و على فكرة ما في حل قانوني للي ذكرتيه يا صاحبة المشكله و اقصى ما يمكن انك تصلي له تعهد من السيجة بعدم التعرض لزوجك، هذا في احسن الاحوال، لاننا لا نعرف رجة فعل البنت و لا ردة فعل زوجك، بالاضافة الى انك لا تتوفرين على ما يبدو الا على سجل المكالمات و ليس على اي دليل مادي

الله يهديها ويردها لصوابها إن شاء الله..

لكن يا عزيزتي، قبل ما تتخذي إجراء ضد هذه المرأة، لا بد أن تعترفي إن زوجك شريك في الخيانة..
وهو أيضاً أعتدى على عرض رجل غافل وإن لم تكن متزوجة فقد أفسدها على أهلها..

ليس لك الحق في إيذاءها، وتنزيه زوجك من هذه الفعلة..
قلتي أن زوجك ( يتسلى ) عجباً لك أصبحت أعراض الناس للهو والتسلية..
مشكلتك الحقيقية في زوجك، وهو من أغرى هذه الفتاة وجرها لهذا الفعل..

إذا أردتي الإصلاح ( أصلحي من حولك أولاً )..
أصلح الله لك زوجك وهداه..

__________________

(( هناك مواقف أيقظتني وصنعتني من جديد..
وهناك علاقات توقعت منها الكثير ووجدت منها القليل..
وهناك دروس لم تكن بالحسبان، لكنها علمتني الأنتباه ! ))

اذا لزوج المراة الخائنة الاحقية بفضح الزوج بنشر غسيله عند اهله وجماعته وعياله وسجنه

لانها "تتسلى" ولعل الله يحدث بعد ذلك امرا..

الزوج يلاقي من تستر عليه وترمي الذنب على غيره ويرجع لبيته يلاقي وحدة تحافظ عليه مع لعبه وخياناته مثله مثل الشريف العفيف

كلاهما مذنب وكلاهما يستحقان العقاب

__________________

اختلافي عنك لا يعني اختلافي معك

لا اختلف معك بان كلاهما مذنب وفي العقاب مشتركين وكلاهما ساقط لقي ساقطة ،،،بغي وجد بغية مثله ،،
وانني أؤيد ان يفضح هو قبل الساقطة ان لم يكن كلاهما ،،، لكن بعض النساء هداهن الله لا يريد فضح زوجها ولكنها تريد فضح الساقطة وهذا قمة الحمق أراه ،،،يعني لو كنت مكانها لتمنيت ان يفضح هو اولا وأخيرا

الستر افضل من الفضيحة
ويقول المثل اللي ما يسوقه مرضعه سوق العصا ما ينفعه

اجل بصراحة
بعذرهم الرجال يوم يخونون
اذا اللوم كله ع الضعيفة
الي مانعرف ظروفها
وهو الحمل الوديع المغرر فيه....
.....
هو اساس المشكلة.....

وليه تفضح زوجها
او تفضح المسلمة التي اخطأت
ليه نعالج الخطا بخطا
ليه الفضيحة والتشهير
هذه مستقاه من اي دين
ديننا انصر اخاك ظالما او مظلوما
وتفسير الحديث طبعا مفهوم
وكلنا نعرف قصة سيدنا عمر مع الشاب شارب الخمر
وقصة الشاب الذي طلب ان يأذن له الرسول بالزنا
ديننا ليس دين التشهير والفضيحة والابتزاز والتخويف
لان باب التوبة مفتوح.
واحمدي الله لست في مكانها وظروفها
واننا الي الان بفضل الله وحده
في ستر وعافيه

انا مع انك تهددينها بارسال رقمها للهيئه ..بنفس الوقت لااازم تشغلين زوجك عن هالسوالف..اطلعو مع بعض..سوو اشياء مفيده مع بعض..تابعو مسلسلات مع بعض..ووقت العلاقه الزوجيه طيريه في السماء خليه ينتظر اللحظه اللي بينام فيها معاك..لازم تشتغلين ع الجهتين ..تصرفين البنات عنه بطريقتك اما الهيئه او اي طريقه ذكيه تحسينها تنفع وبالجهه المقابله انتي تغيرين اشياء بحياتكم..وغيري من تعاملك وشخصيتك

مر اليومين اللي راحت بشكل درامي
حطيت صورة البنت عندي بالواتساب
زوجي توتر وماقدر ينام العصر
‏ورغم انه خميس قلت له بروح انام عند اهلي ورفض
لما رجع الليل سالني وش الصورة اللي حاطتها قلت حفلة شفتها بالانستقرام
بس ما ارتاح كل شوي يسال مرة يقول بنسوي حفلة للعيال ونجيب هذا الديكور ومرة يسال بكم سعره
طبعا ما يقدر يسال سؤال صريح بس بيختبرني
وصلني مستوى التوتر اللي هو فيه

ومرت الليلة وهو يتودد لي بزود برضو يختبرني وانا مرة اجاريه ومرة اصد نمت وهو ماعنده فكرة عن اللي اعرفه

صحيت امس الصبح وقريت آخر رد واخذت فيه كتبت رسالة تهديد للبنت
قلت لها رقمك صار عند الهيئة طلبت كشف مكالماتك لزوجي وبارفع عليك قضية اجرك انتي واهلك للمحاكم وماراح اخلي احد من جماعتك مايعرف بسيرتك ..

شي الهمني بعدها البس عبايتي واطلع من البيت اروح لبيت اهلي

وانا بنص الطريق طلع لي زوجي يركض وراي مسكني وقال تعوذي من ابليس .. ارجعي بيتك .. وانا ارفض
كنت ابي اكمل بس خفت احد يشوفنا بهالوضع


رجعنا البيت وانا مستغربة وشلون حس فيني اطلع وهو نايم .. رغم اني تسحبت بهدوء.. وليش افترض اني زعلانة وهو ماعنده خبر باللي اعرفه

جلسنا وسالني ووجهة مسحوب لونه .. وش فيك وش صاير وشلون تطلعين وتخلين عيالك
قلت له انا ما اقدر اقبل هالوضع .. حاولت اتعايش قلت عالاقل اصبر خمس سنين اكبر نفسي واكبر عيالي وبعدين اتصرف.. بس اعصابي ما تتحمل

وش السالفة؟ قصدك عشان فلانة!!!
هذي موظفة عندنا بعيادة الاسنان كانت ضايعتلها شنطة بالمطار وكلمتني مرة عشان اكلم لها فلان اللي بالخطوط..

سالفة ماتدخل المخ ولا هي مقبولة اصلا .. ليش تكلمه هو وليش تعرف ان صديقه يشتغل بالخطوط وعيادة الاسنان؟؟ يعني لو مكان ثاني ممكن لي سنة اتشحده ياخذ بنته عشان اسنانها مسوسة ومو مهتم .. كان اقول فايدته بالمواعيد ..

كانت ردوده متلخبطة متخيل اني معصبة ومو شايفة شي من الزعل بس انا كنت هادية اركز بردوده واقراه زين

كان بين انه ينكر وبين انه يرد علي .. ضاع مرة يثبت على نفسه ومرة ينفي العلاقة

ولاني صدمته ما امداه يألف قصة محترمة
ما قال انا اسف وانا غلطان بس قال وش يرضيك وش تبين بس بيتك لا تحلمين تطلعين منه
تذكرت كلام متفائلة انه بالمواقف هذي الوحدة تحط شروط ثقيله بس ماقدرت اشرط فلوس.. قلت له

تطلع من المستشفى
تلغي ارقامك ..معه 2 ويكفيك رقم واحد جديد
وماعاد تترك فرض بالمسجد وتاخذ ولدك معك لانه صار يسالني ليه بابا مايصلي

قال الاخيرة سهلة
والنقلة بتاخذ اقل شي اسبوع
والارقام ما راح الغيها الا اذا نقلت

قلت باروح لاهلي ارتاح لما تنفذها بس رفض واصر اقعد بالبيت

بعد صلاة الجمعة رجع وقال انتي وش مرسلة؟

التهديد سوا شي ما توقعته
البنت اعترفت لاهلها واخوها اتصل على زوجي يقول له عن الرسالة ومارد فارسل له رسالة يقول انا مقدر وضع زوجتك واتفهم ردة فعلها ومن حقها بس حاول تلم الموضوع مانبغى فضايح


كان يرجف من الخوف .. سبحان الله يخافون من كل شي الا الله

قال شوفي جنانك وين دخلنا .. هذا رجال محترم وعيال عمه معي بالدوام

قلت له انت اللي دخلت نفسك .. وتوقع مني اكثر

جلس للعصر لحاله مدري وش رد عالرجال

بعدين حلفني اذا انا فعلا سويت اللي بالرسالة او لا
وقلت له انه مجرد تهديد ومو محتاجة اسويه


طلعنا بعدها لبيت اهلي على اساس ياخذنا بالليل بس جتني الشقيقة ونمت مارديت عليه


المرحلة الجاية ما ادري وش الصح

اجلس عند اهلي لما ينفذ اللي طلبته
والا اطاوعه وارجع مع احتمال انه يتساهل ويماطل ولا ينفذ شي