السلام عليكم جميعاً ...

أنا ماراح أطول عليكم بموضوعي .. بس والله جيت أبي أدور حل للمصيبه اللي أنا وزوجتي فيها .. عسى الله أن يحل مصيبتنا .. آمين

المصيبه يا أخوان ويا أخوات ان زوجتي من فتره حست بآلام في الصدر من الجهه اليسرى .. على طول شكت في قلبها .. ليش؟ .. لأنها افتحت الانترنت ودورت على الأعراض اللي تشتكي منها ولقت موضوع واحد يقول ممكن يكون مشكله بالقلب! .. وهنا بدت المصيبه.

أول مابدت حالتها كانت تعبانه شوي .. وتخاف .. خوفها كان مبين عليها .. وكلمتها وقلت وش فيك .. وقالت لي أنا شاكه بقلبي!! .. قلت استغفري ربك .. على طول قلب؟ .. ليش ماتفكرين اننا قبل كم يوم كنا طالعين برا البيت وكان الجو بارد .. وممكن تقلصت عضلات الصدر ؟ .. قالت لا .. أنا أحس بضيق تنفس .. قلت وش يمنع طيب .. انتي غلط تشكين بالقلب .. المهم وديتها دكتور أمراض قلبه (جنسيته هندي) .. ومايتكلم الا انجليزي .. وكنت أنا مترجم بينهم .. المهم زوجتي قالت له بالضبط وش تشتكي منه .. وكشف عليها كشف أولي .. وعطانا موعد للكشف بالموجات الصوتيه (echo ) بعد 5 أيام .. بس حالتها صارت أسوأ .. لأنها صارت تفكر وتوسوس .. وتركت البيت ودخلت عالم ثاني ... المهم قلت شكل المشكله مو متحمله هاخمس أيام فأخذتها من بكره للدكتور الهندي .. وقلت لازم تسوي الكشف اليوم .. فسوى الكشف قدامها .. وكان يقول هذا القلب .. نبضاته سليمه .. ضخ الدم سليم .. كل شي فيه سليم 100% ... ورجعنا لمكتب الدكتور وجلس يكلمها ويقول انتي لاتفكرين بقلبك .. مافيه شي .. هاذي عضلات صدرك متقلصه ويبيلها فك .. وعطاها حبوب relaxon عشان تفك العضلات المتقلصه ..

يوم طلعنا من المستشفى كانت مبسوطه وأنا على بالي 100% تطمنت على قلبها .. وذاك اليوم أكلت زين واضحكت وتغيرت شوي ودخلت جو البيت شوي .. جو البيت يعين أنا وبنتي .. لأن أنا وبنتي نلعب ونضحك وزوجتي الله يشفيها كانت بهمومها

المهم من بكرا يوم صحينا من النوم لقيت تعابير وجه زوجتي تقول ان الحاله رجعت لها ثانيه .. سألتها وش فيك ياحبيبتي .. كأنك مو مبسوطه .. فبكت .. قلت خير ان شاءالله؟ ... قالت مو متطمنه .. أحس بضعف بجسمي .. قلت ماهو الضعف بسبب انك ماكلتي طول الأيام اللي راحت .. وكنتي مهمومه .. تعوذي من الشيطان واذكري ربك وشوفي حياتك زين وراح تحسين بتغير .. المشكله كان يوم خميس ... والعيادات تسكر ومافيه الا طوارئ .. لأني كنت مخطط اني أوديها دكتور قلب عربي !!

يوم صار السبت (اللي فات) أخذتها على مستشفى ثاني .. وكان الدكتور مصري .. فدخلنا عند الدكتور .. وشرحت حالتها للدكتور ... قال الدكتور من قال لك ان المشكله بالقلب؟ .. قالت أنا قريت بالنترنت .. قال هو ممكن الأعراض تكون بسبب أشياء كثيره .. حتى القلق ممكن يسبب الأعراض اللي انتي فيها .. لكن حنسويلك تحاليل وفحوصات .. ماتصدقون .. سوى ذاك اليوم 3 فحوصات:
1 - فحص بالسماعه .. وقال دقات قلبك سليمه ومنتظمه
2 - فحص بجهاز التخطيط .. وقال نبض القلب سليم ومايبين فيه أي ضعف أو مشكله .
3 - فحص بالموجات فوق الصوتيه Echo .. وكان يقول لها " بصي .. ألبك مافيش زيه .. انتي عمال تضحكي على نفسك"

بذاك الفحص كان يأكدلها ان كل شي سليم ووراها الطين الأيمن والأيسر والأذين الأيمن والأيسر .. ويقول شوفي دمك بينضخ ازاي ...

وزوجتي تقول أنا خايفه يكون فيه تضخم بالشرايين !! .. قال انتي ماتحكميش على نفسك وتوسوسي .. فقال لها كلام عن تضخم الشرايين وحبيت أشاركم فيه وأفيدكم بمعلومه .. الحمدلله زوجتي ولا مره استخدمت موانع للحمل (من حبوب أو لولب .. أو غيره) .. قال الدكتور دام انتي الدوره عندك منتظمه وماتستخدمين موانع حمل .. وتحملين وتولدين فمستحيل تفكرين بمشكله بشرايينك .أو حتى قلبك .. وخصوصا عمرك 25 .. وقال ان اللي يفكرون بالمشاكل هذي المفروض اللي يوصلون مرحلة اليأس .. أو اللي يستخدمون موانع .. المهم حبيت أفيد بعض الأخوات اللي تستخدم موانع .. واذا تبون معلومات أكثر عن المعلومه ممكن تسألون ..

نرجع لكلامنا .. الدكتور عطاها موعد علشان يشوف وش سوت .. وعطاها طبعا نصايح ويقول لاتفكرين وتوسوسين .. واهتمي باللي حوالينك .. رجعنا للبيت ذاك اليوم وكأنها شوي مبسوطه .. قلت المفروض تصيرين متطمنه .. خلاص ياحبيبتي لاتفكرين بشكل سلبي .. خلي عندك تفاؤل .. قالت ان شاءالله أحاول ...عدى ذاك اليوم وهي نص مبسوطه ..

يوم الأحد كلمتها من الدوام وقالت ضايق خلقي وصارت تصيح .. قلت ليش مافيه داعي كذا .. حاولي ماتفكرين بموضوعك لأنك مافيك شي .. مافيك الا وسواس بس .. قالت أنا خايفه .. قلت طيب أنتي لو تفكرين انه فيه ناس مهمين بحياتك ومحتاجينك وتلهين نفسك بهالتفكير كان تهون عليك .. قالت ما أقدر والله ما أقدر .. يعني داخله عالم ثاني .. كأنها داخله غرفه دائريه مافيها باب .. وماتقدر تطلع منها

رحنا أمس للدكتور مره ثانيه (علشان الموعد ) .. خلاها تجري على السير الكهربائي .. بس عشان يثبت لها انه قلبها سليم .. ووراها تخطيط قلبها بعد الرياضه هذي .. قال هذا قلب سليم 100% .. والله مافيه أي مشاكل .. قالت طيب ليش أحس بالآلام هذي؟ .. قال الدكتور انتي ركزي بحياتك ولاتفكرين بالهم هذا وراح تشوفين انك تغيرتي .. طلعنا من المستشفى وأنا حاط أمل ضعيف انها تصير مبسوطه .. وكلمتها وقلت لها لازم تاكلين زين وتنتبهين على حالك .. صار لك فتره ماتاكلين الا شي بسيط .. لازم جسمك يتغذى صح حتى لو غصبتيه .. رحنا البيت وتعشينا .. وماتخيلون انها أكلت أربع ملاعق رز بس .. حاولت خليها تاكل قالت ما أقدر .. ما أشتهي .. بعدها اجتمعنا مع الجيران ويوم رجعنا قلت ان شاءالله انبسطتي ... قالت لا والله .. أصلا جالسه بهمومي !! ... قلت المفروض انك تاركه الهموم على جنب وشفتي حالك .. قالت والله ما أقدر ... خايفه من قلبي!! ...

صارلنا الحين تقريبا اسبوعين على هالحال .. لا تاكل .. ولا تنام زين .. ولا تبتسم .. ولا تلعب معنا أنا وبنتي (اللي عمرها سنتين) .. ولا تتحرك كثير ..

رجاءً اكتبوا لي حلول (غير الدكتور النفساني) ... وادعوا لنا ان الله يرجع الحياة في بيتنا وبيت كل مسلم

وآسف على الاطاله