لا تيأسي حولي مع أمك
لاتنسي الدعاء لايرد القضاء الا الدعاء في مامعنى الحديث والاستغفار
ازمه وتعدي ان شاء الله اصبري واحتسبيه عند الله
الله يفتحها عليكي ويفرجها
كلمتي زوجك؟

__________________
اللهم صَل وسلم على نبينا محمد

اشكر لكم وقفتكم معايه .. ولكن انا استسلم .. ماقدر اتحمل او اصبر اكثر .. وماعندي حكمتكم بالتفاهم مع امي .. مو عارفه كيف احلها او كيف اتفاهم معاهم .. زوجي من صوب وامي من صوب واختي من صوب .. احس تراكمت علي المشاكل .. وماعرف منو الغلطان .. هل هم غلطانين والا انا الغلطانه ..

وكان لكلامي بقيه فالرد السابق .. ولكن انا اشوف انه ماله فايده .. يعني ما بيضيف شي للموضوع .. الان امي اجازه اسبوع مع المدارس .. واختي اطلعت مع زوجها تمشيه لمدة ثلاثة ايام .. سوت مشكله واشردت .. وهاي مب اول مره .. من يومنا صغار وهي تفتعل المشاكل بينا وعشان هي الكبيره محد يحاسبها .. كله يحطون اللوم فينا .. وانا احلف لكم بالله انه هذا مو كلامها .. حد منقلها الكلام اللي تبي تقوله .. لاني كل ما ابي اتواجه معاها تتعذر بأي شي .. وها المره قالت انها طالعه تمشيه لمدة ثلاثة ايام وانا متاكده انها في بيتها لانه زوجها دوام ..
امي قالت لي ابيه يوفر لج بيت بروحج حاليا .. احنا كنا بناجر شقه بس اخو زوجي قال له حرام لا تاجر تعال عندي في الملحق .. وزوجي رفض قال لا بنروح شقه .. فهو حلف قال ما تاجر وانا موجود .. هذا قبل العرس .. وما درينا الا انه مجهز الملحق لاخوه وفاصل بينه وبين بيته بجدار وباب اذا نبي نروح لهم وباب خارجي يعني مفصول .. غرفة نوم وصالتين وحده للظيوف ووحده صغيره للقعده ومطبخ مع مخزن صغير وغرفه للخادمه اذا فكرنا نجيب مستقبلا .. بس امي قالت يا تقعدون في بيت بروحكم يعني يوفر لج بيت او تقعدين في الملحق عندنا .. انا مكلمه زوجي قبل بس هو رافض يقعد في بيتنا .. قال انا ما ارضاها على نفسي اقعد في بيت زوجتي وثانيا ما راح اخذ راحتي في بيتكم خصوصا ان الملحق جنب الفيلا يعني مافي شي يفصل بينا وبن بيتكم .. امي قالت له وفر لها بيت .. قال لها ان شاء الله .. هذا قبل العرس طبعا .. الحمدلله اطلعت لنا ارض .. وتعرفون البنا يعني بياخذ له اقل شي سنه .. وامي مسجله حتى في عقد الزواج انه يوفر لي بيت بروحي ويسمح لي اتوظف .. نقطه ثانيه قالت له البنت متى ماحبت تيي بيتنا او تطلع تسمح لها مع اخوها نسيبها هو واختها مالك تمنعهم .. زوجي قال عيل انا مالي لزمه اذا مالي كلمه عليها .. المفروض ما تسوي اي شي الا بشوري .. قالت له هذا اللي عندي .. اما بتقعد تحدد لها من تطلع معاه ومن تكلمه بعد اخاف باجر تقول لها ما تطلعين مع ابوج .. ومن هذا الكلام ..

بخصوص الطلبات .. المهر كان 130 الف درهم .. القاعه ب 45 الف .. الكوشه ب 25 الف .. وكان من ضمن الطلبات ان يكون بحضور فرقه لمطرب مشهور نوعا ما .. وكانت بيكلف حضوره 20 الف .. بس زوجي رفض واصلا قال نحن ما نبي اغاني وبعد شد وصد ورد وافقنا انه بدون .. طبعا انا ما اخترت شي كله امي اللي تختار .. طبعا هذا كله لانه بنت خالتي اللي عرست قبلي كان زواجها مكلف مبلغ وقدره .. فامي كانت تبي تسكت خالتي بزواجي على حساب زوجي .. على فكره .. مبلغ المهر احنا ما ناخذه كامل .. امي تاخذ منه مبلغ وقدره .. امي وخالاتي حبهم للفلوس حب فضيع لا يمكن احد يتصوره .. حتى ابوي من فتره ورث بعد وفاة جدي ابو ابوي مبلغ وقدره .. امي ما خلته لين شفطت عنه المبلغ بالكامل .. ومن فتره كانت تبي تقنع ابوي يسجل البيت باسمها .. ولكن ابوي رافض تماما ..

مادري في اشيا قاعده اقولها واحس انه مالها علاقه بالموضوع او من الخصوصيات اللي المفروض ما اقولها بس اعذروني ماعرف شو اقول وشو اخلي .. على كثر ما نصحتوني بس احس اني خربت كل شي .. اتمنى ما تزعلون مني ..

قعدي مع أمج مرة ثانية وقوليلها أنا برجع لزوجي .. مابي أتطلق وأنا توني عروس ومتمسكة فيه وأبيه ومابي غيره ..

الآن هل أمك لازالت على موقفها من رفض رجوعك لزوجك ؟

فرج الله همك

أمي تقول انه من تتزوجون خيركم كله لازواجكم وتنسون امكم اللي ربتكم وتعبت عليكم وكبرتكم .. والسبب بهذا كله هي اختي المصون الله يهديها .. اشوف ما كان له داعي تقول على امي بموضوع الهديه اللي لعمتها ام زوجها .. امي حست انها فضلت عمتها عليها فها الشي زعلها ..

حاليا ماقدر اكلم امي بعد اللي صار .. وزوجي اليوم ما ارسل لي شي .. الصبح ارسلت له من ساعتين تقريبا بس ما قرا الرساله ولا رد .. بس كلمت اخته وطمنتني عليه .. وقالت انه رايح الدوام اليوم

أكيد طبعاً ما تكلمينها الحين.

اصبري كم يوم .. عطيها فرصة يمكن تراجع نفسها.

بس إنتي أظهري لها إنج حزينة وحاز في خاطرج اللي صار بدون كلام.



وأي كلام يخص شخصية زوجج أو طبيعة علاقتج بنسايبج سايريها فيه ولا تجادلينها ولا حتى تقولين لها زوجي ما يرضى أو عيب أو حرام .... المهم ترجعين لزوجج وعقبها تتفاهمون مع بعض على أسلوب الحياة اللي يريحكم .. ووقتها محد يقدر يتدخل أو يطلّعج من بيته غصب.

__________________


اللهم طِيبَ الأثر .. وحُسْنَ الرحيل.

انا صابره يا مهر وبعد اسبوع راح نكمل شهر .. اعتقد انها فتره طويله جدا جدا .. المشكله انه اذا يونا ضيوف انا ما اطلع من غرفتي حتى ما يشوفوني ويستلموني باسلتهم .. والمشكله الثانيه انه المفروض احنا راجعين من السفر يعني الناس تبي تيي تزورنا .. والمشكله احنا من نفس المنطقه يعني اذا ما شافوني بيشوفون زوجي .. انا مضغوطه جدا وانا متاكده ميه بالميه انه امي قايله لخالاتي خصوصا خالتي الكبيره لاني امي ما اتخبي شي عليها .. وان شاء الله انها ما تقول على عيالها مابي احراج اكثر اللي فيني مكفيني .. وقتنا كلش غلط ..

إن شاء الله إنك بترجعين وأنا شبه متأكده لا تستسلمين يادمعه وراعي زوجك وأمك
أمك تسعى لمصلحتك ومقهوره عليك معليش
وادعي بين الآذان والإقامة هذا وقت مايرد الله فيه الدعاء يستجيبه

قولي لأمك إذا روقت تكفين اللي فيني مكفيني وأنا ما أبي أشيل لقب مطلقة وأنا عروس خليني أرجع بأسرع وقت
الناس بتتكلم بعذريتي وشرفي لأن هذا هو التفسير الوحيد ولا أحد بيصدق السبب الحقيقي
أمك يهمها كلام الناس أكيد فكلميها على هالأساس وأظهري حزنك على وضعك وزوجك

وصدقيني هذا خيره من ربي عشان مستقبلا ماتدخلين أمك بأي مشكله من مشاكلكم واللي يصير ببيتكم مايطلع نهائي

ان شالله ان موضوعك الى خير طالما انت وزوجك تحبون بعض وما اظن ان في أم في الدنيا تسعى لخراب بيت بنتها ابدا
بس الي مستغربة من أمك بصراحة قولها : ( عقلية الثمانينات والسبعينات ) يعني كل زمن له دين معين والله المستعان
مشكلة لمن الواحد يغار على زوجته في أمر واضح شرعا وعرفا يقلون عقليتك متخلفة

بعدين دموع زوجك قدام امك ابدا ابدا مالها داعي ليش الرجال سارو يبكون عالطالعة والنازلة ؟

ابوك فينه من الفلم ذا كله ؟ يعني لا يحل ولا يربط وامك مدركة كل شي ؟

والله لمن نزلت دموعه انا تمنيت اني ما كنت موجوده .. حتى من شوي لمن رد عليه قال لي لا تتحرين اني ضعيف يوم تدمع عيوني بس ماعرف شو اللي صار .. انا اعرف انه يبي يبرر موقفه بس انا مو هامني بسبب او بدون .. المهم عندي انه انجرح وانا السبب وربي يسامحني على اللي سويته ..

ابوي وامي الفرق بينهم عشر سنوات تقريبا .. ابوي شهادته اعداديه وامي جامعيه .. امي مرتبها اعلى عن والدي بكثير .. بس تخيل امي ما تحط ولاشي في البيت كله على ظهر ابوي .. واحنا بناته كم مره كلمناه يرد علينا يقول انا الحمدلله مرتاح بهذه العيشه وقسم بالله انه مو مرتاح وحنا نشوف ونحس فيه بس ما باليد حيله .. حتى اي مبلغ اخوي يعطيه لابوي امي تاخذه منه .. الى ان صار مرات يخبي عندي مبالغ ماليه وانا احفظها له واخر مره فتح لي حساب باسمي وصار يخبي فيه شوي .. يقول ابي اخبي لكم شي للمستقبل ولو بسيط حتى ما تاخذ امكم الاولي والتالي ..