اهلللين خواتي واهليين كلي دلع الله يوفقك بامتحاناتك ان شاء الله ،، لا ما ارسلت له شي بعد الشعر ولارديت عليه هو بس صار يدخل الواتس كل شوي وبكل وقت بس مايطول فيه يعني خمس دقايق ويطلع ويرجع يدخل بعد نص ساعه خمس دقايق ويطلع وكذا وانا ما اكلمه بالواتس ولا برسايل ولا اتصلت فيه وهو بعد ماصار يكلمني من بعد الشعر طبعا الشعر اللي ارسله لي مو كتابه لا مقطع صوت واحد يقول قول امين وانا بدعي الله ان يصونك وان ماتنزل دمعه من عيونك والله يكتب ويحقق امنياتك وان الله يغفر ذنبك ويجمل صفاتك ويحفظك من كل حاسد ويصونك،، مقطع صوتي ،، بس مدري هو وحده من الثنتين يا انه يبي يطلق ومرسلها وداعيه وينتظر ابوي يتصل فيه ويقول هات الورقه مع اوراق ولدي الصغير لانه يسوي جوازه ولدي او انه مثل ماقلتو من خباثته يبي يذلني ويشوفني اترجاه واقوله ليه سويت فينس كذا ليه حطيت كذا قال خليني ارسل لها وهي بترد علي ع طول مثل اول لكنه انصدم اني مارديت عليه لانه خلاص ماعاد احمل له بقلبي مثل اول ،، وابشركم صرت افكر بين امرين يا اكمل دراستي ع حساب ابوي يا اتوظف يعني صار تفكيري مو هو وافكر ادخل ولدي حضانه بفترة دوامي الصبح والصغر اخليه مع شغالته تحت عين امي تراقبه وافكر اروح للعمره وابدى صفحه جديده بس منتظره ابوي واخوي يرجعون من السفر ادعو يرجعون بالسلامه سافرو امس للاردن وامممم بعد مفكره باشياء كثيره بغير ستايلي وبحضر زواجات يعني مخططه الطلاق مايكسرني ابد،، واتفقت مع ابوي لاجا بيرجعني ابوي يقوله مو انا مابك ترجعها بنتي طابت نفسها منك وقالت لي انا كانت ترسلك لانها بعز الصدمه لكنها وعت وهي ماغلطت بشي عشان تسوي فيها كذا والنفس طابت منك ،، انا مخططه ما ارجع له ابد لو حتى هو يبيني لاني اتوقع مرجعني مو عشاني او عشان الحب اللي بينا لا عشان امه وسمعتها بين الناس وخصوصا انتشرت سوالف قالو فلانه طلقت بنت اخوها وثاني شي عشان عياله مو عشاني وانا ماعندي استعداد ابني تعاستي علشان عيالي عيالي بكره يكبرون ويروحون مع زوجاتهم ما اقول ينسوني لا بينشغلون علي وهذا زوجي بكره اي شي يصير بيني وبينه اي خلاص بيحذفني مثل ماحذفني المره الاولى وخصوصا ماعنده ثقه فيني بكره لاطلعت معه مشوار والتفت بدون قصد وجت عيني بعين احد بيتهمن اني اغازله او اني طالعته وغير كذا يمكن يجي بيوم من الالم عشان يحرني وينتقم مني وخصوصا ابوي اهانهم وطردهم من البيت وشتتهم عشاني بيرجعني وبينتقم مني سنتين ثلاث ويصير عنده فلوس او حتى مو لازم يصير عنده فلوس يتسلق يتزوج علي ويخليني انقهر وانا بعز شبابي وغر معاملته معي اهمال باهمال وتخيلو بكون بغربه اهلي بالرياض وهو بالشرقيه وغير كذا بعد تعامل عمتي اخت ابوي معي يوم جدتي تنومت ابوي ماسلم عليها وجا من بكره لقا كل عماتي ماسلم عليهم ولا سلمو عليه كيف اجل انا لارجعت ماراح يسلمون ولاراح يعبروني بكون منبوذه وغربه وقرف لاهو ولا اهله فيهم خير لي لان النفوس خلاص ماهي مثل اول ،، ومرات يحي ببالي انه بيصير لغيري واتضايق بعدها ارجع اقول بيني وبين نفسي حتى انا بكون لغيره ما على الله عسير اللي جابه لي ماعليه عسير بيجيبلي اللي احسن منه ولاعلي من كلام جدتي يوم تقولي لاتطلقتي من بياخذك وانتي ام لطفلين اقول جدتي ماتعلم الغيب الله يعوضني خيير ،، الحمدالله الحمدالله راضيه باللي كتبه الله لي راضيه ومقتنعه اللهم لا اعتراض يكفي الله اذا حب عبد ابتلاه هذا ان دل دل الله يبيني يوم الاخره عندي حسنات غيري يتمناها ويتمنى انه ابتلى عشان يزيده الله حسنات ورب الخير مايجي منه الا كل خير يمكن الله اخذ زوجي مني لانه خاف بيوم انه بيكون سبب لتعاستي وماحب اني اكون تعيسه معه مشفلي نواياهم واخذه عني لانه بيعوضني والحمدالله انه رزقني طفلين غيري يتمنون اطفال وخلاهم لي واذا كبرو يصيرون لي سند الحمدالله ع كل حال ،، والف شكر لكل من دعتلي ودعالي والف شكر لكل من اهتم فيني وبنفسيتي والف شكر لكل من خافت وخاف علي ونصحتوني من قلب اقولكم انا الحين وابشركم نفسيتي ولله الحمدالله احسن من اول بكثير صحيح اضيق شوي بس احسن من الله بكثير وهذا بفضل تقربي من الله ثم بفضل نصايحكم الحمدالله حمدا كثير طيبا مبارك فيه والله العظيم رب الخير مايجي منه الا كل خير،، وانا اقتنعت الله ياخذ شي تحبه وماكنت تتوقعه ضياعه من يدك ويعوضك بشي انت ماكنت تحلم فيه،، لكم خالص شكري وامتناني والله يكتب اللي فيه الخير

فايض ابغى أطلبك طلب ابغى اي تطور بحياتك تكتبينه ماتتخيلين كيف شغلتي بالي والله اني ادعيلك دايماً وبشرينا ولاتنسين تكتبين ردة فعله اذا رفضتي ترجعين له

انا طلبت منك تكتبين لنا التطورات لأني متأكده ان الله راح ينصرك عليهم عشان كذا ابي اقرأ ندمهم على اللي سوه فيك ولوبعدحين

الحمدلله على كل حال اهتمي بصحتك وبأولادك وعوضيهم كوني لهم الأب والأم لاتتركيهم كثيرا مع الشغالات.انت الام والأم مدرسة.وجهيهم التوجيه الصحيح واستفيدي من تجربتك في تربيتهم ولاتكرهيهم بأبيهم ليس لأجله بل لأجلهم وعوضي أباك وأمك اللذان تعبا معك.واستمري بالدعاء ولاتلتفتي الى مايفعله زوجك ولا الى القيل والقال.وتفائلي بالغد وتوكلي على الله.

الحمدالله طمنتيني عليج الحين اقدر اقول البنت عقلت وبدت تمسك طريق التفكير الصحيح فايض حبيتي حلو انك قاعده تهيئين نفسك للطلاق عشان لاسمح الله لو صار ماتنصدمين وتكون ردة فعلك طبيعيه بس اذا ماطلق لا تطلبون الطلاق انتو خلوه ماتدرين يمكن هو بها الفتره قاعد يراجع نفسه اذا جاء زوجك لكم ندمان وشترطتو عليه وحفظ حقج جدام الناس لامانع انج تردين عشان عيالج
يعني الي ابي اوصله لج جهزي نفسج لكل الاحتمالات للطلاق وللرجعه ولانج تضلين معلقه فتره من الزمن
لاتحطين في بالج نتيجه وحده الي هي الطلاق وبس جهزي نفسج وازني بين الامور ترى جدتج يوم تنصح وتقول محد ياخذج اهي تتكلم من خوفها عليج وترى هي صادقه بجزء كبير انا مطلقه ولا ودي انج تجربين الطلاق انا ماعندي عيال والي يجون يا معددين ولا يبون بالسر اومسيار واوضاعهم للاسف مره دمار بس صديقتي تطلقت وتزوجت بسرعه من واحد مطلق فهي ارزاق مقسمه الواحد مايدري وين رزقه واغلبهم يتشرطون يبون الموظفه عشان تساعدهم بالمصاريف فا اذا جاء زوجك وتندم لا تنعادين وتصرين ع الطلاق انا لازم انصج بالذمه وضمير انتي لازم تلاقين حل تادبين به زوجج اذا ركزي وش اقول اذا رجع ندمان وقال ابي ارجع زوجتي وعيالي اما اذا مارجع من نفسه خلاص الخيره فيما اختاره الله وربي يوفقج وتكملين الدراسه وتشتغلين وترفعين راس ابوج انا صراحه انا الي طلبت الطلاق والحمد بصراحه عايشه مبسوطه مكمله دراستي انا الحين سنه ثاني جامعه والحكومه مو مقصره معنا والحمد الله على كل حال بس
اذا رجع لج ندمان لا تردونه بس تشرطو عليه شروط قويه تحفظ لج كرامتج مثل شقه لحالج وكذا وترضاوه واذا زي ماتقولين اهو مديون اتوقع انه ماراح يغامر ويطلقج ويروح يتدين من جد وجديد عشان يتزوج مره ثانيه وكذا بس انتي تفكيرج كذا عجبني عيشي حياتج وصبغي وميشي واذا طلعتي من الاربعين فليها ولا تبيني لحد ضعفج واي تطورات تصير لج سدحيها هوني طيب وبالتوفيق اتمنى ادخلموضوعج بعد الاختبارات والقي تطورات حلوووووووووووووووه وربي يوفقج الغاليه مع السلامه

ياحبيبتي ادعي ربي يدبرك بتدبيره وقولي الله يكتبلك اللي فيه الخير لاتدعي بطلاق او بعودة
ادعي انه ربي يكتبلك الافضل لك ولاولادك ويعوضك خير

ماشاء الله عليك الله يثبتك

ويقويك ويصلح مابينكم

انا من رائي انك تتوضفين قبل واضمني الوضيفه لا ن

الواسطة ماتتوفر باي وقت وتقدرين بعدين تكملين دراستك لوانتساب لان زي مانتي شايفه اللي معاهم جامعات ماحصلو شي اهم شي اضمني لك حياة كريمه لان الواحدمايدري وش مكتوب له بها الزمن وانا متأكده اذا زوجك عرف انك توضفتي راح ينقهر اكثر من لما يعرف انك كملتي دراستك لانه راح يعرف انك اسقليتي عنه مادياً وعاطفياً وهذا اكثر شي يقهر الرجل

خواتي اليوم امس كلمني عمي وقالي انتي كذابه زوجك ما اتهمك تكلمين انتي متهمته انه يكلم بنات وهو مايكلم وان زوجك حرم وطلق ان ماله علاقاته وان يحلف ع القران وقال الغلط منك انتي اللي فرقتي العايله مو زوجك وزوجك يقول اتمنى اطيح عندها ما اطيح عند غيرها لو اني اكلم قمت بدافع عن نفسي قلت لعمي والله ماكذبت هو اتهمني هو وخواته ماتبليت ع نفسي هو قال روحي اسالي امك وعماتك وان لي ماضي قال عمي خلي ينفعك ابوك تطلقي لاقي اللي تلاقينه وقالي وانتي بعقلك تتوقعين عماتك متكلمات فيك عماتك مايتكلمون فيك قلت انا هم معترفات بلسانهم انهم قال اني اعرف شباب قام عمي سكر بوجهي وجلست ابكي بقوه ودخلت تويتر صورة محادثة زوجي مع وحده يتمصلح معها ويضحك بالعام صورة الشاشه شاشة جوالي وارسلتها له لزوجي بالواتس اب وكتبت له خل هذولي ينفعونك اللي طلعت فيني الف عيب وعيب عشانهم وكذبتني قدام الكل وانت اللي كنت تسوي دنيتي وحياتي لكن الحين النفس طابت وانا عارفه من اول انك تكلم وساكته عنك وطلعت من الواتس اب ونمت يعني ماعطيته مجال ابد هو شاف كلامي بنفس اللحظه اللي ارسلت فيها ونمت ساعتين واول مافتحت جوالي وصرت بالواتس اب اون لاين دخل علي وكتب لي هاذي اللي اكلمها وحده قليلة ادب وماتسحتي وماتحتاج احد يطبطب على راسها لانها واطيه هاذي تحتاج حفره وخلي الرجال ينفعونها لكن ما اقول الا الله يستر عوراتنا ويامن روعاتنا وانا ماني ملزوم اوضح لك بس ماني ونفسك طابت او ماطابت بكيفها ومحد نافعني غير عيالي مع الف الف الف سلامه رديت عليه وقلت كل اللي بخاطري انه مايهمني وجودك ورضاك عمي دان ربي راضي عني وانت ماغلطت بحقك ويوم كنت ارسلك ماكنت ابي اخري بيتي واهدمه لكن ارسلت لك عشان تعرف وتصدقني لكن طلعت مكانتي عندك مهزوزه وتنتظر اي شي يهزها واهم ماعل الحين رضا ربي عني ويكفيني ربي يعرف الحقيقه ومع الايام بتنكشف مثل ماربي ابتلاء يوسف بلاني وربي اذا حب عبد ابتلاء وانا فرحانه بهالبلاء لانه قربني من ربي اكثر ولايهمني بعد اليوم وجودك بحياتي وكنت خايفه ع عيالي لكن الحين لا اللي رزق الطيور بعشاشها بيرزقهم اما انت مايهمني من يكون بعدك بحياتي لاني ضحيت لواحد مايستاهل ماعندس استعداد اضحي بعد ،، يكفيني كنت اشوف شوفتك عندي مثل العيد ويكفيني كنت لاسمعت صوتك مثل الدوا لي ارتاح والحين اقولك كل شي كان يعني لاحظ انه كان مالك بقلبك مكان مثل اول ولاظني برجع لك مثل اول ولو كان فيك خير لي او ماكان ودك بخسارتي كان واجهتني باللي حكي فيني لكنك بغيتها من الله وانت ماراح تلقى مثلي بحياتك مو غرور لكن ثقه محد بيعطيك قد ماعطيتك ،، وانا ماكان ودي انس ارسالك او افتح معك مواضيع لان اللي خسرني مره وباعني مره يبيعني مرات انا ارسلت لك عشان تعرف اني صابره عليك عشان ماتكذب وتقول لعمي ان مالك علاقات وتجلس تحلف وتحرم وتطلق لكن بطلع اكبر من هذا كله عشانك ابوي عيالي وعشاني بنت اصل ماني راسلتها لعمي انا بحكم الله بينا لان عمي ضعيف مابيده شي كل شي بيد الله محد بياخذ بحقي منكم الا ربي ما ارجي احد غير ربي ياخذ بحقي منكم ،، وعلى فكره انت اللي خسرتني مو انا خسرتك انت اللي خليتني مو انا خليتك ،، ويوم طلبتك ماتطلقني كانت لحظة ضعف مني وكنت بعز الصدمه شلون واحد حبيته وبينا عشره يسوي كا والله لو اني عدوه لك ماسويت كذا كان لو ماتبيني قلت ياناس هاذي ام عيالي لاتتكلمون فيها عشان عيالي مو عشانها وطلقتني وسكرت الموضوع لكن ربي حب يبين لي قيمتي عندك وحب يبين لي معدنك ،، انا بخليك ولكن بينا اللي عينه ماتنام،، رد علي محد عيب فيك انتي عيبتي بنفسك محد قالك شي وبعدين مو انتي قايله عني اني اكلم واني بخيل واني خبل واني راعي مغازل واني ابي اتزوج غيرك وش اقول وش اخلي كل شي قلتيه عني لكني مابي اتكلم قلت مو لازم تتكلم لانك حطيتني اسوء شي بالحياه وانا ماقلت عنك اي شي ولاضريتك بشي قد ماضريتني لكن حابه اقولك شي واحد اللي حكا لك حكالي فيك ونفس الكلام اللي وصلك وصلني انك قايل عني عقل بزر وان تفكير ولدي اكبر من تفكيري واني نا استاهل واني كذابه واني واني واني لكني انا فوق هالمستوى ما ارخيت اذني لهم مثلك ويحثت بالموضوع وجلسن اسعى واسال وش قال بعد وش حط ،، ع العموم قبل اخليك ان كان قصدك برسالتك اللي تقولي فيها البنت هاذي ماتستاهل طبطبه على الراس تستاهل حفره تقصدني فيها براحتك تكلم واقصد اللي تبيه ووصلني كلام انهم قايللك اني راعية مكالمات والله والله مايهمني ابد اي احد قد مايهمني ربي عارفني وعارف تربيتي وعارف الحدود اللي اوقف عندها وانت مو لازم تثق فيني لان الجنه ماهي بيدك وسعادتي ماهي بيدك سعادتي عند ربي ولاهي بيد احد وارجع اقولك قلبك ماهو الجنه يوم اتعب نفسي اني طلعت من قلبك الحمدالله ربي هداني مع اني ماغلطت ولاحنتك مثل ماتظن لكن ربي كريم ويحتاج الحمد حتى الاغاني تركتها مو عشان تذكرني فيك لا عشان عرفت لذه الطاعه عرفت قيمة البلاء والله اذا حب مؤمن ابتلاه وقربه منه اكثر واكثر والحمدالله اشكرك يافلان انك سويت هالسالفه عشان تقربني اكثر من ربي وقال ربي << فوجدك ضالن فهدى>> الحمدالله ع الهدايه ماحبني اتعلق فيك اكثر وهداني واذا انت عينك تنام بالليل انا عيني ماتنام مو عشان افكر فيك لا تفكيري اكثر واكبر من كذا انا اسهر على سجادتي اطلب ربي ياخذ بحقي وعطي كل ذي حق حقه كاني غلطت عليكم بتاخذون حقكم وكانكم غلطتو بتاخذون حقكم لاني حكمت احكم الاحكمين بينا حكمت العادل بينا ،، مع السلامه ،،، رد علي وقال انا ما اقصدك بالحفره ولا الطبطبه ع الراس انتي دايم تتعمدين تفهميني خطا لكن تعجبني متابعتك لي بتويتر رديت عليه شكرا ،، بعدها بشوي ارسل لي شعر مقطع صوت نفس طريقه اللي ارسله قبل ان الله يسعدك ويفرج والله انت الخير بحياتي وان مدري ايش المهم شعر فيه نفس الدعاوي مارديت عليه سمعته وسكرت الواتس وخليته مارديت ،، بعد ساعتين رجعت لتويتر لقيته كاتب اشعار انه بمعناه ضايق صدري وانه يقول صاحبي خذ قلبي معك لارحت ومنت راضي تاخذه ،، وشعر ثاني ان كل ماذكرتك تبسمت كنها نسمه هوا بارده بعز الظهيره المهم اشعار غزل وبعدها كتب ان لقا بعد عن الناس راحة راسه وان بعده مو مسالة وقت او مساحه انه لقا ببعده عن الناس راحه ،، واليوم كاتب ان عيب الجسم يستره قطعة قماش لكن عيب الفكر يفضحه اول نقاش ،، يصضدني طبعا وعرف اني اتابعه مره يكتب غزل ومره يكتب ان اذا ابعد ارتاح ومايبي الناس ومره سكنب عن الثقه وكاتب لصديقه ان لاتثق باحد مره وحده لان الانسان مو معصوم عن الخطا رد عليه صديقه وقاله كل خطا مغفور ولايعاقب الواحد ع الخطا لان ربي كبير يسامح كيف حنا البشر رد زوجي عليه الله يغفر لنا ولك ولكل مسلم احسن فشله صديقه يوم قال محد يعاقب ع الخطا والخطا مغفور المهم احس فيه انفصام بالشخصيه يكتب اشعار غزل ومره كلام يسب فيني مثل عيب الفكر يفضحه اول نقاش وايه نسيت اقولكم وقف كتابه وضحك مع البنات يعني ماصار يسولف معهم على العام صار يسولف معهم ع الخاص لانه للحين ضايفهم مامسحهم وهو انصدم شكله مني لان مايدري ان عندي حساب بتويتر توقع ان ماعندي عشان كذا ماخذ راحتته ،،، واللي قاهرني اصلا يوم كنت ارسله قبل وش فيك علي ليه ماترد علي كان مطنش ومن ارسلت له صورة المحادثه وطلعن نطرني لين صرت اون لاين ورد علي سبحان الله كان مطنش ويوم شاف الصوره رد ولا بعد يقول ماني ملزوم اوضح لك دامه مو ملزوم يوضح ليه رد علي كان بقا مو ملزوم ،، ضاق صدري منه معقوله يسبني وهو عارف اني اشوف كلامه ،، ودامني صدق ما اهمه ليه مارجع يكلم البنات بالعام مو خلاص اذا ناوي يطلق ليه مايكلمهم ولا عليه مني انسان غريب ،، ادري بتقولون لي لاتتابعينه بتويتر انا اتابعه لاني محتاجه اكرهه اكثر ابي اشوف حقيقته اللي كنت مخدوعه فيها ،، وابي افهم منكم توقعون ليه رد يوم شاف صورة محادثته وليه وقف ماعاد يكلمهم بالعام دامه مايبيني وقالي مع الف الف سلامه ودامه قال مع الف الف سلامه ليه يرسل لي شعر مثل الدعاء يعني الله يكتب ويفرج ومدري وشو المهم بعرف كل هذا ليه وليه مره يسوي اشعار ان تعبته الغيبه والضيقه ومره يسب ان الفكر والثقه ومدري وشو ونسيت اقولكم هو كاتب مقوله ان احسن حظا للرجال مع النساء اللي يستطيع الاستغناء عنهم. ،، بهاذي مدري شيقصد؟؟ وصار بعد ينزل مقاطع دينيه ويحطها تطوع الرجال عقب ماكان مع البنات ضحك وسوالف والله عجزت القا لتصرفاته تفسير ،،. وافوض امري الى الله والله بصير بالعباد

الله يكون بعونك
احس ان اهم حاجة طلعتي الي بقلبك
وما رحمتيه

بس للحين بيظلم فيك وبيحط فيكي العيوب
يعني تخلصي من قصة ترجع قصة


مو حاس فيكي
كان رحمك
والله عدوك يرحمك لما يعرف النار الي انتي فيها

__________________


اللهم اعنا على ذكرك وشكرك وحسن عبادتك