المشاركة الأصلية كتبت بواسطة اوناا

المشاركة الأصلية كتبت بواسطة بنت الحكمي

الله يسلمك يارب الحمدالله مافيه شئ بس اتوقع انك
افتقدتي لهذرتي الزايده هههههههه صحيح لأنك متعوده على مشاركاتي الطويلة اللي اكتبها فاستغربتي اني صرت اوفرفي مشاركاتي
((الحمدلله.. الله يفرج همك ياارب وييسر امرك))


المهم يانبض علشان موضوعك هذا اتوقع انك اعطيتي زوجك

كل اهتمامك يعني انتي لفتي نظره وحسستيه انك متضايقة من تصرفاته لاكن انا عندي لك حل استخدميه ولو مدة شهر بإذن الله انه راح يجيب معاك نتيجه لما ينتقد ويتكلم لات حسسينه انك تضايقتي ولا تتأففين خليك هادئة ولا كأنك سمعتيه عودي نفسك
على كذا اهم شئ انك مقتنعة باللي تسوينه خليه يهذري الين يتعب
لمايشوفك مطنشة ومريحة نفسك ومو مهتمه بملاحظاته ماراح عاد يدقق عليك ولا على شغل البيت راح يتعب من كثر ما ينتقد


((والله انك صادقة..صرت اسأله بكل شيء شرايك..
وان شاء الله ناوية اسوي اللي تقولين عليه
فعلا هذا الحل..كيفه بينكد ينكد على عمره))


ويخفف من انتقاداته وملاحظاته عليك لأنه مايشوفك عاد تهتمين
باللي يقوله لو سألك ليش ما تهتمي وليش ما تردين عليه
مثل قبل قولي له انا بعدني ابغى نفسي وصحتي ما ابغى احرق اعصابي واوترها علشان اجاريك في كل كلمه تقولها وكل انتقاد
توجهه لي انا بسوي اللي مقتنعه فيه وانت اللي اسويه وتشوفه مايعجبك ولا يرضيك خلاص سويه انت بنفسك

خلاص انا تعبت كل ما اقول شئ تقول تقول لي هاذا غلط وهاذا فيه وهاذا فيه خلاص مايحتاج انت تشوف انك افضل مني واحسن مني وافهم مني واعلم مني خلاص اللي تشوفه عاجبك سويه وانا اتعلم منك علشان انت ترضى عني وفي نفس الوقت اكسب خبرتك ومعرفتك بالأشياء اللي انت تشوفها فيه سلبية خلاص كل كلامك صح وكل شئ تقوله انت صح وانا اعترف انك انت متفوق عليه بأشياء كثيرة واللي اطلبه منك انك تعلمني انت بطريقتك اللي تشوف فيها كل شئ صح علشان نتفق ونتفاهم في كل شئ اعتبرني تلميذة عندك

انتي يانبض ارضي غروره امدحيه اثني عليه زوجك الظاهر انه من النوع اللي يبغى يصير هو الصح في كل شئ ويكابر حتى في الأشياء اللي هي صحيحة ويدور لها عيب من وين ماكان يجيب حجة او عذر كله علشان يبغى يثبت انه هو صح وكلامه صح
مثل هاذا الزوج ماتقدرين تغيرينه بسهوله لاكن خليك


((انا والله نافخته نفخة...والظاهر هي اللي حاطت حياتنا.. كل شيء بقدره))


معاه مثلا قال لك هاذا زين قولي ايوه صدقت يبو فلان ماشاء الله لك نظرة ثاقبه في الأمور تصدق اني ماكنت عارفة ولا كنت ادري ان فيه كذا وكذا وامدحي بس لاتكثرين واجد يمكن انه يطفش بسرعة اذا انتقد شئ قدامك ق لي صادق والله انك صادق
زين نبهتني لهاذا الشئ ولو فيه عندك موضوع استشيريه في موضوعك واهتمي برأيه ولاتبينين له انك تضايقتي من كلامه ولا زعلتي منه وابتعدي عن المفردات السلبية مثل انت جاف انت ماتتفاهم انت كثير الإنتقاد شوفي اللي مثل زوجك ماينفع انك تكونين بالند له في كل شئ حسسيه انه هو احسن منك وافهم
منك حتى ترتاحين من انتقاداته لك صدقيني لو تطنشين وتتركينه وتخلينه على راحته وتتجاهلين كل كلمه ينتقدك فيها وماتظهرين له اي ردة فعل انه رايح يخف عنك وراح يتوقف عن انتقاده لك ليش لأنه ماوجد من يعانده ويرد عليه لما ماتلاقي لك خصم تواجهه وتبارزه وتبغى تثبت قدراتك عنده راح تصاب ببرود وفتور

الإنسان ماتتحرك فيه بعض الأساليب الا إذا وجد له شخص مقابله يحب يعلق عليه ويستفزه وينتقده لأن فيه في داخله شئ يبغى يثبته او إنه من صفاته انه يبغى يثبت للكل انه هو الأفضل والأحسن والأجدر وان كلامه صح وان من يخالفه على خطأ
وهاذي صفة متأصله فيه تجدينها من الصغر ولو انتي تواضعتي وصرتي على هواه ماراح عاد يحس بأنك ند له وراح يدور على غيرك سوى من اهله او اصحابه علشان يمارس عليهم نفس الدور اللي مارسه عليك خلاص انتي يحس انك في وجهة نظره انهزمتي وانك لست بند له وان لو حاول يستفزك او ينتقدك ماراح ينفع معاك لأنك صرتي تتبعين رأيه وتفكيره فيصبح يبحث عن من يخالفه في الرأي ومن لايتقبل انتقاداته زوجك يضبط عليه المثل اللي يقول اذا لم تكون معي فأنت ضدي وانا اقول إذا لم تكون مثلي فأنت عكسي وكمان ماعنده حل وسط مايؤمن بالمثل اللي يقول الإختلاف في الرأي لايفسد للود قضية هناك نوعية من الناس رجال ونساء لايتقبلون اراء الآخرين ولا وجهات نظرهم
لذلك تجدينهم كثيري الإنتقاد ويقولون رأيهم يبغون يفرضونه على غيرهم فرض بالقوة حتى وان كانوا مخطئين تجدين البعض منهم يبحث وراء اي ثغرة ينتقدها علشان يضعف بها الخصم ويقوي بها موقفه

ولو قدر يثبت ان هو الصح يشعر بلذة الإنتصار والتفوق ويحس انه هو الأفضل والأحسن

فأنتي مالك حل عنده الا إنك تعترفين بإنك انهزمتي قدامه وان هو الصح وهو الفاهم وان كلامه كله صحيح وفي مكانه في اي موضوع يقوله او تطلبين فيه رأيه

اذا فيه شئ تبغين تورينه اياه خليه يشوفه ولا تتكلمين الا بعد مايعطي هو رأيه وانتي ايدي رأيه وقولي له كلامك صح وشوفي كيف ينبسط لاكن لو عارضتيه وناقشتيه راح يطلع لك بسالفة
علشان يثبت نفسه وكلامه وعلشان يطلعك انك ما انتي عارفه ولا فاهمه شئ لاكن مثل ماقلت لك خليك وراه كل ماقال لك شئ قولي له صح صدقت اتفق معاك وراح تشوفين انه رايح يتغير
ويغير اسلوبه ويصير لك مثل ماتبغين ان شاء الله

شوفي عمي ابو زوجي دايم كثير الإنتقاد لزوجته وبناته واولاده
من يوم عرفته وهو كذا ينتقد وينتقد ويعيب بالأشياء ويقول ماهي حلوة وان فيها وفيها وفي وكل الأسرة تطنش وهو يرجع يطفش ويبطل انتقادات مرة زوجي جاب عصير واحنا في بيت اهله شفتي العلب العائلية الكبار المراعي جاب منها ثلاثة انواع
وجاب معاها كاسات وجلس يصب لنا اول ما اعطى ابوه قال له لا انا العصير هاذا ما احبه ولا اشربه المهم زوجي واصل صب لأمه ولعيالنا ولاأخواته جلس عمي يقول انت تبغى تموت اولادك واهل البيت هاذا كله الوان صناعية ومواد حافظة مافيه ولا فائدة

المهم جلس يهذر ويهذر علينا ويعلمنا هاذا فيه وفيه وفي النهاية

شلنا الباقي وحطيناه بالثلاجة واليوم الثاني جت بنته الا وهو عنده كاس مليان من العصير ويشرب منه سكتت اخت زوجي حتى ابوها خلص وقالت له هاه يابوي كيف لقيت طعم العصير قال والله طعمه حلو وزين وثقيل كأنه طازج قالت له هاذا العصير اللي جابه اخوي امس ورفضت تشرب منه معانا قال اوه وانا اقول ليش بطني مغصني الحين الا اثاريه من العصير الله لا يسامحكم ليش ماعلمتوني اخ يابطني يوجعني احسه منتفخ

هههههههههههههه وهو والله مافيه شئ مافيه الا العافية بس يدور عيوب وعذاريب الحين اللبن مايشربه يقول صناعته بودره

المشكلة عنده شايب في الديرة مأثر عليه كل مايقول له عن سالفة عمي يصدقها

الشايب هاذا هو اللي عوفه اللبن جاء عنده مرة وعمي لزم عليه مايرو ح الا يتغدى معاه وجلس معاه يتغدى ولما عمي جاب اللبن على السفرة جلس يقول لعمي انت تشرب اللبن هاذا قال له ايوه قال الله بلاك ماتدري من ايش يصنعونه قال من ايش قال له بودرة يحطون بودرة بخلاط اسمنت ويظيفون عليها موية وتخلطها الخلاطة ويوزعونها بالعبوات ويبيعونها على خلق الله

وعمي صدق خلاص صاحبه هاذا كلامه منزه مايكذب بالمرة
وليومك هاذا مايشرب اللبن
ولا ياكل الرز بسبب صاحبه قال له ان الرز يرجع يتكون داخل بطن الإنسان ديدان ويمرضه وعمي يصدق كلامه

وكل مانطبخ رز ودجاج يجلس يقول ياعيالي ارحمو انفسكم ترى يجيب لكم المرض الرز مافيه ولافايده

المصيبة صاحب عمي هذا ياكل كل شئ زوجي يقول مرة عزمني ولد الرجل هاذا صديق ابوه على مندي وجيته وتغدينا انا وصاحبي ابن الرجل
وابوه واخوانه وجلس الشايب معانا وتغدى وشرب ببسي بعد
الغداء
وزوجي كل مايقول لعمي صاحبك خراط ماعنده سالفة عمي يقول لا انت تكذب عليه صاحبي اصدق منك

عمي ابو زوجي يعيب في الشئ ويطلع عذاريب وبعد فترة تحصلين اللي مايعجبه يصير يعجبه

ودائما يخالفك بالرأي بس انا لو قال شئ اقول له صادق ياعمي والله انك صدقت واوافقه على رأيه وينبسط مني كثير ودايما يقول لزوجي انت ماتفهم شئ زوجتك احسن منك فاهمه وذكية اما انت الله يخلف عليه فيك ولما تصير سالفة ونتناقش فيها انا وزوجي وامه واخواته عمي دائما يخالفنا الرأي وانا اوقف معاه واقول لهم عمي يقول الصح انتم ماعندكم خبر وعمي يجلس يمدح فيني ويذم فيهم ويقول هاذي تفهم احسن منكم وفي النهاية هم عارفين اني انا عارفة الصح بس اساير عمي واجامله واكسب ثقته وملاحظه لو اي واحد من العايلة قال له شئ مايصدقه لازم يجي يسألني عن حقيقة الشئ وبعدين يصدق
انا دائما اقول لهم ام زوجي واخواته لمايشتكون من انتقاد عمي لهم اقول لهم سايروه وطاوعوه منتم خسرانين شئ
لوخالفوه يعصب ويزعل ويوصل الأمر انه ماعاد ياكل ولايشرب
وزيادة يعتكف في غرفة لحاله

ولايكلمهم ولو بغوا يراضونه يطردهم يجلس فترة يومين ويرجع

يرضى من نفسه .

المهم غاليتي نبض اقرقتك معاي بس الظاهر انك مشتاقة لقرقتي علشان كذا طولت معاك
وانا اشرح لك عن عمي لأن الظاهر ان عمي كان في شبابه مثل زوجك بس جات ام زوجي على هواه ويمكن انها تعبت من تصرفاته فطنشته وصار عندها الوضع عادي فصار ينتقد بناته واولاده وهم بعضهم ماعجبهم الوضع فصاروا يناقشونه وهويزعل ويرضى مرة كذا ومرة كذا .

عاد انتي الله يصلح لك زوجك ويكون لك مثل ماتريدين يارب .

المشاركة الأصلية كتبت بواسطة همومكم تؤلمني