ام الوسطاني هوني عليش

انتي مو متسلطه انتي زوجه حملت الهم كله وتداري وتخطط لصلاح بيتها بارك الله فيش وفي بيتش

زوجش ماشاء الله تغير لانش اصيله وتستاهلين

يمكن يا روح زوجش ينجذب للعمل الحر ويلقى نفسه اكثر حريه وبلا قيد

او فترة حماس وراح يقل منسوب نشاطه مع الاجهاد المستمر

اذا كان عنده القدره الماليه يفتح مكتب ويشتغل بهالمهنه وتدر لكم مدخول جيد يترك الشغله الاولى

اذا حابه تأثرين عليه ممكن بالاطفال تقدرين تدخلين له بهالمدخل

الله يوفقش حبيبتي انتي ام مثاليه وحامله كثير على عاتقك كان الله في العون

__________________
وهل من مصير اخر ؟

امين و الله يجزاك خير ..

روح نصيحتي لك
خلي زوجك ع دوام واحد ولا تقيسين قدراته على نفسك
أنت تقدري تتوزعي هنا وهنا وهنا
هو لا
ممكن يركز في البيت والشغل الأساسي بس
والأصحاب يكون وقتهم للتسلية والترويح عن النفس
اذا ضغطتي زوجك بأشياء كثيرة راح يمل ويمكن يترك ويبيع الكل ( قصدي الشغل الأول والثاني )
أنا عارفة نوعية زوجك يتحمس وبسوي وبسوي
ولكن نفسه قصير تشوفينه يمل ويبدأ يسحب عليهم شوي شوي لحد ما يترك العمل

بالنسبة للتحكم والسيطرة
فأنا فاهمة عليك أن زوجك بيفوضك في أمور كثيرة
متعب جدا وله بعض المميزات
الموضوع مش حب سيطرة ولكن تفويض متعب من الزوج !

الحل بنظري
يبقى على شغل واحد
وتحاولي أنك تقللي ساعات وجوده مع أصحابه
يعني بدال ما يكون من العصر للفجر معاهم
ممكن يصير من المغرب للفجر
واليوم اللي بعده تحجزي زوجك بمشاوير قبل ما يحجزونه ربعه ولما ترجعوا المغرب او العشا تطلبي منه يساعدك بتنويم الأطفال مثلا وراح يساعدك ويذهب لهم

بس لا تضغطيه
زوجي شبيه بشخصية زوجك جنوبي غربي
لحد اليوم يعشق اللعب وكل يوم يكتشف لعبة جديدة
يطلعنا لما نطلب ويقضي أمورنا ويرجع يلعب
يعني بالمختصر ما يعيشون بدون ترفيه ( ومطول حبتين )


وترى ماكدونالدز والوجبات السريعة مو زينة وأضرارها على الصحة مخيفة
لو تشوفي موادهم الغذائية كيف تتصنع
راح تلقيه مقرف أكثر من سندويشات الفول والكبدة ووو الخ

__________________
الحمدلله الذي بنعمته تتم الصالحات

سمعت كلامكم و نصايحكم ..

.
.

الحمدلله ، بدأ ينظم وقته - نوعاً ما - ..

.
.

امين ..

.
.

الله يجزاك خير ..
و يارب أكون مثل ما تقولي ..

.
.

المشكلة زوجك يا فاكهة ، بيتوتي .. قدام عيونكم و شايفين ايش بيعمل ..
لكن زوجي مو بيتوتي أبدا .. و فقدت الأمل إنه ممكن يجلس بالبيت ..

صرت اتركه براحته دحين .. لكن لا يجلس فاضي 4 أيام ..
و بعدين يجي و عليه ديون ، أو يجلس مفلس طول وقته ..

دحين مع وظيفته الثانية ، صار يخرج من راتبها المصاريف الزيادة ..
مثل مخالفات مرورية .. أو تصليح سيارة .. أو يقابل اصحابه و يتعشى معاهم أو يتغدى معاهم ..
أو يجيب لأهله عشاء .. و مصاريف لنفسه و لجيبه ..



.
.

اللي صار اخر شي ..

اني زعلت معاه الشهر هذا بجد .. و لإني تعبت فعلاً ..
و كل مرة الزعل يستمر نص يوم تقريباً و نرجع عادي .. و بعد أسبوع نفس الشي ..
يعني زعل عالفاضي و بدون نتيجة و لا تحسن ..

و أدري إنه أصلا عنده أوقات ممكن يجي يجلس فيه بالبيت ..
لكن هو يقول لي لا .. ما عنده وقت حتى يرتاح ..

.
.

و سمعت كلام فاكهة الشتاء ، و ما صار يهمني شغله الثاني مررررررررة ..
يعني لو خرج من شغله الثاني ، ما راح ازعل و لا أتضايق ..

أهم شي يعطينا من وقته .. و مو معقولة شهر كامل ، مافي ولا يوم اجازة ؟
و لما تجي مناسبة لأهله أو أصحابه .. يقدر يلاقي لهم وقت و يستأذن من عمله الثاني ؟

.
.

قبل يومين زعلت منه خلاص .. ما أبغى اكلمه و لا اشوفه .. و واصلة معايا لآخر شي ..
جلس يراضيني و وعدني إنه بيصير مثل ما أبغى .. و توقعت إنه بيطنشني مثل المرات الماضية ..
و ما حبيت أطول بالزعل و استغليت الفرصة

و قلت له طلباتي ..

قلت له
عندك الصبح كله لحد الظهر ، بتخلص شغل المكتب من 9 لحد 2 الظهر .. هذا مو كفاية ؟
و أصلا الشغلة اللي تخلصها لهم بالجوازات أو مكتب العمل أو غيره ..
لو جابوا لهم معقب كان أخد منهم ألوفات .. فكفاية عليهم كذا و لا يستغلوك هما كمان ..

و مو معقولة ترجعنا الظهر و ما تدخل البيت ، يعني تنزلنا من السيارة و تروح المكتب .. ؟
إنت مانت سواق تنزلنا و تروح ؟
هذا بيتك و هذولي أولادك و انت مسؤول عنهم .. تدخل و تتغدى معانا عالأقل ..

قالي ( ابشري .. و إيش كمان ؟ ) ..

.
.

قلت له .. تفضي حالك كل يوم للأولاد ..

قال لي ( طيب خلاص .. نص ساعة كل يوم كفاية ؟ ) ..
قلت له ( على كيفك ، المهم يشوفوك .. و مو كل شوي ينكدوا علي و يقولولي دقي على بابا يخرجنا
و أجلس أنا مقابلتهم 24 ساعة )

قال لي ( نص ساعة طيب و لا ساعة ؟ )
قلت له ( أي شي )

قالي ( ابشري .. إيش كمان ؟ )

.
.

قلت له ..
و يوم كامل في الأسبوع .. تتفضى لنا و تخرجنا أي مكان ..
مثل ما يوم الجمعة لبيت أهلك .. و نحن كمان من حقنا نخرج و نغير جو لأي مكان ..

قالي طيب ابشري من اليوم تشوفي التغيير ..
طبعا ما صدقته أصلا .. و هو حس إني ماني مصدقته ، لإنه ياما أكلني وعود عالفاضي ..

.
.

قالي المرة هذه تشوفي ، و خلاص أنا قلت من اليوم و وعدني السبت نخرج كلنا ..

أمس كان في بيت أهله ، عشان عزيمة رجال عندهم .. و بعد العزيمة ، راح المكتب لحد الفجر ..
و قبله الخميس كان مع أصحابه اللي بالعمل و تجمعوا و خرجوا برة من الظهر لحد نص الليل ..
و بالقطة اشتروا تيس و طبخوه و تعشوا .. و بعد العشاء ، راح المكتب و لحد الفجر ..

اليوم كان بيقوم و يخرج يروح المكتب .. وو جاله اتصال من صاحبه اللي بالمكتب ..
لكن انتبه إني ممكن انقلب لو طنشني و نسي وعده و راح ..

و تقصدت و قلت له ، فين راح تخرجنا اليوم ؟
قالي بسرعة سجلي طلباتك .. عشان اروح اجيب لكم الاغراض و أروح شغلي ..

قلت له ، مو قلت بتخرجنا السبت و تمشينا ؟

المهم إنه مافي أي اغراض بالبيت و لا حتى خبز و لاشي ..
فقلت له نروح نتغدى بمطعم شامي ، و حرام لا ياكلوا الأولاد وجبات سريعة ما منها فايدة ..
و بعد الغداء قضينا مقاضي البيت .. و رجعنا العصر ، و راح شغله ..

.
.

كويس انه انتبه .. انه لازم يعطينا من وقته لو نص ساعة عالأقل ..
و يارب يستمر ..

^
أقصد أولادي مو مقصرين من ناحية التكسير ، و المصارعات الحرة ..
و الدلع و الزن و التنكيد .. و عارفين دلع الأولاد على أمهم كيف بيرفع الضغط ..

و الله لما أبوهم يكون موجود ..
زي الألف يسمعوا كلامي ..

خاصة دحين لما بدأوا يكبروا شوي ..
صرت أقول له إنت أدبهم .. و أتركه هو يتصرف معاهم ..

.
.

عشان كذا .. وجوده مهم ( لو نص ساعة عالأقل باليوم ) ..
الولد ماحد يمشيه مضبوط .. غير أبوه ..

ربي يوفقكم حبيبتي

روح ممكن تكتبي يومكم بالتفصيل
من ساعه ماتصحوًلغايه ماتنامو
مع برنامج زوجك اليومي

عشان نحاول نساعدك بالتنظيم

__________________
سبحانك لا اله الا انت اني كنت من الظالمين

روح بدايه الشغل ضعبه
شوي شوي يتعود ويعرف
بعدين تقل ساعات العمل

طيب ما اقاطعكم .. صار مستجد ..

انا قلت انه هو قبل كم يوم طاح بسبب الإرهاق .. و دخل المستشفى و اخد المغذي ..
و بعدها طبعا نام يوم كاااااااااااامل في البيت و ما صحيته لانه كان معرق و هو نايم و واضح انه تعبان ..

و بعدين تاني يوم بدأ شغله و دوامه الأساسي .. لكن لاحظت انه كان يهمل المكالمات الي تجيه من شغله بالمكتب ..
وقالي حاس في جسمي خمول و قلت له اكيد تجمع عليك تعب الأيام الي راحت ..

و امس الي بدات إجازته من عمله الأساسي ..
و قبل شوي .. شفت رسالة على جواله من صاحب المكتب .. ارسل له امس و يقول له
الان و بشكل سريع ترسل لي تقرير بخصوص المهام .. عن شي بالعمل

راح امس يخلص أشغاله في المكتب بِدوامِه الثاني .. و رجع في الليل بدري شوي ..
و من الفجر نايم لحد آلان العصر .. صحيته يتغدى و سألته تركت شغلك بالمكتب !؟
قالي لا .. قلت له نايم من امس !؟
قالي ماعرف صاير احس بكسل و تعب من يوم دخلت المستشفى .. يمكن حسدت نفسي !؟
او من السكر !؟ ماعرف السبب ..

سألته ارسلت طيب الملف الي طلبه منك صاحبك !؟
قالي لا

سألته تبغاني أساعدك و اسويه لك و اكتبه !؟
قالي لا .. و رجع يشخر و نام ..

.
.

ايش اقول له و كيف اتصرف لو صحي ؟!؟
أشجعه و لا أطنش و لا اكلمه .. و ايش اقول له !؟

.
.

ام يوسف و سما ..

جدولي انا مرتب مع اولادي و بيتي و عملي ..
لكن هو ملخبط لنا النظام .. و شكله مافيه مواعيد مرتبة ..

راجعة بس اغديهم ..

يعني مثلا من امس .. كنت مخططة اني اروح اليوم الدوام و اخد الاولاد للحضانة
بما اني تعودت خلاص انه طول الوقت مشغول .. و جلوسي بالبيت ما راح يفرق أصلا ..

المهم ..
قالي زوجي في الفجر لما رجع الساعة 5 تقريبا ..
قالي اصحيه عشان يوصل الاولاد الحضانة الساعة 8

و سألني ايش عندك اليوم في العمل !؟
قلت له ما عندي شي ..

سألني ليش رايحة !؟ ( بالعادة ما يسال )
قلت له .. بس كذا ..

قالي خلاص لا تروحي و نامي .. و بعد ما اوصل الاولاد الحضانة ارجع و انام
و بعدين أقوم و أوديكي الدوام الساعة 10 ونص و مرة وحدة اروح اخلص اشغالي
قلت له طيب

شفته الصبح نايم .. و قلت خلاص أغيب الاولاد عن الحضانة اليوم
و ولدي راح المدرسة مع السواق بعد الفجر ..

قلت خليه يشبع من النوم .. لانه من كم يوم يشتغل و ما ارتاح و امس رجع متاخر
و عادي أغيب عن العمل لانه ماعندي شي اليوم ..

فما رحت الدوام و لا اولادي راحوا الحضانة ..
و طبعا طلعوا لي ( قرون ) .. و قلت ليتني أرسلتهم و ارتحت و لا عالاقل كنت نمت لي ساعتين
لكن حزنت عليه و ما حبيت اصحيه

و دحين العصر و شايفة جواله اتصالات من المكتب .. و هو الى الان نايم ..

خليه على راحته
اكيد هو بيتصرف