الله يوفقك يارب ويفرج همك
عندي ملاحظه لاتعطي اكبر من قدرتك
منتي ملزومه بعد التعب تطبخي لعايله كامله الى درجة التعب والضرر الجسدي عليك
تعلمي كلمه لا بدون تانيب ضمير
ترى لنفسك عليك حق وبتحاسبين عليها
مدري ليه تستخدمين الدين ضدك ترى ديننا رحمه بالشخص ولطف فيه مهب اداه تسلط عليه ليعطي فوق قدرته ويتخلي
عن احلامه
بصراحه ردك الاخير تتضح الصوره ليه استحقاقك منخفض لنفسك
لدرجة اذا كلمك زوجك بادب تحسينه شي عظيم وشي يمكن فوق ماتستحقين لانك عشتي مع ام الله يهديها
وياليت الاباء والامهات يعرفون الضرر الي يلحقونه باطفالهم
سواء تم الصلح مع زوجك او لا انتي انسانه طيبه وخلوقه ولا ازكيك على الله وتستحقين كل خير ومعامله طيبه في كل وقت
اذا رجعتي لزوجك ضعي شروط وحدود وحزم في بعض الامور
واذا الله ماكتب لك رجعه نصيحه اسكني لوحدك قريب من اهلك واطلبي تفقه
قوي نفسك ولا تعيشي كثير في دور الضحيه
حتى امك ضعي حدود وبلغيها ان كلامها ياذيك وخذي موقف
البر مو نتحمل ليمن تصير لنا عقد نفسيه

وعليكم السلام ورحمة الله وبركاتة

اهلا بك ابنتى الطيبة

اسعد الله ايامك
بكل راحة بال وسعادة
ويسر امرك وربط على
قلبك وفك عنك كل
هم وضيق

اللهم آمين يارب العالمين

اولا كل ما تشكى منه
علاجة ان شاء الله فى كثرة
الصلاة على النبي صلوات
الله عليه

مع كثرة الإستغفار


ثانيا أشعر من رحمة الله ان
جعلك تلجىء إلى هذا المكان
لكى تجدى فيه المعين بعد الله
تبارك وتعالى ولكى تفضفضى
وتخرجى كل ما بك من هم وضيق
ويكون متنفس لك


نقطة هامة ، أشعر أن الله
يختبرك لقلبك منه سبحانه
وسعك الدؤب لفعل الخيرات
وذلك لان الابتلاء على قدر الإيمان


وأشعر ان الفرج قريب سواء
مع زوجك لو قدر الله له الصلاح

او مع زوج آخر يكون مثلك
وتجدى معه كل المؤدة والرحمه
والسكينة مع الحب

وتشعرى بالسعادة والأمان


لانه وكما قال الشافعى

وَلَرُبَّ نازِلَةٍ يَضيقُ لَها الفَتى ذَرعاً
وَعِندَ اللَهِ مِنها المَخرَجُ ضاقَت فَلَمّا
اِستَحكَمَت حَلَقاتُها فُرِجَت
وَكُنتُ أَظُنُّها لا تُفرَجُ


نحن معك بعد الله
جل وعلى


ومنتظرين منك مشاركات
مليئة بالسعادة والهدايا
الربانية لمن اتقى وصبر


ان غدا لناظره قريب

__________________

* فعلا داؤك منك وما تُبصر *

انا ما تابعت كل موضوعك لكن لحقت اخره
وعرفت الداء
اختي نصيحه عالجي الداخل واتركي الخارج
الخارج سيتعدل اذا تعدل الداخل
واعني الداخل * انتِ *
انتِ وفقط

انتِ عندكِ بلاوي داخلك
عندك غضب "مكبوت" من أمك
عندك قل استحقاق (مجرد ذوق في كلام زوجك فرحك)
عندك حزن (دور الضحيه)
عندك خوف (من الوحده)
عندك تأنيب(تنشئة دينيه غلط وكلنا تلقينها زيك)
قلتلك بلاوي ويا عالم وش عندك زياده ما ذكرتيه

بلاوي وعلل اذا ما عالجتيها سوف تتدمرين
اذا مو من زوجك من زوج اخر
واذا مو من زوج اخر من امك
ومن بناتك مستقبلا ونعم اعني كلامي هذا

عالجي الداخل والا راح تدمر صحتك
واول علاماتها (ركبتك)
اللي مش من كثر الوقوف
بل لها اساس مشاعري (نفسي)

صدقيني الجسد "المادي" اخر مراحل الانهيار
يتضخم الجسد الفكري (العقل)
بالمعلومات الغلط (ومنها الدينيه)
فيزيد الحمل على الجسد المشاعري ( النفسيه)
(بالحزن والخوف والتأنيب والعار ووووو )
فينهار فيتلقفه الجسد المادي
(عن طريق الامراض الجسديه)

لذلك مرة اخرى ابدئي بالداخل
عالجي جسدك المشاعري
عالجي ما ذكرت فوق من بلاوي داخلك

سلامي لروحك الطيبه

__________________
( اللَّهُمَّ آتِ نَفْسِي تَقْوَاهَا، وَزَكِّهَا أَنْتَ خَيْرُ مَنْ زَكَّاهَا، أَنْتَ وَلِيُّهَا وَمَوْلَاهَا )

توني جيت من المستشفى
كنت ابكي قدام من الناس
لما علمتني الدكتورة بعد الاشعة ب حالتي
فيني احتكاك من الركبة
و قالت مافيه حل الا إنك تمنعينه يسوء و يتفاقم و تغيرين نمط حياتك

ماعرف ايش اقول
تذكرت وضعي مع زوجي ب لحظة ضعف
اتمنى ينصلح حالي معاه
والله اني كنت اتمنى الى حد امس و افكر
لو ما اتهمني بالهلاوس العقلية كان سامحته

اتمنى تصير معجزة من السما
يصلح وضعي معاه ان كان فيه خير لي

انا قبل اسبوع شخصوني التشخيص المبدئي
و بدأت بالعلاج
و اليوم شفت الاشعة
من هذاك الوقت بديت احاول اتحسن و امارس رياضة

عزمت صديقتي قبل امس عندي
و كنت ناوية اختار طبخات غير متعبة بالوقوف في المطبخ
لقيت امي تقول مو حلو الكيك الجاهز.. ما اعتبره كيك وع !
و و
كل الاصناف اللي كنت ب اجيبها
كانت تبغاني اسويها ب يدي عشان اثبت لها اني سنعة

و انا للاسف فورًا لقيتني انجريت ورا كلامها
سويت كل شي بيدي و إتصلت لها قلت لها بمزح و ضحك
سمعت كلامك و سويت كل اللي قلتيه
عشان تشوفيني سنعة و ست بيت ب عيونك

أمي معاييرها قاسية و مثالية
اجتهدت طول حياتي اعترف أوصل لمعاييرها
حتى ب تخصصي الدراسي
ضاع عمري و حتى صحتي الحين تتفلت مني
بس عشان احسها راضية عني و اشوفها تفتخر فيني
كنت ولا زلت اجي على نفسي كثيييير
عشان عقدة ان كل يظلون مبسوطين و سعيدين
محد يزعل مني
الكل يحبني
آخرها ب رمضان الماضي لما كنت عند اهلي
انكرفت لحاالي بالمطبخ
كنت اجلس 4 ساعات او 3 واقفة على رجولي متواصل
اسوي اصناف عشان ينبسطون

لما تذكرت هالفقرة
و انا طالعة من عند الطبيبة انهرت انهرت

__________________

الحمدلله على قضاء يقربني من الله عز و جل.

فيه اشياء كثيرة ذكرتيها صحيحة عني
و فيه اشياء ب أوضحها لك
دور الضحية ماشوفه فيني ولا احبه
كذلك الخوف من الوحدة الحمدلله متصالحة مع هالشعور
كذلك غضب مكبوت من امي لا
لكن خوف منها الحقيقة و من عدم رضاها عني و انها اذا ما رضت ب تكشر بوجهي
و هالشي يعني اني بنت فاشلة عاقة و يمكن ربي ب يبلاني بناتي و و تفكيري ما يخلص ..

لكن صحيح كلامك عندي قل استحقاق ماحس استحق اي شي كبير منه و سببه
اني ارحمه مابي اتعبه مابي اكلف عليه
والله ماعاد اعرف هي قناعاتي صح ولا غلط

كذلك عندي عقدة المثالية
و عقدة ارضاء الجميع و حب الجميع
و اني لازم اعيش بدون عداوات او مشاكل مع الكل

عقدة اني لازم امشي وفق المعايير المطلوبة
في المدرسة الشطورة هي اللي تجيب درجات عالية و تسمع كلام المعلمة و تجلس قدام و و
فهمت هالشي من معلماتي و مشيت وفق معاييرهم
و كل شوي يختاروني الطالبة المثالية

قيسي عليها كل شي بحياتي

دخلت زواجي
لازم اكون بنت الرجال المطيعة اللي تسعده اللي ترحمه ما تكلف عليه
الزوجة الصالحة هي اللي تكون مرتبة طول الوقت
بيتها نظيف و ريحته حلوة
تسمع الكلام ما ترادد
اطفالها مرتبين و تنشئهم تنشئة صالحة
الاكل قبل يجي الزوج موجود

ابكي لي اسبوع من سؤال واحد
انا يا مجتمعي و يا حياتي و يا دنيا
مشيت على معايير الزوجة الصالحة المطيعة
ليش انهارت حياتي و فشل زواجي ؟
مو المفروض احصل زواج مثالي و حب اسطوري

لكن انا حتى حب حقيقي عادي ما لقيت

ماعاد اعرف ايش الصح و الغلط

لما اقولك زوجي عاش معاي 5 الى 6 سنين
كل مشكلة يدخل ناس للصلح
في كل مرة يقول مافيها اي عيب

طيب ليش يفشل زواجي

عرفت ان الاسباب كلها داخلية
و تعرفين هذا محزن اكثر اكثر اكثر ..

الحين حتى في بيتنا
السنعة هي اللي تكرف و تسوي كل شي ب يدها و ماتريح نفسها
لازم انام و انا احس مفاصلي ب تتقطع
كذا انا خذت الدرجة الكاملة من امي

خواتي ماهمهم هالكلام و المعايير و ماشيين باللي يريحهم ولا يضغطون على انفسهم
انا الوحيدة المجتهدةً

ترا والله مو هذا تقييمي لنفسي عن نفسي
هذا تقييم المحيطيين

سويت عزيمة كبيرة قبل اسبوعين
عزمت بنات خوالي و اعمامي و صديقاتي
و طبخت كل الاكل ب يدي
كنت ابغى أقول لأمي برسالة غير مباشرة
انا شطورة افتخري فيني
شوفيني سنعة

انا الحين تعبانة اكتب و انا مرهقة من كل شي
احتاج اغير كل شي ..
كتبت لكوكي قبل عيوبي كلها داخلية و انا عارفة هالشي و متاكدة منه
لاني اسمع الكلام و ما اجادل ولا اعاند زوجي و مرتبة و احترم اهله و اسكت لهم حتى لو اهانوني
و اكتم بقلبي
كنت ابغى العب دور الزوجة الصالحة العاقلة اللي شارية بيتها لآخر رمق
والله انهم سووا فيني مصايب
والله انهم سووا فيني مصايب

و مشيتها عشان زواجي يصير مثالي بدون مشاكل و ما يكرهوني
و يحبني زوجي و اكبر ب عينه و و
ولا حصلت اي شي

انا لله و انا اليه راجعون

__________________

الحمدلله على قضاء يقربني من الله عز و جل.

انا افضفض مو لاني ابي العب دور الضحية المظلومة
لكن لقيت متنفس يريحني و يخليني ارجع اقيم نفسي و حياتي و اكتشف اخطائي

و لما اكتب تعبت او بكيت او او
لان وضعي ك معلقة بالأساس مدمّر استقراري النفسي

__________________

الحمدلله على قضاء يقربني من الله عز و جل.

انا حصلت لي مستجدات معه ضغطت على نفسيتي زيادة بعد ..

في حياتي
لما كنت امشي وفق المعايير
كنت احصل رضا و حب و شكر و تقدير و علاقات حلوة من اللي حولي
لكن امي كانت الشخص الوحيد اللي كلما قدمت اكثر كلما شدّت علي اكثر

اجتمعت انا و اخوي نشتكي لبعض قبل فترة
ليش امي بس تشوف اخطاءنا
رغم ان البقية يسوون نفس الغلط و تمشيه
مثل المعلم اللي تزعله غلطة الطالب المجتهد اكثر

تقاجئت امس لمًا كلمت خالتي " كلمتها عشان تكلم امي بطريقة غير مباشرة
و تنصحها تخف عني و ترحم وضعي لانها الشخص الوحيد اللي ممكن يأثر على امي "

المهم تفاجئت تقول لي انتي و فلان الوحيدين اللي تفتخر فيكم و تتكلم عنكم بكل حب و فخر و سعادةً

طبعا هذا الشي ولا عمري سمعته ولا حتى حسيت فيه
تفاجئت كثييير
و تفاجئت اكثر ان احنا اكثر 2 متضررين نفسيا

لكن ظاهريا من ورانا قدام الناس المدح و الفخر و انو ما ضاعت تربيتها
امي و ابوي ب وعي او بدون وعي شكلوني و رسموا لي رسمة معينة امشي ضمن اطارها
ابوي الحين ليش مقهور من زوجي
قال لي مرة عطيته اياك و انتي المثالية " قالها صريحة مرة "
يحس انه متحسف علي اني خذت زوجي دايم يقولها لي

نجي لزوجي اكثر شخص بحياتي حبيته و عطيته اضعاف اضعاف اهلي و حتى نفسي
ايش يشوف كل شي اسويه من احسان و دلع و ادب = واجب علي
غصب عني
كل الزوجات يسوون كذا
+ اللي يعور اكثر : ما يثمر فيه ابدا ولا لي عنده اي رصيد حسنات
بمعنى يغضب لاسباب تاااافهه و يفجر فيني
و ينسى كل شي قدمته
و قد اكون مسوية له خدمات قوية قبلها ب دقايق

زي لما مد يده علي ب مصر

كنت قبلها ب دقايق
رايحة على رجولي لمحل حلويات كشخة
شارية على حسابي لأخوه و زوجته ك نوع من الاعتذار اني ما بحضر خطوبتهم بحكم الاختلاط
راح عطى اخوه الصينية و طلع الشقة ضربني

هذا الشي دمرني
يمكن امي تضغطني نفسيا و تزيد حساسيتي بحكم وضعي الحالي

لكن زوجي تصرفاته من اول يوم زواج قضت علي
اني احسن
او اجيب هدية
او افكر ب شي حلو اسعده فيه و اقدمه له
و القى بعد دقايق
مو ايام او شهور او سنوات

بعد وقت بسيط القى ردة فعله بشعة

زوجي اصعب
من ناحية اني مهما قدمت ماراح يصير عندي رصيد
يمنع عني اذيته

امي ماراح توضح شي ولا تشكر عشان ابذل اكثر
لكن ماراح تضربني او تسبني او تقذفني

انا ب دوامات دوامات حياتي الحالية و السابقة
اقارن
و احن لزوجي و بيتي كثير
و فيني رغبة قوية صادقة تنصلح الامور بيننا

مع ان للاسف اهلي و اقرب الناس لي
يشوفون شي اخر تماما
غير اللي اشوفه عن زواجي
و تقريبا صار اجماع
ان افضل حل اي الطلاق
و ان احنا ما نصلح لبعض و و

حتى ترا لما افكر بالطلاق
اصارحكم ب سر
اقول ان شاء الله لو تطلقت ارجع له مرة ثانية

عندي امل بكل الاحوال بالاصلاح مهما كان الفشل مغرقني

__________________

الحمدلله على قضاء يقربني من الله عز و جل.

عزيزتي
نصيحه لا تتطلقي منه وانت متعلقه فيه
اما ان تفكي التعلق او عودي له
فكي جميع انواع التعلق (بزوج او حتى شنطة يدك)
عودي له واشتغلي على نفسك
لين تفكي تعلقك به
وتصلي للقدره على الطلاق وانتي مبتسمه
وعن قناعه ورضى داخلي

……
دور الضحيه فينا كلنا
كلنا نمر بفترة او فترات دور الضحيه
واحيانا نحتاج تمثيل هذا الدور
المهم الا نبقى فيه دائما وابدا

عادي فضفضي بالعكس هذا شيء لصالحك
واكتبي كل شيء تنحرجي ان تقوليه
مهما كان تافه اوحساس

……

على فكره يا اختي
المثاليه لعلمك شيء سيء
والاسوأ ان نجعلها هدف نسعى له!!
شايفه المشاغبه اللي بآخر الصف اللي قلتي عنها؟
هذي صدقيني الطبيعيه
اللي تاركه نفسها على سجينها
وانتي الغير طبيعيه
لانك قيدتي يديك ورجليك عن الحركه والمشاغبه
لتحصلي على "نجمة المثاليه"!

وامك وزوجك درس علمك
بانك ضيعتي وقتك
ولن نعطيكِ النجمه المستهدفه!!
درس يعلمونك ان المطلوب تعطين بقدر
(وكل شيء خلقناه بقدر)
تعبانه قولي تعبانه ما بطبخ اليوم
ما بروح المكان الفلاني
ابغى هذا وما يناسبني ذاك
تعلمي ثقافة ((( لا )))
البر لامك وابوك مو اللي تعلمتيه
وتعلمته انا وغيرنا
البر هو الاحسان وليس الطاعه العمياء
والخرافات كثيره شغلي عقلك وتخلصي منها نصيحه

عزيزتي النجمه منك انتي
انتي اعطي نفسك نجوم على ما ترينه صح
ليس ما يراه الناس صح
الصح عندي غير الصح عندك
وما يناسبني لا يناسبك وهكذا

كوني نفسك واعطي النجوم لنفسك
وليكن دافعك نفسك ومكافئتك من نفسك

مريت سريع على ما تذكرت من كلامك
لاني ما فضيت ادخل المنتدى غير اليوم
تمنياتي لك بالفرج والسعاده❤

__________________
( اللَّهُمَّ آتِ نَفْسِي تَقْوَاهَا، وَزَكِّهَا أَنْتَ خَيْرُ مَنْ زَكَّاهَا، أَنْتَ وَلِيُّهَا وَمَوْلَاهَا )

طيب فيه مصادر ممكن تساعديني فيها ؟

بالنسبة للطلاق
ماعرف ما تتفقين معاي انه قرار صعب
مستحيل اوصل فيه للقناعة المصيرية مية بالمية ؟
الا ما تجيني شكوك او ندم

بالنسبة لتعلقي فيه
والله ماعرف اذا متعلقة او لا
احترت ب نفسي
ترا مالي نفس اشوفه ولا اسمع صوته ولا ابغى شي منه
لكن ليش كتبت هالامنية الظهر قبل ساعات
لاني كنت مثل الغريق اللي يبغى يتعلق ب قشة
كنت اقول يمكن ارجع لبيتي افضل بدون مسؤوليات زايدة
مع ان في الحالتين فيه مسؤوليات
لكن عقلي طاش و كنت منهارة و اعبر عن افكار غير واقعية بداخلي ..

للامانة كلامك مريح جدا جدا

ترا اختي حظي حلو
انا ماكنت كذا ولا كانت شخصيتي بهالشكل من التطرف
في المبالغة في الارضاء
انا تغيرت كثير

اهلي
امي
صديقاتي
يقولون بسبب زوجك كسرك و دمرك و نسف شخصيتك

امس كلمتني قريبتي
قالت والله طفّاك يوم تزوجتيه
فلانة اللي عندها مشاريع و خطط و تطوع و و
ماتت لمًا تزوجت
الحين رجعتي بقوة احس هذي فلانة اللي نعرفها

__________________

الحمدلله على قضاء يقربني من الله عز و جل.

الاعضاء الكرام
رغم كمية الحزن اللي تملا مشاركاتي مؤخرا
لكن ابشركم لازلت ابحث عن حلول واقعية

و حطيت في بالي خطتين هالعام
1. اكون في معهد القران - في جو يذكرني بالله و يصبرني
2. اني اتعرف على عيوبي شخصيتي الداخلية و اعالجها

__________________

الحمدلله على قضاء يقربني من الله عز و جل.