بسم الله الرحمن الرحيم
انا في هم مايعلمه الا الله الله يفرج همي وهم المهمومين ..
كنت مطلقة ومعي بنت .. وبعدها بفترة تقدملي مطلق مثلي ومعه بنتين .. ايام ملكتنا كانت قصيرة تفاهمنا واتفقنا نعوض بعض وبناتنا .. والحمدلله ربي رزقنا بولد والحين لنا 4 سنين..
بعد زواجنا اكتشفت انه حالته النفسية مريضة وتعبانة جداجدا لأسباب كثيرة منها مطلق ام بناته (مرتين) وبناته عنده وتحمل مسؤليتهم لحاله يوم عنده ويوم عند اهله .. وامهم ولاتسأل فيهم وغيرها من الاسباب .. يعلم الله اني حنيت عليه وعليهم ووقفت جنبه وحبوني بناته وينادوني ماما .. ماثمر فيه استغفر الله عصبي بشكل جنووني على اتفه مشكلة يعصب ولايعطيني فرصة حتى اتنفس يسب ويجرح بشكل فضيع حتى بناته نفسيتهم تعبانه بسببه .. صبرت لانه يقولي سامحيني حياتي القديمة دمرتني وربيت بناتي لحالي صرت الام والاب.. وانا احن عليه و اسامحه .. لين صار يتمادى يسب ويضرب وحتى اهلي وابوية المرحوم يسبهم وبنتي يسبها ويدعي عليها مع انها عمرها مادخلت بيتنا الا مرتين تخيلو ولاهو مسؤول عنها هي عند اهلي ومطمنة عليها .. وانا وربي ماارادده عشان يكون فيه سبب .. مافهمته اذا سكت يقولي ليش ساكته واذا تكلمت يقولي اسكتي وهو معصب جربت اقوله كلام حلو يقولي كذابة ليين طفح الكيل لأنه تمادى في بنتي بالذات كلام ماينقال اشتكيت لأهله واهلي وطلبت الطلاق .. جن جنونه واعتذر وانه مايعيدها وانه ماحيلاقي مثلي وانه مستعد يتعالج نفسيا لانه تأكد بان تصرفاته غير طبيعية وصدقته ورجعت لاني غبية خفت اطلق للمرة الثانية ومعي هالمرة ولد ..

.. مرت الايام صحيح فيه مشاكل وصااابرة اللهم انه مايضرب ولايتعدى حدوده في اهلي وبنتي ..
الحين يقولي ابغى ارجع ام بناتي .. انا انجنيت كيف بعد ماتحسنت نفسيتك ونفسية بناتك بترجع للحياة الي دمرت نفسيتك ودمرتهم .. يقولي ماعلي منها ابغى بناتي قلتله يعيشون معانا قلي لا منتي مسؤولة .. صدقته ووافقت وندمت .. شفت محادثة بينهم اعترف اني غلطانة بس كنت شاكة بينهم شي واكتشفت بينهم رسايل واغاني اعوذ بالله .. والجمال ماله دخل لاني ولله الحمد بشهادة الجميع اجمل بكثير وست بيت بس سبحان الله الشيطان مزينهم لبعض .. الحين انا مصممة عالطلاق ولاهمني كلام الناس محد عايش معاناتي .. لأنه ماراح يعدل ولا يتعدل وبيرجع مثل ماكان نفسيته حتتعب ومتأكدة لاني عرفتها من اهله وشفتها فعلا شخصيتها قوية ويخاف منها وطلباتها اوامر وكل ماقالت شي في المحادثة قال ابشري ولايعجبها العجب صحباتها كثيير وخرجات وحفلات وسهرات وتحب تجمعات الحريم وهو مايعجبه هذا كللله وادري بيتركها تسوي على كيفها واذا زعل من شي وماعجبه شي عندها بيسكت ويحطها فيني اناا واناماعاد اتحمل ..
الحين انا كرررهته وكرهت نفسي لاني صبرت على اهانات وكلام في حقي وحق بنتي صعب اقوله لانه محد راح يتحمل وبتقولون ليش صبرتي وسكتي .. لاني ماابغى اطلق ثاني وكان عندي امل اعيش بهدوء وسلام ..
اعذروني ع الاطالة لاني بجد ماادري شسوي مايبغى يطلق .. احيانا افكر ارسله ارجع واصير مثل الشوكة بحلوقهم واتشرط على كيفي .. واحيانا اقول حرام اهين نفسي اكثر واعذبها واخون اهلي لأني وعدتهم انساه ولا اتواصل معاه .. واطلع من حياته للأبد ....