اناا اشوف انك شايله هم ماهو همك

يعني شايله هم مؤونة البيت
شايلة هم فواتير كهرباء وغيره

وهذي أمور مالك دخل فيها
اقصد هو يدبر راسه


ان جاك بعد الزواج يشتكي قلة الفلوس وكثرة المصاريف

استمعي له باهتمام لكن من دون ماتمدين ايدك وتعاونينه


هذي شقته وهو مسؤول عنها

حتى لو لمح سوي نفسك مو فاهمة تلميحاته

وهو قالك بيشتغل على تاكسي يعني شفتي بيدبر أموره فليش تشيلين هم مادري



اناا مثلك موظفة
زوجي بداية زواجنا كان يلمح لي اساعده بالفواتير اناا طنشت
صرح لي مرة وقلت مو مشكله بس ماطلت فكان يبي يسددهم من صرافتي
رفضت وزعل واناا زعلت قلت له مو من حقك تزعل

الان ماشاء الله مايلمح لي اني اساعده
بالعكس صرت اعتمد عليه في بعض مصاريفي وطبعا اعطيه المصاريف البسيطة الي تناسب راتبه

ماعمري شلت هم مؤونة بيت أو فواتير ههو الرجال

وأنا ابي زوجي يظل بعيني رجال افتخر فيه

حطي براسك كل رجال يتزوج موظفة هو يبيها تساعدة
سواء كانت بنت أو مطلقة فلاتحز بنفسك





لكن بذكائك وصليله انك تساعدينه بأنك تشيلين مصاريفك الشخصية
وهذا أكبر مساعده تقدرين تقدمينها


وهي حقيقة احنا نساعدهم من هالناحية ونخفف عليهم أعباء كثيرة

أكثر من هالمساعده صدقيني بتندمين عليه وبيطيح زوجك من عينك

أختي معالي إذا لم أكن مخطئاً فإنه كانَ لكِ موضوعاً في قسم المطلقات ذكرتي فيه أنه تم خطبتكِ، وكنتي من قبل مطلقة.

عموما المسألة يجب أن تدرس بعمق.

أولاً مامدى تقبلكِ له؟ كشخصيته؟ هل تفهمينها جيداً؟ هل مرتاحة له أو حبته أو لا؟ هل تشعرين أنه فعلاً رجل؟ هل تعتقدين أنه لا يمثل أو يستخدم دموع التماسيح؟

هل أنتي عاطفية في تقييمك للأشخاص؟ أم لا ؟
هل ممكن تشعرين أنه يكذب أحياناً؟

إذا تقدري تتكلمي عن ماضيه من ناحية إذا كان متزوج من قبل؟ وأنتي إذا كنتي متزوجة من قبل؟ كيف تمت الخطبة؟

ياليت تتكلمي عن البداية ثم بالملكة والمكالمات والإيجابيات والسلبيات والمواضيع ثم بعد أن بدأ يبتعد عن الأتصال بكِ.

ممكن تقدمي فكرة عامة عنه وعنك وعن حياتكما وبعض التفاصيل التي ترين أنها مهمة.

شكراً لكِ ووفقكِ الله.

__________________
ياصبحِ لاتِقبل !!
عط الليل من وقتك..

معالي بكون واضحة معك أكثر
مثل ما ذكرت لك أن الألف وشوي ماتفرق كثير عن ال600
بمعنى أوضح
لو الالف وشوي كانت تكفيكم فعلا مصروف زوجك + مؤونة البيت
فأنا أقدملك الآن كحل أنك تكملي ال600 الى الألف وشوي اللي كنت تعرفي عنها مسبقا , وبهذا تكون التكملة مساهمتك أنت كزوجة في مصاريف البيت , وهو مبلغ يسير جدا لا يذكر , لو كل الموظفات يصرفون مثله في بيوتهم كان عاشوا بهنا وبدون مشاكل مع أزواجهم لانه مبلغ بسيط ..

هذا هو الحل ببساطة

ولكني أشعر أن الموضوع أعمق من موضوع الصرف
بدليل أنك الى الان لم تأخذي وتعطي معه في موضوع الصرف ومسؤوليات البيت حتى تعرفي مالك وما عليك

تفكيرك اتجه للانفصال مباشرة
بدون حتى ان تتناقشي معه

__________________
الحمدلله الذي بنعمته تتم الصالحات

معالي اشوف انك مكبرررره الموضوع ... راتب زوجي كان اكثثر مَـَُِنٍّ 10.000 وفصل من
عمله و اشتغل بوظيفة براتب 4000 غير الديون اللي عليه وعندي 3 بنات
بس يصرف اكل و شرب فقط و الباقي علي . وكل الموظفات هم اللي مأثثين بيوتهم
يمكن صح أول الزواج بيوتهم مؤثثة لكن لو يخرب شي ما يغير الا هم
أذا اخلاقه زينه كملي معه .... و اصرفي على نفسك فقط اكل وشرب أجار بيت خليه عليه

__________________

يمكن نظرة كل وحدة تختلف عن الاخرى ؟

أنا لو زوجي يشتغل كناس لو اي شغلة شريفة ..
و براتب زهيد .. و يحسن تدبير راتبه ..

و مايقصر معانا معنويا ..

عادي .. اصرف كل راتبي معاه ..

.
.

كانت شكوتي سابقا من اهماله و استهتاره .. حتى انفصل من عمله ..
و لما يشتغل مايعرف كيف يصرف راتبه و طيشه السابق

.
.
لكن لو نظرت للحالة المادية ..

حاليا .. مصاريف البيت .. و كل شي علي ..
انا ساكتة .. لاني شايفته بيشتغل اشغال مؤقتة .. تأتيه بمصروف يومه ..
مثلا يكسب 50 ريال اليوم .. باشوفه يروح يصرفها عالبيت ..

و لا انه ينام و ياخد مصروفه مني ..
او يستدين .. او يروح يصرف الي كسبه على اصحابه .

.
.

المهم ..

الوحدة تعيش كم مرة ؟
خلاص .. ابغى اعيش حياتي .. اشتريت بيت و الحمد لله .. و راح أأثثه ..
و هو لو معاه راتب و حصل على وظيفة .. قال بيشيل معايا ..

بس المهم عندي ..

انه يكون رجال .. و يهتم فيا و في الاولاد ..

.
.

زوج اهتي مليونير ماشاءالله ..
*اختي

لكن جفاف عاطفي .. و كل شي يحسسها انه بفلوسه .. و انها ولاشي بحياته
مجرد مربية لاولاده ..

و كمان يخليها تصرف على حالها من راتبها ..

لييييييش اعيش مع واحد مليونير او غني .. و يقصر عمري ؟

ههههه صح زوجي مقصر عمري

بس عالاقل يهتم لمشاعري و لي خاطر عنده و يحاول يسعدني ..
هذه عندي هي الاهم ..

.
.

انت شوفي ايش تبغي و هل تتحملي الحياة معاه بالطريقة هذه و لا راح تعيشوا بمشاكل يومية ؟
لاسمح الله

.
.

صحبتي .. راتبها و راتب زوجها بيدها هي .. و راتبه الفين ..
و البيت حقة اهله .. يعني ببلاش ..

و ماعي قادرة تتحمل و مشاكل كل يوم .. تقول له .. حتى لو تسرق ..
ابغى اعيش زي العالم ..

و ندامانة هي .. و تقول لو رجع الزمن باتزوج واحد غني ..

مع هذا الراي بكل كلمه

كملي المبلغ واشتري راحتك الى ان الله يفرجها عليه
ان كنتي على قناعه باخلاقه ودينه

ربي يختار كل الخير ويسهل امورك

__________________


سبحان الله و بحمده
عدد خلقه و رضى نفسه
و زنه عرشه و مداد كلماته

~♥¤♥¤♥¤♥~

:*

معالي
أنا مع فاكهة الشتاء أنت أتجهت مباشرة للأنفصال وسؤالي هنا هل لازلت تقارنيه بزوجك السابق وتبحثين
عن رجل مماثل له من ناحية المستوى المادي وغيره..؟؟

إذا أنت تبحثين عن رجل طيب وخلوق تعيشي في كنفه وتتعاونين أنت وهو على الحلوة والمرة
وزوجك هذا طيب وابن حلال وعيبه قلة راتبه فتغاضي ياحبيبة وربي بكره يفتحها عليه ويسعدك
وفكري في الأمومة وفي الأستقرار في كنف زوج وإذا العيب بس قلة الراتب فهذا مقدور عليه
بما أنك موظفة

__________________

النقطة الأهم في الموضوع يا معالي هل الرجل جاد أم لا في الموضوع؟ إذا هو جاد فمسألة الفلوس تنحل،أم أنه يريدها تأتي منكِ؟

__________________
ياصبحِ لاتِقبل !!
عط الليل من وقتك..

لؤلؤة حبيبتي،،

تدرين ليه شايلة هم ( المفترض) يكون مو همي،، لأنه رح يكون من واجباتي في حال
ماقدر يدبر راسه،، وأنا بطبيعتي عاطفية وفوق كذا يدي مخرومة،،
وأخاف مع الوقت يتعود ع الصرف من قبلي ويشوف ان هذا الشي صار واجب علي
ويتملص،،

إذا ع التلميح فأنا ( كأني) استوضحت من كلامه عن خطيبة اخوه تلميح بأنه محظوظ فيها وانه يتمنى أكون مثلها،، استغفر الله يمكن مو نيته لكن انا فهمت غلط طبعا هذا لكلام ما قاله في نفس المكالمة اللي صدمني فيها بالخبر قاله في مكالمة سابقة،،

وانت ي قلبي هونتي علي الموضوع جزاك الله خير،، انا ماانلام أبدا،،
صايرة حساسة من الرجال وبقوة من بعد تجربتي السابقة،،

وأنا مثلك بالضبط ما ودي يهتز كرجل في نظري،،
لإن كوني رح اصرف عليه هالشي ينزله من عيني كثير

وهذا اللي ما اطمح له في زوج المستقبل،،

جدا افدتيني بتجربتك وقصتك وفتحتي ذهني لأفكار ما كانت في بالي،، جزيت خيراً حبيبتي

__________________
ربي احفظ لي ابنتي ..

أخي الكريم

أولا احب ان أجيب على تساؤلك الأخير بأني تأكدت بأنه جاد والدليل انه ارسل لي بالأمس فيديو يلقي فيه شاعر قصيدة ومن أبياتها :
الفقر للرجَّال ماهو بعذروب
الرجل عذروبه ليا باح طيبه
لا صار بليا طيب لو يملك شعوب
راس(ن) بليا طيب ما ينبديبه
... الخ

فلو انه غير جاد ما ارسل قصيدة بهذا الموضوع وفي هذه الظروف،، بل سكت وانتظر جوابي السلبي الذي يريده،، من هنا تأكدت ان الرجل خائف ان يخسرني،،

بالنسبة لتساؤلاتك حضرتك السابقة عن انطباعي عنه ونبذه عن حياتي وبداية علاقتي معه سأجيب عليها بالتفصيل :

ما مدى تقبلي لشخصيته؟
متقبله لها مع رغبتي في تطوير بعض الجوانب فيها كالاهتمام والابتعاد قليلا عن الثقل الزائد،، وزيادة ثقافته وعلمه،،

هل أفهمها جيدا؟
لازال يكتنفها بعض الغموض فلم اكتشف جوانبها بعد ربما لقلة مكالماتنا،

هل مرتاحة له وحبيته ام لا؟
ما أدري هالسؤال ليه أتوقف عنده كثير وأفكر وأغوووص كثيرا داخل نفسي،، مدري احبه ولا لا إلى الآن مشاعري متأرجحة،، مرات اشتاق له،، ومرات لا،، وع الاغلب مشاعري تجاهه محايدة،، في نفس الوقت اكره يصيبه أذى ،، بالنسبة للراحة النفسية انا ع العموم مرتاحة له سبحان الله،، بس بعض كلامه يشككني في نواياه زي روايته لقصة اخوه،،

هل أشعر انه رجل؟

مممممم خف الشعور هذا كثير لمن عرفت بظروفه مدري ليه ،، من اول كنت أشوفه مثال للقوة والرجولة بس لمن عرفت ان فيه احتمال اني اصرف ع البيت تغيرت نظرتي له،، مدري طبيعي ولا انا فيني شئ،،

هل اعتقد انه يستخدم دموع التماسيح؟
مستحيل، دمعته صعبة نوعا ما،.

متزوج من قبل؟
لا، لم يسبق له الزواج،.
ويقول انه كان يبغاني من قبل بس تفاجأ بزواجي،،
وما صدق تطلقت وجا يخطب،، وقال انه اعجب
بي من كلام أخواته عني،،

بعد الأحداث الأخيرة وسوس لي إبليس ان كل
ها لقصة الرومنسية مجرد خيال،، وان اللي
شجعه ياخذني في المقام الأول وظيفتي>> مجرد وسوسة

بالنسبة لي انا تطلقت قبل من زواج دام سبعة اشهر وانصدمت جدا وتعبت نفسيا بعد الطلاق،،
طبعا الأغلب هنا يعرف قصتي،، وبإمكانك أخي مراجعة موضوعي ( مكسورة) للاستيضاح،،

http://www.66n.com/forums/showthread.php?t=235778

طبعا كنت أحب طليقي جدا،، والى الآن أحيانا يجي على بالي خاصة في أوقات الأزمات مع زوجي الحالي مثل هذه الأزمة

بداية خطوبتي،، كنت مرتاحة جدا لأهله،، وأبوه معروف بأخلاقه بين الناس وله ذكر ماشاء الله وأمين جدا لدرجة انه رفض يخطب لولده الثاني لان طباعه مو كويسة وقال له روح اخطب بنت خالك بنفسك،، أما زوجي فقال لأبوي انا أضمنه مئة في المئة وهو ذراعي اليمين وبار في وفي امه وهو يعرف أبوي من زمان وقال مستحيل اجرؤ أخطب منك وأنا مو واثق بولدي ( بس هو من قبيلة جددا بعيدة عن قبيلتنا، انا نجدية وهم من قبايل شمال غرب المملكة بس ساكنين ومستقرين في نفس مدينتنا في المنطقة الغربية) ،، أمانة أبوه وخلقه المعروف خلاني أثق في شهادته تجاه ابنه واتطمن،، أبوي حتى ماسأل من كثر ثقته،، طبعا انا تغاضيت عن بعض الشروط اللي كنت أتمناها مثل الشهادة والمستوى الاجتماعي والثقافي والمادي المعقول ،، مقابل اني ضمنت أخلاق الشخص( والضامن هو الله) وقلت الشهادة يكمل ويأخذها، والمادة مش بطالة( على اعتبار ان راتبه كان حول الخمسة) والمستوى الاجتماعي والقبيلة كلنا عند الله سواسية وقبيلتهم معروف اصلها وفصلها وما عليهم خلاف،، تم الموضوع وتملكت،، شفته وارتحت له كثير،، وبدأنا نكلم بعض فترة، بعدين صار ينقطع،، ومرة سألته ليه هالقطاعة فقال لي: وانت ليه ما تكلمين؟! الظاهر كل واحد فينا ينتظر الثاني يكلمه،،

طبعا اكتشفت بعدين انه ينزنق أحيان في الشحن بسبب ظروف الزواج،، واحيانا مدري ليه ما يكلم ولا حتى يرسل رسائل واتس إلا نااادرا،، مرة قال لي يمكن انا ما عندي أسلوب في التعبير عن الحب بس اوعدك رح تنبسطين معي بعد الزواج،،

جرررئ جدا ويتكلم في ألامور الخاصة كثير، واكثر من مرة ابدى رغبته في انه يطلع معي في (( فندق)) جدا جدا صدمني وهزأته، طبعا قال ما فيها شئ الكل عارف بزواجنا،، بعدين لمن يشوفني معصبة يضحك ويقول انه يمزح،، مع العلم انه أكثر من مرة اقترح هالاقتراح،،

يكره الدراسة جددا وما عنده طموح للأسف من هالناحية،، إيه صح مرة قاللي مزحة نسيتها،، بس بعد اللي صار حاليا تذكرتها قاللي ليتني اترك العسكرية واجلس في البيت أنظف وأطيبه واكنس وانت تشتغلين ويضحك وأنا طبعا ضحكت وقلت هذا اللي باقي على أساس أنها مزحة ( هو يكره العسكرية جدددا ومتعبته ويتمنى يغير وظيفته)

هذه أبرز الجوانب اللي تذكرتها أخي الفاضل،، وآسفة ع الاطالة،، وشاكرة لك تعاونك معي،، جزاك الله خير،،

__________________
ربي احفظ لي ابنتي ..