اشكرك ع مرورك يآ طيب



\




أهلاً جمال الروح ,

والله بدعي ان ربي يكتب لي الخيرة ويعجل لي فيها ,

وربي يكتب اللي فيه الخير وربي تعبت ,

وكل شوي احد يفتح لي الموضوع ويحاول يقنعني والا يسبو فيه ويقولو ليه ماطلق وليه ماسووا

اسكتهم كم يوم ويرجعو وربي نفسيتي تعبت ,

الله يعين .





\





من ناحيه الطمع وانه مأمل اصرف هذا انا فعلاً حسيته منه

عارفه .. زوج اختي معاه ثانوي حالته المادية متواضعه يعني راتبه مو بعيد عن راتب خطيبي ,

ورافض رفضآ تآمآ ان اختي تتوظف مع انها جامعية وبالراحه يقبلوها مدرسة لأن تخصصها مطلوب

يقول انا الرجال وانا الي حاصرف وانتي تجلسي ملكه فبيتك ,

وبحث له عن عملين واجتهد وربي انه مقطع نفسه عشانها ما شاء الله ,

وقالها ان شاء الله ما اقصر معاكِ بشي ,

واذا انتي حابه تتوظفي عشان ودك من باب تقدمي علمك للآخرين وتضيعي طفش وكدا

اتوظفي بس ماتحطي شي فالبيت انا الي اصرف ,

سبحان الله اصابع الانسان مو وحده .


بالنسبة للمستوى التفكيري ,
شعرت بفترة قصير انه مايستوعب بسرعه ما ادري عشان مضغوط والا يستهبل عليه والا فعلآ هو كدا
حسيت اني اكبر منه بكثير ماشعرت ان عنده الوعي والاستيعاب
كل تفكيرة مادي ويبغى يتزوج ,
مايخطط هو كيف يدبر اموره حسيت انه وده يعتمد عليه وبس
مره قال لي لازم تتوظفي كل يوم حاوديكي الجامعه تدرسي ع الفاضي لازم تتوظفي مو اودي واجيب وتجلسي فالأخير فالبيت

.

يآعزيزتي طلبت الخلع وقلناله طقم الشوفه والمهر حايرجعلك
وكل موعد جلسه يروح الوالد ومعه الطقم والفلوس والاخ مايجي
يقفل جواله والا مايرد .

ما ادري ليه يسوي كدا ..!
يعني ماوده يطلق ,

المفروض يكون عنده كرامه وحده ماتبيك فكها ,
وطال الموضوع يعني 3 او 4 شهور وانا طالبه الخلع .

قلت يمكن خيرة وجلست افكر بالايجابيات والسلبيات
بصراحه من خلال مواقفه معايا سلبياته اكثر
فحبيت اني استشيركم هنا واشوف ,
هل فعلاً المرأة تقدر تغير الرجل ؟

الوالدة تقول الرجل مثل الطفل خذية بحنان ودلع وحسسيه انه كل شي
راح تكسبينه وبالذات هو مثل العجينة اقدر اشكلها زي ما ابي ,
ونصحتني اجلس وياه ونتناقش بس انا رفضت اناقشة لأن كنت حدي مضغوطة وكمان عندي اختبارات
وبحوث وتخصصي صعب يبغاله رواقة وتفكير وهدوء ,
فرفضت بشدة اني ناقشه والا اتكلم معاه ,
فالبداية كل ما اكلمه احسه معايا ويتضح لي انه موفاهم والا ايه واتنرفز
كلو كوم ولما يقولي جيبي اني طقم الشبكه من المهر وبعدين اعوضك ياويلي ايش دا
الطقم هو يجيبه هديه لي من بدايتها كدا يقول ؟
ماحسيت ان عنده ذوق في تعامله معايا ,

اتضح لي انه من بيئة وانا بيئه اخرى تماما ,
الحي الي عايشين فيه , قبيلتهم غير وعاداتهم واكيد تربيتهم غير عننا ,
فإستيعابه وتعامله ابد ابد موراقي بناءً ع الاسباب الي ذكرتها ,

وكان يدور براسي هل اقدر اغيره واخلي تعامله معايا واسلوبه غير
يعني لو قلت له انا احب كدا وما احب كدا وعاداتنا كدا
ولو احد قال كدا اقول كدا مو اتصرف زي ما انت تسوي , هل حايتقبل مني واقدر اغيره ؟

الله اعلم ,

خبراتكم وتجاربكم اكيد حاتفيدني .



.


أما بالنسبة لجلوسي فبيت اهلي ,

الوضع الاسري كما ذكرت اعلاه انه تقريبا مفكك
وودي اكون اسري هادية ويكون عندي اطفال واعيش بإستقرار
عمري 26 وبعد كم شهر حأدخل ال27
وبوضعنا من ناحيه طلاق والداي وانالوالد سبق وانسجن مرتين
وغير كدا حاكون بنظر المجتمع مطلقة بعد الخلع ,

فهل تتصورو بسهوله ممكن احد يتقدم لي ؟

العمر يمر بسرعه ,
ودي استقر واشعر بالامان واكون اسرة .


الوالدة تقول لي ,
انتي بسن زواج ومانتي صغيرة الي اصغر منك كلهم متزوجين
ونظرة المجتمع ومدري ايش ؟
وكل مرة تكرر اني راح اندم .

قلتلها الدراسة تكفيني راح احط حري فيها ولا اني اتزوج واكون تعيسه
بالنسبة لي لو ما اتزوج طول عمري واكمل طموحي بدون ما احد يعرقله واوصل واشتغل
يكفيني ولا اني اتزوج وراح يأثر ع طموحي ودراستي ونفسيتي ويمكن ماينجح هالزواج وارجع اطلق وانا عندي منه اولاد
وبهذله ,

رجعت وقالت راح تندمي ,
شوفي فلانه وفلانه ماتزوجو وكانو يتشرطو
والان ندمو وودهم لو اي احد يتقدم ويرضو فيه
ووحده اتضرت تتزوج انسان اجنبي وحطته ع كفالتها واتزوجت والكل يتكلم عليها
بس هي ودها تتزوج واضطرت انها تقبل فيه عشان تحس بالامان وتنجب اولاد بكرة يشيلوها
الاهل مو دايمين لك ومن هالكلآم ,

وانا مابينت لها قلت لها اهم شي ادراسة ,
صح اهم شي دراستي ولا يمكن اضحي بيها لكن احتاج لزوج واولآد
لا اب حنون بعيد عنا ولا يسال علينا ولا يصرف ولا شي
ولا اخوان لآن ربي مارزق الوالدة الا ب6 بنات
وحده بس الي تزوجت واحنا الي جالسين وتفكر فبكرة
هي كبرت وتعبت ومحد دايم لأحد ,
الله يجزاها خير ماقصرت ويانا عمرت لنا بيت بإسمنا وسيارة
وكلنا وصلنا لتعليم عالي ,
بفضل الله تعالي ثم هي وطموحنا ,
لكن لو لاسمح الله حصل شي مالنا احد الا رب العباد
احنا تبهذلنا بسبب عدم وجود محرم
وهيا تبي ترتاح وتريحنا ,
واتقول اتحمليه كل الازواج تلاقي فيهم عيوب ومحد كامل وحريمهم يصبرو عليهم
ومع العشرة يحبو بعض ومايستغنو عن بعض وكدا

مدري انتو ايش رايكم ..!

أهلاً اخي الرآقي ,

انا علمت براتبه ومستوى المعيشه وشهادته

ووافقت عليه بعد استخارتي ,

وقلت اهم شي يكون رجآل ويعتمد عليه والرجال مو بشهادته
بخبرته في الحيـــــــــآة ,

بعدين اكتشفت انه بخيل ,
يعني كان يقدر يدبر نفسه بدبل وكدا .. في الرخيص والغالي
يآخد من راتبه من امه من اخوه من صاحبه يتصرف ,
اقل شي الدبل وماجابها .!

الي يقدم ع موضوع زواج يكون مستعد له ,
مكون نفسه وقادر يفتح بيت ,
والمصيبة قبل الزواج اول ماتقدمو يقول جاهز وجاهز
واهله احنا جاهزين وهو خلاص جاهز بس باقي العروسة ,
واول يوم ملكه قبل لايقول تتوظفي وتصرفي ,
كان يقول انه حايسعدني وحايعيشني فالمستوي الي انا فيه وحايعطيني مصروف
وحايغرقني هدايا ومحا ينقص عليا شي ,
وحاتكوني معايا اسعد انسانه فالكون وحاسوي كل شي عشانك ,
فجآة انقلب الحال وتتوظفي وتصرفي وتهببي

شوفو القهر بس ,
اول يوم ملكنا قلتله حانسوي عشا بسيط فالبيت ونلبس الدبل وهو الي حدد يوم
وحجزنا الذبيحه واشتريت فستانوجهزنا كل شي ,
فالنهايه قال ماجبت الدبله مالقيت أما مالقيت ..!
ليله العزومه اخر الليل وربي قهر خلاص متهيأه نفسيا ان بكرة العزومه واتفشلنا وكسر الفرحه بقلبي
واتكنسل العشا طبعا .

هلا اخوي الرآقي |.. ضاحي .

صادق اناعمى عيني الي يفكر براتب الزوجه والا املاكها والا ...

يعني كإنه داخل ع طمع ,

في كثير نساء موظفات سواء موظفات او فالتمريض اوو متزوجين رجال ع قد حالهم ,

ولا قالو لزوجاتهم تحطو والا تفعلو ,

المرأة بقلبها الطيب وحبها وتقديرها لزوجها والحياة الزوجية بما فيها المشاركة

تلاقيها تجيب وتحط وتسدد ووو من نفسها من تلقائها ,

بس مو يجي يشرط عليها تتوظف

\

أشكرك ع مرورك وردك ع مشكلتي ,
بارك الله فيك ,
ولك التقدير .

الله يستر ,

ربي يكتب الي فيه الخير ويبعد الضيق عني

وعن جميع المسلمين والمسلمات ,

أشكرك المرور ,
ودعواتك ,

تقبلي ودي .

الله يكتب الي فيه الخير .

محتاجه لدعواتكم ,

شآكرة لكِ ولكِ مودتي .

هدفي من الزواج |.. لايعد ولا يحصى

طفل - استقرار - أمان - تكوين أسرة - ....... _ كثير وكثير ومنهم كمان اني ما اصير عانس والناس تنظر لي نظرة موحلوة , ولا مطلقة , مجتمعنا مايرحم .

المظاهر ماتهمني قد مايهمني ان الزوج يكون رجل بكل معنى الكلمة ويقدر المرآة ولا يظلمها ويخاف ربه فيها

اذا ع الفقر مو مشكلة ربي بإذن الله يرزقه ,
وممكن اتوظف ونتساعد اهم شي يكون رجل رجل رجل ,
مو يدخل ع طمع والا يكذب والا بخيل ,

حكاية اصبر عليه ,
انا محتاجه لخبراتكم فالحياة لو صبرت وحاولت اغيره هل هذي الصفات ممكن تتغير فيه ؟!
وهل تسرعت بحكمي عليه والا معاي حق ..!

\

شآكرة لكِ
ولكِ ودي .

الاخت الكريمة ذاتي 2010 ,,

الرجل لم يكذب عليك بل على العكس كان صادقاً جداً و واضح معك و اعطاكي تصور واضح جداً عن وضعه المالي المتردي الذي يمنعه حتى من جلب بعض الاشياء التي وعدك بها !
المشكلة انك غير مقتنعة بصدقه و وضوحه بل تريدين منه ان يكذب عليك و يعيشك في جو وهمي عبر الاقتراض من الناس كما ذكرتي !!

المشكلة الاكبر انك غير متقبلة له اطلاقاً لا من الناحية الفكرية و لا الثقافية و لا الاجتماعية ثم جاء وضعه المالي السيء جداً كالقشة التي قصمت ظهر البعير !

نحن لسنا امام شخص (بخيل) بقدر ما نحن امام شخص معدم مادياً بالكاد قادر على توفير اساسيات الحياة و بارخص الاسعار ,, و عادة ما يكون الشخص المضغوط مادياً مشحون و مضغوط نفسياً و هو ما ينعكس على سلوكياته و طريقة تعامله مع الناس بالسلب !

عليك ان تقبلي بوضعه و واقعه المادي و الاجتماعي و الفكري و الثقافي و الا فالاستمرار في اجرائات الانفصال افضل لكما ..

اما خوفك من ان تحملي لقب مطلقة فلا ارى اي داعي لذلك اطلاقاً , نظراً لانه في صك الطلاق يكتب ((مطلقة من غير دخول)) و في عقد الزواج الجديد تعتبرين ((بكر)) ...

كلامك عين العقل ,
ونصآئحك بإذن الله سآخذ بها ,
شعرت انك لآمستي مشكلتي وفهمتيها تماماً
ربي يسعدك يارب ,
وان شاء الله ربي يفرج همي ,
وهم جميع المسلمات ,
أشكرك كثيرآ ,

دعواتك يآ رآقيه .

إذا بتاخذي شور امك وبتكملي مشوار الزواج فحط في ذهنك اسوء الاحتمالات حتى لا تنصدمي
وجهزي نفسك حق الفقر وضيق الحال

وإذا شعرتي انك ما راح تندمي لو تركتيه ، توكلي على الله وإخذي قرار الانفصال

وعلى فكرة ما اعتقد لو هو وافق على شروطك راح تضمني حياة كريمه ، شخصيتة ما راح تتغير بشروط

مادام ما حبيتيه وتقبلتيه هالفترة البسيطة ، كيف راح تتحمليه بعد ما تعرفيه

سلام

أخي الفاضل صقر الشرقية..




أين الصدق والوضوح في كل ما سبق؟

الرجل يلف ويدور .. وغالب ظني أنه يستغل وضعها الأسري (انفصال والديها .. وسجن والدها) ويستغل عمرها الذي يعتبره البعض متقدماً فظن أنها ستوافق على كل شيء وأي شيء في سبيل الزواج.

قال ما لقى دبلة!!!!!

طيب لا يستطيع شراء دبلة ألماس .. مب مهم .. ولكن أصغر وأبسط محل ذهب سيجد فيه دبلة ذهب على الأقل .... لا يريد شراء دبلة أساساً ولا يرى لها أهمية .. ممكن وله ذلك .. فلماذا لا يكون واضحاً بدلاً من مثل هذا الادعاء الساذج؟!!

__________________


اللهم طِيبَ الأثر .. وحُسْنَ الرحيل.