أوافق الاخ نيت مان
أخبرنا كيف التقيتها ؟!
لأن فكرة الإهداء لفتاة ليس بينك وبينها شيء
غير مناسبة، أنت تظن أنك ستستميلها بذلك و أنا أرى أنك ستجعلها تتوجس منك وتستغرب من تصرفك.

خذها قاعدة: البنات غالبا يتوجسن خيفة من الرجل المندفع .
لذلك لا تندفع بمشاعرك دفعة وحدة لأي فتاة مهما شعرت برغبة شديدة في إظهار مشاعرك، خصوصا في البداية، لأن الفتاة تكون متحفظة و تجد من يندفع بهذا الشكل، هدايا و إصرار على أخذها.
أنت اضطريتها أن تتصرف بشكل لايمت لها بصلة، و كنت تحلل حركاتها و كلامها و ابتسامتها وقبولها للهدايا، وهي أمور لاتمت لها بصلة وفيها خلط كبير بين طبيعتها و تصرفات طارئة على طبيعتها، نظرا للموقف الذي وضعتها فيه، لم تجعلها تتصرف بطبيعتها .

لذلك من المهم جدا أن تستفيد من أخطائك لتتجنبها في المستقبل.

شكرا على المشاركة

أختي الكريمة: بدك تعذريني لأنو ما إلى رغبة نهائيا في الحديث عن كيف ووين التقيت فيها.. وبالنسبة للاندفاع والإهداء..الخ فماني عارف وين الاندفاع؟ حقيقة ماني عارف.. أنا أصلا ساويت كل اللي ساويته وأنا في راسي هدف واحد وغاية واضحة ومحددة إنو بدي أخطبها للبنت قبل ما حدا تاني يخطبها وتضيع من إيدي.. كل التعب اللي تعبته وكل الإرهاق اللي عانيته وكل الشغلات اللي حكيت عنها وساويتها من أول لحظة فكرت في البنت لحد اللحظة اللي جلست قدامها واتكلمت فيها معها كانت بهدف إني ألحق أخطبها قبل ما تروح وتضيع من إيدي وقبل ما واحد غيري يجي يخطبها وأقول يا ريت اللي جرى ما كان.. فما كنت رايح لموعد غرامي ولا لجلسة تعارف أو طق حنك.. كنت رايح وبدي أخطبها خطبة رسمية.. وطالما إنو الأمر هيك فطبيعي جدا ذوقا وأدبا وعرفا إني أجيب معي كم هدية.. فوين الغلط؟.. وبعدين وين الاندفاع وأنا حتى كلمة "بحبك" ما قدرت أقولها إلها لأنها لسه ما صارت زوجتي وحلالي.. كل الكلام اللي قلته كان عبارة عن محاولة تعبير عن كم المشاعر الصادقة والمخلصة اللي كانت جواتي تجاهها كعادة أي خطيب لما يجي يخطب أنه يوضح السبب من وراء خطبته ورغبته في أنه فلانة تصير شريكة حياته.. وهادا اللي صار واللي ساويته.. فحاولت باطيب أسلوب وبطريقة كتير مؤدبة على قد ما بقدر إني أوصلها هالشي بإني ذكرت لها (إني قطعت كل هالمسافة منشان اتقدم لك).. وسؤالي عن ضحكها والسبب اللي ممكن يكون وراه هو لأني خفت بصراحة أكون غازلتها وأنا مو دريان فبكون ساويت شي ما بجوز وبكون أغضبت رب العالمين وأنا ما بدي أبتدي حياتي الزوجية بهيك شي ولا هيك كان قصدي وأنا راجع من الصلاة!!.. كل اللي صار إني حاولت أبين إلها كم المشاعر الصادقة جواتي ناحيتها فصرت أشرق وأغرب.. وأقرب وأبعد.. لعل وعسى تفهم علي.. كل هاد منشان ماني كنت قادر أنطق بكلمة "بحبك" وما شابهها اللي كانت راح تختصر علي كتير من التعب والشرح والتوضيح.. فوين الغلط ووين الاندفاع وأنا بكرر للمرة الما بعرف كم وبحلف بالله العظيم وهي حليفة في شهر رمضان الكريم إني كنت رايح أخطبها خطبة رسمية بيعقبها زواج على شرع الله وسنة رسوله صلى الله عليه وسلم.. وذكرت إلها هالشي بوضوح وكانت أول كلمة قلتها بعد ما جريت الكرسي وجلست إني بدي أتزوجك با بنت الناس!! وفوق هاد كله ذكرت لها بصريح العبارة إني ما بعرف عنوان أبوك ولو كنت بعرفه كنت مباشرة توجهتله وحكيت معاه.. هادا كان تلميح ومعناه بالصريح (إذا بتريدي: تعطيني عنوان أبوك مشان أحكي معه ومشان أطلب إيدك رسمياً منه).. وهي فهمته ولقطته بسرعة.. وهو اللي أكد إلها 100% إني جاي أخطب مو جاي ألعب وإنه اللي قدامها (أنا) بدو يخطب خطبة رسمية.. وهالشي هو اللي يمكن (عم بقول يمكن وما بجزم بشي) بيفسر سبب تكرارها للرفض أكتر من مرة كونها شعرت فعلاً بالخطر والخوف على شي الله أعلم شو هوي (يمكن على دراستها وإنها صارت فعلاً مهددة بمشروع الزواج اللي عم ينعرض أمامها؟!!) كون اللي عم يحكي قدامها إنسان جاد جداً وما عندو كتير مزح.. وبعد هاد كله بعيد وبكرر سؤالي: وين الاندفاع بالمشاعر أو بالأصح : كيف بدو الواحد اللي رايح يخطب خطبة رسمية ما يكون مندفع بمشاعره؟
صحيح يا أختي إني إنسان خجول.. خجول كتير كتير..
وصحيح إني ما بعرف أعشق ولا أتمعشق..
وصحيح إني إنسان عاطفي وحساس..
صحيح إن كل الثلاثة اللي فوق بتشكل نقاط ضعف كبيرة في زمنا هاد لواحد بدو يختار زوجة لتكون شريكة حياته وأم أولاده لكن الأكيد ومن تجربتي الشخصية إنه كله ما حسيت فيه وأنا بستعين برب العالمين وبسأله العون والتوفيق والتسديد في كل خطوة.. صدقيني إنه كله اختفى.. وبدل الخجل صرت جريء.. وبدل قلة الحيلة في التعامل مع النسوان بسبب إني ما بعرف أعشق وأتمعشق حكيت حكي محترم مع الوسيطة حتى اقتنعت وتعاطفت معي بشكل فوق ما يمكن إنك تتخيليه وفوق ما كنت ممكن أتصوره.. أنا حتى نفسي استغربت.. وكوني عاطفي فمثل ما ذكرت إني خرجت من المقابلة والسكينة نازلة علي.. ما بقول إني خرجت منها وأنا عم بسخسخ من الضحك.. صحيح اتضايقت شوي تماما مثل أي عرض وظيفة الواحد بيتقدم له وما بيتوفق فيه فبحس بشوية ضيق.. لكن والله ما تميت شوية دقايق إلا وأنا عم أضحك من جواتي على اللي صار.. وتميت على هيك بقية اليوم.. ولغاية اليوم كل ما أتذكر لا شعوريا شو اللي صار إلا وتلاقيني عم ببتسم ويمكن أضحك حتى.. وما عندي مانع أبداً أحكيه وبالتفصيل الممل حتى.. في حين سمعت الكتير عن غيري من اللي بمجرد يسمعوا بالرفض: البعض منهم أغمي عليهم ووقعوا من طولهم.. والبعض التاني بكى أو دمعت عيونه.. وغيرهم اللي صار يشرب أو يتعاطى لحتى ينسى.. والبعض منهم ركب سيارته وصار يمشي بعكس الخط في الطريق السريع لحتى يصدم أو يدخل بشي عامود ويموت ويخلص.. يعني محاولة انتحار رسمية.. لكن رب العالمين دخيل اسمه وبفضله وكرمه نجاني وعافاني من كل هاد رغم إني كنت (عم بقول كنت) بحبها كتير للبنت وتمنيتها فعلا تكون زوجتي وشريكة حياتي وأم أولادي.. هادا كله بفضل رب العالمين وحده مو بقوتي ولا بعزمي ولا بأي شيء فيني.. الحمد لله.. فالقصد يا أختي الفاضلة المحترمة هو إنه طالما الواحد ماشي على هدي رب العالمين ومتوكل عليه ومعتمد عليه فرب العالمين سبحانه ما بيتركه ولا بيتخلى عنه.. بالعكس بييسر أمره وبيكون سنده ومعينه.. وشكرا إلك على تحملي وتحمل ردي المطول وإن شاء الله ما أكون نسيت شي.. الله يعطيك العافية..

حاليا عم تسيطر على بالي فكرة يمكن تكون غريبة شوي أو حتى مجنونة
لكن كل يوم عم بقتنع فيها أكتر واكتر
خصوصا مع دلع البنات اللي في سن الزواج في الوقت الحاضر
وعدم جدية الكثير منهم في موضوع الزواج والارتباط!

بمناسبة عيد الفطر المبارك بحب أهني نفسي وأبارك لها بهالمناسبة السعيدة وبقول:

كل سنة وإنت سالم يا شاكر.. وإن شاء الله ما بيجي العيد الجاي إلا وتكون تزوجت بنت الحلال اللي تكون هي ويكونوا أهلها على كيف كيفك إن شاء الله.. وإن شاء الله ما بتروح صلاة العيد الجاي إلا والمدام معك.. رجلها على رجلك وإيدها في إيدك.. وبعد ما ترجع من الصلاة تعطيها إن شاء الله أول عيدية وبإذن الله راح تكون أحلى عيدية.. إنت بس قول يا رب ولا يكن لك فكر.. لأنها إن ما صغرت ما راح تكبر.. وعلى قولة المثل: طريق الألف ميل يبدأ بخطوة.. فطالما إنك خطبت مرة فمعناها إنك قريبا بإذن الله راح تتزوج.. وطالما إنك بديت فمعناها إنك وصلت.. بس بدها شوية صبر.. ولا لشو مسمي حالك: شاكر وصابر؟ ومبروك مقدما.. ماشي يا روحي إنت.. يا أنا؟

أيش الفكرة ؟!

لاتقول عدم جدية ، قول خوف/قلق
والله ما ألوم البنات لما يخافوا من موضوع الزواج والارتباط
لأنه موضوع كبير و مو سهل ترتبط حياتك بشخص ماتدري
بيكون نعمة لك و لا نقمة عليك، مشروع الزواج مهما الواحد أخذ بالاسباب
يظل توفيق من الله، وصعب أحد يضمن لك أنك بتكون سعيد مع هذا الشخص.
خصوصا في ظل القصص اللي بيسمعوها البنات لأقاربهم أو معارفهم أو جيرانهم
يكون الرجل في بداية الخطوبة ملاك و ينقلب بعد الزواج لشيطان
شذوذ و علاقات و شرب خمر و أمراض نفسية وووو
يحق فعلا للبنات يخافوا و أنا أول وحدة خوافة
والزواج بالنسبة لي شيء أتمناه لكن الاختيار جدا صعب و مرعب !

إني أتقدم لكم بنت ولكم بيت في نفس الوقت