رد : يوم زفافكم
[[SIZE="5"]أمل
هل ترانا نلتقي
وابل الندى هههههههه سراقة مرة وحدة ضحكتني الله يسعدك يارب
لينة العريكة
الفردوس غايتي
الله يسلمكم يارب ويجزاكم خير على دعواتكم الحلوة اللي مثل روحكم العسل ولكم بمثل مادعوتم لي وبارك الله فيكم
ومعليش ترى ما احب شغلة الفواصل هاذي لاكن وقتي ضيق ماعندي وقت اطرح كل السالفة في مشاركة وحدة المهم لما قابلنا ابو الشباب في الطريق انا واخته وكعادته مبتسم ويقول لي وين رحتي انا دورت عليك ماحصلتك ورجعت سألت راعي غنم بالوادي عن الحريم اللي كانوا يتمشون بالمزرعة وين راحوا وقال لي إنهم راحوا للقرية يعني كل وحدة راحت لبيتها فتوقعت إنك روحتي معاهم طبعا كان طبعه هادئ معاي ومستحيل يعصب او يزعل عليه كنت بطبعي تصرفاتي دفشة وما عندي اي خلفية عن حقوق الزوج وواجباته وايش اللي لي واللي عليه كنت عايشة حياتي وكأني باقي ماتزوجت لما كنت عند اهله ماكان فيه احد ينتقدني سوى اخته الكبيره وكانت انتقادات لمصلحتي قصدها فيها النصح تقول لي يا فلانة اعقلي واثقلي واتركي عنك حركات العبط هاذي انتي كبرتي وصرتي راعية بيت لما اعاندها وارفع لها ضغطها تقول لي الله يعين اخوية عليك ويصبره وكنت لما اروح عند اهلي كانت الوالدة ماتقصر الله يرحمها دائما تفهمني وتنصحني وتوجهني لاكن انااقول لها طيب خلاص ابشري حاضر ولا يهمك وعلى امرك بس كلام كانت تقول لي الزوجة تغسل لزوجها ملابسه وتهتم فيه وتراعية وتطبخ له الأكل وانتي من يوم ماتزوجتي زوجك حتى كاسة الشاي ماتكلفين عمرك وتطبخينها له يابنتي خليك عاقلة وراكدة وتعلمي لشغل البيت الحين انتي لما تكونين عندنا اختك الكبيرة وانا سادين بمكانك عن شغل البيت ولما تكونين عند اهله ام زوجك واخواته مايقصرون لاكن لو طلعتي في بيت لحالك كيف تبغين تتصرفين وانتي ماتعرفين لطبخ والغسل وشغل البيت طبعا من اصرارها عليه وكثر نصايحها حبيت اوريها إني اعرف اشتغل واطبخ واقوم بحقوق زوجي مثل كل النسوان وابتديت اطبخ لزوجي واغسل ملابسة وضبط له الشاي والقهوة واجيبها له لاكن والله وبالله وتالله إني ما ضبطت معاي ولا شغلة منها كلها اول شئ الطبيخ الرز اجيبه له إما هريس او حبوب ويامالح او ناقص ملح واوقات ما اتذكرإن مافيه ملح إلا وهو مصروف على الصحن وارشه ملح من فوق وهو على الصحن والخبز والله ان العجينة تطلع معاي من برى مطبوخة لاكن وسطها نيئ ومن سمكها تتقسم اربع قطع وانا احطها خبزة وحدة الشاي والقهوة ما اذكر إني قد سبق وخليت الإبريق او الدله تغلي بس الماء يسخن شوية وعلى طول على ترامس القهوة اصبها ولو ذاقها زوجي وشاف سخونتها ضعيفة وسألني اقول له ترامس القهوة تقليد ولا القهوة غلت الين فاحت ريحتها وشموها الجيران يشرب له فنجان وبياله شاي ويسكت بالنسبة للغسيل كنت اغسل له الملابس والله ما اقصر فيه لاكن مستحيل اشطفها من الكلوركس والتايد على طول من الغسالة إلى النشافة على حبل الغسيل بدون تشطيف بموية نظيفة انشرها بريحة الكلوركس ورغوة الصابون وما امداني استنى يومين بس إلا وزوجي كل جسمه حساسية وكان يهرش الجلد الين يتقشر ويطلع الدم من شدة الحكة والحساسية خلاص جسمه صار فيه التهاب واحمرار شديد وراح للمستشفى واعطوه دواء مرهم وقالوا له اكزيما حساسية ولما شفت الوضع ازداد سوء رحت ادور له علاج شعبي وحطيت له حناء مع زيت زيتون وخليته دافئ وجيت احطه له على جسمه يا الله يالطيف الرجل ولع مثل النار شب في جسمه عاد الحناء جاء على القروح اللي مكان الحكة وزاد الإلتهاب والألم بزيادة وانا عن نفسي ماكنت اعرف إن اللي صاير في جسمه كله من اسباب غسيل الملابس ولا انتبهت عليه اختي الكبيرة إلا في وقت متأخر وقامت تعاتبني وتنصحني وفهمتني كيف اغسل الملابس كنت ما اعرف اسوي شئ من شغل البيت ابد كل البيت على راس امي واختي الكبيرة وتزوجت واصبحت فجأة عليه مسؤلية زوج ولا البيت كان باقي ما ضبط وضعه المادي واستقلينا في بيت لحالنا وإلا كانت الكوارث اشد واطم من كذا بس الله ستر كنا لما يجي اجازة نروح عند اهله ولما بيسافر يرجعني عند اهلي طبعا ما اتقنت شغل البيت مية المية إلابعد ماتزوجت اختي الكبيرة وسافرت مع زوجها حينها كنت انا مسؤلة عن شغل البيت حتى زوجي تحسن وضعه المادي واخذ لنا بيت وسافرت معاه ورجع الدور على أختي اللي اصغر مني طبعا بعض المواقف اللي صارت لي كنا عند اهله في اول ايام زواجنا وطلب مني اجيب له في اليل كأس موية يشربها ورحت اجيب له طبعا اهله كانوا كلهم نايمين مافيه إلا احنى صاحين ورحت اجيب له الماء في كأس زجاج ولما رجعت تعثرت وطحت في البلاط والكاسة انكسرت في يدي واصبع يدي اليمين السبابة دخلت فيها حافة الكأس وقطعت الأعصاب ووصلت للعظم والله لما سحبت الكاسة من اصبعي إني كنت اشوف بياض العظم الصغير اللي بإصبعي وسحبته وهو جاء ركض ولما شافني كان يحاول يوقف الدم بس ماقدر وشق فنيلته اللي كان لابسها واخذ منها جزء وربط على الجرح وجاء لبسني عبايتي وغطوتي وهو لبس ثوبه على فنيلته مقطوعة نسي لايغيرها وشالني وداني للمستشفى وعملوا لي اربع غرز في إصبعي واعطوني ادوية وروحت للبيت وجلست حدود اسبوع هو يوكلني بيده كنتةماةاقدر أكل بيدي وكان متحسف ومتندم ويقول انا السبب لو رحت جبت الموية ماصار فيك كذا والحمدالله موقف عدى على خير طبعا الموقف الأخير هو يوم ما وداني لأهلي وكان مسافر وقتها لشرقية كان معسكرهم بالشرقية عقب مارجعوا من الكويت كانت آخر ليلة لنا مع بعض وهوكان طفشان وزعلان وشفت دموعة نازله اربع اربع ماوده يسافر وانا جالسة اضحك علية واقول له وش فيك تصيح مريض متضايق من شئ احد زعلك بشئ قال لا والله بس طفشان الحين لو سافرت مابيعطوني إجازة عن قريب علشان ارجع لكم اشوفكم قلت له عادي طيب وليش مستعجل على الرجعة استنى حتى يعطونك إجازة وتعال بعدين ليش تسوي في نفسك كذا المفروض تكون مبسوط بتسافر وتشوف اصحابك هناك وتتمشى معاهم قال لي الحين لو سافرت ماراح تشتاقين لي قلت إلا والله بشتاق لك وافقدك لاكن ايام الإختبارات بس من بيذاكر لي دروسي ولا غيركذا عادي لو تجلس خمس سنوات مسافر عادي عندي طالع فيني شوية وسكت مسكين تحطمت نفسيته بالمرة وانكسر خاطره وانا ولاهمني جلس عندي او سافر ما اهتميت لفراقه ولا شئ عادي عندي وكمان كان لما يناظرني ويطيل النظر وهو يطالع فيني اقول له خير وش فيك تناظر فيه شئ مو عاجبك وليش تناظر فيني كذا بطل هالحركات ماتصلح عيب كان يقول اتأمل فيك ومو عيب الواحد يناظر في زوجته كنت اقول له خير شايفني مبنى اثري قدامك كل شوي تطالع فيني وكمان كنت ارفض انه يجلس جنبي وانا عند اهلي او اهله او يمسك يدي مستحيل اخليه يقرب صوبي عيب كل شئ عيب واستحي على وجهك مايصير نجلس جنب بعضنا قدام الناس او تجلس تناظر فيني كل شوية وفيه شئ ثاني بعد كان عندي شروط عليه في اشياء خاصة بيننا حاطة له حدود مثلا وقت الظهر والعصر ما اجلس معاه في غرفة النوم لوحدنا اخليه جالس فيها لحاله وانا اروح عند اخوات زوجي او اخواتي ان لاقيتهم صاحين سولفت معاهم وإن كانوا نايمين اشوف لي اقرب سرير في غرفتهم وامسكه نوم جنبهم وهو نايم بالغرفة لحاله كانت الكبيرة من اخوات زوجي تقول لي ليش ماتنامين عند زوجك في غرفتكم اقول لها يشخر ومايجيني نوم عنده اصرفها قالت يعني اخوية في النهار يشخر وفي اليل مايشخر الله يعينه عليك ويصبره طبعا في اليل كنا اوقات انا واخوات زوجي نسهر ونخربها للآخر وعمي يصحى ويمر يطالع لغرفة بناته نورها شغال يفتح الباب ويدخل علينا ويجلس يناظر فينا وحدة وحدةالين يوصل عندي ويوقف ويقول لي حتى انتي معاهم هنا وتاركة زوجك بغرفته لحاله الظهر الآقيك هنا وحتى في اليل هنا معاهم وش استفاد زوجك وجاء قال كل هذا من البنات هم اللي خربوك وقفل التلفزيون وشال الفيش معاه وجت ام زوجي وتهاوشه وتقول له وش دخلك فيهم خلهم بنات ينبسطون ويسولفون مع بعض قال لها بناتك فاضين وبيخربون زوجة اخوهم معاهم قالت له هو اخوهم اشتكى عليك من زوجته قال لك شئ قال لا مايحتاج يشتكي ويقول انا شايف كل شئ قالت له طيب خلاص مالك فيهم شغل بس عمي الله يحفظه شكله حاس بمعاناة ابنه ورجعناانا والبنات لما نسهر ونحس إن باب غرفة عمي انفتح نعرف انه عمي جاي على طول انا ازت نفسي تحت اقرب سرير من اسرة البنات وهم يشيلون شرشف ويغطون فوق السرير ويسدلون الشرشف على اسفل السرير علشان مايشوفني يدخل يتفقد البنات ويقول لهم غريبة اليلة فلانه ماهي معاكم سهرانه يالله زين الله يصلحها ويهديها يارب ويروح واحنى نكمل السهرة لاكن كثير اوقات يصيدوني نايمة بغرفة البنات زوجي يسهر معانا احيان بس يكسل ويروح ينام يقول لي يالله نروح ننام بغرفتنا اقول له انت فاضي انا ابغى اجلس مع البنات بنشوف المسلسلة الفلانية اليلة الأخيرة روح نام ماني ماسكة النوم عن عيونك ولا لو شفت الحاحه زاد اقول له روح وانا الحق وراك بعد شوية وكنا نقضيها سهر شاي وفصفص كانت جارتنا تبيع فصفص وكل ماخلص الفصفص رمينا حصى على نافذة بيتها وتفهم انا نبغى فصفص تطلع وتعطينا كيسين ثلاثة وتناولنا اياها بيتنا الباب في الباب مرة رمينا حصى على نافذتها رمت اخت زوجي بحصاتين والحرمة تأخرت ماردت علينا بسرعة واني ارمي الحصى الثالثة مع فتحتها لنافذة وصقعتها في راسها وانها تصيح خلاص بس سمعتكم الله لايبارك فيكم وجت اعطتنا الفصفص وقالت من اللي رمت الحصى الأخيرة قالت لها اخت زوجي فلانه قالت حضك علشان انك عروس وظيفة ولا كان رديت لك الحصى هذا في راسك وجايبته معاها في يدها ورتنا راسها والله انه طالع مكان الحصى مثل الكورة بين شعر راسها وكنا الأوقات اللي نسهر فيها على المنوال هذا حتى اروح من عند اعماميطبعا معليش الموضوع هو عن يوم الزفاف عاد انا كملتها حتى شهر البصل اللي قضيناه انا وزوجي مع بعضكان زوجي يقول لي كلام حب ورومنسي وغزل يبغاني ارد عليه بالمثل وانا الف فيه لموضوع ثاني حتى في بداية زواجنا كنا نسمع اغاني انا وهو والحمدالله اللي الله حفظ سمعنا عنها في مابعد كان هو يجي يحط بالمسجل اشرطة لمحمد عبد
__________________
جمال العقل بالفكر
وجمال اللسان بالصمت
وجمال الحال بالإستقامة
وجمال الكلام بالصدق
اشهد ان لا إله إلا الله وأن محمد رسول الله
التعديل الأخير تم بواسطة أم سلطان1 ; 16-12-2012 الساعة 01:28 AM