المشاركة الأصلية كتبت بواسطة الـــوحيد

السلام عليكم ورحمة الله وبركاته

مثل ماقلت لكم وصل ابوها واخوها وبعد ماقمت بضيافتهم جلسنا وطلب عمي انها تجي وتجلس وفعلا جت المهم فتح
الموضوع وقالي انا جيت اسمع منك فـ تكلمت وقلت كل شي وطلعت كل اللي بقلبي
حتى موضوع الطلاق واسبابه قلته وهو ماكان داري اصلا حتى بالطلاق عياله ماقالوا له
المهم بعد ماتكلمت وهو ساكت يسمع بعد ماخلصت سألها صحيح اللي قاله زوجك هي سكتت قال لها الحين تقومين
تجمعين اغراضك وتروحين معي انتي اصلا ماتستاهلين تكونين على ذمته لكن انا غشيت ولد عمي يقصدني لاني
ابوي وابوه عيال عم وانا لازم اصلح غلطي وانا بنفسي ازوجه اللي تستاهله وانا متكفل بكل شي
وانتي تروحين معي تخدميني الين الله ياخذ امانته وانسي موضوع المدرسه قومي بسرعه اخلصي
هي طبعا عارفه ابوها بصراحه صعب المهم صارت تدق اخوها يعني تكلم
المهم تكلم اخوها وسكته على طول ماخلاه يتكلم فـ تكلمت انا وقلت ياعمي انا ابي فلانه وهي ام عيالي
قال اجل خذها الحين بعيد عني وتكلموا وانا جالس انتظر وش يصير يااما تتسنع وتصير مره على قولته
والا اخذتها معي ورحنا انا وياها للغرفه وجلسنا نتكلم ولاول مره تعترف باخطائها قلت مو مهم الحين من
الغلطان المهم نصلح امورنا ونعيش مثل باقي الناس بحب وتفاهم لان خلافنا يأثر حتى على عيالنا كل
يوم ويشوفون ابوهم نايم بالمجلس ومايكلم امهم الخ
وكلام كثير ماخليت شي
المهم طولنا بالكلام وهي قالت خلاص انا فعلا غلطانه وانا وانا
المهم ان شاءالله انتهى الموضوع
مدري حسيت انها فهمت وساعات اقول انه خوف من ابوها