معليه ..
ماني عارفة كيف أبدأ ؟
.
.
أحس كل شئ تجمع علي في لحظة وحدة ..
و ما أحب أكون ضعيفة و استسلم ..
أحس كل شئ تراكم فوق بعضه ، من قرار تأجيل الدكتوراة ، من مرض أمي بالسرطان ،
من تحمل مسؤولية ولدي لوحدي ، من برود زوجي و اهماله ، من كل شئ ..
من مشكلة حصلت في العيلة و أنا في النص بأحلها ..
.
.
* ما أعرف إيش أقول ؟ *
يمكن أحد يفيدني كيف أقدر أتصرف و أفهم طبيعة الإنسان هذا و طريقة تركيبته ؟
أو أغير من نفسي ؟
زي ما قلت قبل .. إننا في الغربة ماكان يفكر زوجي أبدا في (المستقبل)
مع إني قلت له ( مصيرنا بنرجع و بنحتاج نأثث شقة و نجيب سيارة )
قال لي (بأحلها و لا يهمك) ؟ <- طبعا بس عشان يسكتني
قلت له (ترى ماني مثل زمان ، و ما حأتحمل النتايج وقتها من دحين بأقول ..
و أهلي مو ملزمين فينا ، إنهم يتحملوني و يتحملوا ولدي )
قلت له كذا ، لإنه في الخارج كان يصرف كل فلوسه في أسبوع واحد
و أنا أشيل هم المصاريف و كل شئ إذا نقص أي شئ ..
بنفس الوقت ، كان مررررررة حبوب و لطيف معايا و يهتم فيا و يدللني و يساعدني
مرات في البيت و ما يحب يزعلني .. فكنت أقول بداخلي ( يكفيني حبّه و تدليله )
و مافي شئ كامل في الحياة هذه ..
++++++++++++++++++++++++++
* جينا هنا للسعودية *
صار لي 3 أشهر في بيت أهلي أنا و ولدي .. و أحس زوجي عاجبه الوضع ؟
و هو شايف نفسه مو مقصر أبدا ، لإنه حجته الظروف ..
و لو تكلمت و قلت له ( تعبت من الوضع ) يبدأ يتأفف و تتغير أخلاقه ..
طبعا .. جاب الشقة بعد موضوعي اللي نزلته .. و بعد طلوعة الروح و بكاء
و أنا اللي أحركه كل شوي .. و أعصابي كانت عالأخر و ماسكة حالي
و أكتم غيظي و أكبر عقلي و اختار الوقت المناسب إني أكلمه فيه..
بالإضافة إلى إني - من ناحية المشاعر - كنت متعودة عليه من بداية الزواج ،.
ما أنام بعيدة عنه يوم واحد ، إلا لظروف قاسية .. فتعودت على وجوده جنبي ..
بس خلاص ما صرت أهتم دحين و لا أدور عنه .. و ( قلبي عافه و برد تجاهه )
لإني يوم أقول له متى نرجع نستقر زي زمان و تعبت ..
يقوم يتأفف ، و يقول ( شايفتني ألعب ؟ ) ،.
أقول له بأكلمك بشويش .. كلمني بشويش ..
كنت أقول له ( طيب عدّي علينا خلينا نشوفك ؟ وحشتنا .. أو نفسي أتكلم معاك ) ..
يقوم يتعذر بأي عذر ؟
فين اهتمامه السابق ؟
و فين حبه االلي يتكلم عنه ؟
مع إني كنت في الخارج مشغولة مرة مع دراستي و مو فاضية له ؟؟؟؟
و كان هناك مرررررة رومنسي ؟
.
.
في البداية .. عذرته عشان أوقات دوامه في العمل ، و عشان حجة السيارة ..
( بالرغم من إني قلت له في الخارج ، ترى شهر بالكثيييير بأجلس عند أهلي )
و للأسف ، إنه رمى بكلامي كالعادة خلف ظهره ..
و دحين بأتحمل نتيجة طيشه هناك أنا ..
صار يتحجج و يقول يا حبيبتي .. بس اشتري السيارة و تشوفي كيف تشوفيني كل يوم و تشبعي مني
و أخلص من الشقة و أثثها و ما نحتاج لسيارة أحد ..
( مع إني من زمان قلت له ، جمّع فلوس السيارة من دحين .. بكرة بنتورط )
و أنا مليت أتحمل نتايج طيشه و اهماله و مراهقته المتأخرة و اللي انحرم منها في بيت أهله
.
.
قلت يا شيخة ، خلاص انسي اللي فات و لا تدققي .. و بيتعلم إن شاء الله و يتغير
جبت له السيارة مثل ما قلت في الموضوع الأخير
و بدل ما نشوفه أنا و ولدي مثل ما وعدنا ، استمر على نفس أسلوبه
و يتحجج إنه بيأثث الشقة ، و أنا عارفة إنه نص كلامه كذب
( كأني بأتشحت شوفته ، بدل ما يحرص هو على شوفتنا )
و مازلت عند أهلي .. و أنام أنا و ولدي مع بعض .. و كل شئ ينقص علينا
أهلي بيوفروه .. و هو إذا طلبت منه - عشان أحسسه بالمسؤولية - بيجيبها لي
بعد يومين .. و ما أتكلم و لا أدقق .. بعد يومين ، أحسن من لاشئ ..
طبعاً ..
هو أبرد ما عنده ؟
.
.
و إذا فرضاً ..
جاء يزورني، بيجي عندي نعساااااااااااان و على طول يحط راسه و يشخر
و إذا خرجنا نتعشى كمان ، يكون سااااااااااااكت و نعساااااااااااان ؟؟؟
ليه ؟
قد كذا أنا ثقيلة على قلبه ؟
+++++++++++++++++++++++++++++++
و إذا خرجنا مثلا نتمشى بس ساعة ..
يقوم يخاصم ولده و يحط راسه براسه ، و تنقلب ( نكادة ) كالعادة ..
و كم مرة قلت له ، أكره ماعندي .. الهمجية و النكد و الصياح ..
مو كفاية ، إني ماسكة أعصابي و متحملة كل شئ ؟
( حتى في الخارج ، كل ما خرجنا و معاي ولدي ، ينكد زوجي معاه و تنسد نفسي )
بس يتضاربوا ، زوجي يحب يصغر عقله بعقل الطفل ..
و إلا يخليه يبكي .. و أجلس أتفرج عليهم ..
لمتى ؟
و كم مرة قلت له بإنفراد .. كلمه بشويش أول مرة ،.
و إنت شايفه كيف يسمع الكلام من أول مرة موو لازم صياح و مد اليد ..
و الضرب على أتفه شئ ، عمره ما كان أسلوب في التربية ..
ولدي صار دحين يكرررررره يخرج مع أبوه و من حاله ..
لإنه تعوود على غيابه عنه ..
و حتى يوم يحتاج ولدي لأي شئ فبيجي يطلبه مني ..
لإنه أبوه ما يشتري له .. أقوم أمثل على ولدي و أقول له : قول لبابا شكرا لإنه جاب لك
الشئ هذا .. أبغى زوجي يحس .. و أبغى ولدي يحسب إنه من أبوه ..
يعني اللي بأوصله إنه ولدي أصلا ، اخر اهتمامات زوجي و كم مرة يطلب مني أعطيه لأمي
المهم ، خلينا من ولدي دحين ..
+++++++++++++++++++++++++++++++++
* جبنا السيارة .. *
يتبع ..
قبل لا ولدي يسحب السلك و يفصله
و يطير الرد