السلام عليكم و رحمة الله و بركاته

اليوم كان من خططي إني أرفع على زوجي دعوى نفقة و حضانة و اتفرغ لها

صحيت جداً متأخر اليوم على غير عادتي
صحيت متكدر خاطري .. بعد أحلام كثيرة متتالية متخربطة اشوفه فيها كعادتي
شفت اني مسافرة معاه و خايفة يغدر فيني
و فجأة اشوف نفسي ابكي لأنه جوعني ما رضى يشتري لي شي
"احداث كلها مرت فيني زمان معاه اشوفها الحين بأحلامي"

أنا ما اذكر قد ذقت الجوع معاه الا ب مصر
سبحان الله كنا نمر عالمزارع و الخير و استشعر قول الله عز و جل "اجعلني على خزائن الارض اني حفيظ عليم"
و اقول بخاطري خزائن الارض انا امشي عليها و انا جوعانة !

سافرنا اول مرة لشقتي هناك و ماعندي مطبخ و الشقة عظم
و المنطقة اللي هم فيها مافيها هذيك المطاعم
كنت حرفياً اموت جوع
اقضيها من المخبز كعك محشي ب تمر او من البقالة
وهو يطلع من الصباح لليل و يخليني لوحدي ادبر عمري

مرت السفرة الأولى شهر كامل بحلوها و مرها
و سترت عليه و لا علمت اهلي عن أي شي صار ضايقني
وبالعكس وصّلت لهم فكرة حلوة و اني استمتعت و و

بعدها عاهدت نفسي اعطيه فرصة اخيرة و اسافر معه وهو وعدني و اعتذر لي
رحنا المرة الثانية و قبلها ب شهر سحبت من البنك من حسابي ٥٠٠ ريال بدون ما يدري
خفت يجوعني

وحطيتها بمحفظتي كاش
طلبت منه قبلها يعطيني كاش اي مبلغ قبل نسافر ما رضى ابدا
و كعادته كلمته المعتادة : اطلبي اي شي يجي لك
و كنت خايفة يغدر فيني
وفعلاً
كملنا اسبوع حلوين
كنا ننعزم عند اقاربه
بعدين رجعنا لفقرة الجوع
و السنة الثانية ما كمل المطبخ لسه ماعرف ليش يسوي فيني كذا ويبهذلني
طلعت فلوسي بدون ما يدري و كلمت وحدة من صديقاتي تصرفهم لي جنيهات من البنك
وفعلا كنت كل يوم اطلب لي من المطعم
"فتحوا مطعم بمنطقتهم فخم و محترم على السنة الثانية من جيتي"
كنت كل يوم اطلع بنفسي اجيب لقمتي
احس ماوراي رجال
اطلع انا و بنتي نمشي على رجولنا الين نوصل المطعم نطلب كثير
اكل يقضينا لليل
و يجي هو نهاية اليوم مرات كثيرة ياكل معانا

المرة الثانية و البهذلة الثانية هذي ماسترت عليه فيها
و علمت ابوي و انا ابكي قلت له انا اطلع ب حجابي و ستري و عبايتي ومعاي بنتي نجيب لقمتنا يوميا
وهو يطلع من الصبح لليل مع امه ماشوفه الا نهاية اليوم يجيني دايخ ينام
ابوي انجن انجن قال لي ماعاد تسافرين معاه ابدا
السنة اللي بعدها جات كورونا و تقفلت المطارات
و اللي بعدها فعلا سافر لوحده
بس مو عشاني و لا عشان كلام ابوي
عشان امه طلبت منه انه يجي بدوني

تبهذلت مع هالانسان و هالعيلة
لكن الغريب فيه افكار متضاربة لسه ب مخي

فتحت صفحة ناجز ب ارفع عليه دعوى بعد الاستخارة
والله ماقدرت
مشاعري غلبتني

__________________

الحمدلله على قضاء يقربني من الله عز و جل.

صحيت اليوم و فيه فكرة مسيطرة علي
افتقدت حسه و كلامه
خاصة بأيام اجازة نهاية الأسبوع
لما يفضى علي الجو ، و يفضى علي بيت اهلي
و كل واحد ينشغل ب عالمه
القى نفسي لا دوام و لا شي
تهزمني افكاري
تهجم علي هجمة الأسد المفترس ،، و تآكلني حرفيا من داخل


كنت افطر و احس نفسي مخنوقة
افتقدت الشخص اللي كنت اصبح عليه
افتقدت سواليفه و كلامه
افتقدت احاديثنا المطولة مع بعض
و اجوائي معه الخاصة في نهاية كل اسبوع
خاصة يوم الجمعة
اكثر يوم يجرحني من كل اسبوع
اكثر يوم افتقد فيه بيتي و حياتي السابقة و يعورني "كتبت هالسطر و بكيت "

كنت اصحى الصباح بدري
اسوي له فطور محترم و اخبز له
و أبخر البيت
و اشغل التلفزيون على خطبة الجمعة من الحرم
بعدين يجي من الصلاة يلقاني لابسة و بناتي نفس الشي
استشعر انه عيد المسلمين الأسبوعي
و احاول اخليه يوم حلو و مبهج قدر المستطاع

حالياً اصحى متأخر
ابغى اليوم يفوتني
ابغاه يخلص قدر المستطاع
كأني اهرب منه ، و المشكلة اني اهرب من عمري و وقتي و حياتي اللي تنسرق مني

اصحى ماقدر اسوي فعاليات ولا شي
اعرف يقيناً اننا وصلنا لنقطة اللاعودة لكني افتقده بشدة

زوجي أسرني و سحرني ب شي واحد
خلاني اصبر فيه على كل اللي سواه معاي
و اعديه و اتحمله

نضجه الفكري و سوالفه و احاديثه

احنا كمجتمع شرقي نفتقد لغة الحوار الهادف الممتع في بيوتنا
تربينا عالصراخ او الجدل او المقاطعة او او

قليل نلقى اسر يتحاورون الام و الاب ب كل رقي" الله اعلم لكن هذي افكاري"
يمكن لأني شفت نماذج كثيرة حولي كذا

الزوج مهما يكون شهم كريم محترم الا انه صامت مع زوجته
و يفضل اصدقائه عليها

لكن انا زوجي كنت انا صديقته الوحيدة
و انا كنت رغم كثرة صديقاتي اكتفيت فيه
وما اشعر ب شوق او فقدان او حاجة ملحة للصداقة

نمشي ب زحمة شوارع الرياض الساعة و الساعتين
ماحس بالوقت من حلاوة سواليفه

حتى انه تعب نفسيا لما سافر لوحده بدوني مصر آخر مرة

انا ماعرف ليش و كيف صار كل هالحاجز بيننا

صحيح انا كنت نافرة منه ك زوج بسبب اهماله لنفسه
لكن كنت اعشقه ك صديق لروحي
اشبع فيني الجانب الفكري

وانا مثلما كتبت عن نفسي بنت مراكز
ف انا بنت منتديات .. اعشق الحوارات الهادفة و التحليلات لكل شي يصير و النقاشات
في الجامعة كنت دايم اشترك بالنوادي الادبية و الفكرية
لما جا زوجي سوّا لي اجمل و اروع نادي فكري بحياتي
لأنه نادي يشبهني
افكارنا وحدة و منظورنا واحد لكل القضايا و الامور
وكل الاشياء اللي تستهوينا و نتكلم عنها وحدة

كنا مرات نسافر مسافة ٨ ساعات اختم معاه كتاب بالطريق
اقراه فقرة فقرة و نتناقش فيه
كنت احس اني مو قادرة امسك نفسي من السعادة
صحيح ضيق علي في اشياء و بهذلني و استغلني و بخل علي
لكن في الوقت كان معاي كرييييم
كان وقته كله لي و افكاره
و ما يخطي خطوة الا ب شوري
كان انسان متردد جداً اي شي يفكر فيه لازم يتصل علي
حتى في امور عمله لازم ياخذ رايي

اصحى من النوم مرات افطر و اجلس اكلمه ساعات قبل يجي
ماكأننا عايشين مع بعض

افتقدت صديقي جداً
صار عندي شك بكل البشر
شككني بنفسي
شككني بكل الرجال و الناس
مفاهيمي كلها مشوشة و احس ب خوف فظيع يجتاحني

اذا كنا احنا اقرب صديقين لبعض
ليش وصل فينا الحال لهالمستوى !!

و ليش يطلعني من بيتي في الليل و معاي بناته
احس متلخبطة اكتب و انا ابكي

سبحان الله ماعمري فكرت بنقطة الصداقة و انا معاه
لكني كنت اقوله دايم انا معجبة فيك جدا جدا لما تتكلم او تفتح اي موضوع

هو اللي قال لي بآخر شهر قبل مشكلتنا
اكتشفت ان ماعندي احد بالدنيا اتكلم معه غيرك
وانك صديقتي الوحيدة اللي اثق فيها

الحين انا ماعندي اي مخلوق اي احد
يأيد رجعتي او اني اعطي فرصة
حتى المستشارين الاسريين يحذروني

انا زوجي و اقولها صدقاً
خاطب عقلي و غازل فكري بشكل ماعمري لمسته من احد
لا من اقاربي و لا اعمامي ولا صديقاتي ولا اي شخص خضت معه نقاش فكري قبل

__________________

الحمدلله على قضاء يقربني من الله عز و جل.

مايخيفني رفضه للشروط الماديه
طيب ماهي الامور الماديه الي هو موافق عليها
كم النفقه الشهريه الي يشوفها مناسبه وكم الرضوه
مده اليد والطرد امور مش هينه
ويبلها فعلا يتادب عليها ان عزمتي الرده
والواضح الشي الوحيد الي يعوره ويخليه يفكر الامور الماديه ولا الباقي عنده سهالات
الله يكتب لك الخيره يارب
نصيحه ابحثي عن وظيفه

طيب مبتعثة هذا دليل ان حكمي عليه صحيح لانه اعترض على الماديات
وافق على انه يشتري للبنات غرفة نوم + يغير ملابسه

النفقة الشهرية اللي يشوفها مناسبة :
الحقيقة ما سألته كم بيعطيني
لو عطيته المجال ب يعطيني أصغر رقم
شرطت عليه يعطيني الفين لي
و الف لكل بنت

الرضوة
بعد شهرين من مشكلتنا تواصل معي عن طريق زوجة صاحبه
و شرطت عليه بس يعطيني 10 الاف و ايفون
و بعدها نتفاهم عالرجوع
و رفض
مع ان راتبه زي ماكتبت فوق 42
يعني اللي طلبته ولا شي

لكن لاني أدرى الناس ب طبعه
اعرف ان 10 بالنسبة له مثل مليون عند غيره
و ماكنت بعد ابغى الموضوع يكبر و ابغى أسهل عليه

شفته رفض
و بعد ما وصلنا للمحاكم
رفض يرفع النفقة قال مانتي ماشية على اعراف مجتمعكم
قلت له خلاص ب امشي على اعرافنا دامك تبيها
الرضوة 50 الف " وهذا كان راي اهلي من البداية "
يعني ما يقارب راتب شهر
يوم شافني رفعتها
قال خلاص ب اعطيك 10
رفضت و قلت 50 تحولها علي و بعدين نتكلم

و طرحت الرقم على محاميين
هل هو يعتبر مبلغ فلكي؟ و كأني هدمت بيتي ؟
قالوا لا جداً عادي خاصة قياساً على راتبه
و قياساً على اخطائه بعد

انا رفعت المبلغ
بعد لانه أذاني بعد الطردة
سبني و سب اهلي
و احتجز اوراقي الرسمية
و انكر قدام الشيخ الطرد و كل شي

و كتبته له ب رسالة
هذا المبلغ رفعته لانك سويت كذا و كذا
و لانك رابع مرة تطردني

/
فعلا اليوم لما صحيت في بالي فكرة الوظيفة
لكن بعد ما اخلص المعهد و ارتب اوراقي
و اعرف اصلا هل فيه رجوع او طلاق نهائي
عشان اعرف اقدم وين
لان اهلي في منطقة و زوجي في منطقة

__________________

الحمدلله على قضاء يقربني من الله عز و جل.

ان شاء الله
ابشر
الله يجزاك خير
انا كنت في المكتبة قبل دقائق اشتري رواية بين القصرين اللي قلت لي عليها .

__________________

الحمدلله على قضاء يقربني من الله عز و جل.

ربى يحفظك ويسعدك
يا ست البنات


طيب اقرا الرواية
وأعطيني انطباعك
على سى السيد


مثال سىء للرجل
مع الأسف

__________________

ان شاء الله ابشر ..

__________________

الحمدلله على قضاء يقربني من الله عز و جل.

اشتقت لشخص ..
كنت أسرد له كل تفاصيل يومي ب دقة
أسرد له كل حكاياتي المضحكة و المملة
كل مواجعي و خيباتي
كل أفكاري و مشاعري
ف ينصت لي بكل جوارحه !

__________________

الحمدلله على قضاء يقربني من الله عز و جل.

يسر الله آمرك
نصرك الله
ثيتك الله
وفقك الله


انا اشعر بك جيدا

ولكن زوجك ليس مثاليا
كما تعرفى

ما فعل بك لا يفعله
إنسان لدية ذرة دين
ورجولة ونخوة

كما قالت مبتعثة
لو تريدى الرجوع له اذن
لازم يكون لديك مصدر دخل
تعتمدى عليه بعد الله

وزوجك يكون الصديق
والحبيب دون اى اعباء مادية

بخلاف هذا لن تستقيم لك
حياة معه أبدا


ولكن فى كل الاحوال انا متفق
مع كلام اخوك


لا رجعة له ان شاء الله
الا بعد تادبة ودفع ثمن
كل ما فعل فيك


والا سيفعل بك اضعاف ما فعل
سابقا ولن يحترمك بعدها قيد انملة


اصبرى وان شاء الله فرج الله قريب


ادعى الله يألف بين قلبك
وقلب امك ويهديها ويصلح
حالها ويصرفها عنك

__________________

معظم مشاكلكم على الماده
زوجك ممكن تتعايشين معاه اذا عندك مصدر دخل
غيره بيتحول وحش طالما عندك طلبات ماديه
وفي احظات الصفاء وبدون طلب مادي بيكون اعز الحبايب وصديق طيب
مدري وش انصحك
استخيري واخذي قرار