انتي الى الآن لم تحملي اسم مطلقة وهذا هو تعامل اهلك معك

بعد الطلاق تأكدي أن كل هالسلبيات ستتضاعف

استغرب بداية موضوعك تقولين مرتاحه كثير كثير

وببعض الردود تبكين بصمت الى ما جا ابوك وهداك

وردك هذا يبين ان سلبيات اهلك بتجنن فيك وبتقولين عيشتي هناك اهون

انا رأيي دامه وصل الى باب بيتكم وطلب ابوك للتفاهم هذي بداية خير ان شاء الله

خلي ابوك يتفاهم معاه على اهم النقاط اللي تضايقك مثل

البصق - السب - الضرب - الاهمال والسهر - المصروف او النفقة

واتركي : يمشي خواته مايمشيني يعطيهم ولا يعطيني يوديني ويتركني للفجر

قبل تطلعين قولي له وديني الساعة كذا ورجعني الساعة كذا

هذا رأيي اما ان كنتي قد وصلتي الى درجة عدم تقبله نهائياً ولا تريدينه

فالله يرزقك بالوظيفة اللي تغنيك والزوج الصالح اللي يعوضك

راحتك في رضى الله

صدقيني أرضي ربك

وكون عون لبناتك على بر والديهم أنتي الحين مرتاحة مع والدك ووالدتك وأخوانك وهم سندك
لو تطلقتي بتحرمين بناتك من هذا كله لو لا سمح الله كبرت البنات و تزوجن وصار لهن مثل ما صار لك أي بيت بيروحين يا ترى عند بيت أمهن ولا بيت أبوهن ولا عند أخوالهن

شوفي أختي دام جاكم زوجك لباب بيتك حطي عليه شروطك
وحاولي تتعايشين معاها ولا تكبرين غلطاته كثير وركزي على إيجابياته
وحاولي تدلعينه جعلي نصب عينك بعد رضى الله بناتك و أفرحي لفرحهن
ولا تأخذين هم كثير لسلبيات زوجك و صدقيني بترتاحين

الشيطان يجي عند الواحد منا ويزن عليه و يخليه يفكر في السلبيات ليييه
عشان يزيد المشاكل والفتن

واستعيني بالله
وربك كريم
والله أعلم

لا لايااختي مافي ازعاج ابدا خذي راحتك وفضفضي بكل الي يجول بخاطرك وكل مافضفضتي اكثر فهمنا اكثر ونقدر نفيدك انشاء الله طبعا يااختي انتي حاليا بين قوسين معاناتك معى زوجك واهلك في نفس الوقت ولاكن يااختي ابشرك انه عندما تشتد المصيبه قرب الفرج بأذن الله انتي حاليا حاولي قدر الامكان تمسكي اعصابك وامك مهمه جدا لمصلحتك على الاقل تقدري تدخلي لوالدك عن طريقها انتي لازم تبلغيهم بأنك صبرتي على المر معى زوجك وصبرتي على الضرب وكرامتك من كرامت اهلك ولجئتي اليهم فأذا كان وضعك حاليا مايرضيهم وودهم ترجعي لزوجك فماهناك اشكال حطيهم في القايمه معى زوجك وقليلهم يعملو لك حل للضرب معى زوجك ويلزموه بباقي حقوقك وقليلهم انا برجع واعطيه اخر فرصه عشانكم واذا ماتسوون لي حل انتم من غيركم يسويه عند من اروح من لي سند غيركم بهالدنيا اشرد من عند زوجي والا اروح انتحر لاني حاسسه ان مافي معي حد يسندني كل يوم وانتم تعايروني وتقفلوها بوشي وكأني ارتكبت جريمه ........
المهم ياااختي الطلاق شيليه من راسك حاليا والله مااانصحك لان اهلك حاليا ماهم مقتنعين فيه يمكن يقتعنو فيه في المستقبل اذا كثرت المشاكل وشافو ان مافي حل غيره بس حاليا انا شايف ان الاهون لك الرجوع لزوجك ولو يوقفو اهلك بجوارك ويأخذو موقف حازم معى زوجك ويرجعوك بالشروط الي ذكرناها ويهديه الله ويلتزم بها فأكيد انك راح تنسين الطلاق وراح تتغير حياتك ان شاء الله وفي حاجه مهمه جدا ابغى الفت انتباهك لها بعد عودتك لزوجك استخدمي فنياتك فيه وحاولي يدور لك وضيفه قريبه من البيت وهناك عدة طرق لاقناع الزوج بالوضيفه وافضلها في قدر ضني انك راح تساعديه في مصاريف البيت وراح يكون راتبك تحت تصرفه الى ان يرزقك الله بالوضيفه وبعدها ان صلح زوجك واصلتي حياتك وان استمر على حالته سابقا فوضيفتك جاهزه ومنتي محتاجه لاحد بعدها حتى لورحتي بيت اهلك ماراح تحتاجين منهم شي
اتوكلي على الله افتحي صفحه جديده منتضر ردك الله يوفقك

__________________
تمنيت حبـاً يدوم طويـلاً .. فـدام الحب وَ رحل الحبيب.

والله يافي بعض الردود تقهر
وش الي هذا وانتي مابعد تطلقتي هذا ردت فعل اهلك
وش هالكلام؟؟!!
المهم انت اعلم بزوجك هل عنده نيه يتغير
طيب فكري لخمس اوعشر سنين قدام هل بيتغير
والا مثل ماهو ويعيشون بناتك مرضى نفسيين
لزوج اخلاقه سيئه فكري هل يستحق يكون اب
هل زوجك فيه رجى يتغير والا بيظل يهينك ويبصق في وجهك
كل هالاشياء انتي ادرى بزوجك منا
اليوم عندك طفلين بكره يكون الضحايا اكثر ويصير مافيه خط رجعه

__________________
استغفر الله وأتوب إليه

اهلها مو مقتنعين ان زوجها غلطان وطالعين نازلين كلام عليها وهي باقي على ذمته
ويشوفونها هي الغلطانة وش اللي يقهر بالردود
هذا كلامها هي لاتكبرين براسها فكرة انه ماراح يتغير
اذا ماتغير مو لازم يتغير المهم يلتزم بشروطها ويحترمها

لو قالت ماتغير وبتطلق اهلها شايفينها مدلعه وادنى مشكلة راحت بيت اهلها
الطبيعي يقتنعون ان هذا مايصلح يكون زوج ويوافقونها كلهم على هالقرار ويدعمونها
مو الام تدقها بالكلام وللاخو يحط عليها ونص ضدها ونص معها

ننصحها تحط شروطها الاساسية لاستمرار حياتها معاه
الضحايا مو لازم يزيدون فيه موانع حمل

اشكرك اختي على ردك وعلى النصيحة. .
بالنسبة لبناتي هم نقطة الضعف الصراحة. .
وطريقة معاملت الامبالاه هي الي كنت استخدامها معها بعد فشل كل المحاولات
فكنت اعطية حقوقه بالكامل ولا ابالي بخيره او شره..
ولاكن كان يخلق مشكلة لاتفه سبب لاتتصورين اسلوبه
يخلق ممشكله عشاني نظراتي ما اعجبته ..
مع اني كنت انظر له عادي .. فيبداء بشجار لا ينتهي ..
الله يصبرني ويعيني ..
والله يرزقك ماتتمني ومن حيث لا تحتسين. .

اشكرك على ردك اختي..
من ناحية تقبلة نعم لا اتقبله نهائي ..
بس بناتي كاسرين ظهري.. والله مافيه شي يرددني غيرهم ..
مستعده اتقبل كلام اهلي ومشاكلهم
ولا اتقبل ضرربه واهانته لي يمكن مو متخيله الشعور كيف !!
لا كن انا حاليآ قاعده افكر مثل ماتقولين و احاول اعطي نفسي فرصة اخيييييييييره ..
وأحياناً اقول لا لا
اخاف اهلي يرجعون ضدي امام زوجي ...!!!
انا كني بين نارين ..
الله يسعدك ويوفقك ولا يذيقك حزن يارب..

جبتها على الجرح الصراحة ...
بناتي هم الي افكر فيه ..
ام زوجي فلا ينفع معه لا دلع ولا غيره .. انا جبرت معاه الدلع و كل شي ما فاد معاه
والشروط فعلا شي جدآ ممتاز الله يجزاكم خير انا قاعده افكر فيها ..
الله يجزاك الجنه ولايحرمك السعاده بالدنيا والاخره.

كلامك انك قاعده تفكري بالشروط وعدولك عن طلب الطلاق افرحني والله
فكري يااختي وخذي راحتك وحطي الشروط الي تعجبك اهم شي لاضر ولاضرار واتمنى ان اول شرط يكون عدم تعرضك للضرب وهناك شروط اخرى اسمحيلي بمساعدتك فيها مثل اي مشكله يصعب عليكم حلها والتفاهم فيها يمسك لسانه ومايشتم ويوديك بيت اهلك معززه مكرمه يلتزم بالاشياء الناقصه مثل صرفتك انتي واطفالك وطلبات البيت وماشابه ذالك
ومافي مشكله لوطلبتي ضمانات على كلامه مثل ناس من اقاربه او اهله يضمنو عليه او غرامات ماليه مثل ماهو سائد في السلف والعرف
واتوكلي على الله وربي يسعدكم ويحببكم الى بعض
وفي الاخير اسئل الله ان يرزقك وضيفه مناسبه وقريبه من منزلك وبالتوفيق يااارب واعذريني على التطفل والفضول لاني متحمس للفكره

__________________
تمنيت حبـاً يدوم طويـلاً .. فـدام الحب وَ رحل الحبيب.

مشكور على كلامك الجميل...
تفكيرك منطقي ماشاالله. .

اخي افكر بشروط للعوده مع اني الى الان لم اجزم على العوده ..
ولاكن افكر ب..
اول شي افكر به ( يغير الشقه الي احنا ساكنين فيها) السبب : مو مرتاحة فيها وموقعها جنب بيت امه بالظبط ..
ومره من المرات كنت حاطه بناتي عند اهلي ورتبت الشقة وكنت كاويه ملابس بناتي وحاطتها على السرير وكل شي مكانه
وطلعت انا وزوجي ولما رجعت للشقه لقيت الملابس مرميه بالشارع وملابس بناتي مرميه بالدرج حق الشقه والعابهم ..!!!!!!
وانا من زمان كنت اقوله كل ما ارجع الشقة الاقي كل شي مو مكانه وقال مستحيل يتهيأ لك..
ومره اعترف انه مع امه مفتاح للشقه ومفتاح لسياره !!!
وصرت اقوله خذ المفتاح انا مو مرتاحة ورافض وتصير مشكله..
فااخذت كل اغراضي واوراقي وصوري وذهبي كلهم حطيته عند اهلي لاني مو مرتاحه أبداً. .
الشي الثاني ..
ما ابغاه يلزمني بشي لاهله لا زياره ولا شي نهائي ولا زواج خواته ولا امه ولا احد ..
السبب.. سوء المعاملة من اهله وغيرتهم مني..
الشي الثالث..
يمشي لي مصروف شهري .. ويلتزم بأنه يوديني ويجيبني بالوقت الي ابي بدون سهر ...ولا يحرمني من زيارة اهلي وقرايبي ..
واكيد وفوووووووق هذا كلة

(يحترمني ولا يمد يده علي نهائي )..

هذا الشروط الي ممكن اني احطها عليه ايش رائيكم ..!!
مع انه له الان اكثر من 20 يوم لا سأل عن بناته ولا هو مهتم ولايفكر هم في حاجة مصروف او لا .. امس بنتي الصغير تبكي وتنادي بابا ..
والله تقطع قلبي عليها..