السلام عليكم ورحمه الله ...

اتمنى ان تنوروني بحل لاني احس الامور بدت تفلت من يدي ... القصه بدأت قبل سنه ان ماكان اكثر تعرف زوجي على وحده من غرف الدردشه وكلمها وهي متزوجه وطبعا لما اكتشفت الامر وواجهته قال نزوه والله يلعن الشيطان وابشري ومشيتها له وتغاضيت وصرت اتابعه من بعيد لبعيد وفعلا وجدته صادق بتركها ...لكن بعد فتره عادت علاقتهم واكتشفتها ايضا وواجهته وكان السبب اني مقصره معه بكلام الحب لاني كنت ذيك الفتره تعبانه واتعالج ...فماكنت القى وقت حقيقه لتدليعه اوغزله ...المهم انه وعدني وقال خلاص لو رجعت لها لك الحق بأي شي واي قرار قلت لو رجعت لها تطلقني قال ابشري .

اكتشفت يوم الخميس محادثات له معها نسي يمسحها وهو المبادر بالتودد والحديث صراحه وقتها انفجرت وقلت اطلع برى البيت ومستحيل تدخل البيت هذا ويوم الاجازه تجي توديني لاهلي خلاص ابي الطلاق لاني اسكن بعيد عنهم ...

والان من يوم الخميس ليوم الاثنين وهو ينام برى البيت طبعا لان عندي دوام فهو يجي يوديني الدوام ونكون على الصامت لاكلام ولاشي ويرجعني البيت وخلاص يروح طبعا هو يوم الجمعه حاول يرجع بس انا رفضت بس محاوله بارده وبعدها وقف اصلا حتى انه يحاول يصلح الموضوع او يجي يعتذر ويحل الاشكال بالعكس احسه زعلان !!!

زوجي طبعه رومنسي بزياده يعني يبي 24 ساعه حب وغزل ودلع والحمدلله انا مومقصره معاه بأعترافه هو هي بس فتره لما كنت مريضه ... ورجعت امورنا طيبه واما سئلته قلت وش قصرت فيه ؟؟؟ نزل راسه وخرج لما طردته


الان انا متضايقه لاني كل لحظه اتخيله يسولف ويضحك معها ... وانا متأكده انه ماقطعها او تركها وشكلها هي مقويته لانه يوم طردته كان انسان ندمان ووده يصلح الامر لكن بعد كذا الرجال مستقوي ومسوي زعلان ولاهمه .


طبعا مابينا اطفال انا عندي مشاكل وهو كمان ...حياتنا ممتازه هو مواصفاته ممتازه ويحبني وانا بعد بس ماادري ليش خان !!!

كنت اربط فتره خيانته لي لما اروح اسافر لاهلي فأنشغل عنه فقلت بلاش اروح ولارحت اروح معه وارجع معه لكن الحين انا معاه ووضعنا من كل النواحي ممتاز ...وش السبب الي خلاه يرجع لها


انا عنيده وهو اعند ...لكن امورنا كانت تمشي الحمدلله يعني ماعمرنا نعاند بعض في اي شي يخص حياتنا متفاهمين جدا لكني انصدمت من الخيانه ومع نفس البنت ولاعنده عذر !!!


ايش الحل الحين لو اقوله تعال نتفاهم بيقول ايه لما شافتني مستقوي وزعلان ويالله ارد عليها الكلمه خضعت ووقتها بيحس غلطه ولاشي ولو مااناديه اعرف زوجي مايحب المشاكل ولاعنده القدره على المواجهه ابد


انا نفسيا تعبت من خيانته وافكر بالطلاق لكني احبه واخاف هالامر يأثر على حياتي مستقبلا يعني اصير ابكي على الاطلال طول عمري

ساعدوني الله يرضى عليكم