ندى ..

فكرتك مرة حلوة .. حكاية اني اجيب شمع و كذا و حركات ..
ما عمرها خطرت على بالي ..

اسوي لهم مرة ممكن بالسنة مع اولاد اخواتي .. بس انا و هما !
ما جات ببالي ..

يبغالي ..

.
.

اشعر بتأنيب الضمير ..

لانهم محتاجين لوجودي جنبهم .. و أشعر بالسعادة من عيونهم لما اكون معاهم
و لما مرات اكون مضغوطة .. و الشغالة تشيل ولدي؛ ما يبغاها ..
يبغاني و ينبسسسسطوا لما أترك كل شي و اشارككهم اي شي ..

.
.

زوجي لما مزاجه رايق .. ما في احسن منه بالتعامل مع اولاده ..
و مزاجه متعلق بيا ..

لازم أكون مبتسمة على طول و مروقة على طوووول ..

.
.

يمكن مفتقدة وجود امي .. و الحديث معها ؟
فالحزن مرات يظهر علي غصب عني ؟

كنت دايما مرحة و سعيدة .. و متفائلة ..

.
.

بإذن الله بأرجع بالتدريج .. و بينعكس الشي هذا على اولادي اكيد ..

هموم قلب ..

بأدور عنها و أشوف ..
تسسسسلمي ..

نور الايمان

كنت اقصد كمبيوتر شخصي صغير .. للتعليم و مو شرط متصل بالنت ..
و معاه سيديهات تعليمية .. و اعلمه اسس تشغيل الحاسب و اشياء زي كذا ..

.
.

او فيه غرفة زايدة .. كنت افكر احط مكتبة صغيرة لي و ادوات رياضة للبطن بعد الولادة ..
يصير أخليه يستخدم الكمبيوتر معاي ؟؟؟

.
.

اما الايباد ..

هو جهازه الايبود .. جلس معاه سنة و نص و كان نفسه بأيباد مثل اولاد اخواتي و صحباتي ..
بس تقصدت ما أجيب له على طول .. و جبت له الايبود الصغير ..

دحين جهازه خربان من شهرين .. و تقصدت ما أصلحها له بسرعة .. عقاب له لانه دخل الايبود
معاه للبانيو و هو يستحم ..

و وعدته أجيب له أيباد ..

هل ممكن اجيبه له .. لكن ما أفعل النت فيه ؟
و الالعاب أنا أدخل له كلمة السر ؟

وعموما .. دايما لما يجتمع ولدي مع بقية الاطفال .. اقولهم شيلوا الاجهزة ..
ما تجمعتوا عشان واحد يجلس على جهازه و يلعب ؟

و اذا خرجنا .. اخليه يوقف اللعب بالايبود ..

.
.

و لما كان معاه الايبود .. كنت مرات أشيك عالصور الي يصورها
و مرات عاليوتيوب و اشوف ايش كان يتفرج ..
و اشوف الالعاب الي حملها ايش هي ؟

هموم قلب .. مالقيت القناة

بس تويي فتحت له قناة براعم .. و ولدي انبسط و قالي ماما من زمان ما اتفرجته ؟
و جالس يتفرج عليها دحين ..

و احسها تناسب الاطفال و يتكلموا بالفصحى و بريئة مو مثل ام بي سي ثري
قلة ادب و مساخة و حركات اتفجعت لما شفتها بقناة الاطفال ؟؟؟؟

روح ممكن الطفل يستخدم الكمبيوتر او اللبتوب او الايباد بس تحت مراقبة الاهل وفي اوقات طبعا ما تأثر على باقي الاشياء المفيدة وما تنقلب لادمان ويكون في مكان مكشوف في البيت ومثل ما فعلتي تراقبي الاشياء اللي يتفرج عليها ويكون امامكم ، وطالما ان الكمبيوتر او اي جهاز في غرفتهم غير متصل بالنت فما في مشكلة خاصة وانك مراقبة الالعاب بنفسك ، ربي يحفظهم

مشكوووورة .. نور الايمان ..

جاتني فترة الصراحة؛ ابغى بس أكون بجو لوحدي و ابعاد أي ازعاج عني ..
و الصراحة؛ زوجي لما يكون في البيت .. احاول اكون معاه ..

هو يبغاني ارمي كل شي عالشغالة .. بس احاول امسك العصاية من المنتصف ..

.
.

يوم جيت اكتب الموضوع .. كان حالهم جدا مزعلني ..
صار الكبير بس يبكي الصغير و مرات يضربه .. و الصغير بس يزنننننن ..
و طيور الجنة 24 ساعة .. والشغالة معاهم و الجوال بيدها طول الوقت ..

.
.

الحمد لله بديت اخد من نصايحكم و انتبه لامور صغيرة بعدت و انشغلت عنها ..

.
.

الحمد لله من أمس؛ رجع ولدي الكبير يعطي العابه لاخوه و يشاركه العابه ..
بأجلس معاهم .. و اخد اغراضي و اروح الصالة و اتابعهم ..

اقلب القناة بين فترة و فترة .. و ولدي الكبير الحمد لله من حاله بيقلب على براعم ..

لانه فترة ما كنت حامل بةلدي الصغير و لما رجعت من بريطانيا ..
كنت متضايقة من قنوات نيكولوديون .. زي كذا لاحظت ولدي الكبير يتابعها و مدمن عليها
و شفت لقطات اسوا بكثير من ام بي سي ثري

و وقتها عرفت قناة براعم بالصدفة ..
كان ولدي يتضايق لما افتح القناة .. بس بدأ يحبها ..

و دحين لما رجعت للقناة .. صار يتابعها باهتمام ..
و خاصة انه تعلم العربي خلاص و يفهم كلامهم ..

.
.

جالسة ادور على قصص احكيها له قبل النوم ..

بالنسبة للايباد .. مرات كانت تجيني فترات انشغل عنه الصراحة ..
ايام و اسابيع .. بس ارجع انتبه على حالي و امسك جهازه و احمل له برنامج او برنامجين تعليميين ..
طبعا الوم نفسي على الفترة الي اكون انشغلت فيها عنه .. تكون بسبب ظروف او مناسبات او ضغوط عمل او غيره ..

ما أجبره على متابعة اي برامج تعليمية .. بس تكون امام عينه ..
عشان لا يتعود انه حياته تكون كلها لعب فقط ..

:*

أهلين روح
أنا داخله على السريع بس لي عودة
بالنسبة للقنوات ..عندك براعم والجزيرة للأطفال حلوين
وبراعم جميلة جداً لعمر ابنك الصغنن بسم الله عليه
وكمان حلوه للكبير ومفيده
والجزيرة للأطفال تثقف الطفل وتعمق مفهوم الحوار لديه

ولاتشددي كثير على الصغار وتفرضي الدين عليهم
فرض وهذا حلال وهذا حرام بها الطريقة بيتبعوه بغير
قناعة وبيصير عادة لاعبادة

أهم شيء حتى يطلع الأطفال بإذن الله صالحين
أمرين:
الدعاء لهم في كل صلاة بالهداية لقولة تعالى:
أنك لاتهدي من أحببت ولكن الله يهدي من يشاء

ثانياً: تكوني قدوة صالحة لهم في كل شيء
بدل ما تأمريهم أو تضيقي عليهم بأسم الدين
كوني قدوتهم
يشوفوك وأنتِ تتوضي وأنت تصلي
تكوني صادقه في وعودك معهم فيأخذو خصلة الصدق منك
تكوني طيبة ومحسنة مع الآخرين فيأخذو هالخصال الحميدة منك
طريقة حديثك وأسلوبك وتعاملك تأثر فيهم أكثر من إنشغالك بطريقة
التحريم والتحليل والخوف المبالغ فيه

خليهم يحبو الدين حُب...
حتى ينمو ويكبر معهم ويكون جزء أساسي من حياتهم
ومن قناعاتهم

صدقيني البيوت إلي زرعت حب الدين في ابناءها بالإقتداء
والأحتواء واللين
هي البيوت إلي أنتجت أفضل النماذج

والبيوت إلي أستخدمت عصا القمع والتحريم والمنع
والإجبار بلا إقناع هي البيوت إلي أنتحت لنا
المتأسلمين من دينهم ظواهر لا بواطن

__________________

سيدة الموقف

اليوم كنت تمام معاهم .. و كويسة ..
ماعرف متوترة مع الحمل .. حتى زميلاتي بالعمل يقولولي صايرة متشائمة و عصبية و عجولة ..

.
.

المهم ..

ولدي الصغير رافض ياكل اي شي .. بالاخير عصبنييييييييي ..
اول مرة الشوربة عدم فيها كل ملابسه و سكتت و تركته .. يحب ياكل بنفسه ..
يشرب لقمة و عشرة يكبها

غيرت له ملابسه و نيمته

و كل ما حاولت ااكله شي .. يخرجه من فمه و يكبه عالموكيت ..
اخر شي .. رحت عملت له اندومي .. لانه يبكيييييي و ينكد من الجوع ..
رافض ياكل اي شي و الشغالة طول الوقت تمشح و تكنس المسكينة

اخر شي عصصصصصصبت عليه و ما صرت ارد عليه و تركته عند الشغالة ..
قلت لها .. مابغى اشوفه

.
.

اسمع ولدي الكبير في الحمام الله يعزك .. بعد نص ساعة يصيح و ينادي الشغالة
و سامعة صوت الموية تنكب بقوة من الصنبور ..

سالته ايش فيه ؟
يقول ابغاها خليها تجي ..

قلتله انا جاية ايش فيه ؟

خايف مايبغاني ادي .. لانه عارف غلطته ..

.
.

هذه المرة الثالثة الي ياخد علبة شامبو كاملة و يخلصها كلها عشان يلعب و يغسل لعبة من العابه ..
المرة الاولى خاصمته و هددته .. و قال مايعرف و عذرته ..

المرة التانية و خاصمته و ضربته بشويش و ما أثر فيه

.
.

ما قدرت اتمابك نفسي .. و خاصة انه مو اول مرة كذا يعمل معايا ..
و ما يراعي اني ما اضربه و يستهين باوامري ..

شفته خلص شامبو الاطفال .. و خلص الشامبو التاني و عادم المغسلة ..
و عشان يده كلها رغوة .. مو عارف يقفل الموية

.
.

ماقدرت امسك حالي .. لانها المرة الثالثة

بس اول مرة اضرب بالشكل هذا ..

ضربته بقووووووة على كتفه او ظهره ثلاث مرات .. او اربع مرات ..
و بعد عني يبكي و يقول أيييي ..

و دفيته برة الحمام .. و بالغلط اتزحلق شوي و طاح برة الحمام ..
عمل حاله كأنه اتعور .. عشان احزن عليه و اشوف ايش فيه ..

كملت تهزيئ و قلت له .. مو اول مرة اكلمك ..
كم مرة قلت لك .. لازم اضربك عشان تتعلم ؟

قلت له قوم و روح من قدامي لا اشوفك ..
روح اجلس في الغرفة ..

عصببببببت مرة .. و لدرجة اني مرة خلاص ماني عارفة ايش فيا ..

لما ما اكون حامل .. اكون هادية و بالي طويل ..
دحين ماني قادرة ..

بس عو عصبني .. مو اول مرة يكسر كلامي و يطنشني و مايهتم بكلامي ..
و يسمع كلام ابوه و هذا ابوه كل شي يعامله بالضرب

و الصغير وترني بزيادة .. رافض ياكل او يشرب اي شي

.
.

و ابوهم لما اطلب منه اغراض يجيبها بعد سنة ..
و لازم اعصب عشان يتحرك ..

او اخرج بنفسي و اروح البقالة و اشتري ..

.
.

حاسة اني فاقدة التحكم بنفسي ..

و متضايقة من نفسي لاني ضربت ولدي بقسوة ..
بس مو اول مرة اكلمه .. و في اشياء كثيرة غير الشي دا بيكرر اغلاطه
و الشغالة و زوجي .. قالولي لانه تعود ماتضربيه ..

.
.

الحل ؟

بالنسبة لكلمة حرام و لا و ممنوع ..
ما اعاملهم به ..

اعامله باسلوب الاقناع

.
.

حتى مرة وديت ولدي عند طبيبة .. و تطلب منه فعل شي ..
و ولدي رافض .. قلتلها اقنعيه ؛ متعود هو كذا ..
قالتلي .. عاقبيه في البيت

لما خرجنا من عندها
سالته ليش ما سمعت كلامها ؟

قالي .. شكلي زي الغبي و انا اسوي حركات هبلة ..

.
.

بس احس اسلوبي معاه بدأ ينحدر .. للاسفل ..
لانه بدأ يعاندني و يطنشني .. و لما اضربه ؛ يسمع كلامي المرات الجاية و يريحني
بس ما اعانله بالضرب غير بعد ثالث تحذير ..
اقصد ثالث مرة اضربه ..

بس اليوم .. ضربته بقوووووة الصراحة ..
لانه عارف نفسه غلطان و مو اول مرة و مكرر الغلط بزيادة ..

و حتى و انا جاية .. يقولي ماما ما ابغاكي انت
ابغى الشغالة ..

عارف حاله غلطان .. و برضو ..
مستمر بغلطه