ياجرح فعلا انا لاحظت الي كله يعطي

يجي يوم يظنون الناس ان هالامور واجبه عليه

لا واذا بيوم ماسوه الي متعودين عليه منه يزعلون وكانه قصر بحقهم

ماكانه كان كرم اخلاق منه

لذلك لاتعملين اشياء ماهي واجبة عليك وماهي ضرورية

كل مرة

لا مرة اعمليها ومرة تعذري علشان لما سوين شي لهم مرة ثانية
يعرفون انك تكلفتي علشانهم وماهو واجبك

يعني هادئ نسبيا و الوضع يشجع على فتح الموضوع بكل هدوء...

هو الحين ما يبي يكسر كلمته قدامج... و في نفس الوقت انت مب ملزومه شرعا انج تسوين الشي هذا... سويتيه كسبتي الأجر و الثواب من حسن التبعل... ما سويتيه فما راح تأثمين عليه لأنج شرعا مب ملزوووووووووومه...

و لكن خلينا نمسكها بالنص شو رايج؟

تكلمينه اليوم بعد العشا و بكل هدوء و بورقان و تدلعي شوي... ياختي في وضعيه دلع يبالج تتعلمينه يمكن تجيب راس الأخ اللي عندج... و لكن ما علينا... الحين نبي نوصل للأخ نقطه ان مب حلوه تقول لي اروح بيت اهلي علشان ما نظفت المكان مره... خاصو انج مب مقصره معهم... و خااااصة ان الغرفه مب في بيتج أصلا بل في بيت امه.. فليش مب الخدامه هي اللي تسوي هالشي مب انتي...


تتوقعين هالشي ينفع معاه؟

لؤلؤه... المشكله يوم الناس مب راضيه تفرق بين واجبات الزوجه و الأشيا اللي تسويها من حسن التبعل للزوج... تعرفين ليش؟ لأن الكل تربى في بيئه و شاف امه و خالاته و عماته و جداته يسوون كل شي و على قولة واحد من المعارف..."الوحده كانت تخدم و تسوي و بعد تاخذ على راسها و فقيره ما تقدر تفتح حلجها بكلمه"... هو طبعا يقولها و هو يواسينا... فيستغرب يوم تجي زوجة المستقبل تقول ستوب انا ما بسوي هذا...

امهاتنا ما قصروا في كل شي... و لكنهم كانوا يستندون على عادات و تقاليد اكثر من كونها واجبات شرعيه.. يا اختي إذا حق الإستمتاع ما كانوا يعرفونه... و يظنون ان المتعه بس للرجل و هي ما لها شي ابدا... فما بالج بالخدمه و هالسوالف!!!

انا عارفه انه رح ينفع ورح يرضى لانه عرف انه جرحني جدا بكلمته بس لو اكلمه بيقول لي ليش ماتسمعي كلامي وليش تردي وتقولي اخوانك ماني ملزومه فيهم وبدافع عن نفسي وبنرجع من جديد فخليه يداوم بكره بعد بكره يصير خير واحتمال كبير ماناقشه خلاص امشي الوضع نفس ماهو عليه والغرفه خلاص اتوقع نسي امرها ماعاد فتح السيره يعني لابنظف الغرفه ولابروح لاهلي بس بيعاقبني بصمت

لحظه لحظه لحظه...

الحين فتحتي موضوع من اول الصبح..

و نقاش و حاله..

و آخر شي هذا جوابج!!!

إذا كنتي عارفه الوضع جي بيكون... فليش فتحتي الموضوع؟

انتي تعبانه من الوضع... و شكلج طلعتي حرتج هني... الحمدلله انها هني مب معاه... على الأقل أهون شوي من انها تكبر بينكم...

انت اصلا شايله عليه وايد.. و شكلها القشه التي قصمت ظهر البعير عندج صح جرح؟

أختي في الله غزلان

كل اللي أتكلمين عنة معروف ونعرف أن الحق الشرعي للزوج من زوجتة هو فراشة فقط ، لكن وبما أن الرجال عندة واجبات خارج البيت من شغل وتعب وكدح ومسؤوليات عشان يوفر لأهله حياة كريمة كذلك المرأة لازم تشاطرة مسؤولياتة وتمسك بيتة وتهتم بشؤونة الداخلية كلها!! لأن كل اللي علية هو ك رجل أنه يهتم بالشؤون الخارجية اللي توفر لأهله حياة رغيدة ، وتوفرلهم حياة كريمة.

وإلا على كذا خلاص نلغي موضوع النفقة المادية وما اعطيها مصروف وأكتفي فقط بمسكنها وكسوتها ومأكلها وأنتهينا!!

وإذا أطلبتني فلوس أقولها مالك حق لان الشرع ماقسملك شي مادي!!

أو أقولها والله ماني مسفرك ولاني مخرجك ولاني أمشيك لأن الشرع ماقالي كذا!!

صحيح أن الأعراف والعادات والتقاليد أحكمت بخدمة الزوج لكن لما أنقول أعراف مش معناتها ان كلها غلط او عيب أو مهينة!! بالعكس فيه منها محبب جداً وقريب من الدين والشرع حتى لو ما نزل فيها حكم شرعي.

عموماً أنا أتكلم بلغة أن اذا كان الرجل كفو ويستاهل ف على المرأة أن تحطها بعيونة.

وكذلك لأني أبغى مصلحة أختي "جرح" وخايف عليها اتطلق..!! لأن شكل رجالها مندفع!!
وفوق كذا أبيلها الزينة وأبيلها العلم الغانم والسمعة الطيبة!! أبي الناس لاذكروها يذكرونها بخير ويقولون عنها خوش مرة!!
وفوق كل هذا أبيها تعمل بأصلها وطيبها ومالها شغل بإساءات الناس!! أبيها مثل عود البخور كل ما انحرق طلع طيبة!!


أما باقي الاخوات المخببات
فأقول أنتوا حاطين رجل ع رجل وجايات تسولفون وماعندكم شغل!! وتشيشون المسكينة على رجلها!! ولاطاح الفاس بالراس ولاسمح الله وتطلقت كلكم مابتنفعونها ولا بينفعها كلامكم!! ف أما انكم تقولون خير أو أتخذوا من الصمت وسيلة تكسبون فيها الأجر.

__________________
استغفر الله واتوب إليه

اه يااختي والله شايله كبر الجبال من اشياء كثييييييير ومو قادره اتكلم اشياء صغيره بس تجرح وتكره في الحياه غير القسوه وهذا الموضوع اكبر دليلل عليها مايرحم قبل ثلاث ايام امه كانت موجوده وكان عندي نزيف فاهمه. اتوقع اني انام ماصحى او اطيح ماعااد اقوم وهو صحي يقول امي بتجيك واذا تنشطتي سوي لها شي تاكله رغم ان اخوه وزوجة اخوه معاها يعني امه ثم نفسه ثم اولاده وانا اخر القائمه احس كرهت الحياه اللي لازم اكون فيها مااقصر رغم كذا كلامه مرررره يجرح واسلوب ماعنده اقول له امك تجي اشيلها على راسي يقول غصب عنك مو بكيفك يااااعالم انا قاعده اموت من ذا العيشه

في نقاط انتو مب يالسين تلتقون فيها...

طبعه هل هو جاف دائما معاج؟ شو أكثر المشاكل اللي تكون بينكم؟

الرجل عموما يحب يحس بقيمة أهله عند زوجته و خاصة امه... في الموقف اللي ذكرتيه انا معاه و مب معاه.. امه و اخته و زوجة اخوه ياينج ضيوف يعني ما يصير هم يقوومون بأي شي في بيتج (إلا إذا الميانه طايحه و الوضع حلو بينكم و هالشي ما اشوفه).. ردج عليه واااايد حلو و رده عليج قاسي... و لكن هل كان رده بسبب طريقة ردج...

أحيانا لغة الجسد عندنا تلعب دور...

ما اقول ان انتي الغلطانه و لا أقول ان هو الغلطان... و اضح ان في بعد في العلاقه يا اختي... حاولي تصلحين هالشي و ان شاء الله راح ترتاحين...

اسال الله لكِ الراحه...

والله مايدكروني بالخير ولاقد سووها قبل اليوم عمتي مانكر تدعيلي وتذكرني وتشكرني بس سلفاتي واخوانه بالعكس يكرهوني اكثر ويحسدوني لانهم مايبغون احد يمدحني او يقولو شوفو فلانه

اوضح نقطه هم في بيتهم تحت وانا في بيتي فوق مفصولين عنا وعشان انزل او اروح لاهم لازم عبابه لان البيت في سكان فهمتو وهم مو ظيوف كل اسبوع جاايين