اولا لايجوز يضرب البنت اذا كان مثل ماوصفتي بهالطريقة حرام عليه لكن الاولى ان يتم التفاهم معه في حالة رايقه ان ضربك للبنت راح يضرها بالمستقبل نفسيا وكيف بتتقبلك وتحبك وانت تضربها بهالشكل بتبعد عنك كثير خل بنتك تفتخر في انك ابوها وسندها ولو رزقها الله بابن الحلال بتقول ابوي ماضربني لكن ولد الناس لو عرف انها تتلطش من ابوها بيقول هذي ماتمشي الا بهالطريقة وابوها ضربها خل اضربها انا بعد

ثانيا شي طيب انه بدأ يطلبك حقه الشرعي اذكر انك كنتي تشتكين من هالنقطة فهذا راح يحسن العلاقة الزوجية بينكم وتخفف التوتر

ثالثا الأسلوب كلنا نرتكب اخطاء لكن اسلوب المتحدث معنا عن اخطائنا يصنع الفرق سواء بالاعتراف بالخطأ او المكابرة كلمة مااسمح لك تعامل بنتي بهالطريقة والتكشير والنظرات اللي مملوئه بالحقد يجي ويقول انا غلطان واسف بعد الكلام هذا مستحيل

رابعا قروا لكم على رأي انتي تستاهلي السفره ولا ماتستاهلي , تستاهلي الذهب ولا ماتستاهلي
ثم رضيتي المرة الماضية بعد السفرة وقفلتي الموضوع وقلنا لك المشكلة باقيه بينكم لم تقتلع من جذورها لتختفي حتى بعضهم قال ننتظرك بموضوعك الثاني وسيكون مشابه للسابق
ورضيتي الان بعد الذهب
ثم رجعتي رسمية بعد طقم الذهب وبيعصب من انك رسمية ويقول ماتستاهلي
ولو ارتخيتي بيقول رضت بطقم ذهب خل يقول كلنا نراضي حريمنا بهدايا ويرضون هذي سنة الحياة تقديم الهدايا الهدف الاساسي اذابة الجليد القاسي بعد الزعل

وبنتك وش موقعها من هذا كله ماكلمتينا عن نفسيتها هل هي رضت عن ابوها هل تجلس بحضنه او تبعد عنه هل سامحته هل رفسها برجله فعلا مثل ما احنا متخيلين او انتي بالغتي بالوصف

لي يومين اكتب رد طويل و يطير بسبب ضعف الإنترنت بمنطقتي المهم

اني حابة اقولك
..الأسلوب الأسلوب
لا تخلين نفسك طرف شرس
حتى بطريقة رفضك للعلاقة
الله يصلحك بس كيف تكلمتي كذا !
ما تعلمتي المسكنة من الشغالة ؟
وكيف ب ثواني غيرت نبرة صوتها مع زوجك !
وهي اللي كانت شوي و تضربك!

تعلمي
كيف تحتوين المواقف
زوجك مو أول شخص يعامل طفله
بقسوة ، ما أبرر لكن إذا ضربه
لها بهذي الطريقة نادر جدا فلا تكبرينها ..وتهددينه
زي ما ذكروا البعض تحصل كثير
وحصلت معي شخصيا لكن اللي سويته
قمت مسكت بنتي وحضنتها وقلتله خلاص
أتركها
طبعا وقتها شملني ب التهزيء واني
انا السبب وانا اللي قاصدة ازعل البنت عشان
تزعجه لكن سكت
ولما طلع من الغرفة سكرت الباب علينا عشان
لين هدت البنت .. وما اخفيك جلست أبكي معاها
و اتحسب لاني حسيته وحش بكل بساطة
ومن البكرة من طريقه تعامله معاها عرفت
انه ندمان وقلتله أمس انت فجعتها ب طريقتك
هي متعودة على حنانك عليها الخ وبالغت بكلامي
بالاشياء الإيجابية
النتيجة ان الوضع انقلب سار جدا جدا حنون
واذا انا زعلتها أو ضربتها يجبرني اتأسف منها !
وما كان يصدر منه ذاك الاهتمام فيها لكن
سرت بين فترة والثانية اقوله قرأت دراسة بتربية الطفل
واقوله ايش انا ابغى بطريقة ما تحسسه اني القنه
أوامر أو أنه تعديل لسلوكه
احيانا هي تسوي تصرف ف أعلق عليه بطريقة
اني أبجل ابوها بعينها
فهو يزيد حرص عليها وعلى تربيتها
سار حتى هو يرسل علي وينصحني !


اتوقع نمط زوجك شمالي
اقرأي كيف تتعاملين معاه وقت غضبه
لأن أغلب الرجال بهذا النمط
نار×نار ع طول معصبين

لماذا طلبتِ سوق الذهب؟

__________________


اللهم طِيبَ الأثر .. وحُسْنَ الرحيل.

ما ادري والله
بس انا شخصيا ارتحت
لو جاريته زي ذاك اليوم
كان جلست ابكي طول الليل


ارتحت لاني كنت صريحة
اخترت الشي اللي يناسبني

اول ماتزوجته كان عنده ظروف صعبه
صعبه جدا جدا (مو ماديه)
ما اقدر اشرح اكثر
المهم كان يداري خاطري كثير
ويقول دايم ودي اعوضك الخ
بعدها انفرج حاله
وصار اهتمامه يقل بالتدريج
ماودي ادعي عليه بمصيبه
بس فعلا وقت الرخاء يهملني الله يهديه

بنتي نست
بكت شوي يومها وقامت تلعب
هي اصلا كانت مسويه ازعاج
وابوها عنفها قدامي
وثرت عليه باسلوب شديد
لكن بدون ما اجرحه
بينما هو جرحني بكلام ماينقال
وصد عني وانا صديت عنه

اني استاهل او ما استاهل
هذا رأيه هو ويجرحني فيه
المفروض يحتفظ فيه لنفسه
انا عني ما اشوف قيمتي بهالامور
لأنها كماليات
لكن اتنرفز لما يعاقبني فيها
خصوصا اذا هو مهبب من الاساس


اني ارجع بمشكله جديده او لا
فهذي سنه الحياه
مو معناته انحلت مشكله اني بعيش بهناء
انا استغرب احيانا كلام بعض الاعضاء
وتريقتهم اني برجع بمشكله ثانيه
طيب انا ليه مسجله بمنتدى اسري
عشان اذا واجهتني مشاكل استفيد منكم
مو يعني انحلت مشكله خلاص
وتنتهي كل المشاكل
ياليت الامور بهالجمال ذا كله

كلامك صحيح يا براءة
يخوني الاسلوب احيانا
بس ارجع اتعذر واتأسف
بعكسه هو.. يجرح ويطنش


مسكنه الشغاله ولؤمها
هذا لحالها مدرسه بالتمثيل والنفاق
وانا ما اتقنها لاني عندي ضغوطات كثيرة
مضغوطة من كل ناحيه
مو مثلها تكنس وتنظف وتحط راسها وتشاخر

اليوم عند اهله عزومة كبيره
وحفظوا الطقمين اللي عندي
سألت نفسي: لمتى اراعي واحد مايراعيني؟

قلت له ابي ذهب البسه بعزيمتكم
قال ابشري ورحنا شريناه
وهذي اول مره من تزوجنا اطلب هالطلب
عندي عزة نفس غبيه
اروح اشتري من فلوسي اللي ابغاه
واحسسه دايما اني مو بحاجته
ناويه اغير هالسياسه


النقطه الثانيه
اذا هو مايعرف ياخذ بخاطري
ويراضيني بهديه تليق فيني
مالي الا اروح واختار واخليه يحاسب
بس طبعا بدون ما اقول هالشي
ولا حتى سميتها رضاوه


شكرته بذوق
ورحت حطيت راسي ونمت

كلنا نستفيد من المواضيع وأراء الاعضاء ورغم اختلافنا في التعاطي مع المشكله واختلاف الآراء لكن نستفيد مجملا

عموما انتي غير صادقه ان الكماليات ماتهمك والدليل انه كل ماعاقبك على كماليه وشي مايهمك تنقهرين ماحد ينقهر من شي مايهمه

كل ماترضون على بعض يتم الارضاء بالكماليات اللي ماتهمك لكن حقيقه تهمك وفوق ما تهمك والاهم انها تشعرك انه يدور رضاك وهذا شي طيب

اما كلام الاعضاء عن المواضيع قصدهم مختلف هم قصدهم مشكلتك معروفه تتهاوشون وتغلطون على بعض والاحترام بينكم مفقود وتكبر المشكله انك مطنشه ثم تنفجرين وهو يرتاح اذا انتي انفجرتي ووصل للي يبيه الخ الخ الخ نفس الموال واختلاف بالاحداث

فحرصنا على انهاء هالمشكله علشان ماتتكرر بسيناريو مختلف بس

بنتك بلحظتها نست وراحت تلعب مافيها الا العافية ونست كل شي وهي طفله وانا خفت على نفسيتها طلعت ناسيه كل شي ولعبت وممكن رجعت كان ماصار شي

وانتوا مازلتوا متهاوشين يعني المشكله كانت لحظية وانتوا مديتوها لأيام وش فيكم ؟

انا انفعلت عليه على تصرف معين
راح هو رجعني للمشكله القديمه
قال ليه قلتي كذا قبل شهر
وانا عجزت انسى كلمتك ذيك


هذا الطبع مو راضي يتركه
نقفل المشكله ونعيش يومين حلوين
يجي خلاف جديد
يفتح كل الملفات القديمه
وتنشحن النفس عالاخرررررر
فوقها كلمات زي السم وتطنيش


باقي كلامك صح
هو يستفزني حتى انفجر بوجهه
هذا اللي بيريحه
لكن ماراح انوله مراده
وبحاول اضبط نفسي


اما مشاكلي
فوالله يا اخوي من تعبي
صعبه اروح اتشكى لامي والا اختي
مالي بعد الله الا انتم
تحملوني الله يرضى عليكم