هل تريدين هذا الرجل أم لا؟

اختي أحلى شي انك صريحه
وكتبتي أشياء يمكن لو غيرك ماقالتها ودافعت عن نفسها
ماشاء الله عليك
شوفي المواقف اللي ذكرتيها انا مع اني امرأه ارتفع ضغطي من تصرفك فيها
لما تقولين جيب خبز ويقولك كم انتي ماتحددي لا العدد ولا النوع
اكيد بيعصب ومعاه حق غيري هالطريقه تكلمي بطلباتك بثقه وفلسفه كمان
زوجك من النوع يبيك توضحين مثلا قولي ابي هالنوع مابي النوعية ذيك لانها تعبانه
فهمتي قصدي مع تبرير وحركات فلسفه
الموقف حق لما تكوني نايمه يقولك يالله نتقهوى عند أهلي
انا لو مكانك ماارد نفس ردك بصراحه ردك مستفز وبيعصب منه
مشكلتك مااعندك سياسه ومرونه
السياسه لااازم تتعلميها
لو بعيد الشر تطلقتي من هذا هل على بالك غيره مايبيله سياسه! !
انتي العيب فييك واجهتي نفسك بصراحتك معنا
وانا بكون صريحه معك
تستفزين زوجك بردودك وبالغصب تبينه يفهمك وبدون توضيح منك كيف تجي! !
ماابيك تزعلين مني أبد
انا أنصحك وحاطه نفسي مكانك ومكان زوجك بعد
في حالتك ماينفع الطلااااق مافي شي يستدعي غير انك تكوني مرنه وسياسيه مع تصرفات زوجك
كل الرجال فيهم عيوب ونصبر وننطق ونسايس ونحاول
الحمدلله زوجك مايضرب مايسب بألفاظ تكرهك فيه مو معذبك
وان شاء الله أنه يصلي
أما عن التفاهم حاولي تغيرين أسلوبك لأنه بجد يعصب ومعاه حق يعصب
مثلا سالفة المطعم تقولين يحوس مايلقى شي طيب شفتي فيه هالحركه خلاص
مرا ثانيه اذا قال نطلع نتعشى برا
خليك محضره في بالك مطعم معين وقوليله عليه بكذا تنتهي اللفلفه بالشوارع عادي
تنحل مو صعبه
شكلك عنيده وتخلينه محتار
وهالشي يقهره وهو يلاحظ انك قاصده تخلينه كذا ف طبيعي بيعصصصب
الله يهدينا واياك
الله يكتب لك الخيره يارب

جيد تكوني قيادية وتدبري وتعبري، بس ضروري تعرفي الخط الرفيع بين القيادة وبين أنك تهيني نوعاً ما قيادة ورجولة زوجك من خلال بعض القرارات والتصرفات التي قد تكون بحسن نية منك، لكن هي مهارة سهل تعلمها.

أنت تقولي نظامية ومرتبة، وهذا شيء جيد، لكن هناك بعض النقاط ما أشوفك فيها مرتبة، وهي أشياء بسيطة، مثلاً الخبز، قولي ببسطة أحتاج خمس أكياس، استخدم كيسة اليوم وبكرأ كيسة، واحفظ الباقي بالثلاجة، انا حقيقة يعطيني أنطباع انك تقولي جب أي شي انك غير مرتبة وعشوائية ولا عارفة توزني نفسك واحتياجك.
خليك محددة ومركزة وواضحة، لاتعطين الرجل أشياء عشوائية تشعره انك غير مشاركة باتخاذ القرار، حاولي تكلفي نفسك بالتفكير وتحديد مدى احتياجاتك.

أيضاً بالنسبة لأهله أو الضيوف، هو جيد أنك تسألي وش تفضل وش حاب اسوي لك، وهذي منهجية رائعة، واتبعها احياناً بس فيه أمور مثل الأشياء المتعارف القهوة والشاي لاتسألي عنها، حضريها وجهزيها، إلا إن كنتي تعرفي مثلاً أنهم لو سويتي قهوة ماراح يشربوا ولا نص فنجال.

العشاء، عطيه جوه، وقولي وش تحب، لاذكر مطعم، قولي أي والله حلو ومرتب واكله زين، حتى لو ما أعجبك، مو لازم نصادم الأخرين بأذواقهم، أيضاً تستطيعي أنك تخلينه يوافق لو حبيتي تروحي لمكان ما، بس استخدمي نوع من اللطف والدلع اللي يخليه يوافق، مثلاً وش رايك حبيبي نروح للمطعم الفلاني، لو اعجبه واقنعتيه خير وبركة، لو ما اقتنع لاتصري.

فقط فكري بذكاء عاطفي وبهدوء، لاتكون ردود فعلك مباشرة وحادة حتى لو لم تشعري بحدتها، أكثرنا لايعرف طبيعة طباعه ولا شخصيته جيداً لذلك ردود فعله تكون تلقائية غير مدروسة.

اعطي الرجل جوه ، دعي القيادة له، وامدحي آراءه وأفكاره حتى لو هو من جنبها، لاتكثري الجدل والنقاش، وإذا طلب منك أشياء محددة أذكريها ولا تحتاجي لأن تعطينه إجابات عائمة، فالرجل لايحب ذلك، وربما لاحظتي رد الأخ خاطري فيك وتذمره، وأنا شخصياً أتذمر من هذا السلوك واعتبره شخصية اعتمادية وفوضوية.

__________________
ياصبحِ لاتِقبل !!
عط الليل من وقتك..

اختي لما قلت شخصيتك شخصية رجل ،، ما المقصود منا انتقاص من انوثتك

القصد منا انو شخصيتك فيها نضوج ووعي اكثر من شخصية زوجك ،، و هالشي عمبحسس زوجك بالنقص ،، لان معظم الرجال بتحب تكون اعلى من زوجاتهم
و انتي ما عمتمنحي زوجك هالاحساس
تغابي عليه ،، سوي حالك ما بتفقهي بالامور و خلي هو يوضحلك ،، تنازلي و اطيعيه خاصة بالامور الي ما منها تاثير ،، قلك لا تسالي الضيوف خلص لا عاد تساليهم امشي على عقلو شو خسرانة ،، و ازا حسيتيه على خطأ حاولي تبينيلو خطؤو بس بطريقة تبين ان طلعت معك صدفة مو لانك اعقل منو ،، صيري مجنونة شوي ،، بينيلو ضعفك
حسب ما شفت انك بحاجة لتشتغلي ع حالك لتظهري امامو بانك اقل منو ،، لان انتي بالحقيقة اعلى منو ع مستوى الشخصية و التفكير و طريقة الحياة و هالشي الي مسببلكم ازمة ،، و لهادا السبب نفسو عبحاول يحرمك من وظيفتك ليحس انو متفوق عليكي

المهم انتي ما تتخلي عن وظيفتك و حاولي تشتغلي ع حالك شوي
بس طلاق ما بنصحك فيو لانو يعتبر حل اخير و انتي لسا عندك عدة محاولات لا تضيعيهم

__________________
استغفر الله ،، والحمدلله ،، ولا إله إلا الله ،، والله أكبر

وانا لاسف مو شايفه فيه ذيك الصفات الي تخلينه اتنازل عن كل شي له اقل شي والله لو الجانب الديني عنده جيد كنت تنازلت عشان هذا الجانب لعل الله يحدث بعد ذلك خيرا واحتسب اجر بباقي الاشياء الي ارتدها مع عدم استسلام ولكن اطلبها باساليب مختلفه لعلي ف يوم اجدها


اذاً اتركي الكوره الان في مرماه وادعي الله ان يقدم لك مافيه الخير ....

سعيدة بوقفتكم معاي وتفاعلكم مع موضوعي
الله يبعد عنكم كل هم وغم ويسعدكم

طبعا لاني بالجوال ماعرف ارد لكل واحد بالرد ع الكل

انا اكيد عندي اغلاط ف التعامل اعترف لكن انا لسى اول سنة لي ف الزواج طبيعي مابفهم وش طبيعة الرجل وكيفية تفكيره رغم اطلاعي ع هالامور كثير لكن التجربة غير ع الدروس فما بالكم لما اصادف شخصية صعبه ومعقده مثل شخصية زوجي وربي في سنة وحدة تقريبا غيرت اسلوبي معاه مليون مرة وكل مرة اشوف ردة فعل مختلفه منه وكلها تنم عن عدم رضاه

انا المواقف الي حكيتها لكم نقطه من بحر الي بيسمع قصصي مع زوجي بيقول متزوجين لنا عشر سنين من كثر الهواشات وتفرع المشاكل الي صارت لنا

زوجي يبغا كل شي كالاكل بالملعقه حبة حبة وكل شي علي انا لما اقوله براحتك ابيه يفكر شوي مو كل شي علي وهذه ابسط الامور يسالني ولما اجاوب مايعجبه ردي ولا يعجبه طلبي ويقعد ينتقد

في موقف للحين ماله تفسير عندي واشباه كثير

توظف وظيفة جديدة قلت له بهذه المناسبه انا بعزمك ع الغدا في احسن مطعم تفائلا بانها تكون فال خير عليك
رجعنا البيت بعد الدوام مبوز هو وانا اقول ها نمشي الحين يقولي وين بنروح قلت المكان الفلاني وجلست امدح الاكل فيه وقلت له قد سبق ورحته مع صحباتي قبل الزواج
قالي طيب من غير مايعجبه ولا ف اي تفاعل
وسكت وقاعد
وانا محتارة وش السالفه اقوله ولا اقولك بما ان العزيمة لك انت اختار اي مطعم يقولي خلاص ماتفرق قلت طيب متى نروح يقول اصبري
وعدت ساعه
قلت اذا مايمديك اليوم نخليها يوم ثاني خليني ادخل المطبخ واسوي غدا لان خلاص اذن المغرب
قال لا انتظر اتصال اذا الي انتظره يبي شي مانروح
قلت مو مشكلة طيب اسوي شي خفيف تصبيرة انا خايفة يكون جاع
قال لا ... وعدا المغرب واذن العشا وخلص العشا وهو ساكت وانا ساكته اخر شي قلت له ترا خلاص عادي مانروح او اذا تبي نجيب اكل يقولي انتي وش فيك تزنين يلا امشي امشي
قلت ترا الموضوع ابيه بطيب نفس اذا ماتبي انسى الفكرة قال لا امشي نروح
وطلعنا
طبعا الصراخ والهياط مايعتذر منه هو مفترض مزاجي يتغير بنفسي وحاولت اضغط ع نفسي واغير مزاجي قال وين تبينا نروح ،،، رجعنا لنفس السؤال الاول قلتله المطعم الي قلتلك عليه قالي مو زين قلت خلاص اختار براحتك قال مطعم فلاني قلت اوكي قالي انتي تبينه قلت طالما انت بغيته خلاص ماراح نتهاوش ع اي مطعم ويصير يصارخ تبغينه ولا لا قلت له انا الي ابيه علمتك عليه بس اذا انت تبغا الي اخترته انا ماعندي مشكلة وللعلم المطعم الي اخترته ارقى من الي اختاره

وداني للمطعم الي انا اخترته بعصبيه وسالته ليش جينا هنا قالي انزلي بس ودخل مبوز والله واكل مبوز وطبعا يسمع كلام بنات من الكراسي الثانية يقولي كذا تسون انتي وصحباتك لما تجو هنا قلت اي بس مانعلي صوتنا وقاعد ياكل وهو طفشان وانا احاول الطف الجو اقوله ها عجبك ها حلو الاكل وارجع اقوله وش فيك ماعجبتك الفكرة ولا ماعجبك المطعم
اقوله ترا انا نيتي بس عشان تنبسط ونحتفل بمناسبة دوامك الجديد ولايرد علي يقولي خلاص طيب

طبعا ماتتخيلو حجم تحطيم القلب الي كنت اواجه بس امثل الوضع عادي
وانتهي اليوم وطلعنا وهو مو عاجبه بعدها قالي بنروح عند اهلي نشرب قهوة قلت اوكي مع ان نفسي ضايقة مرة ورحت جاملت وهو قاعد يضحك ومبسوط ولا كانه صار شي

هذا الموقف بس عشان تفهمو نفسيته كيف

بس اوضح لكم شغله انا احب اشتري راحة بالي يعني مالي ف كثر النقاش والجدال مالي ف الازعاج والصخب احب الهدوء ولا احب كثر الكلام ولا احب الزن ولا اعطي اي شي اكبر من حجمه. ببسط كل امور الحياة الا الدين والمبادئ ومع زوجي زاد هذا الطبع فيني صرت معاه يمين يمين يسار يسار

والدليل زوجي كان يخوني ف فترة وكان ع علاقة مع بنت قعدت اترقبه ثلاث اشهر ابي اكلمه بادله من غير لا احسسه بشي مع اني كل يوم كنت اغلي وكل يوم انام ودمعي ع خدي لكن كنت مسيطرة ع الامور لما واجهته قلب السالفه علي واني جاسوسة وماراح يثق فيني مرة ثانية واني مثل مافتشت جواله ممكن افتش جيبه واسرق فلوسه يعني كله تجريح قلت له بهدوء بعد موجة الصراخ الي سمعته منه والبكا الي انا بكيته ولا عبرني فيه اسمعني هذا بيتي وانت زوجي من حقي احافظ عليكم وبسوي نفسي ماشفت الي شفته وبصدق كلامك انها كانت زميلة جامعه معك ومالك علاقه فيها لكن والله اذا شفت رقمها ثاني مرة او شفت سويت شي ثاني من وراي ماراح تلاقيني ف هذا البيت وبعتبر هذا الموضوع ماقد صار ولا كاني شفت شي ولا بجيب لك طاريه مرة ثانية وفعلا التزمت بوعدي معه وسويت هذا الحدث كنه ماصار وف وقت هدوئنا كل مرة اذكره باني انا الوحيدة الي في حياته صح ويقولي اي من غير لا اجيب طاري الخيانه


طبعا الاغلب كلمني عن طرق تعاملي مع ووجهني نصايحكم ف عين الاعتبار والله واكيد اذا ربي قدر ورجعنا لبعض راح ارجع اشاوركم لكن وضعي الان مايسمح اناقش وش المفروض اسوي معاه وكيف مفروض اتفهمه لان الي بينا شبه منتهي ومثل ماوضحت اتفقنا ع الطلاق برغبه منه وانا قاعدة بيت اهلي انتظر طلاقي اذا هو ماغير رايه لان من ناحيتي ماحقدر اسوي شي الا اذا كان لكم راي مختلف تنصحوني فيه؟؟؟

عودة لسؤال البليغ هل اريد هذا الرجل اما لا

لو ان هالسؤال موجهه لي وانا لم ارتبط فيه بعد ساقول لا اريده لكن بما انه جرى القلم وقدر لنا الزواج نعم احب احاول لكن في حال هو حيتغير من عدة امور مهمة صلاته واخلاقه وتعامله معي والاهم من ذلك قبوله لي بما فيني من عيوب ومزايا
وهذه الاشياء كلها تتوقف عليه واحب ابدا فيها بمعنى مابي ارجع له واخذ كورسات ف طرق واساليب اخليه بطريقتي يسويها لا ابيها باقرار منه

لاني مني واثقة من نفسي جدا لكي اقول فعلا اقدر اغيره شخصيته صعبه وفي له عقد نفسه واصرار وخوف من ان تغيره امرأة فيتمزت برايه حتى لو كان غلط ع ان يقبل رأي امراة لذلك لا استطيع ورحم الله امرء عرف قدر نفسه!!

ممكن استطيع امشي ع الامور الثانية لكن الاساسيه الي ذكرتها لا اتنازل عنها صحيح احبه لكن الحب وحده لا يعمر بيت هذا رأي!!

وش تنصحوني استمر ع موقفي وخصوصا اني حاليا والله اعيش ف راحة نفسيه صحيح ان التفكير مستمر ومشاعر الحزن مسيطرة علي لان الموضوع لم يحسم بعد لكن وضعي النفسي الان افضل من وضعي النفسي معه لاني معه اكون ف ترقب مستمر متى ستقع المشكلة الجديدة وماذا حيكون عنوانها واين سيصل مداها !

الحمدلله ع كل حال
احتاج دعواتكم بان الله يفرج همي ويختار لي ماهو خير لي

والله حاسه فيك وحاسه ببكي عشانك
أكره شي اسمه طلاق
لأنك ماأهانك ولاكان فيه شي سيء جددا
كلها مشاكل متلاحقه وعاديه بسبب عدم التفاهم وتقريبا لأنه مايتقبل أي شي
الله ييسرلك الخير ويقنعك فيه وترتاحي يارب
من قلبي ادعيلك
وخايفه عليك بنفس الوقت
الطلاق مو بسيط عالنفسيه الحمدلله ماعندك اطفال
هالشي أهون بكثير من وجود الأطفال
الله ييسرلك كل خير يارب اللهم آمين

الله يسعدك اختي بائعه الورد ع تعاطفك معي
مين قالك زوجي ما اهاني
انا وش الي خلاني اخذ منه موقف غير الاهانات المتكررة زوجي الله يصلحه لسانه بذئ جدا ومايثمن كلامه ابدا
الفتره الاخيرة صار يقولي خلاص روحي اتركي مكان لوحدة غيرك خليني اعيش حياتي
واذا انتي قاعده تحاولي تصلحي الوضع بينا ترا انا مابي ويمكن اخونك او اتزوج عليك مسيار
انا وانتي ماننفع لبعض وزواجنا كان غلطه احنا مانتفاهم
وشوي يقولي انتي وش تبين فيني ليش تبي تعيشي مع واحد مايبيك وش شايفه فيني مميزات

طبعا الفترة الاخيرة ماصارت احاول اتكلم واشرح كثير كنت اقول كلمة واسكت ودموعي تسبقني اصير طول ماهو يهزأ ويتكلم بس ابكي وهو ولا يبالي
وشوي يقولي لو اتكلم مع بنت عمي الصغيرة عمرها البنت تقريبا 16 سنة وعلاقتها مع زوجي كلها استهبال ومزح ثقيل هو يسبها وهي تسبه يقوًل لو احكي معاها هي تفهم اكثر منك
شو يقولي مدري وش شايفين فيك الناس عشان يقولون لي زوجتك كويسة وهم مايدرون عنك
انا مو مصبرني عليك غير ابوي ولاني خايف ع صحته ولا انتي مابيك

طبعا ردة فعلي لكل هذا الكلام ياسكوت وارد بس كلمه او انفجر واصير اروح الحمام ابكي وهو ولا ع باله يتركلي البيت ويطلع وكنت ما اخذ الكلام ع انه جد او يمكن قاله وقت غضب وبس وبينساه وعشان كذا اصبر


اخر مرة قلتله خلاص انا بصير مثل ما انت تبي كل شي بسويه وش الي تبغاه يقولي دوام مابي تقعدي ف البيت اهتمي ف بيتك وشكلك انا جبت ماكينة ازالة الشعر ولا عمرك استخدمتيها وانا اصلا مسوية ليزر للبعض الاماكن المهمه والماكينه استخدمها من وراه يعني مو لازم اوريه وش قاعده اسوي. ف نفسي قلتله حرام عليك ماعمرك شفت شعر علي ليش تقول كذا تخيلي وش رده تعالي قربي ندور واتحداك اذا مالقيت وحدة انا وقتها انفجرت قلتله ماحوريك لانك ماتستاهل تشوف وخلاص ماعاد ابي اصير مثل ماتبي واذا انتي ماتبيني انا بعد ما ابيك مافي شي بالغصب انت مايرضيك شي وكلي ع بعضي خليتني عيوب لو اولع اصابعي العشر شموع ماحترضى وتركته جلست اخذ دش لاني عصبت مرة و راسي حينفجر
وهو روق قالي خلاص يعني قلت اي خلاص قالي اجل متى تبي تروح بيتكم
قلتله اي وقت تبيه قالي بجي بعد شوي اتجهزي ولميت الاغراض الي اقدر عليهم
وانا طالعه قالي وش نسوي في صور الزواج طيب قلت براحتك قالي نحرقهم قلت الي تشوفه سويه اذا الاصل ماعاشو مع بعض وش فايده الصور

انا احس شايف له شوفه او امه واعدته بزواجه احسن خصوصا ان كان في بنت قريبته يكلمها وكم مرة لقطته وكالعادة صرخ علي ليش افتش وقال انه هذه قريبته وعادي يكلمها قلت قريبتك اوكي بس ماتعرف حضرتها انك متزوج قولها سلمي ع زوجتي ليش تكلمها من وراي اذا مابينك وبينها شي قالي انتي مدري كيف تفكري وصرخ علي كالعادة

خيباتي املي معاه متواليه ولسانه جرح فيني كثير والمشكلة ولا مرررة قد اعتذر ابدا الا مرة كان بيمد يده علي عشان كنا وقت غدا وباقي قطعه صغيرة قلتله بهدوء يلا كلها وكمل صحنك حرام بدل ماتنرمي صار يصرخ علي ليش انتي ماتاكليها قلتلك ما ابي يمكن عدت عليه مرتين انو ياكلها بس كله بهدوء وود يعني مو غصب لما صرخ علي قلتله اوكي اسفه انا الغلطانه الي قلتلك عسى عمرك ما اكلت قلب الدنيا علي لاني قلت عسى عمرك يقولي ليش تقولي انا الغلطانة قلتله اي انا غلطانه انت ماكنت تبي بس انا ما افهم يقولي لا تعيدين هذا الكلام وصار يصرخ لين وصل لمد يد قلتله خلاص الحين وصلنا للضرب كمان قلتله والله لو ضربتني ماحسكت .. وقتها كان اليوم الوحيد الي اتصل علي في لما طلع برا وقالي سوري انا طبعا كنت منهارة وابكي وقلتله خلاص مو مشكلة وسكت وعديت الموضوع ولا قد ذكرت له وبعد مدة هو كشف نفسه بنفسه وقت هواش وصراخ قال من ضمن كلامه مايدري الواحد ف ايش تفكرين يمكن تبغين تعلمين اخوك ولا ابوك،،، وانا برضو سكت ماعلقت ع كلامه هذا بس انا فهمت انه قصده وقت الضرب توقع اني بعلم اهلي واعتذر

اما عن باقي الكلام الي يقوله عمره ماعتذر ولا طيب خاطري بالعكس لو شافني ابكي يصرخ علي يقولي وش فيك وانا من النوع الي لما ينجرح يسكت وحتى ما ابكي بس من كثر اهاناته وتجريحه صرت ابكي بس دموع تنزل كلها خيبة امل واسكت وهو يقولي وش فيك بس بصراخ عاالي ولا كانه قال شي من شوي اقوله مافيني بس ابي ابكي ويترك لي البيت ويطلع وهو يتحلطم

احس قلبي مكسورو وحتى لما اذكر احس لا شعوريا العبرة تخنقني ودموعي تنزل ماكنت اني ادري بهذا السوء وهذا الفشل هز هذا الرجال ثقتي ف نفسي ادري واكيد اني عندي عيوب زي زي اي احد ف هالدنيا بس ماتوقعت ابدا اني بطيح ع شخص يركز ع عيوبي وبس ويحطم من ايجابياتي احس اني كرهت كل الناس صرت اطالع ف الناس بنص عين احس زي الي يعرفون وش فيني ويعرفو بكسرة قلبي وكرهت الرجال بالاخص حتى لما افكر اذا تزوجت غيره ماراح اعرف اتعامل معاه يمكن عشان كذا احس اني متمسكة فيه اقول احاول فيه احسن ولا تبين خيبتي ف غيره بعد احس مرة تجيني حالة قوة وتقبل للموضوع وحتى تصبير لاهلي اقولهم عادي ماصار شي انا مو زعلانه عليه وهو الي خسران وانا سويت الي اقدر عليه وحتى اذا سمعت امي تتدعي عليه ولا ع امه الي هي سبب كل شي اقولها ولا يستاهلو انك تتدعي عليهم وكلي امرهم لله لا تزعلي نفسك وماعليك من كلام الناس ولا تعطين احد اي تفاصيل انا عن نفسي راضية بوضعي الحمدلله ومرات احس بضعف وألم وحزن وانطوااء ومؤخرا عصبية شديدة ماصرت اطيق احد الي يقولي كلمه اصرخ عليه وهزأه احس ابي اظل ساكته طول الوقت مابي اتكلم

اما عن شغلي فانا ف عالم وشغلي ف عالم اخر اروح الدوام وطول الوقت شاردة احس من كثر مازوجي سوا لي مشاكل عن شغلي كرهت الشغل والله من تزوجت وانا الدوام اروح له صورة بس واخلص المهام المهمه بس ولا ف انجاز ولا ف روح
والحين زاد علي الموضوع صرت من ادخل الدوام ادور ع شي يلهيني يا اروح اتمشى ف الممرات او اقعد اتصفح نت او اسولف مع بنات والمشرفة ملاحظة وساكته وانا كاره الدوام لولا حاجتي للراتب ودي اتركه ما احس لي نفس اشتغل صرت مايعدي اسبوعين الا ماخذه اجازة مرضية خصوصا ان شغلي يبي له تركيز ومايرحم ضغط فترة قبل شهرين تقريبا صار نفس الموضوع مع زوجي انو خلاص بننفصل او تتركي دوامك اخذت اجازة اضطرارية عشر ايام قلت احاول اهدي وضعي معاه ولا فاد هدا شوي ورجع لحالته ف اقل من شهرين

حسبي الله ونعم الوكيل الله يجبر كسر قلبي ويصلح شأني وشأن كل مهموم

أسأل الله العظيم رب العرش العظيم ان يفرج همك ويصلح زوجك

__________________
اللهم اني استودعك اولادي وبناتي دينهم وآمانتهم اللهم جنبهم الخمر والمسكرات والمخدرات والزنا واللواط والفتن ماظهر منها وما بطن يامن لاتضيع ودائعه

أختي وبكل صراحة

انتي تنافسين زوجك على القيادة وهذا يثير غضبة ولكن يعبر عنة بطريقة غير مباشرة
هو مايبغي يقولك انك اخذة الزعامة بالبيت حفاظا على كرامتة ولكن يختلق معك المشاكل انتقام لما تقومين بة
لانك اقتحمتي عرينة بسو تصرفاتك وكل المشاكل بينكم من باب الانتقام من تصرفاتك افهمي يامرأة
دائما الصراع على الزعامة متعب جدا لكل الاطراف ..كيف تطلبين منة قيادة روحاتك وجياتك
وش دور زوجك بروحاتك وجياك انتي مسحتي شخصية زوجك وعتبرتي ذلك من خصوصياتك
اصلحي حالك يصلح لك زوجك وجربي لمدة شهر مايضرك لاجل ديمومة العشرة

__________________
سبحان الله وبحمده سبحان الله العظيم