكس حنونه على الولد وحنونه علي بس انا اشرح لكم وضعها فقط في حال العصبيه .. هي ممكن تؤذي نفسها ولكن ما اعتقد انها تؤذي الولد ولكن الي يخوفني ويخليني متوتر هو صراخها قدام الولد وسقوطها وتمثيلها بانها انهارت تماما ..حسبنا الله ونعم الوكيل
بالنسبة لولدي هي اكيد ماتؤذيه ولكن اذا عصبت من شيئ تضربه ضربه واحده ثم يبكي وتضمه ..!! فمثلا هي على اللابتوب تكتب ولما يأتي الولد ويرفس اللابتوب او يطيح عليه وهو يلعب تعصب وتخلي عاليها واطيها واحذرها من ضرب الولد ولكن مافيه فايده تضربه مثلا على راسه بيدها بقوه ثم يبكي وترحمه وهكذا دواليك ...!! ياليل المعاناة
بالنسبه لمنعي فهي تتحكم حتى بالمناسبات الي عند اهلها مثلا اهلها عزم ناس وقالها خلي زوجك يحضر هنا هي تقول ازواج خواتي بيجون انت لازم تروح اقولها يابنت الناس فكينا بس مانيب رايح وفعلا ماروح لكن تزعل وتصارخ وتقلب ذاك اليوم نكد وهم الله ينكد عليها يعني لازم تروح للعزيمه ولا بزعل وبنكد عليك ..يعني ليه يجون عدلاي وانت ماتجي علما انهم مايجون فكذا عزيمه اجي ما القى ولا واحد فيهم .. صبر جميل
بالنسبه لمنعها شراء اشياء هههه لا مستحيل تمنعني انا شديد بأس معها ولكن متسامح معها على الوجه الاخر يعني لايروح فكركم اني ضعيف عندها بالعكس لكن انا اداري اشياء واتسامح بأشياء احاول احافظ على بيتي وللعلم انا حاس اني بطلقها من اول شهر زواج مادري هالاحساس هي الي زرعته فيني علما اني ماودي لكن ادري انه بيجي اليوم الي تطلب فيه الطلاق بشكل جدي .. والله المستعان
بالنسبه للكلمه هي مالها كلمه بالبيت الكلمه لي طبعا ولكن مايستفزني هو صراخها وفضحها لنا بالعماره والله ان صراخها يسمعه راعي البقاله ....!
اخي البليغ
ان لم تكن قد اتيت فسوف انادي عليك حتما.. اسعدني وجودك حقيقه
تفضل واقس علي وافعل مابدالك .. وآآآمرني وسوف اتجاوب معكم فلم اسطر حكايتي عبث..!
تقبل تحياتي
اختي شقرديه
حياك الله هي ماتعاني من مرض نفسي وقتي او مكتسب بالعكس هي تعاني من مرض عضال وراثي متعمق ومتجذر وطبيعه خلقيه بحته ... وهذا هو طبعها وش الي اقدر اسويه برأيك ..!
ناني
شكرا لك وااكد لك اني اول مره اكتب هنا .. وماسبق لي الكتابه عن مشكله شخصيه .. لكن بضرب لك مثال .. عن أنس أن النبي - صلى الله عليه وسلم- أدركه أعرابي فأخذ بردائه فجبذه جبذة شديدة حتى نظر إلى صفحة عنق رسول الله - صلى الله عليه وسلم- وقد أثرت فيه حاشية الرداء من شدة جبذته، ثم قال: يا محمد مر لي من مال الله الذي عندك فالتفت إليه رسول الله - صلى الله عليه وسلم- فضحك وأمر له بعطاء. البخاري
هل هذا ضعف في شخصية رسول الله .. طبعا لا وحاشاه صلوات ربي وسلامه عليه .. والامثله كثيره بارك الله فيك
بسمله
حياك الله ربما اصبت كبد الحقيقه في كلامك .. لكن ثقي اني واجهك اهلها في فتره من الفترات وقلت لهم مايحدث ولكن تقابلني هي بأني انشر غسيلها عند الناس ... اقولها هذولا اهلك وترد حتى لو .. اقولها من اشكي له اجل .. تقول خل مشاكلنا بيننا ههههه شي مضحك بصراحه طيب وين اروح انا ..؟؟ مالي الا امها احيانا اتصل عليها واشكي لها سوايا بنتها وامها بصراحه تنحط على الجرح وطيبه وحنونه وايضا احيانا اتصل على خواتها الكبار واعلمهم ولكن مافيه رد الا ابشر ان شاء الله بنقولها ونعلمها و...و... الخ ولكن آآآه من الطرف الاخر ابوها .. ابوها شايب متقدم بالسن وعصبي ولايتحمل شي وغلطتي اني اشكيها عنده ...
بالنسبه لتويتر انا ماواجهتها وجه لوجه لانها بتنهار وترتبك ولكن فقط رسائل بالجوال وخبرتها اني عرفت كل شي عنها وعن الاشخاص الي تتكلم معهم وخصوصا ذاك الشخص الي ذكرته .. علما ان علاقتها معه انترنتيه بحته ماعتقد وصلت للمكالمات وهي اصلا مشرفه في منتدى له من قبل زواجي بها وعلاقتها به من زمان ولا اكتشفت هذا الي متأخر للأسف
سماحة قلب
شكرا لك ودعوتك لي تهمني
لمسه غروب
شكرا لك سأفرد رد خاص بخصوص المشكله وما اريده وتوجيهاتكم الان انا مازلت في طور ترتيب المشكله وحيثياتها وان شاءالله بحاول اكتب لكم ما احتاجه وما انا فيه متردد .. واصلح الله حالك وحال زوجك
everything
فكرة اني ارجعها فقط لتعلقي بولدي ولكن مسأله اني ارجعها لحبي لها لا والله انا عفتها من زمان ومن قبل المشكله للأسف البنت هذي ماتتعاشر نهائيا .. وانا متأكد من كلامي البنت ماعتقد احد بيتحملها غير امها وابوها..
يمام البراري
جزاك الله خير وماقصرتي
كلامك في محله ولكن احب ابين لك بعض الامور هي ماتمد يدها في كل وقت وكل حين لا .. انا مشكلتي معها الوحيده هي العصبيه والعناد - قبل معرفتي بسوالف التويتر طبعا - الشي الثاني هي تمد يدها اذا بغلت القلوب الحناجر ..يعني اذا ماثلا تكلمت عليها ورفضت شي او حذرتها من شي او منعتها من شي وبدأت تصرخ وانا اصرخ وارد الصياح بالصياح هي هنا تعتقد انها تعادلت معي فتحاول تفعل شي يحسسها بأنها تقهرني اكثر فتمد يدها .. ثم هنا انا طبعا ما ابادلها الضرب لاني لو ضربت قلت لك ممكن يصير مالا يحمد عقباه ولكن احاول اهديها لعل الشيطان الي براسها يركد..
بالنسبه لتعاملها مع الولد اعتقد انه تعامل ممزوج بالحب والرحمه ولكن اخشى على الولد فقط وقت عصبيتها وقفدانها للسيطره على نفسها
شكرا لك مره اخرى
ضيقوا صدري
قولي ليتك مثل الرجال بلا قلب رحيم ولاعقل حليم ما فادني حلمي عليها ولا رحمتي لها.. انا اؤكد على ان الحلم ينفع مع ذا اللب والعقل الرزين اما بنت مثل هذي ماعتقد للأسف.. علما اني اعول عليها فهي متفوقه بدراستها ومتخرجه من الجامعه بتقدير ممتاز وتعتقد انها أديبه وتحب قراءه كتب الادب والروايات (الساقطه للأسف) ترمي بشرر ....وهلمجرا