الاخ Fahacci
وجدت الموضوع وقرأته جيدا مع الردود

ولو حاب اعلق في موضوعك الاخر بعلق !!!

وفعلا ظلم وقهر مقابل تسامح ولين من قبلك للزوجه

وبصراحه لمن قريت رد الأخت أم اثير

قلت وين احنا !!!

صارت لعبه !!!

الزوجه تغلط والزوج يجازيها بهديه لها ولامها !!

هديه ليش !!!!!!!!!!!

مقابل شتم زوجته لامه واهانته من قبل ام زوجته !!!

وين عايشين حتى بالمسلسلات الرومنسيه مايسوونها !!!

وخفت من ردك شنو بيكون!!

بس الحمدلله ردك طمنتني جداً

وحابه تعرف اني ماقد نصحت رجل بأهمال زوجته بس مادري ليش معاك متعاطفه

لانك مو مقصر معاها وحليم لاخر لحضه بس الضرر نالك ونال والدتك وخرب بنتك

وانت صبرت اربع سنين يعني ماقصرت صبرت مده كافيه !!!

اخيرا اسال الله يهديك ويصلح حالك ويصبرك وياجرك على ابتلائك ويعوضك خيرا ً

__________________

اخي ما نصحتك هذه النصيحه كي انال كل هذا الاستهزاء منك و من الاخت صريحه جدا

انني اعطيتك من خلال ما رايت امام عيني من مثل ما عانيت منه
وكانت النتيجه الطلاق و العياذ بالله
التشهير امام الناس سواء للزوج او الزوجه
فراق الاحبه

اذا كنت تريد من البدايه الفراق
فلما ذا تبحث عن حل
اخبرنا مباشره انك لم تعد تحتملها و تريد فراقها


اخت صريحه جدا
الصراحه تكون مفيده جدا في مواضع
لكن لا اظن انك تريدين هذه الصراحه حين يفكر زوجك بالطلاق منك و استشاره الناس فيشيرون بما اشرتي انت للاخ
اتقي الله


و للمعلوميه فقط
هذه التجربه التي مرت بي
جميع من اشترك في اسداء النصيحه تطلق
و منهم سيده عندها 3 اطفال و مزوجه لمده 15 سنه

و رجل قال له طلقها لماذا انت متعلق بها
تطلقت بنته بعد ما شاف الويل
و تطلق ابنه بطريقه نفس طريقه طلاق قريبي
و زياده
عنده ابن لم يراه زوجته طلقها وهي حامل ولدت بدون ما يعرف منها
بل عرف من الناس
وهو في بلد وهي في بلد

و انا لو اني ما سحبت نفسي من الاول في بدايتها مع اني اقرب للانسان صاحب المشكله قرابه من الدرجه الاولى
لكنت ضمن المطلقات الان


ولا حول ولا قوه الا بالله

__________________

اللهم أنت ربي ، لا إله إلا أنت ، خلقتني وأنا عبدك ، وأنا على عهدك ووعدك ما استطعت ، أبوء لك بنعمتك ، وأبوء لك بذنبي فاغفر لي ، فإنه لا يغفر الذنوب إلا أنت ، أعوذ بك من شر ما صنعت(البخاري)

السلام عليكم ورحمة الله وبركاته
عزيزتي أم أثير حاشى لله ان يكون المقصود هو الاستهزاء بك
ولكن هو الصدمه من الرد !!
فلو قرأتي ردود صاحب المشكله لوجدت فيه هدوء وتنازل واستسماح وتبرير لأخطاء زوجته
ولو قرأتي له مشكلته التي عرضها سابقا ستدركين خطأ زوجته الفادح ووالدتها
ويبدو انك اقترحتي اقتراحك طيبة منك وعلى نية منك للاصلاح
ولكن يا اختي العزيزه يراضيها ويطلب ودها حلو .... بس انتي احكمي
واحده ماراح اقول ماتحترمه ولاتسمع كلامه بس ... قبل ماطلعت من بيته شتمت امه
وكملت امها ورفعة الجزمه الله يعزك في وجهه وامام عديله !!!
ثم تخرج زوجته من بيته بعد تنبيهه لها انها ان خرجت لن ترجع !!!
ثم تطلبين منه ان يجازيها هي ووالدتها بهديه !!
يمكن ماتعرفين انتي هالامور يعني فعلا شي غير معقول بعد اللي سوته يهديها
وان شاء الله فهمتي ليش غضب الاخ وليش استغربت انا !!

يبدو انك فعلا لم تنتبهي لذلك وكانت نيتك الاصلاح وعودة المياه الى مجاريها حتى لايؤدي للطلاق
بس يا اختي انا قلت ماراح اقول كلام والسلام اما اكون صادقه وقادره افيد او اسكت
حبيت اكون واقعيه لو حسيت انه غلطان ماكنت سكت وبقول بكل صراحه
بس انا محاسبه كوني اكتب حل لمشكله لازم اكون صادقه في حلها
ولا اقول رراضيها وتحملها على حساب نفسه وكرامته انا محاسبه اقول النصيحه الصحيحه
والله بيحاسبني ويمكن بنصيحتي انه يرجعها بعيبها يعيش طول عمره مهموم بسبة نصيحتي
وبعدين يا اختي النبي اللي قال لزوجة ابنه تقول لزوجها انه يغير عتبة البيت
بسبب كلام الزوجة عن زوجها عرف انها مافيها خير!! حكم عليها من كلامها عن زوجها !!
يعني اقصد ان فيه حريم علاجها الوحيد هو الطلاق او الزواج عليها

وشكلك ماشفتي ردوده علي اهو طول الوقت يبرر لها يعني هو مايبي الطلاق
اصلا حتى موضوع بيت الطاعه كان مو عاجبه
وترى الكلام اللي قاله لج ماينلام
رد فعل طبيعي لموقف زوجته
وانا واثقه اللحين بعد مافهمتك سبب رفضه يراضيها راح تعرفين ليش ماعجبته نصيحتك
وليش كنت مستغربه من كلامك
واتمنى تكوني رضيتي عنا

وحابه اعطيك قصه انا بعد دام ضربتي عن الطلاق في شخص اعرف قصته شخصيا
متزوج وعنده اطفال زوجته تقريبا نفس زوجة صاحب المشكله يعني تسمع كلام امها وخواتي ماتحترمه وتطلع من بيته من اول طفل مشاكل سكت وتنازل وصاروا طفلين وهي معاه بمشاكل تدخلوا الناس للصلح وترجع بس هي نفسها وهو صار عصبي مقاطع اخوانه حتى امه من المشاكل يعصب عليها مو طايق نفسه الين صاروا اربع اطفال وزوجته نفس الحال ولمن تصير مشكله وتروح بيت اهلها تشتكي من زوجها وتقول فيه كل عيوب الدنيا رغم انها لمن تكون في بيته نشوفها بملابس اخر موديل وبيتها روعه وكل شي حلو حتى عياله موديهم مدارس خاصه بس شوفيها وقت الزعل مافي عيب ماقالته عنه بخيل مايحط شي في البيت وماينطاق ونتهاوش بدون سبب وما أمن على عيالي منه يمكن يذبحهم اهو مو صاحي .... الخ بس هالمره مصختها معاه زياده يعني قالت عنه كلام ماينقال حطها في صدره وسكت وبدى يلعب بهدوء وبدون ما يقول لاهله ولا حتى امه خطب بنت هاديه وطيبه واهلها طيبين ومحد يدري وطول هالفتره لمن يقولون نصلح بينكم يقول ماعندي مانع وهو يخطط للزواج من تحت لتحت ويجهز بيته بعدها رفع قضيه للمحكمه وصارت في المحكمه وبعدها انتشرت قصه خطبته يعني ماعرفوا الا وهو مالك ومسوي حفله عقد القران في بيت العروس ولمن عرفت زوجته رمت له العيال كلهم عنده تبي توهقه فيهم وبدى التناقض هي منعته يشوف عياله وحرمتهم منه لانه على قولتها ينخاف عليهم منه وكانت تمنعه يشوفهم كيدا له وكان اذا يبي يشوف الكبار يروح للمدرسه يسلم عليهم ويعطيهم مصاريفهم واللحين ترميله الاربعه في حوش بيته وتروح وتخليهم !!!!
بس اهو وداهم عند امه وحط خدامه وقال لامه هذي اللي كنتوا تصبروني عليها ماكنت متحملها وعندي منها طفل واحد واللحين صاروا اربعه والبركه فيكم وفي سماعي لكلامكم !!
قعدوا اسبوعين بعيدين عنها بس كانت بتستخف تبي العيال كأن الله انتقم لزوجها منها مثل ماحرمت ابوهم منهم ورفضت يشوفهم حرمها الله من عيالها وباراداتها
و المحكمه قالت لها ترد لزوجها ماعندها اي حجه او سبب مقنع للطلاق بس اهي صممت على الطلاق وهو رافض قال تبي اطلقها تخلع انا ماني مطلق وعيالي عندي وهو في قرارة نفسه عادي بيعطيها العيال بس حب ينتقم لنفسه ويادبها شوي في الاخير وافق يطلقها بدون اي شروط منها ويعيشوا العيال معاها في شقه صغيره
وبيتها الكبير اللي كانت فيه أثث غرفة نوم جديده للعروس وتزوج وسكنت فيه العروس الجديده واللحين هو سعيد معاها والله رزقه منها بولد ورجعت علاقته مع اخوانه بعد ماكانوا مقاطعينه بسبة زوجته اللي فرقة بينهم وصار هاديء وطيب ودايم يضحك مثل قبل ويشهد الله اني على مااقول شهيد وربي كل كلمه قلتها صادقه فيها الشخص هذا مقرب لنا انا نفسي كلمت زوجته قبل تتطلق وقبل حتى يتزوج عليها زوجها بس طلعتلي كل عيوب الدنيا في زوجها وانها هي صبرت عليه ولو غيرها ماراح تتحمله قلت لها والعيال قالت مايشوفوهم عندي بربيهم ويدفع نفقتهم وبيتي انا بسكن فيه وهو يطلع برى وبيطلقني غصب عنه وكان كل كلامها اوامر وكل شوي تقولي حتى فلانه شاهده وفلانه تقصد خواتها و امها وتقارن بينهم وبينها قلت لها لاتقارنين بين خواتك وبينك ونصحتها وربي من كل قلبي بس كانت معنده رقم اني عمري ماكلمتها الا بس سلام في المناسبات بس لمن عرفت بمشكلتها سالت عن رقم بيت امها ودقيت عليها لاول مره وعرفتها بنفسي وكلمتها كنت حابه اصلح بينها وبين زوجها محد يحب الخراب
بس الاثنين كانوا معندين بس الخسران هي الزوجه وخواتها وامها مانفعوها كل واحده قاعده اللحين في بيتها ومع زوجها وهي مطلقه وكل حركه عليها محسوبه وبعد ماكانت بعافيه اللحين صايره هيكل عظمي
والعكس عند زوجها مرتاح ودايم يقول لاهله فرق بينها وبين زوجته الاولى الجديده يقول لو ازعل عليها اتحسف من طيبها وسكوتها حتى ولدها غير هادي وتبين فيه طيبه عكس عياله من الاولى اللي صاروا مثل امهم يكرهونه وكأنهم أعداء مو عيال
بس هذ قصه اقولها باختصار وعلى عجال بس انا استفدت كثير منها وحابه اخوي يستفيد منها ويتدارك الوضع قبل يزيدون الاطفال وانا ماقلت له طلقها انا قلت له عدة طرق يسويها يمكن فيها يعتدل امر زوجته وترد له احسن من قبل بس اذا هي معنده خلاص لا حول ولا قوة

واسفه على الاطاله

__________________

الأخت أم أثير أود أن تعلمي بأني لم أستهزى برأيك ولكن أعترضت عليه بشدة لأنه كان فيه الكثير من الإهانة لشخصي في وقت أنا ماغلطت فيه ..

ولو حصل سوء فهم منك فأنا اسف لشخصك الكريم ومشاركتك في ابداء الرأي ولكن إذا أردت أن تطاع فأمر بما يستطاع .. قصتي مع زوجتي فيها الكثير من الضيم لي فأنا زوج مع وقف التنفيذ.

تخيلي نفسك تصحين وتنامين على أقل كلمة زوجتك ماده بوزها طول اليوم .. تمزح معها لو طلعت كلمة منك عفوية وكان بإمكانها تفسير الكلمة بشكل سيء قامت الدنيا وقعدت !!

أنا ما سعيت للطلاق ولو كان واحد غيري ماهمه بنته كنت أخذها من زمان بنفسي لبيت أهلها ومعطيها ورقتها .. كنت على الدوام بفضلها على نفسي هي وبنتي ..

- تلبس أحسن لبس .. جوالات أخر موديل وأنا أخذ جوالها القديم على الدوام .. كل أسبوع مطعم شكل .. أهلها لا بغوا سوق ماقصرت معاهم أنا أمرهم بنفسي .. أشياء كثير ما أحب أذكرها عشان لا أكون بأتمنن عليهم بما عملته ولكن يحز في قلبي أنه ماقدروني أبدا ...


حتى تربية بنتي يبون يتدخلون فيها أنا لاجيت أزجر بنتي أو أضربها ضربه خفيفة على يدها أو مؤخرتها قلبي يتقطع وهي تبكي لكن لما تجي زوجتي تحتضنها وتقولي حرام عليك وتقول لبنتي خلاص حبيبي احنا مانحب بابا .. والله شي يقهر.

أما لما هي زوجتي تضرب بنتي قدامي وتجي بنتي تلجأ لي أقولها عشان لا تعملي شقاوة ثاني مرة .. البنت الشاطرة تسمع كلام بابا وماما .. هناك فرق بين ماتسمعه بنتي مني عندما تزجرها أمها وبين ماتسمعه من أمها عندما أزجرها أنا ..

أنا على يقين أنه من الخطأ أن أغلط زوجتي أمام بنتي عند زجرها لها لأن في ذلك تنزيل من قدرها في عين بنتنا ونفس الشيء بالنسبة لي .. لدرجة أن بنتي صارت ماتسمع كلامي !!

مرة وحدة فقط عندما قامت زوجتي بضرب بنتي على وجهها قمت بزجرها وقلت لها أصحك ثاني مرة تضربينها على رأسها أو وجهها .. قالت لي: بنتي مثل ماهي بنتك! قلت لها: صحيح بنتنا الأثنين لكن ضرب على الوجه والرأس ما أسمح لك أبدا لأن الغرض من الضرب الغير مبرح هو التأديب وليس الإهانة والإذلال فلو تعودت بنتنا أنها تنضرب على وجهها ورأسها سوف تتعود على الذل والمهانة .. وأنا ما أسمح لك تذلينها حتى لو كنتي أمها!

أما غير ذلك فلها الحق في تأديبها ..

وشكرا

الأخت صريحة جدا شكرا على أهتمامك بمشكلتي ..
الرجاء التعليق بإسهاب على الموضوع الاخر في قسم التوجيهات الزوجية.


الأخت ام أثير .. عرضت المشكلة للأستشارة فماخاب من أستشار ولكن هذا لايعني أنني في الأخير سأتخذ القرار بنفسي وإنما عرضي للمشكلة من باب الترويح عن النفس فكل من حولي يعلمون بأني على حق ولا أستطيع أن أظهر أي تعاطف مع زوجتي على الأقل من أجل حفظ ماء الوجه فأنا مقهور على نفسي وعلى بنتي وعلى تيعيت زوجتي لأمها من غير تفكير على الأقل في بنتها .. أنا أتحدى لو أنها فكرت في بنتها قبل أن يبدر منها تصرفها بترك البيت غلى الرغم بأن لاحق لأمها بالتدخل في حياتنا و لكن متبع الصمت وأحاول أن لا أظهر تأثري بما حصل ولهذا وجدت متنفس لي في منتداكم .. لا أقلل في ردودكم فكل تقدير واحترام لكل من ساهم في إبداء الرأي والمشورة وعسى الله أن يجعل لكم ذلك في ميزان حسناتكم.

وسلامتكم

اعلم جيدا ما تعاني منه من زوجتك و انا قصدت الاصلاح
لانني رايت انه لا راي واضح لك هل تريدها ام لا
اعلم يا اخي ان كل الزوج و الزوجه
يجتمعون في بيت
وكل واحد منهم قد جاء من بيت له حاله تختلف عن الثاني
و لابد من التنازل من الطرفين
اعلم جيدا انك عانيت كثيرامن زوجتك و انا على علم وقرات موضوعك الاول
لكن ان تبقى معلقه في بيت اهلها هذا لا هو في صالحها ولا في صالحك ولا صالح البنت
لابد من انهاء الوضع و اخر فرصه لكما
هو الاقتراح الذي اعطيتك اياه
لا فيها ما ينزل من كرامتك و لا شي

بهذا تكون قد اعطيتها الفرصه الاخيره
و اثبتت انك انسان واعي و انك زوج بمعنى الكلمه
اي تصرف اخر تتخذه هي تتحمل نتيجته
اخي
اذهب لها و افهم منها بينك و بينها و لا تدع لاي احد ان يتدخل بينكم
و لخاطر بنتك
لان اذا زاد الجفا و الموضوع استمر على هذا الوضع
تزيد المشكله ولا تنحل
كما فهمت انه بيت بدون رجل
و اتذكر جيدا الان انني في رسالتك الاولى
نصحتك بان تكون
ابنا لوالده زوجتك و زوجا لابنتها
تحافظ عليهم
حاول اخر مره لخاطر البنت
الله يكتب لكم الخير وين ما كنتو
و والدتك
كرامتها فوق الراس محفوظه و طيب خاطرعها بكلمتين و فهمها انها محاوله اخيره للم شملك مع والده ابنتك
و اكيد والدتك حتوقف معاك هي و اخواتك


بس لاتخليها معلقه لان هذا حرام

__________________

اللهم أنت ربي ، لا إله إلا أنت ، خلقتني وأنا عبدك ، وأنا على عهدك ووعدك ما استطعت ، أبوء لك بنعمتك ، وأبوء لك بذنبي فاغفر لي ، فإنه لا يغفر الذنوب إلا أنت ، أعوذ بك من شر ما صنعت(البخاري)

أختي أم أثير شكرا لمشاركتك وأهتمامك ولكن أسمعي مني التالي ..

زوجتي خرجت من البيت قبل هذه المرة وجلست في بيت أمها شهر ونصف ورجعت .. ولم يتغير حالها بل أزداد سوء.

أما عن ذهابي شخصيا لها فللمرة المليون أسبابي تمنعني لأن ألم ماهي ردة الفعل فلو أفترضنا أني أتنازل (مافي أمل أكيد) لكن دعيني أقول لك بأنه في أحدى المشاكل عندما كانت بنتي عمرها 3 شهور .. ماكنت غلطان ولكن تنازلت وذهبت مع والدتي لبيتهم وحاولنا الصلح ولكن طوروا النقاش الى لوم وطلب طلاق وأصروا عليه فما كان مني الا أن طلبت من أمي أن ننصرف من منزلهم أفضل فما كان من أم زوجتي الا أن أحضرت بنتي وقالتلي خذها هذي بنت شؤوم علينا مانبيها .. أخذت بنتي وأنا خارج مع أمي وبنتي جن جنون زوجتي وأخذت تصيح فخرجت أمها ولحقت بنا في الدرج وسحبت بنتي من بين يدي فتركتها حتى لا تتأذى من عنف أمها وخرجت زوجتي خلفها تسب وتلعن ..

أتمنى أنك تعيشي في موقفي وتصدرين أحكامك فأنا أعلم أني لو ذهبت لهم مرة أخرى ما حيكون فيه وضع نقاط عللى حروف ولايحزنون .. نفس الموال أمها سوف تصر على الطلاق وسوف يخلقون مشكلة أكبر.


وأما عن طلبك بان أكون أبن لأم زوجتي فاسمعي العجب ..
قبل عام توفي أخ زوجتي الصغير (14 عام) رحمة الله عليه .. قبل وفاته ترقد في المستشفى حوالي 25 يوم .. عندما مرض أخذته لمستشفى أهلي ونظرا للأن تكاليف العلاج كانت باهظه توسط لهم دكتور بن حلال ونقله لمستشفى حكومي .. نقلته للمستشفى وانتظرت معاهم حتى أدخلناه غرفته حتى صلاة الفجر .. وكنت حوالي يوميا أروح أوصل أمه وأخواته عنده وأرجعهم البيت في الليل .. كان رحمة الله عليه غالبا ما يطلب غداء من مطاعم معينة فيتصلوا على زوجتي وتطلب مني أن أروح أشتري له الطلبات وأوصلها له المستشفى وبعدين أروح أجيب أمه وأخواته بعض الاحيان.


وافته المنية بعد ذلك فجرا وكانت زوجتي وقتها نايمة عند أهلها يوم أربعاء فاتصلت علي تبكي تقولي أنه حيموت وحتروح المستشفى تشوفه فما كان مني الا أن لحقتهم على المستشفى وعندما وصلت كان قد توفي الله يرحمه دخلت الدور اللي فيه غرفته وكانت أصواتهم واصله للمصعد صياح وسب في الممرضين ولما وصلت الغرفة .. كلهم أتهموني انت السبب يافلان الله يلعنك الله يكافيك والله و الله ... أخواته وامه كلهم أتهموني بأني أنا السبب لأنه على حد قولهم المفروض أشوفله مستشفى أهلي .. (والله لو كان عندي وقادر كنت ما ألومهم لكن أنا راتبي مايسمح أبدا) .

خرجت من الغرفة ولحقني أخوهم الثاني (عمره 16) يبكي وقالي سامحهم ولاتزعل منهم .. والله أني بكيت على أخ لم تلده أمي وبكيت على أتهامهم لي من غير حق ولكن لعلمي أنهم في حاجتي تجاهلت كل مابدر منهم .. وذهبت لتخليص اجراءت الدفن ولكن أمه أصرت أن تأخذه للبيت أولا ومن ثم المغسلة !

أخذوه للبيت ولما وصل (لا حول ولاقوة الا بالله) أمه تصيح فوقه وجات زوجتي تصيح مع أمها وكان فيه جيران لهم كانت بس لابسة طرحة فحاولت تهدئتها وأخذها الى غرفة الحريم فدفعتني وصرخت فيني "سيبني الله يلعنك" فأخذوها الحريم من قدامي لأني كنت على وشك أن أفقد السيطرة على أعصابي ..

تركتها تواسي أمها أسبوع واتصلت فيها كم مرة كانت حزينة ولها الحق ولكن ماكلفت نفسها تقول لي أسفة على اللي صار مني ومن أهلي .. أخوها الصغير تأسف لي في نفس الوقت في المستشفى وهي زوجتي ياجماعة غلطت فيني وأهلها غلطوا فيني وماكلفت نفسها حتى كلمة اسفة ..


الله كريم ..

وأخيرا رغم كل ماحصلوا والدي ووالدتي يلحون علي في الصبر عليها من أجل بنتي وحتى الان والدتي تقولي ياولدي هي يتيمة تحملها ولك الأجر أن شاء الله يعني أهلي ما يحرضوني عليها رغم كل مابدر منها ولكن أنا خلاص لست على أستعداد أني أتنازل أبدا ..

والدي طلب مني أن أسايرهم وأمشيها عشان بنتي وأنا رافض ..

مافي شي أقدر أضيفه غير حسبي الله ونعم الوكيل

ليس لنا رأي بعد كلام الله عز وجل وسنة نبينا وحبيبنا محمد عليه الصلاة والسلام!

حيث قال رسول الله عليه الصلاة والسلام في حديث لا اذكر نصه بالضبط، ولكن فيما معناه: ايما امرأة خرجت من بيتها بدون علم زوجها، لعنتها الملائكة حتى ترجع!

ولنا في رسول الله اسوة حسنة .. عليه الصلاة والسلام

__________________

If there is a WELL , there is a WAY

يا ام أثير .. يعلم الله أني حاولت أخبي الكثير من تصرفاتها وكلماتها البذيئة حتى مع بنتي لأني ما أبغى أحد من اهلي أو أهلها ..

الان لما جلست مع نفسي خلال غيابها أستصغر نفسي لأني خبيت وداريت على أشياء كثيرة ومن المواقف اللي صدمتني ..

ذات يوم كانت زوجتي عند أهلها ولما رحت أخذها عشان نرجع البيت .. نزلت فسألتها: البنت لابسه حفاظه لأننا رايحين كالعادة كل جمعة نتمشى .. قالت لا بس دخلتها الحمام قبل ما ننزل وماكانت حشرانة ..

المهم البنت ماشاء الله عليها لقطت الموضوع فقالت: ماما ماما أبغى حمام .. ردت الأم رد بذيء جدا قالت لها: ك... أمك.

الكلمة هذي أستخدمتها مرتين وكنت أحذرها من هالكلمة لأني ماتزوجت من شارع .. تقولي: معليش طلعت بالغلط! أمشيها لها لكن أنها تقولها لبنتي والبنت صغيرة أي كلمة راح تسمعها أكيد سوف تستخدمها عن جهل منها بما تعنيه.

للأسف حتى أم زوجتي سمعتها مرة تستخدمها الله المستعان ..


ربما يا أم أثير تقول لي تذكر حسناتها .. راح أقولك مافي شك لها حسنات ولكن صدقيني حسنات لا تخرج عن المألوف وكان ودي أسبيح لها العذر على مافعلته عشان أتنازل وأقبل باقتراحك لكن صدقيني ماينفع!

شكرا لجميع أعضاء المنتدى على المشاركة وأخص بالذكر أم أثير و صريحة جدا ..