انا مستغربة من بعض اللي يقولون البسي وسوي مثل اللي يشوفهم بالإنترنت!؟
معقولة يا ناس تطلبون من واحدة متزوجة ومستورة انها تقلد العاهرات اللي بالأفلام الإباحية هذي؟
انتو عارفين كيف طريقة لبس الهوكرز فليش تنصحونها تصير بنفس هالاستايل الواطي!!؟
من جهة أخرى: ليش الزوجة إذا خانها زوجها حتى لو بالنظر قلتوا لازم تسوي نفس اللي يشتهيهم.. لنفرض ان الزوجة هي اللي خانت زوجها، هل بينقال للزوج في هالحالة لا تبين لزوجتك انك دريت وحاول تقلد اللي تناظرهم بالإنترنت أو اللي تخونك معاهم؟؟!!
دايماً المرأة تتحمل جزء كبير من الهم والقلق والعذاب النفسي عشان ترضي الرجل.. لدرجة انها تُجبر على تغيير مظهرها إلى الأرخص والأوطى عشان يرضى عليها ويكف عن مشاهدة اللي بالإنترنت!!!!
وصدقوني حتى لو لبست له لباس فاضح ومشت قدامه وسوت حركات اللي بالمشاهد الخليعة المنتشرة بين بعض الرجال هداهم الله.. مهما سوت ماراح تملى عينه ومستحيل يتوب عن هالأفلام والصور لأن اللي يتعود على شي ممكن يوصل إلى درجة الإدمان تماماً مثل إدمان المخدرات.
المشكلة يبي لها حل أفضل من انها تقلد اللي بالنت..
المشكلة إذا ما انحلت راح تتعقد أكثر اذا استمر الصمت من ناحية الزوجة...
أنصح الزوجة انها تصارح زوجها بغلطته لأنه بصراحة اللي قاعد يسويه إهانة لها.. لو انا متزوجة وزوجي يطالع هالخرابيط من وراي بشك في مظهري وقدراتي الجنسية وجسمي وبفقد الثقة في أنوثتي وجاذبيتي وبحس بجرح في الكرامة!
إذا كان عندك كرامة وقفيه عند حده.. لا تلتزمين الصمت حتى لو كان عنيد لأنه الغلطان.
واذا قال لك ليش تفتحين جهازي من غير علمي، قولي له انا ما كان قصدي أتجسس عليك بس كنت ابي شغلة بالكمبيوتر وبالصدفة شفت الصور والأفلام... بيني له انه تسبب لك بجرح كبير... حسسيه بغلطته في حقك.... المفروض هو اللي يخاف من فتح الموضوع هذا مو انتي!
واهجريه فترة بالفراش وعامليه بثقل وتغيري عليه.. واذا حسيتي انه تأدب خليه يوعدك انه ما يرجع للغلط مرة ثانية وادعي ان الله يهديه دايم بكل صلاة.
أما اذا ما تاب ورجع للشي هذا فهدديه انك تروحين لبيت اهلك وتعلمين أحد كبير من العايلة عشان ينحرج.. وممكن تروحين لبيت أهلك وتقعدين هناك لين يحس بقيمتك ويتحسف.
اختي.. غيري بستايلك اذا انتي مقصرة، بس انتبهي تنزلين من مستواك لمستوى البنات اللي يطلعون بالأفلام الإباحية.
مع تحياتي