رد: كوفي شوب الصبايا (٣)
قصتي لكم اليوم عنوانها "جن سداب / مسقط"
هذي القصه حقيقيه صارت لمديرة مدرسه اعرفها من يوم كنا صغار بعدنا في المدارس
يقول لك هذي المديره انسانه متدينه و مؤمنه و كانت تتطوع في تغسيل الاموات من المسلمات رحمة الله عليهم ..و كانت اعتقد تسكن في الحمريه او الوطيه .. المهم لما كان يموت عندهم وحده من الاقارب او من الحاره كانو الناس يروحو يخبرو هذي الحرمه .. كانت متعوده ان لما تكون نايمه يدقو عليها الدريشه و هي تقول لهم بصوت عالي (ان شاء الله جايه) كانت تتوضى و تتطهر و تروح معاهم للتغسيل.
في يوم من الايام هذي الحرمه كانت نايمه الساعه ثنتين بليل .. و في عز نومها سمعت حد يدق الدريشه .. هي فهمت انه في حد متوفي .. فقالت ان شاء الله جايه و قامت و اتوضت و لبست و طلعت .. شافت حرمه لابسه بلوشي عند الباب و قدام الباب سياره بيضا مال ناس هوامير .. .. فركبت المديره السياره من صوب و الحرمه هذيك ركبت الصوب الثاني .. يوم دخلو السياره قالت الحرمه اللي لابسه بلوشي للسايق خلا سوق ... تو المديره اللي هي المغسله لفت على الحرمه تريد تسالها من متوفي .. تقول لك يوم لفت عليها شافت شكل الحرمه غريب .. بيضا و وجهاا مافيه ملامح غير عيون مقلوبات و البؤبؤ يروح يمين و يسار بشكل سريع .. المديره هنا حست بقشعريره و شعر جسمها وقف بس كانه حد سكتها .. ما قدرت تتكلم و لا كلمه و لا تصرخ بس نزلت راسها في الارض و كانت شايله مسباح في يدها .. و عرفت انه اللي معاها جنيه .. و قامت تسبح و تهلل و تدعي في قلبها طول الطريق .. المهم شافت ان السايق يروح صوب مسقط (مسكت) على قولة اهلنا*
يوم صارو صوب قصر العلم و الماليه اختفى كل شي و اتغيرت ملامح مسقط كلها البيوت ما هي البيوت و الشوارع اختفت و صارن تراب كلهم و الجبال اللي ورا البيوت اقتربت بشكل غريب .. و السايق يسوق فجاه ضرب بريك قووووي و الدنيا انترست غبااار و قامت الجنيه تقول له بالبلوشي ايه شوي شوي رد عليها السايق (عفريت نازل من الجبل)*
المهم السياره قربت صوب سداب / مسقط .. تقول المديره انا كنت متربيه في سداب و اعرفهم البيوت لكن البيوت شكلها غير و غريب!! وقف السايق عند بيت من البيوت و قالت لها الجنيه تعالي امشي وراي .. نزلت المديره و مشت ورا الجنيه .. بيت مترووووس ناس حريم و رجال بس كلهم اشكالهم نفس الجنيه و اكثر شي لاحظته انه عيونهم مقلوبات و البؤبؤ يتحرك يمين و يسار بشكل سرررريييع
المهم .. دخلتها غرفه و قالت لها يوم تخلصي دقي الباب .. الحرمه داخل غرفه فيها شرير و عليه ميت و ادوات التغسيل و الحنوط كلها مجهزه .. جات الحرمه و بدت تغسل الكائن الغريب بنفس تغسيل المسلم .. ما عرفت مو ذاك اللي ميت كان حرمه و لا رجال ولا عجوز و لا شباب ولا طفل!!!! بدون ملامح و لا اعضاء تناسليه .. و لما كانت تحركه و تقلبه كان بدون عضام ولحمه رهيييف*
المهم خلصت الحرمه التغسيل و دقت الباب و سالتها الجنيه خلصتي.؟ قالت الحرمه ايوا خلصت .. فطلعو من البيت بنفس الطريقه و ركبو السياره و رجعو نفس الطريق*
لما وصلت الحرمه عند باب البيت قامت الجنيه و عطتها شي في يدها داخل كلينكس و قالتلها هذا حالش .. نزلت الحرمه بسرعه من السياره و دخلت البيت و قفلت الباب بسرعه .. يوم دخلت الغرفه شافت في الكلينكس 4ورقات شجر ... قامت تقول تو ذي مو عاطتني .. بعد كل ذا الخوف اوين تعطيها ورق شجر .. المهم حطت الحرمه الكلينكس على الكوميدينو و كان قريب اذان الفجر .. فراحت اغتسلت و اتوضت و صلت و قرات قران و حمدت الله انها طلعت من عندهم بالسلامه .. و طلعت الشمس و قررت المديره ما تنام و تروح المدرسه على طول .. راحت المدرسه و رجعت من وقت البيت على اساس انها ما نايمه بليل .. رجعت البيت على اذان الظهر .. فقالت بصلي و بنام .. يوم وقفت تصلي شافت شي يلمع في السقف .. يوم شافت على الكوميدينو شافت الورقات الاربعه صارن 4 جنيهات ذهب فاستغربت .. قامت و اتصلت على اختها و حكت لها القصه و طبعا اختها قالت لها تو انتي حد يطلع نصاص الليالي يغسل اموات؟؟ مره ثانيه طلعي بعد اذان الفجر .. وقالت لها شلي هذيلا القطع و خليهم مكان اللي تحطي فلوسش*
قامت المديره و فعلا حطت القطع في التجوري مالها .. و من بعدها تقول الله جاب لي رزق واجد و اشتريت بيت ملك و اموري الماديه اتحسنت بشكل كبير .. المهم في يوم من الايام ولد الحرمه بغى يتزوج و ما كان عنده فلوس علشان يتزوج ... قامت الحرمه شلت شوية ذهب و قالت ببيعه عشان يتزوج ولدها .. من القطع شلت جنيه من القطع الذهبيه مال الجنيه .. و راحت سوق الذهب و سالت عن سعرهم .. لما قاس البايع الجنيه قال لها من وين حصلتي هذي القطعه؟ قالت له حد عاطني من زمان .. قال لها ماما هذي قطعه واحد يساوي 8000 ريال
هي استوت كذاك**😨 و الهندي استوا كذاك**😨 و يوم حكت لي اختي القصه انا استويت كذاك*
😨 ان الله يرزق من يشاء بغير حساب .. ونعم بالله
الحرمه زوجت الولد و لازالت موجوده و الله يطول بعمرها حرمه مؤمنه مصليه و عسى الله يزيد في رزقها و رزقنا امين
و توته توته خلصت الحدوته و اموه
اتمنى تكون القصه اعجبتكم*
30-05-2016, 08:22 AM
ضوابط المشاركة
العرض العادي
