فيه اشياء كثيرة ذكرتيها صحيحة عني
و فيه اشياء ب أوضحها لك
دور الضحية ماشوفه فيني ولا احبه
كذلك الخوف من الوحدة الحمدلله متصالحة مع هالشعور
كذلك غضب مكبوت من امي لا
لكن خوف منها الحقيقة و من عدم رضاها عني و انها اذا ما رضت ب تكشر بوجهي
و هالشي يعني اني بنت فاشلة عاقة و يمكن ربي ب يبلاني بناتي و و تفكيري ما يخلص ..

لكن صحيح كلامك عندي قل استحقاق ماحس استحق اي شي كبير منه و سببه
اني ارحمه مابي اتعبه مابي اكلف عليه
والله ماعاد اعرف هي قناعاتي صح ولا غلط

كذلك عندي عقدة المثالية
و عقدة ارضاء الجميع و حب الجميع
و اني لازم اعيش بدون عداوات او مشاكل مع الكل

عقدة اني لازم امشي وفق المعايير المطلوبة
في المدرسة الشطورة هي اللي تجيب درجات عالية و تسمع كلام المعلمة و تجلس قدام و و
فهمت هالشي من معلماتي و مشيت وفق معاييرهم
و كل شوي يختاروني الطالبة المثالية

قيسي عليها كل شي بحياتي

دخلت زواجي
لازم اكون بنت الرجال المطيعة اللي تسعده اللي ترحمه ما تكلف عليه
الزوجة الصالحة هي اللي تكون مرتبة طول الوقت
بيتها نظيف و ريحته حلوة
تسمع الكلام ما ترادد
اطفالها مرتبين و تنشئهم تنشئة صالحة
الاكل قبل يجي الزوج موجود

ابكي لي اسبوع من سؤال واحد
انا يا مجتمعي و يا حياتي و يا دنيا
مشيت على معايير الزوجة الصالحة المطيعة
ليش انهارت حياتي و فشل زواجي ؟
مو المفروض احصل زواج مثالي و حب اسطوري

لكن انا حتى حب حقيقي عادي ما لقيت

ماعاد اعرف ايش الصح و الغلط

لما اقولك زوجي عاش معاي 5 الى 6 سنين
كل مشكلة يدخل ناس للصلح
في كل مرة يقول مافيها اي عيب

طيب ليش يفشل زواجي

عرفت ان الاسباب كلها داخلية
و تعرفين هذا محزن اكثر اكثر اكثر ..

الحين حتى في بيتنا
السنعة هي اللي تكرف و تسوي كل شي ب يدها و ماتريح نفسها
لازم انام و انا احس مفاصلي ب تتقطع
كذا انا خذت الدرجة الكاملة من امي

خواتي ماهمهم هالكلام و المعايير و ماشيين باللي يريحهم ولا يضغطون على انفسهم
انا الوحيدة المجتهدةً

ترا والله مو هذا تقييمي لنفسي عن نفسي
هذا تقييم المحيطيين

سويت عزيمة كبيرة قبل اسبوعين
عزمت بنات خوالي و اعمامي و صديقاتي
و طبخت كل الاكل ب يدي
كنت ابغى أقول لأمي برسالة غير مباشرة
انا شطورة افتخري فيني
شوفيني سنعة

انا الحين تعبانة اكتب و انا مرهقة من كل شي
احتاج اغير كل شي ..
كتبت لكوكي قبل عيوبي كلها داخلية و انا عارفة هالشي و متاكدة منه
لاني اسمع الكلام و ما اجادل ولا اعاند زوجي و مرتبة و احترم اهله و اسكت لهم حتى لو اهانوني
و اكتم بقلبي
كنت ابغى العب دور الزوجة الصالحة العاقلة اللي شارية بيتها لآخر رمق
والله انهم سووا فيني مصايب
والله انهم سووا فيني مصايب

و مشيتها عشان زواجي يصير مثالي بدون مشاكل و ما يكرهوني
و يحبني زوجي و اكبر ب عينه و و
ولا حصلت اي شي

انا لله و انا اليه راجعون

__________________

الحمدلله على قضاء يقربني من الله عز و جل.

توني جيت من المستشفى
كنت ابكي قدام من الناس
لما علمتني الدكتورة بعد الاشعة ب حالتي
فيني احتكاك من الركبة
و قالت مافيه حل الا إنك تمنعينه يسوء و يتفاقم و تغيرين نمط حياتك

ماعرف ايش اقول
تذكرت وضعي مع زوجي ب لحظة ضعف
اتمنى ينصلح حالي معاه
والله اني كنت اتمنى الى حد امس و افكر
لو ما اتهمني بالهلاوس العقلية كان سامحته

اتمنى تصير معجزة من السما
يصلح وضعي معاه ان كان فيه خير لي

انا قبل اسبوع شخصوني التشخيص المبدئي
و بدأت بالعلاج
و اليوم شفت الاشعة
من هذاك الوقت بديت احاول اتحسن و امارس رياضة

عزمت صديقتي قبل امس عندي
و كنت ناوية اختار طبخات غير متعبة بالوقوف في المطبخ
لقيت امي تقول مو حلو الكيك الجاهز.. ما اعتبره كيك وع !
و و
كل الاصناف اللي كنت ب اجيبها
كانت تبغاني اسويها ب يدي عشان اثبت لها اني سنعة

و انا للاسف فورًا لقيتني انجريت ورا كلامها
سويت كل شي بيدي و إتصلت لها قلت لها بمزح و ضحك
سمعت كلامك و سويت كل اللي قلتيه
عشان تشوفيني سنعة و ست بيت ب عيونك

أمي معاييرها قاسية و مثالية
اجتهدت طول حياتي اعترف أوصل لمعاييرها
حتى ب تخصصي الدراسي
ضاع عمري و حتى صحتي الحين تتفلت مني
بس عشان احسها راضية عني و اشوفها تفتخر فيني
كنت ولا زلت اجي على نفسي كثيييير
عشان عقدة ان كل يظلون مبسوطين و سعيدين
محد يزعل مني
الكل يحبني
آخرها ب رمضان الماضي لما كنت عند اهلي
انكرفت لحاالي بالمطبخ
كنت اجلس 4 ساعات او 3 واقفة على رجولي متواصل
اسوي اصناف عشان ينبسطون

لما تذكرت هالفقرة
و انا طالعة من عند الطبيبة انهرت انهرت

__________________

الحمدلله على قضاء يقربني من الله عز و جل.

انا افضفض مو لاني ابي العب دور الضحية المظلومة
لكن لقيت متنفس يريحني و يخليني ارجع اقيم نفسي و حياتي و اكتشف اخطائي

و لما اكتب تعبت او بكيت او او
لان وضعي ك معلقة بالأساس مدمّر استقراري النفسي

__________________

الحمدلله على قضاء يقربني من الله عز و جل.

انا حصلت لي مستجدات معه ضغطت على نفسيتي زيادة بعد ..

في حياتي
لما كنت امشي وفق المعايير
كنت احصل رضا و حب و شكر و تقدير و علاقات حلوة من اللي حولي
لكن امي كانت الشخص الوحيد اللي كلما قدمت اكثر كلما شدّت علي اكثر

اجتمعت انا و اخوي نشتكي لبعض قبل فترة
ليش امي بس تشوف اخطاءنا
رغم ان البقية يسوون نفس الغلط و تمشيه
مثل المعلم اللي تزعله غلطة الطالب المجتهد اكثر

تقاجئت امس لمًا كلمت خالتي " كلمتها عشان تكلم امي بطريقة غير مباشرة
و تنصحها تخف عني و ترحم وضعي لانها الشخص الوحيد اللي ممكن يأثر على امي "

المهم تفاجئت تقول لي انتي و فلان الوحيدين اللي تفتخر فيكم و تتكلم عنكم بكل حب و فخر و سعادةً

طبعا هذا الشي ولا عمري سمعته ولا حتى حسيت فيه
تفاجئت كثييير
و تفاجئت اكثر ان احنا اكثر 2 متضررين نفسيا

لكن ظاهريا من ورانا قدام الناس المدح و الفخر و انو ما ضاعت تربيتها
امي و ابوي ب وعي او بدون وعي شكلوني و رسموا لي رسمة معينة امشي ضمن اطارها
ابوي الحين ليش مقهور من زوجي
قال لي مرة عطيته اياك و انتي المثالية " قالها صريحة مرة "
يحس انه متحسف علي اني خذت زوجي دايم يقولها لي

نجي لزوجي اكثر شخص بحياتي حبيته و عطيته اضعاف اضعاف اهلي و حتى نفسي
ايش يشوف كل شي اسويه من احسان و دلع و ادب = واجب علي
غصب عني
كل الزوجات يسوون كذا
+ اللي يعور اكثر : ما يثمر فيه ابدا ولا لي عنده اي رصيد حسنات
بمعنى يغضب لاسباب تاااافهه و يفجر فيني
و ينسى كل شي قدمته
و قد اكون مسوية له خدمات قوية قبلها ب دقايق

زي لما مد يده علي ب مصر

كنت قبلها ب دقايق
رايحة على رجولي لمحل حلويات كشخة
شارية على حسابي لأخوه و زوجته ك نوع من الاعتذار اني ما بحضر خطوبتهم بحكم الاختلاط
راح عطى اخوه الصينية و طلع الشقة ضربني

هذا الشي دمرني
يمكن امي تضغطني نفسيا و تزيد حساسيتي بحكم وضعي الحالي

لكن زوجي تصرفاته من اول يوم زواج قضت علي
اني احسن
او اجيب هدية
او افكر ب شي حلو اسعده فيه و اقدمه له
و القى بعد دقايق
مو ايام او شهور او سنوات

بعد وقت بسيط القى ردة فعله بشعة

زوجي اصعب
من ناحية اني مهما قدمت ماراح يصير عندي رصيد
يمنع عني اذيته

امي ماراح توضح شي ولا تشكر عشان ابذل اكثر
لكن ماراح تضربني او تسبني او تقذفني

انا ب دوامات دوامات حياتي الحالية و السابقة
اقارن
و احن لزوجي و بيتي كثير
و فيني رغبة قوية صادقة تنصلح الامور بيننا

مع ان للاسف اهلي و اقرب الناس لي
يشوفون شي اخر تماما
غير اللي اشوفه عن زواجي
و تقريبا صار اجماع
ان افضل حل اي الطلاق
و ان احنا ما نصلح لبعض و و

حتى ترا لما افكر بالطلاق
اصارحكم ب سر
اقول ان شاء الله لو تطلقت ارجع له مرة ثانية

عندي امل بكل الاحوال بالاصلاح مهما كان الفشل مغرقني

__________________

الحمدلله على قضاء يقربني من الله عز و جل.

عزيزتي
نصيحه لا تتطلقي منه وانت متعلقه فيه
اما ان تفكي التعلق او عودي له
فكي جميع انواع التعلق (بزوج او حتى شنطة يدك)
عودي له واشتغلي على نفسك
لين تفكي تعلقك به
وتصلي للقدره على الطلاق وانتي مبتسمه
وعن قناعه ورضى داخلي

……
دور الضحيه فينا كلنا
كلنا نمر بفترة او فترات دور الضحيه
واحيانا نحتاج تمثيل هذا الدور
المهم الا نبقى فيه دائما وابدا

عادي فضفضي بالعكس هذا شيء لصالحك
واكتبي كل شيء تنحرجي ان تقوليه
مهما كان تافه اوحساس

……

على فكره يا اختي
المثاليه لعلمك شيء سيء
والاسوأ ان نجعلها هدف نسعى له!!
شايفه المشاغبه اللي بآخر الصف اللي قلتي عنها؟
هذي صدقيني الطبيعيه
اللي تاركه نفسها على سجينها
وانتي الغير طبيعيه
لانك قيدتي يديك ورجليك عن الحركه والمشاغبه
لتحصلي على "نجمة المثاليه"!

وامك وزوجك درس علمك
بانك ضيعتي وقتك
ولن نعطيكِ النجمه المستهدفه!!
درس يعلمونك ان المطلوب تعطين بقدر
(وكل شيء خلقناه بقدر)
تعبانه قولي تعبانه ما بطبخ اليوم
ما بروح المكان الفلاني
ابغى هذا وما يناسبني ذاك
تعلمي ثقافة ((( لا )))
البر لامك وابوك مو اللي تعلمتيه
وتعلمته انا وغيرنا
البر هو الاحسان وليس الطاعه العمياء
والخرافات كثيره شغلي عقلك وتخلصي منها نصيحه

عزيزتي النجمه منك انتي
انتي اعطي نفسك نجوم على ما ترينه صح
ليس ما يراه الناس صح
الصح عندي غير الصح عندك
وما يناسبني لا يناسبك وهكذا

كوني نفسك واعطي النجوم لنفسك
وليكن دافعك نفسك ومكافئتك من نفسك

مريت سريع على ما تذكرت من كلامك
لاني ما فضيت ادخل المنتدى غير اليوم
تمنياتي لك بالفرج والسعاده❤

__________________
( اللَّهُمَّ آتِ نَفْسِي تَقْوَاهَا، وَزَكِّهَا أَنْتَ خَيْرُ مَنْ زَكَّاهَا، أَنْتَ وَلِيُّهَا وَمَوْلَاهَا )

طيب فيه مصادر ممكن تساعديني فيها ؟

بالنسبة للطلاق
ماعرف ما تتفقين معاي انه قرار صعب
مستحيل اوصل فيه للقناعة المصيرية مية بالمية ؟
الا ما تجيني شكوك او ندم

بالنسبة لتعلقي فيه
والله ماعرف اذا متعلقة او لا
احترت ب نفسي
ترا مالي نفس اشوفه ولا اسمع صوته ولا ابغى شي منه
لكن ليش كتبت هالامنية الظهر قبل ساعات
لاني كنت مثل الغريق اللي يبغى يتعلق ب قشة
كنت اقول يمكن ارجع لبيتي افضل بدون مسؤوليات زايدة
مع ان في الحالتين فيه مسؤوليات
لكن عقلي طاش و كنت منهارة و اعبر عن افكار غير واقعية بداخلي ..

للامانة كلامك مريح جدا جدا

ترا اختي حظي حلو
انا ماكنت كذا ولا كانت شخصيتي بهالشكل من التطرف
في المبالغة في الارضاء
انا تغيرت كثير

اهلي
امي
صديقاتي
يقولون بسبب زوجك كسرك و دمرك و نسف شخصيتك

امس كلمتني قريبتي
قالت والله طفّاك يوم تزوجتيه
فلانة اللي عندها مشاريع و خطط و تطوع و و
ماتت لمًا تزوجت
الحين رجعتي بقوة احس هذي فلانة اللي نعرفها

__________________

الحمدلله على قضاء يقربني من الله عز و جل.

الاعضاء الكرام
رغم كمية الحزن اللي تملا مشاركاتي مؤخرا
لكن ابشركم لازلت ابحث عن حلول واقعية

و حطيت في بالي خطتين هالعام
1. اكون في معهد القران - في جو يذكرني بالله و يصبرني
2. اني اتعرف على عيوبي شخصيتي الداخلية و اعالجها

__________________

الحمدلله على قضاء يقربني من الله عز و جل.

عزيزتي طبيعي تتأثري بالطلاق
طبيعي جدا
لكن التأثير هذا يفرق اذا تم الطلاق بعد فك التعلق
عن اذا تم وانتي متعلقه به
وما زال عندك شيء له او معه
احيانا نستمر في شيء نريد ان نكرهه للاخر
لا نريد ان نتركه الى ان نصل لاخر نقطه معه
وهنا اذا تم الترك نكون عارفين ان هذي اخر نقطه

مثال بعيد لكنه يصف الفكره
(عندك شنطه اشتريتيها عن قناعه
وما زلتي تحبينها لكن مثلا صغيره ما تشيل كل اغراضك
فتصبرين على صغر حجمها مقابل شكلها اللي عاجبك
فتتمسكين بها شهر وشهرين وثلاثه
وانتي متضايقه من صغر حجمها
وعدم حملها لكل اغراضك
وتقولين لنفسك ليش ما اغيرها مره صغيره
لكن قلبك يقول لا شكلها حلو وعلموضه
ولونها كذا ما بتركها
لين تنقطع الشنطه باي شكل
او يسقط منها شيء ثمين ويضيع منك
وهنا ستتخذين قرار بتغييرها وانتي واثقه انه القرار الصح
في الوقت المتأخر ولكنه اكيد صح ( الان )

وربما اقول ربما يكون زوجك جيد لو تغيرتي انتي
وربما لا
انا لا اعرف انتي وحدك من يقيم الوضع
نحن خارج الدائره ونرى النظره الكليه من بعيد

امر اخر (ليس فيه عصبيه قبليه لكن مجرد تحليل)
ربما زوجك يشعر لكونه من غير جنسيتك
ويعمل في بلدك
بشيء من الدونيه عنك؟؟
حتى وان كان طبيب او ما شابه
البعض يكون عنده كل شيء لكن نفسه صغيره
محتقرها من الداخل
فيرى انك قويه بشخصيتك وببلدك واهلك
فيحاول ان يضعفك ليشعر بالقوه عليك؟؟
اقول ربما وانت من يقرر صحيح او غلط كلامي


كلامي اراحك لانه لامس فيك شيء
اختي كلنا نمر بصدمات في حياتنا
منها في الطفوله او في الكبر
نسيناه او تذكرناه
في العقل الواعي والعقل اللاواعي

كل انسان عنده ثلاثة اجساد
جسد فكري (وهو العقل واعي وغير واعي)
جسد مشاعري (النفسيه)
جسد طاقي اثيري
كل جسد منها تعتريه اوساخ ( صدمات)
لابد من تنظيفها وازالتها
شوفي في اليوتيوب طرق عديده للتنظيف

وابدأي بدون تردد "بالتنفس عن طريق البطن"
(التنفس اسهل طرق التنظيف )
التنفس عن طريق البطن مفعوله عجيب
وهو المسعف الاول لكل موقف


كل صباح اجلسي في مكان تهويته جيده
في حوش او عند شباك يدخل لك هواء الفجر النقي البارد
اجلسي مع نفسك ربع ساعه او اكثر
تنفسي عن طريق البطن
(شهيق عميق الى ان يمتلىء وينتفخ بطنك بالهواء
ثم زفير عميق عن طريق الانف الى ان يخرج جميع الهواء)
اول مره يمكن ما تقدرين تتنفسين الا دقيقه او دقيقتين
بعد كم يوم بتلاحظين وقت التنفس زاد
قد تبكين بعد او مع التنفس او تشعرين ببعض الالام
في جسدك كل هذا طبيعي
ويعني ان التنفس عمل مفعوله في التنظيف
لا تمنعي نفسك من البكاء
واعطي نفسك الوقت للتعبير عن المها ورغبتها
( وهذا في جميع الاوقات)

بعد التنفس استلقي او اجلسي جلسه تريحك
واغمضي عينيك واطلقي نية التغيير
قولي انا انوي ان اتغير بكل حب ويسر وسهوله
( النيه مفعولها عجيب)
وسوف تختبرك الحياه في صدق نيتك هذي من كذبها
فكوني جاهزها لاختباراتها

وتقدرين تنوين عدت نوايا مثلا
( انا انوي ان تتغير شخصيتي للافضل بكل حب ويسر وسهوله
انا انوي ان استمتع بيومي بكل حب ويسر وسهوله
انا انوي الشفاء لجميع اجسادي بكل حب ويسر وسهوله

وخذي نفس عميق ونامي
او افعلي ما تشعرين انك تريدين فعله
لا تتقيدي بوقت ولا واجبات ولا مسؤوليات
(رددي مع نفسك هناك وقت لكل شيء)

واذا تقدرين تقولين لزوجك ناخذ فترة هدنه
نضع فيها الاسلحه وكلن يروح بحاله هدنه
ترتاحين فيها وتتنفسي وتغيري جو
لو اسبوع تنفسي فيه كل يوم زي ما قلت
(وطبعا يصير التنفس عاده يوميه لك بعد ذلك)

ان قدرتي تسافري سافري
ما قدرتي ف حيث ما تكون راحتك كوني هناك
ارقصي وغني وجني لاقصى حدك
ارجوك ضعي المثاليه تحت اقدامك وارقصي عليها
ارفعي صوت الاغاني لاخر حد
وانتي ترقصين وتضحكين وتصرخين
( ارجوك ارجوك لا تقولي الغناء حرام
خلاص خلاص ارحموا انفسكم من هذي الترهات والتعقيدات
التي ما انزل الله بها من سلطان)
ولو اردتي تجاوز هذي النقطه فهذا لك
انا سأقول لك كل ما لدي وانت حره

واي اي اي مشاعر تظهر لك حينها او باي وقت
اسمحي لها تظهر لا تكبتي شيء
فجأه ستبكين ابكي لا عليك طبيعي
فجأه بتضحكين اضحكي وسمعي الجيران ضحكك

انتي متضايقه وما تبغين تطبخين
لا تجاملي وتقولي انا جيده وسأطبخ
( لعيون اي احد)
لا قولي مالي نفس اطبخ اليوم
بختصار (( طابقي الداخل مع الخارج ))
لا تتناقضي مع نفسك
فتقدم لك الحياه المتناقضات

لا تدعي المثاليه فتقدم لك الحياه اشخاص
يريدونك دائما مثاليه
لانك انت قدمت نفسك للحياه على انك مثاليه

تعرفين حتى شكلك واناقتك
لا تتحري فيها الدقه والمثاليه
اسمحي لنفسك تغلط وتطلع يوم والالاينر عين مزبوط
وعين شوي مخربط So what ?!
شعري شوي منكوش ( It’s Ok )!!
الكل راح يزور فلانه في يوم محدد لمناسبه معينه
انا بتأخر وبزورها بوقت اخر بعدين
وش بيصير؟!
مو لازم اكون مثاليه واروح مع الجميع!

وهذي الاشياء زي التمارين البسيطه لنفسك
حتى تتعود تطلع شوي شوي من زاوية المثاليه
اللي جالسه فيها من سنوات



بخصوص المصادر عزيزتي انا والله من كذا مصدر
واغلبها في اليوتيوب
حسابات تتكلم عن الجسد المشاعري وكيف انه الاساس
اذا كان بحاله جيده صارت باقي الاجساد بأحسن حال
وهكذا اتنقل من فديو لاخر لين فهمت وضعي زين
اول ما اتذكر شي معين بقولك عليه

__________________
( اللَّهُمَّ آتِ نَفْسِي تَقْوَاهَا، وَزَكِّهَا أَنْتَ خَيْرُ مَنْ زَكَّاهَا، أَنْتَ وَلِيُّهَا وَمَوْلَاهَا )

والله يا صاحبة الحظ الحلو كلامك جميل ومنظم وواقعي لكن الانتفاضة على الامور المسلم بها ارجو ان تراجعيها
معلوماتي الدينية قليلة وعلى قدي لكن ما اعرفه ومتاكدة منه انه التوفيق من عند الله وبطاعة الله وتجنب معاصية

وهذا لا يعني اني مرات لا احن واستمع قليلا للغناء لكن اندم واستغفر وابفى لمدة
لكن اعرف انه حرام حرام
الله يغفر لنا جميعا

عزيزتي امال عظيمه
هذي بعض الفديوهات لوحده اسمها منال موسى
انا استفدت منها لعلك تستفيدين

* العلاقات وقانون الانعكاس لمنال موسى

*حقيقة فك التعلق لمنال موسى

*طريقة فك التعلق لمنال موسى

*اسباب المعاناة في الحياة لمنال موسى

*العطاء متى اكون معطاء
ومتى اتوقف عن العطاء لمنال موسى

*لماذا تعاكسك الحياه لمنال موسى

واحدث فديو لها اسمه *شعور الاحتياج
وتطرقت فيه عن المثاليه
وانو اللي يعطي طلبا للمثاليه ما راح يلاقي شي
لانه اعطى عن "احتياج " للمثاليه
وليس عن "حب خالص"

نسيت في ردودي السابقه اقولك لازم لازم تحبي كل صفاتك
حتى السيئه عشان تتخلصي منها
صفة المثاليه فيك حبيها واعترفي فيها وتقبيلها
قولي مع نفسك نعم انا مثاليه اعترف واتقبل هذي الصفه
واحب نفسي بهذي الصفه
الصفه اذا تقبلتيها يقل الحاحها عليك
ويسهل التخلص منها
اسمعيها ستتضح لك الصوره اكثر
واي شي ما يناسبك تجاوزيه وخذي اللي ينفعك

تمنياتي لك بحياه سعيده

__________________
( اللَّهُمَّ آتِ نَفْسِي تَقْوَاهَا، وَزَكِّهَا أَنْتَ خَيْرُ مَنْ زَكَّاهَا، أَنْتَ وَلِيُّهَا وَمَوْلَاهَا )