ياجماعه الخير .. جلست مع خالها واتكلمنا في الموضوع قلت اللي عندي من اهتمام في البيت و طبخ الغداء وتنظيف ملابسي وتجهيزها بس طلب منى اعطيها مصروف شهري مايقل عن 1000 ريال و رضوه 5000 ريال عشان ضربتها ( رغم اني ماضربتها نهرتها ومسكت يدها ودقنهاا فقط ) وتقضي للبيت رغم اننا شهريا نقضي بس اخذتها حجه عشان هاذا الشهر ماقضينا شي بحكم انها سافرت للرياض 10 ايام وانا طلعت للدمام كان عندي اجتماع وشغل وبعد مارجعت انشغالنا بيوم او يومين - حاليا اانا مطنشها وماكلمتها رغم رسايلها واتصالها على ...
ايش رايكم يااهل الراي !!؟ هل تنفع ان تكون زوجه على المدى البعيد ام هناك وقفه في الموضوع !! لاني بصراحه ماحبيت كلامهم عن الماده والرضوه !!!

طيب وايش كان ردك ؟
يعني انا شايفه انها تجرب عليك او تبغا تشوف ردة فعلك
بالنسبة لكلام خالها المصروف ماقصرت عليها والبطاقه معاهاا
والرضوة انتا اللي بحاجتها خخخخخ

وحاسه انو لو تقلب عليها الطاولة وانتا اللي تسير زعلان ممكن يرجع لها عقلها
وتحاسب اكثر في تصرفاتها

__________________
-

" وَلسوف يُعطيك ربُّك فترضى "

هناك اسباب تجعلني ضدها...
1) العمر فهي ليست صغيره حتى نلقي اللوم على صغر سنها
2) هناك سبب جعلك تتاخر في ان تقضي للبيت وهي سفرها وسفرك والتاخير يومين وطبيعي جدا يعني من المفترض زوجتك
اطلاقا مااشتكت ولو ضايقها هالموضوع تجي عندك وتقول لك حبيبي البيت فاضي نبي ننزل الليله ونجيب اغراضنا يعني غلطانه
3) تضجرها من القيام باعمالها المنزلية على الرغم من دخولها مرحلة النضج وووعيها التام
4) اخراج اموركم المنزلية خارج اسوار المنزل يعتبر احد وابرز فشل العديد من الزيجات
5 ) محاولتها ان تكون كلمتها هي التي ماشيه عليك وعليها وعلى البيت
6) مكوثها بعدم رضاك عند اهلها يدل فعلا انها تبي كلامها فقط الي يمشي

اخي زوجتك تتمتع بشخصيه قويه والله يعينك ويعينها والدليل ان اخيها الذي كان ولي امرها لم تكن تلقي بال لكلامه بل تمشي خلف كلامها هي فقط

والله يااخي هذا موقف لصالحك ويااما انك تبين شخصيتك لها او انك ترخي لها وراح تمر عليك مواقف مشابهه لهذا الموقف
وتتعب وتعاني كثيرا

عليك ان تطنشها فعلا وترسل لها رساله تبين فيها الواجبات المنوطه بها كزوجه والتي تكون سبب في اسعاد منزلكم
واستمرارية الزواج بكل حب وسعاده
وتكتب ايضا انك ستقوم بواجباتها على اكمل وجه
وكل شخص يقوم بواجباته بالمنزل وذيل الرساله بوقت محدد انت تحدده وتعطيك قرارها
يااانها تعيش معاك كزوجه انثى بكامل انوثتها وطاعتها كما امر الله وانت كزوج لك القوامه من صرف وتدبير لامور المنزل كما امركما الله

او تختار مايناسبكما جميعا

اخي هذي فرصتك وجات الى عندك

أخي الكريم أنا ما أشوف أي غلطة كبيرة عشان تعطيها رضوة الوضع استغلال ضع تحتها مليون خط تبغا تفرض شخصيتها بالقوة بصراحة هي تشوفك طيب و على نياتك وهي تستغل هالفرصة أتمنى اخي الكريم أن تكون جازم و حازم باﻷمر اذا في غلط صدر منك و غلط كبير لا يمنع أن تحل الموضوع و تراضيها اذا ما في أي غلط قول لها بصريح العبارة بيتك موجود و حياك بأي وقت اذا تبغين زوجك و بيتك و قفل على الموضوع و اتركها الى ان ترضى بنفسها

__________________

والله كلامك مقنع ومنطقي .. هاذا اللي اانا افكر فيه .. رغم اهلي ( امي وابوي ) مره زعلانين ومو عاجبهم هالكلام ويبوني اتركها ... بحكم انها افشت كل اسرارنا الزوجيه وادخلت اهلها بااادق التفاصيل
العجيب في الامر ان خالها يرسل لي اليوم الصباح يقولي قولها صباح الخير ولا تعاتب !! لكن معصي الوضع يبغاله جديه وحزم
زيادة على ذالك .. جات للبيت وقت ماكنت عند خالها واخذت ملابس واغراض لها وطلعت !!!! حسيت انهم متفقين ومرتبين لها الشي !!!! االلي راح اسويه بنتظر اخوها لين يجي واتكلم معاه في الموضوع
سبحان الله .. ماعاد هي فارقه معي عالاخر ان صلحت لنفسها وان خربت فلقد جنت عبى نفسها براقش

ما ودي اكتب هالرد لكن والله غصب عني

المفروض اللي يرسل الرساله اخوها مو خالها

انا ما ادري وش دخل خالها بالسالفه واخوها واهلها موجودين
ما ودي اشتتك لكن مشكلتك تقع بين ( زوجتك وخالها وامها ) المفروض يستبعد خالها ويكون اخوها
مادخلوه في خصوصياتك الا انهم يفصحون له كل شيء ورأيهم مشترك
وأنت اصلا ماطلبت منه يتدخل
هم حاطينه الكل بالكل اخصره وخلي تفاهمك لا يتعدى اخوها


لان الخال المصون مطاوع اخته وبنت اخته وممكن يكون رأيه بـــــ صراحه فقع مرارتي يوم يملي عليك الشروط


لا طنشت خالها وخليت التفاهم مع اخوها افضل لك لانك بتقطع اساس المشكله

هذا رأيي

الله يسهل امرك

السلام عليكم

اشوف مشكلتك جدا بسيطه ومستغرب من ردود الاخوان اللي ممكن تدمر بيتك وبالنهاية انت وزوجتك الخسرانين ومحد درى عنك

زوجتك مبين عليها فيها خير وعلى كلامك بدأت تتقبل البيت وتحس ان مملكتها وتغسل ملابسك واطبخت لك وزوجتك غير ماديه عالرغم انها استقالت الا انها عافه نفسها عنك ( شوف الموضوع من زاويه ايجابيه )

بخصوص كوي الملابس زين منها انها تغسل كان المفروض توافق على الكوي غير مكلف نهائيا اشوية ريالات واغلب الناس تكوي بره لان جوده الكوي افضل من البيت ومنها تريح زوجتك

فالمفروض تأخذ وتعطي معها يعني خلها تكسب بعض الأمور وحسسها بالاهتمام مثال يعني هي تغسل وتكوي بالمغسله وان فلست اطلب منها تكوي بالبيت مسالة أيام وراح تقدرك
الطبخ مره عليها ومره من مطعم لين تتعود عالطبخ ولين توصل الخدامه وهكذا
من ناحية الفلوس اللي بالبطاقه واضح ما تنفع مع زوجتك لاسباب منها عزة نفسها وما تعرف كم تأخذ من المبلغ ومنها كذلك مبين ما تعرف تتصرف وتبي رجال شايل البيت ويحسسها بالأمان يعني لازم انت تروح تشيل البيت من نفسك وغير كذى عطها مصرف لها بيدها

كون خالها او اخوها تدخل بالموضوع هذا ما يهمنا كثير المهم ان واحد من محارمها وخلاص لا تدخل نفسك بمتاهات كل بيت وله اسراره الا ان كان الخال ما منه فايده هنا تروح لاخوها

المصرف اللي طلبته 1000 ريال مبلغ جدا بسيط واقل من بسيط خصوصا انها كانت موظفه وكان المفروض تدفع لها من غير ما تطلب وتسليم باليد

روحتها لاهلها ونامت اكثر من المده المتفق عليها غلط تقدر تمشيه خصوصا في بداية الزواج والمفروض أصلا ما تخليها تغلط هالغلط دامها قالت تبي تنام أسبوع عند أهلها خلها تنام أسبوع لان عندك ملل وما تعودت على بيتها تحتاج سنوات لين تلهى بالعيال ومثل ما قلت انت هي بدات تتقبل بيتها مع مرور الوقت يعني ماهي متعلقه تعلق مرضي باهلها مسأله وقت وتثقل وتقل روحاتها لاهلها
وان راحت لاهلها تعيشون اثنينكم حياة الحريه كم يوم وهالشي صحي وممتع ويبعد الملل

والرضاوه مبلغها بسيط وهذا عرف اجتماعي سائد لا تخالف الناس ومجتمعك وتقعد لحالك
منت صغير تمر السنين وباكر تندم على حالك

بعد كل هالمحاولات ان ما انصلحت الزوجه انت بطريق وهي بطريق

فاجئهم وتعال بطريقه جديده واقبل بالصلح وبشروطهم وشوف شنو راح يصير معاك
وانت تغير للاحسن من غير ما تعلم زوجتك بخطتك وراح تشوف الفرق

والله اعلم

كلام بدوي حساس صحيح
لا انخرب بيتك مهب نافعينك من يزيدوا النار حطب
كونك نهرنها هذا ضرب ترضا احد من برى يشد ثوبك
ولا يسوي هالحركه لامك واختك
والف ريال مصروف احسن من تعطيها البطاقه وتريح راسك

والله انك صادق الخال المصون .. دبل كبدي بالعربي الفصيح .. كلامه كلام حريم ( اخته + بنتها ) وانا بيني وبين نفسي اقول يارب صبرني لا اجيب العيد !! انهيت النقاش معاه بااسرع طريقه

والحين بنتظر اخوها وهو اكيد عنده العلم الاكيد

كلامك وردك كان في الحسبان .. بس وانا اخوك الواحد يفكر ع المدى البعيد !! الله يبعد عننا الشر .. كل بيت تصير فيها مشاكل .. هل مع وضعها الحالي !! من النووم في بيت اهلها .. اتوقع انه راح يتكرر نفس السيناريو يوما ما .. !!! واحتمال يكون عند الواحد اطفال .. هنا تكبر الحكايه وتصير الحياه متعبه ..

بخصوص الرضاوه .. ماهمني المبلغ بقدر مااستغربت من الكلام عن المادة بيني وبينها للصلاح .. !!! تخيل ان خالها عارف راتبي بالفواصل ..!!!!!!!! زوجتي عرفت عن طريق اخو زوج امها ( معاي بالدوام) ليه افشاء الاسرار !!! فلنفرض يوما من الايام .. تعرض الواحد لي ازمه ماليه .. هل الزوجه المصونه راح تقدر وتتقبل الوضع ام لا يوجد مجال للصلح الا بالرضاوه !! الزواج رابط شرعي ولا رابط مادي