ما السبب وراء تخلي الشاب عن قيمه وعاداته بعد ما يخطب ؟؟!!..
السلام عليكم ورحمة الله وبركاته ..
عندي استفسار وتساؤل شاغل فكري حبتين وإن شاء الله أجد الجواب الكافي منكم ..
حقيقاً استغرب من حال الشباب حينما يتقدم لخطبة فلانة يكون قبل ذلك مع أهله إخوته وأمه لديه بعض من القناعات و الاعتقادات والقيم التي يتمسك فيها ويحارب لأجلها لكن بمجرد يخطب يتناسى كل ذلك ويتغير بين ليلة وضحها و ياليت للأفضل بل للأسوأ ..
خليني أضرب أمثله لكم ..
- شخص كان يرفض النقاب و اللتمه ، كان يعمل مضاربات معانا لما ندخل سيارته يرفض أي وحدة تدخل سيارته إلا وهي مغطيه عيونها المهم خطيبته الآن تتلتم وهي ممرضة وشافها في المستشفى هكذا قبل أن يخطبها يعني ما رفضها وغير أنها تخرج متلتمة بالمكياج ومره من المرات حتى أنها مارفعت شعر قصتها عن عينها وتلتمت يعني شعرها بره ..
استغربت وقلت فين اللي يضارب وممكن يوقف السيارة يطرد البنت اللي تكشف عينها ..
وتخيلوا لما عمل الشوفة الشرعية دخلت عليه بالتنورة الميدي " يعني القصيرة إلى نصف الساق " طبعاً غير المكياج وغير البلوزة ولبسته ساعة وهو بعدها طار من الفرح وتناسى قيمه هو وعاداتنا ..
بالرغم أنه كان الولد العاقل الهاديء اللي الكل يعجب به بسبب هدوئه وأنه غير عن الشباب الطايشين بمجرد تجيء عندنا يتحول إلى مجنون ليلى مره جات عندنا في الخيمة على البحر هو تجنن فتح الأغاني بأعلى صوت يعني اسمعي ياجارة وأخذ دباب رملي ويفحط قدام الخيمة اللي عمره ما عملها قبل كذا ..وغيره ذلك من الطيش والجنان ..
- شخص آخر كان صارم من ناحية غطى العين والحمد الله خطيبته تلبس عباية فوق الرأس ماشاء الله ..
لكن هذا الشخص مره ما يحب البنات الجريئات اللي بس ترفع صوتها بحضرت رجال تعتبر عنده قليلة أدب وما عندها حياء بغض النظر عن المتسبب في ذلك وكان يعطي أحكام على البنات مباشرة من شكلها و تصرفاتها ويسوء الظن مره كثير ويشك كثير المهم عمل الشوفة وتخيلوا هذه البنت ماذا عملت !!
دخلت عليه بالبنطلون الضيق " وهي ماشاء الله مره مليانة " وتجيء مباشرة عليه وتمد يدها وتسحب خدوده وتبوسها تخيلوا وعادي جلست قدامه وبدون أي إحراج أو حياء وهو ماشاء الله خلاص طار عقلوا المسكين بها ..
- وحده و واحد كانت شوفتهما عجيبة كأنها ملكة أو زواج ..
طبعاً هي دخلت عليه بكامل أناقتها يعني مكياج ولبسه عريان والشعر وحركات لكن الطامة الأكبر أنها لبسته ساعة ولبسها طقم ذهب وأكلوا بعض كيك وشربوا بعض العصير ...
أنا كنت أشك أنها كانت شوفه ..
أخيرا شخص يرفض رفض تام للنقاب و يا ويلها لو وحده من أخواته كشفت عينها ممكن قدام الناس يعطيها كف على وجها المهم خطيبته بل خلاص ماشاء الله صارت زوجته ما تغطي وجها أصلا وتخرج بالمكياج عادي ولا شرطت شرط أنه لا يجبرها على غطاء وجها وللأسف لما سألوه ليش وافقت على وحده زي كذا ؟؟ برر موقفه بـ أنها هي خلاص عاشت كذا بيئتها كذا وتربت كذا وتعودت على كذا وهي عندها أخلاق ومؤدبة ومحترمة طبعاً أخواته استغلوا الموقف وقالوا حتى نحن كذلك ونريد كشف وجوهنا فكان رده أن زوجتي غير وأنتم غير!!!
ها ما رأيكم مالسبب وراء ذلك التغير وأنا عندي قصص كثيرة مثلها لكن هذه التي تعايشتها ؟؟
أنا لا أريد أن أسيء الظن بهم ولا أريد أن أغير رأي بهم ولا ينزلوا من عيني وعلشان كذا ودي أعرف ماهو الشئ الذي يحصلهم بعد ما يخطبوا ؟؟
وسلامتكم ..
سبحانك اللهم وبحمدك استغفرك وأتوب إليك ..
28-03-2008, 08:43 PM
ضوابط المشاركة
العرض الشجري