موضوع النفقة وراتب الزوجة من المواضيع الحساسة جداً في مجتمعنا.. ومن اكثر المواضيع اللي فيها اختلاف لاسباب كثيرة..
خليني أحاول أبسط لك اللي اشوفه يا اختي من خلال تجربتي البسيطة بالحياة
فيه عندك 3 أنواع من الرجال - الأزواج - بشكل عام..
1- المحافظ.
2- المنفتح "Open Minded".
3- مدعي المثالية.
النوع الأول هو الموجود بكثرة في مجتمعنا، وهذا النوع - أحياناً - لا تفضله النساء لأنه يتدخل في أمور كثيرة ويؤمن بأن طاعة الزوجة لزوجها واجبة،، واذا رفضت إنصياعها له يعتبره "نشوز".. ولازم تاخذ شوره في كل أمورها، مثل الخروج، اللبس، العمل (خصوصاَ لو كان مختلط)، قد يعارض فتح حساب في موقع تواصل اجتماعي، بل وحتى عند فتح مشروع او شراء شيء غالي مثل السيارة أحياناً يتدخل بقراراتها.. هذا النوع من ميزاته انه يغض النظر عن مال زوجته وراتبها بشكل عام..
النوع الثاني وهو الـ Open Minded.. هم قلة بمجتمعنا،، اغلبهم عاشوا برا ثم جاؤوا هنا.. هذا النوع ما عليه من زوجته بشكل عام ومعطيها كامل حريتها.. لكن تلقين بمجتمعه بشكل عام البنت تساعد زوجها بالنفقات عادي، وبيستغرب لو ما ساعدته زوجته بالمصاريف، وصدقيني كثير من زملائي بالعمل (مع ان رواتبهم قوية) الا انهم متأثرين بالخارج كثير، وكلهم يتزوجون موظفات، ويعتبرون اللي ما تساعد زوجها متخلفة ورجعية.. هذي النوعية اشوف صعب تعيش معها اغلب البنات اللي هنا لأني بصراحة اشوفهم جداً متحسسين من ناحية الدخل والراتب وماسكين الفلوس بزياده شوي..
النوع الثالث موجود مع الاسف وهو اللي المفروض الواحد يبعد عنه، هذا النوع باختصار كلامه وتصرفاته قبل الزوج غير عن بعد الزواج...
- - -
أما بالنسبة للموضوع.. اشوف ان زميلتك تكلم زوجها وتتفاهم معاه على كل شيء.. وطبعاً أهم شيء انها تفهمه ان مصاريف الأولاد ما تخصها (ولو انه عيب ان الوحده تبخل بمالها على عيالها، لكن عشان يتعود :] ).. وبنفس الوقت تفهمه انه المفروض يعطيها بالاعياد ويعطي الأولاد برضوا.. واذا اعطاها مبلغ جيد خليها تشجعه وتشتري له هديه مناسبة للمبلغ اللي اعطاها.. شينه لو يعطيها 4000 وتجيب له قلم بـ 60 ريال.. صدقيني لو تجربين هالشعور بتحتقرين نفسك..
وخليها تقيس بالمنطق، لو لا قدر الله انفصلت عن زوجها هل بتتزوج واحد ثاني بيصرف عليها وهي موظفه ام لا؟ أشك في ذلك - بعيداً عن من يدعي المثالية -.. يتزوج ربة بيت اريح له ولها
ومو عيب يتوصلوا لحل مثل يسوون ميزانيه للبيت وتشارك هي بـ 15% منها مثلاً وبكون خلاص الباقي لها..
الله يعين صديقتك وزوجها وييسر لهم أمورهم..